Jehova i Gat Longfala Tingting Mo i Sore Long Jona

Ol man long taon ya Nineve long Asiria oli mekem plante rabis fasin. Taswe, Jehova i talem long profet Jona se hem i mas go givim woning long olgeta, blong oli jenisim ol rabis fasin blong olgeta. Be Jona i no wantem, ale hem i girap, i tekem narafala rod olgeta. Hem i jam long wan sip we i stap go long Spen.

Taem sip ya i stap long solwota, bigfala win i blu, i mekem solwota i raf we i raf. Ol boskru oli fraet tumas, nao oli prea long ol god blong olgeta se: ‘?Trabol ya i fol blong hu?’ Jona i talem se: ‘Fol blong mi ya. Jehova i givim wan wok long mi, be mi mi stap ronwe. Yufala i sakem mi mi go long solwota, nao win ya bae i stop.’ Ol boskru oli no wantem sakem Jona i go long solwota, be hem i strong long olgeta. Taem oli sakem hem i go long solwota, win i godaon mo solwota i kwaet.

Jona i ting se bambae hem i ded. Hem i draon, i godaon we i godaon, nao hem i prea long Jehova. Ale Jehova i sanem wan bigfala fis i kam, i solemdaon Jona, be Jona i no ded. Insaed long bel blong fis ya, Jona i prea se: ‘Jehova, mi promes se bae mi obei long yu oltaem.’ Jehova i mekem se Jona i stap laef blong tri dei insaed long bel blong fis. Afta, fis ya i goso, i traot, nao wantaem nomo, Jona i kamaot i foldaon long sanbij.

From we Jehova i sevem Jona, ?hemia i min se Jona i no moa nid blong go long Nineve? Si, hem i mas go. Jehova i talem bakegen long Jona se hem i mas go long Nineve. Long taem ya, Jona i obei. Hem i go talemaot long ol rabis man ya se: ‘!I gat 40 dei nomo i stap, nao God bae i spolem gud Nineve!’ Nao wan samting i hapen we Jona i no tingbaot. Ol man Nineve oli lesin mo oli jenisim fasin blong olgeta. King blong Nineve i talem long ol man se: ‘Yumi prea strong long God, mo yumi lego ol rabis fasin blong yumi. Sipos God i luk samting ya, maet hem i no spolem yumi.’ Taem Jehova i luk we ol man ya oli tanem tingting blong olgeta, hem i no moa spolem taon ya Nineve.

Be Jona i no glad long samting ya, hem i kam kros. Yu traem tingbaot: Jehova i soemaot longfala tingting mo i sore long Jona, be Jona i no wantem soemaot sore long ol man Nineve. Hem i go sidaon afsaed long taon long sado blong wan kasroel tri, i stap harem nogud. Nao tri ya i kam drae, mo Jona i kros we i kros. Ale, Jehova i talem long hem se: ‘Yu yu sore long tri ya i bitim we yu sore long ol man Nineve. Mi mi sore long ol man Nineve taswe oli no ded.’ ?Jehova i wantem tijim Jona long wanem samting? Hem i wantem tijim hem se ol man Nineve oli moa impoten i bitim wan tri.