Jehova i Winim Bal Long Hil Ya Kamel

Plante nogud king oli rul long ten laen blong Isrel, be Ehab i mowas. Hem i maredem wan rabis woman we nem blong hem Jesebel. Woman ya i wosipim Bal, ale hem mo Ehab, tufala i mekem se kantri i kam fulap long wosip blong giaman god ya. Mo tu, tufala i kilim plante profet blong Jehova oli ded. ?Jehova i mekem wanem? Hem i sanem profet Elaejah i go talemaot ol toktok blong hem long Ehab.

Elaejah i talem long King Ehab se, from we hem i mekem ol nogud fasin, bambae i no moa gat ren long Isrel. Ale, i no moa gat kakae long garen blong tri yia, mo ol man oli hanggri. Nao biaen, Jehova i sanem Elaejah i go luk Ehab bakegen. Ehab i talem se: “!Yu ya nao! !Yu yu mekem bigfala trabol i kasem Isrel!” Elaejah i talem se: ‘!Nogat! Mi mi no man blong mekem trabol. !Yu nao yu stap mekem trabol from yu wosipim god ya Bal! Bae yumi pruvum hu nao i trufala God. Yu singaot ol man mo ol profet blong Bal oli kam antap long hil ya Kamel.’

Ol man oli kam antap long hil ya, nao Elaejah i talem se: ‘Yufala i mekemap tingting blong yufala. Sipos Jehova i tru God, yufala i folem hem. Be sipos Bal i tru God, yufala i folem hem. I gud ol 450 profet blong Bal oli rerem wan sakrefaes mo singaot long god blong olgeta, mo mi tu bae mi rerem wan sakrefaes mo singaot long Jehova. God we i ansa, mo i sanem faea i kam blong bonem sakrefaes ya, hem nao i tru God.’ Ale, ol man oli agri.

Ol profet blong Bal oli rerem wan sakrefaes. Oli gohed fuldei blong singaot long god blong olgeta se: ‘!O Bal! !Plis yu ansa long mifala!’ Taem Bal i no ansa, Elaejah i jikim olgeta, i se: ‘!Ei! !Yufala i singaot bigwan! Ating hem i stap slip, mo wan man i mas go wekemap hem.’ San i godaon mo ol profet ya oli gohed yet blong singaot hem, be i no gat wan ansa.

Nao Elaejah i putum sakrefaes blong hem long olta, mo i kafsaedem wota antap long hem. Nao hem i prea se: ‘O Jehova, plis yu soemaot long ol man ya se yu nomo yu tru God.’ Wantaem nomo, faea i kamdaon long heven mo i bonem sakrefaes ya. Ol man oli singaot se: “!Jehova nao i tru God!” Elaejah i talem se: ‘!Yufala i holemtaet ol profet blong Bal, yufala i no letem wan i ronwe!’ Long dei ya, oli kilim i ded ol 450 profet ya blong Bal.

Wan smol klaod i kamaot long skae long saed blong solwota, nao Elaejah i talem long Ehab se: ‘Bigfala ren i stap kam. Yu mekemrere kat blong yu, yu gohom kwiktaem.’ Ol blak klaod oli kam kavremap skae, win i blu, mo bigfala ren i foldaon. Draetaem i finis. Ehab i spid long kat blong hem. !Be Jehova i givhan long Elaejah blong i ron kwik moa, i bitim kat blong king! ?Olsem wanem? ?Yu ting se ol problem blong Elaejah oli finis naoia? Bambae yumi luk.