LESEN 30
!Ol Fren Mo Famle Oli Save Laef Bakegen!
Ded i mekem plante man oli harem nogud. From samting ya Baebol i singaot ded se i wan enemi. (1 Korin 15:26) Long Lesen 27, yu lanem se Jehova bambae i winim enemi ya. ?Be olsem wanem long ol man we oli ded finis? Long lesen ya, bambae yu lanem wan narafala promes blong Jehova, hemia se bambae hem i givimbak laef long plante milian man blong oli save enjoem laef olwe. !Yes, bambae oli laef bakegen! ?Hemia i save hapen? ?Bambae oli laef bakegen long heven o long wol?
1. ?Jehova i wantem mekem wanem long ol fren mo famle we oli ded?
Jehova i wantem tumas blong mekem ol dedman oli laef bakegen. Gudfala man ya Job i sua se God bambae i no fogetem hem taem hem i ded. Hem i talem long God se: “Bambae yu singaot [mi long Gref], mo bambae mi ansa long yu.”—Ridim Job 14:13-15.
2. ?Olsem wanem yumi save se ol dedman bambae oli laef bakegen?
Taem Jisas i stap long wol, God i givim paoa long hem blong mekem ol dedman oli laef bakegen. Jisas i mekem wan gel we i gat 12 yia mo boe blong wan wido oli laef bakegen. (Mak 5:41, 42; Luk 7:12-15) Biaen, fren blong hem Lasaros i ded. Nating we Lasaros i ded mo oli berem hem fo dei finis, be Jisas i mekem hem i laef bakegen. Afta we Jisas i prea long God, hem i singaot i go long tomb se: “!Lasaros, yu kamaot!” Nao “man ya we i bin ded, hem i kamaot” i laef. (Jon 11:43, 44) !I sua se ol fren mo famle blong Lasaros oli glad tumas!
3. ?I gat wan hop blong ol fren mo famle we oli ded?
Baebol i promes se: “Bambae oli laef bakegen.” (Ol Wok 24:15) Olgeta ya we Jisas i mekem oli laef bakegen, oli no go long heven. (Jon 3:13) Olgeta oli laef bakegen long wol ya mo oli glad tumas. Long sem fasin, i no longtaem bambae Jisas i mekem plante milian man oli laef bakegen, blong oli enjoem laef olwe long wan paradaes long wol. Hem i talem se “olgeta man we oli stap long ol memoriol tomb,” bambae oli laef bakegen. Olgeta ya oli stap yet long memori blong God, nating se ol man oli fogetem olgeta finis.—Jon 5:28, 29.
DIGIM MOA
Luk ol pruf long Baebol we oli soemaot se ol dedman oli save laef bakegen mo i sua se bambae i hapen. Ol save long saed blong laef bakegen bambae i mekem yu yu harem gud mo i givim hop long yu.
4. Jisas i pruvum se hem i save mekem dedman i laef bakegen
Lanem sam moa samting we Jisas i mekem long fren blong hem Lasaros. Ridim Jon 11:14, 38-44, mo tokbaot ol kwestin ya:
?Olsem wanem yumi save se Lasaros i rili ded?—Luk vas 39.
?Sipos Lasaros i stap long heven, yu ting se Jisas bambae i mekem hem i kambak bakegen long wol?
5. !Plante man bambae oli laef bakegen!
Ridim Ol Sam 37:29, mo tokbaot kwestin ya:
Taem ol milian man ya oli laef bakegen, ?bambae oli stap wea?
Jisas bambae i mekem olgeta we oli wosipim Jehova oli laef bakegen wetem plante narafala tu. Ridim Ol Wok 24:15, mo tokbaot kwestin ya:
?I gat wan man we yu rili wantem luk hem bakegen?
Tingbaot: I isi nomo blong Jisas i mekem wan man i laef bakegen, olsem we wan papa i save wekemap pikinini blong hem
6. Laef bakegen i save mekem yu harem gud mo i givim hop
Stori blong gel blong Jaeras we i stap long Baebol, i leftemap tingting mo i mekem plante man we oli lusum fren o famle oli harem gud bakegen. Ridim trufala stori ya long Luk 8:40-42, 49-56.
Bifo we Jisas i mekem gel blong Jaeras i laef bakegen, hem i talem long Jaeras se: “Yu no wari, yu bilif nomo.” (Luk vas 50.) ?Olsem wanem hop blong laef bakegen i save givhan long yu . . .
taem wan fren o famle blong yu i ded?
taem laef blong yu i stap long denja?
Plei VIDEO, mo tokbaot kwestin ya.
?Olsem wanem hop blong laef bakegen i givhan long perens blong Felisiti?
SAM MAN OLI SE: “I had blong bilivim se ol man bambae oli laef bakegen blong stap long wol ya.”
?Wanem tingting blong yu?
?Yu save yusum wanem vas blong pruvum se ol man bambae oli laef bakegen long wol?
SAMARI
Baebol i promes se plante milian man we oli ded bambae oli laef bakegen. Jehova i wantem se oli laef bakegen, mo hem i givim paoa long Jisas blong mekem samting ya.
Tingtingbak
?Jehova mo Jisas i harem olsem wanem blong mekem ol man oli laef bakegen?
?Taem plante milian man oli laef bakegen, bambae oli stap long heven o long wol? ?From wanem yu talem olsem?
?From wanem yu sua se ol fren mo famle blong yu oli save laef bakegen?
FAENEMAOT
Sam rod we yu save folem taem yu stap harem nogud.
“?Wanem i Save Givhan Taem Wan Famle i Ded?” (Wekap! N. 3 2018)
?Yu ting se ol advaes blong Baebol oli save givhan long wan man we i stap harem nogud?
?Wanem i save givhan long pikinini taem hem i lusum wan fren o famle?
?I gat sam man we bambae oli laef bakegen blong go long heven? ?Hu bambae i no laef bakegen?