Fastok Blong Haf 10

Jehova i King, hem i rul antap long olgeta samting. Stat long taem bifo, hem i soemaot se hem i gat olgeta paoa, mo bambae i stap olsem blong olwe. Traem tingbaot: Hem i sevem Jeremaea taem oli sakem hem long wan wel blong i ded. Jehova i sevem Sadrak, Mesak, mo Abednego, oli aot long bigfala faea, mo i satem maot blong ol laeon blong oli no kakae Daniel. Jehova i protektem Esta tu, blong Esta i save sevem ol man ples blong hem. Jehova i no save letem ol nogud fasin oli gohed blong olwe. Profet tok blong bigfala statiu mo bigfala tri oli olsem wan promes se i no longtaem, Kingdom blong Jehova bambae i spolem ol nogud fasin, mo bambae i rulum wol.