STORI 83
Jisas i Givim Kakae Long Plante Taosen Man
Long yia 32 K.T., bifo long Lafet blong Pasova, ol aposol oli kambak long wok blong prij. Oli taed, ale Jisas i go wetem olgeta long bot, blong oli spel smol long Betsaeda. Be taem oli kam klosap long so, Jisas i luk se i gat plante taosen man i stap finis. Nating se hem i wantem spel wetem ol aposol blong hem, be hem i toktok gud long ol man ya. Hem i mekem ol sikman oli kam gud bakegen mo i tijim olgeta. Long fuldei, Jisas i tokbaot Kingdom blong God. Nao taem san i godaon, ol aposol oli kam talem long hem se: ‘Ol man ya oli hanggri. ?Bae oli kakae wanem? I gud yu sanem olgeta oli gobak blong oli save kakae.’
Jisas i talem se: ‘I no nid blong oli go. Yufala i save givim kakae long olgeta.’ Nao ol aposol oli askem se: ‘?Yu wantem se mifala i go pem bred blong olgeta?’ Filip, we i wan aposol i talem se: ‘Nating sipos yumi gat plante mane, be bae i no naf blong pem bred blong olgeta man ya.’
Jisas i askem se: ‘?I gat hamas kakae i stap?’ Andru i talem se: ‘I gat faef bred wetem tu smol fis. Hemia i no naf nating.’ Jisas i talem se: ‘Tekem bred mo fis ya i kam.’ Nao hem i talem long ol man blong oli sidaon long ol grup, we sam i gat 50 man long olgeta mo sam i gat 100 man long olgeta. Jisas i tekem ol bred mo fis ya, i lukluk i go long heven, mo i prea. Nao hem i givim long ol aposol, mo oli givimaot long ol man. Ol 5,000 man, woman, mo pikinini, olgeta evriwan ya oli kakae gogo oli fulap gud. Afta, ol aposol oli putum gud ol haf kakae we i stap, blong oli no westem. !Oli fulumap 12 basket we oli fulap gud! ?Wanem tingting blong yu long merikel ya? !I nambawan, a!
Ol man oli glad tumas nao oli wantem mekem Jisas i kam king blong olgeta. Be Jisas i save se hemia i no stret taem we Jehova i jusumaot, blong hem i kam king. Nao hem i sanem ol man ya oli gobak, mo i talem long ol aposol blong oli pul i go long narasaed long Si blong Galili. Ale oli tekem bot i go, be Jisas i go antap long hil. ?From wanem? From we hem i wantem prea long Papa blong hem. Nating se Jisas i bisi, be hem i tekem taem blong prea.
“Yufala i mas wok, be i no from kakae we i blong smoltaem nomo. Yufala i mas wok from kakae we i blong stap longtaem, we i save givim laef we i no save finis. Kakae ya, Pikinini blong man bambae i givim long yufala.”—Jon 6:27