Jisas i Laef Bakegen

Afta we Jisas i ded, wan rijman we nem blong hem Josef i askem long Paelat blong i letem hem i tekemaot bodi blong Jisas long pos. Nao Josef i kavremap bodi blong Jisas long gudfala kaliko ya linen, wetem ol lif we oli smel gud, mo i putum long wan hol blong ston we i rere finis. Nao hem i rolem wan bigfala ston i go blong blokem hol ya. Ol jif pris oli talem long Paelat se: ‘Mifala i fraet se sam disaepol blong Jisas bae oli kam tekemaot dedbodi blong hem, nao oli talem se hem i laef bakegen.’ Ale Paelat i talem se: ‘Yufala i mekem ston ya i fasgud mo yufala i putum wan gad long hem.’

Tri dei biaen, long eli moning, sam woman oli go long beregraon mo oli luk we ston i no moa blokem hol ya. Wan enjel i stap insaed long hol, mo i talem long ol woman ya se: ‘Yufala i no fraet. Jisas i laef bakegen finis. Yufala i go talem long ol disaepol se oli mas go mitim hem long Galili.’

Ale, Meri we i woman Magdala, i hareap blong go faenem Pita mo Jon, nao hem i talem long tufala se: ‘!Oli tekemaot bodi blong Jisas!’ Pita mo Jon i resis i go long hol ya. Taem tufala i luk we hol i emti, tufala i gobak long haos.

Nao Meri i gobak long hol ya, i luk tu enjel insaed, nao i talem se: ‘Mi no save weples oli putum bodi blong Masta blong mi.’ Nao hem i luk wan man, we hem i ting se i man blong katem gras, mo i talem long hem se: ‘Masta, plis yu talem long mi weples yu putum bodi blong hem.’ Nao man ya i talem se: “!Meri!” Wantaem nomo, Meri i save se hemia Jisas. Nao hem i singaot se: “!Tija!” mo i holemtaet Jisas. Jisas i se: ‘Yu go talem long ol brata blong mi se yu luk mi finis.’ Meri i resis i go long ol disaepol, mo i talem long olgeta se hem i luk Jisas.

Long sem dei ya, tu disaepol i aot long Jerusalem blong wokbaot i go long vilej ya Emeas. Long haf rod, wan man i kam klosap long tufala, mo i askem se tufala i stap tokbaot wanem. Tufala i ansa se: ‘?Be yu no harem yet? Tri dei i pas finis, ol jif pris oli kilim Jisas i ded. !Be naoia sam woman oli stap talem se hem i laef bakegen!’ Man ya i askem se: ‘?Be yutufala i no bilivim tok blong ol profet? Oli talem se Kraes bae i ded mo i laef bakegen.’ Nao hem i gohed blong eksplenem ol tok blong Baebol long tufala. Taem oli kamtru long Emeas, tufala disaepol i askem long hem blong i kam kakae wetem tufala. Ale, man ya i prea nao i brekem bred. Long taem ya nao, tufala i jes luksave se hem i Jisas. Nao hem i lus bakegen.

Nao tufala i girap, tufala i hareap blong go luk ol aposol long Jerusalem, blong talemaot ol samting we i hapen. Taem oli stap wanples, Jisas i kamtru long olgeta. Fastaem, ol aposol oli no bilivim se hemia Jisas. Nao hem i talem long olgeta se: ‘Yufala i traem luk tufala han blong mi, yufala i tajem mi. Baebol i talem finis se Kraes bae i laef bakegen.’