LESEN 12

?Wanem Bambae i Halpem Yu Blong Gohed Blong Stadi Baebol?

Printed Fomat

Fasin blong stadi Baebol i save givhan long yu, be samtaem i no isi blong stadi. Maet yu no sua sipos yu save gohed blong stadi. ?From wanem i impoten blong traehad blong stadi? ?Wanem i save halpem yu blong gohed nating se i gat sam jalens?

1. ?From wanem i impoten blong stadi Baebol?

“Tok blong God i laef i stap mo paoa blong hem i stap wok.” (Hibru 4:12) Baebol i impoten tumas from we i soemaot ol tingting mo filing we God i gat long yu. Hem i halpem yu blong kasem trufala waes, hop, mo save. Antap moa, Baebol i halpem yu blong kam fren blong Jehova. Taem yu stadi long Baebol, yu letem paoa blong hem i mekem laef blong yu i kam gud moa.

2. ?From wanem i impoten blong save ol nambawan trutok blong Baebol?

Ol trutok blong Baebol oli olsem ol sas samting. Taswe, Baebol i enkarejem yumi blong ‘pemaot trutok mo yumi no mas salemaot.’ (Ol Proveb 23:23) Sipos yumi tinghae long trutok blong Baebol, bambae yumi traehad blong stadi, nating se yumi fesem sam jalens.—Ridim Ol Proveb 2:4, 5.

3. ?Olsem wanem Jehova i save halpem yu blong gohed long stadi?

Jehova i Krieta mo i Fren blong yu, taswe hem i wantem se yu save hem. Hem i save halpem yu blong, wantem mo gat paoa “blong mekem olgeta samting we hem i laekem.” (Ridim Filipae 2:13.) Taswe, sipos yu nidim strong tingting blong stadi mo folem samting we yu lanem, hem i save halpem yu. Sipos yu nidim paoa blong winim ol jalens o fasin agens, hem i save givim long yu. I gud yu prea oltaem long Jehova blong i halpem yu blong gohed long stadi.—1 Tesalonaeka 5:17.

DIGIM MOA

Lanem olsem wanem yu save gohed long stadi, nating se yu bisi o narafala i agensem yu. Biaen, yu luk olsem wanem Jehova bambae i halpem yu blong gohed long stadi.

4. Tinghae long Baebol stadi blong yu

Samtaem laef i bisi, mekem se yumi harem se yumi nogat taem blong stadi. ?Wanem i save givhan? Ridim Filipae 1:10, mo tokbaot ol kwestin ya:

?Yu ting se wanem ya “ol samting we oli moa impoten” long laef blong yu?
?Wanem i soem se yu tinghae long Baebol stadi blong yu?

A. Ol pija: Wan pija we i soem baket we oli fulumap wetem sanbij mo ol ston. 1. Wan hip blong sanbij mo wan hip blong ston. 2. Wan baket we klosap i fulap wetem sanbij. 3. Ol ston oli stap antap long sanbij be sam oli stap aotsaed.

B. Ol pija: 1. Semfala hip blong sanbij mo ston. 2. Sem baket ya klosap i fulap long ol ston. 3. Sanbij i fulumap ol spes raon long ol ston mo i fulap go kasem top. Smol sanbij nomo i stap yet long graon.

Sipos yu fulumap sanbij long wan baket, afta yu putum sam ston i go, bambae evri ston i no save go
Sipos yu putum ol ston fastaem, bambae yu gat plante spes blong fulumap sanbij. Sem mak sipos yu putum “ol samting we oli moa impoten” fastaem long laef blong yu, bambae yu finisim ol impoten samting ya mo yu gat taem blong mekem ol narafala samting

Baebol stadi i fulumap nid blong yumi long saed blong spirit, hemia nid ya blong save God mo wosipim hem. Ridim Matiu 5:3, mo tokbaot kwestin ya:

?Bambae yu kasem wanem sipos yu tinghae long Baebol stadi?

5. Gohed blong stadi nating se narafala i agensem yu

Samtaem, maet ol narafala oli traem blokem yu blong stadi. Yu luk eksampol blong Francesco. Plei VIDEO, mo tokbaot ol kwestin ya.

VIDEO: Gudfala Samting We i Kamaot From Hem i Gohed (5:22)

Wan pija blong video ya ‘Gudfala Samting We i Kamaot From Hem i Gohed.’ Francesco i stap wokbaot i go afta we i talem long ol fren blong hem se bae hem i no moa joen wetem olgeta.

Long video ya, ?ol fren mo famle blong Francesco oli mekem wanem taem oli save se hem i stadi?
?Wanem gudfala samting i kamaot taem hem i gohed long stadi?

Ridim 2 Timoti 2:24, 25, mo tokbaot ol kwestin ya:

?Wanem tingting blong ol famle mo ol fren blong yu taem yu stadi Baebol?
Folem ol vas ya, ?bambae yu mekem wanem taem narafala i no glad se yu stadi Baebol? ?From wanem bambae yu mekem olsem?

6. Dipen long Jehova blong i halpem yu

Taem yumi kam klosap long Jehova, bambae yumi wantem moa blong mekem hem i glad. Be yumi save faenem i had yet blong jenisim laef blong yumi olsem we Jehova i wantem. Sipos yu harem olsem, yu no givap. Jehova bambae i halpem yu. Plei VIDEO, mo tokbaot ol kwestin ya.

VIDEO: Jehova i Halpem Yumi Blong Jenisim Laef (3:56)

Long video ya, ?Jim i jenisim wanem long laef blong hem blong mekem Jehova i glad?
?Yu yu laekem wanem long eksampol blong hem?

Ridim Hibru 11:6, mo tokbaot ol kwestin ya:

?Jehova bambae i mekem wanem long olgeta we “oli stap traehad blong faenem hem” o mekem hem i glad?
Folem vas ya, ?wanem filing blong Jehova taem hem i luk we yu stap traehad blong stadi?

MAET MAN I ASKEM SE: “?From wanem yu stap stadi long Baebol?”

?Bambae yu ansa olsem wanem?

SAMARI

Nating se i no isi oltaem blong stadi Baebol, be hemia i save halpem yu blong enjoem laef olwe. Gohed blong dipen long Jehova, nao bambae hem i givim pei long yu.

Tingtingbak

?From wanem ol trutok blong Baebol oli impoten long yu?
?Olsem wanem blong mekem “ol samting we oli moa impoten”?
?From wanem yu mas askem Jehova blong i halpem yu, blong yu gohed blong stadi?

Seksen i finis long:

Nekis Step

I gud yu gohed blong stadi, wan taem evri wik. Sipos i no posibol blong stadi long nomol taem, jenisim taem blong stadi.

Narafala:

Your other goal

FAENEMAOT

Luk fo rod we i givhan long plante man blong yusum gud taem blong olgeta.

“How to Invest Your Time Wisely” (Wekap!, Februari 2014)

Luk olsem wanem Jehova i halpem wan woman we hasban blong hem i no kasem save ol traehad we hem i stap mekem.

Jehova i Givim Paoa Blong Winim Ol Traem (5:05)

Luk olsem wanem wan man i kasem gudfala samting from waef blong hem i gohed blong stadi.

Mi Jekem Trutok (6:30)

Samtaem ol man oli talem se ol Witnes blong Jehova oli stap seraotem ol famle. ?Be hemia i tru?

“?Ol Witnes Blong Jehova Oli Mekem Famle i Seraot No i Joengud?” (Web atikol)