LESEN 8
Josaea i Gat Ol Gudfala Fren
?Yu yu ting se i had blong mekem samting we i stret?— Plante man oli ting olsem. Baebol i tokbaot wan boe we nem blong hem Josaea. Boe ya i harem se i had tumas blong mekem samting we i stret. Be hem i gat sam gudfala fren we oli givhan long hem. I gud yumi save moa long stori blong Josaea mo ol fren blong hem.
Papa blong Josaea i king long Juda, mo nem blong hem Amon. Amon i wan rabis man mo hem i wosipim ol aedol. Taem papa blong Josaea i ded, Josaea i kam king long Juda. !Be hem i gat eit yia nomo! ?Yu ting se hem tu i rabis olsem papa blong hem?— !Nogat!
Sefanaea i talem long ol man se oli no mas wosipim ol aedol
Taem Josaea i smol yet, hem i wantem obei long Jehova. Taswe hem i jusum blong fren nomo wetem ol man we oli lavem Jehova. Mo olgeta ya oli givhan long Josaea blong hem i mekem samting we i stret. ?Hu ya sam fren blong Josaea?
Wan fren blong hem, hemia Sefanaea. Sefanaea i wan profet we i talem long ol man Juda se trabol bambae i kasem olgeta, sipos oli wosipim ol aedol. Josaea i lesin long tok blong Sefanaea, nao hem i no wosip long ol aedol, be i wosipim Jehova.
Wan narafala fren blong Josaea, hemia Jeremaea. Hem i gat klosap sem yia olsem Josaea, mo taem tufala i smol, haos blong tufala i klosap nomo. Tufala i fren gud, mo taem Josaea i ded, Jeremaea i raetem wan singsing we i tokbaot se hem i harem nogud from we hem i tingbaot Josaea tumas. Jeremaea mo Josaea tufala givgivhan long tufala blong tufala i mekem samting we i stret, mo blong tufala i obei long Jehova.
Josaea mo Jeremaea tufala i givgivhan long tufala blong mekem samting we i stret
?Yu yu lanem wanem long stori blong Josaea?— Nating se Josaea i wan smol boe nomo, be hem i wantem mekem samting we i stret. Hem i save se hem i mas fren gud wetem ol man we oli lavem Jehova. !Yu mas traehad blong jusum ol fren we oli lavem Jehova, mo we oli save givhan long yu blong mekem ol samting we oli stret!