Fastok Blong Haf 9

Ol stori we oli kam biaen oli tokbaot ol yangfala, ol profet, mo ol king we oli bilif strong long Jehova. Long Siria, i gat wan smol gel we i bilif se wan profet blong Jehova i save tekemaot sik blong Neman. Profet Elisa i bilif strong se bambae Jehova i protektem hem long ol enemi blong hem. Hae Pris Jehoeada i putum laef blong hem long denja blong sevem laef blong yangfala Jehoas, taem bubu woman blong hem, Atalia, i wantem kilim hem i ded. King Hesekia i trastem Jehova se bambae hem i sevem Jerusalem, mo i no fraet long ol ami blong Asiria. King Josaea i spolem ol aedol long Isrel, i wokem gud tempol bakegen, mo i lidim ol man Isrel blong oli wosipim Jehova bakegen.