LESEN 46
?From Wanem Yu Mas Givim Laef Blong Yu Mo Baptaes?
Yu givim laef long Jehova, taem yu prea mo yu promes se bambae yu wosipim hem nomo mo yu putum wil blong hem long fasples long laef blong yu. (Ol Sam 40:8) Biaen yu baptaes. Taem yu mekem olsem, yu soemaot long fored blong ol narafala se yu bin givim laef blong yu long Hem. Desisen we yumi mekem blong givim laef blong yumi long Jehova, hem i wan desisen we i moa impoten i bitim eni narafala desisen. ?Wanem i save pulum yu blong mekem impoten desisen ya we i save jenisim laef blong yu?
1. ?Wanem i pulum wan man blong givim laef blong hem?
Lav nao i pulum yumi blong givim laef blong yumi long Jehova. (1 Jon 4:10, 19) Baebol i talem se: “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.” (Mak 12:30) Yumi soem se yumi lavem God, i no long ol toktok blong yumi nomo, be long ol aksen blong yumi tu. Lav we man mo woman i gat, i pulum tufala blong mared. Long sem fasin, lav we yumi gat long Jehova, i pulum yumi blong givim laef blong yumi long hem mo baptaes.
2. ?Jehova i givim wanem blesing long ol Witnes we oli baptaes?
Taem yu baptaes, bambae yu kam wan memba blong hapi famle blong Jehova. Bambae yu ekspiriensem lav blong hem long plante defren rod, mo bambae yu kam klosap moa long hem i bitim naoia. (Ridim Malakae 3:16-18.) Bambae Jehova i kam Papa blong yu, mo tu, bambae yu gat wan bigfala famle blong ol brata mo sista raon long wol we oli lavem Jehova mo oli lavem yu tu. (Ridim Mak 10:29, 30.) Be i gat sam samting we yu mas mekem bifo we yu baptaes. Yu mas lanem moa long saed blong Jehova, lavem hem, mo bilif long Pikinini blong hem. Biaen, yu mas givim laef blong yu long Jehova. Sipos yu mekem olsem mo afta yu baptaes, bambae yu stap long rod ya blong enjoem laef olwe. Baebol i talem se: “Baptaes we naoia i stap sevem yufala.”—1 Pita 3:21.
DIGIM MOA
Faenemaot from wanem i impoten blong yu givim laef blong yu long Jehova mo baptaes.
3. Yumi wanwan i mas jusum se bambae yumi wosipim hu
Bifo, ol man Isrel oli ting se oli save wosipim Jehova mo wosipim giaman god ya Bal long sem taem. Be Jehova i sanem profet Elaejah blong i stretem tingting blong olgeta. Ridim 1 King 18:21, mo tokbaot kwestin ya:
?Wanem desisen we ol man Isrel oli mas mekem?
Olsem ol man Isrel, yumi tu yumi mas jusum se bambae yumi wosipim hu. Ridim Luk 16:13, mo tokbaot ol kwestin ya:
?From wanem yumi no save wosipim Jehova mo wan narafala samting long semtaem?
?Olsem wanem yumi save soem long Jehova se yumi jus blong wosipim hem?
4. Tingting dip long lav we Jehova i gat long yu
Jehova i givim plante nambawan presen long yumi. ?Yumi save givim wanem long hem? Plei VIDEO.
?Wanem sam samting we Jehova i mekem blong soem se hem i lavem yu? Ridim Ol Sam 104:14, 15 mo 1 Jon 4:9, 10, mo tokbaot ol kwestin ya:
?Wanem ol presen blong Jehova we yu yu rili laekem?
?Yu gat wanem filing long Jehova from ol presen ya?
Taem yumi kasem wan presen we yumi rili laekem, yumi wantem soemaot tangkiu long man we i givim presen ya. Ridim Dutronome 16:17, mo tokbaot kwestin ya:
Taem yu tingbaot olgeta samting we Jehova i mekem blong yu, ?hemia i pulum yu blong givim wanem long hem?
5. Givim laef mo kasem plante blesing
Plante man oli bilif se sipos oli gat haenem, gudfala wok o mane, bambae oli hapi. ?Be hemia i tru? Plei VIDEO, mo tokbaot ol kwestin ya.
Nating se man ya long video i laekem tumas blong plei futbol, ?from wanem hem i lego profesenol spot ya?
Hem i lego futbol mo i givim laef blong hem long Jehova. ?Yu ting se hem i mekem wan gudfala desisen? ?From wanem?
Bifo we aposol Pol i kam wan Kristin, hem i gat wan hae posisen. Hem i bin stadigud loa blong ol man Jiu, wetem wan tija we ol man oli tinghae long hem. Be Pol i lego ol samting ya blong kam wan Kristin. ?Yu yu ting se Pol i rigret? Ridim Filipae 3:8, mo tokbaot ol kwestin ya:
?From wanem Pol i tokbaot ol samting we hem i mekem bifo se oli “olsem doti nomo”?
?Hem i kasem wanem from?
?Wanem tingting blong yu taem yu skelem wok blong Jehova wetem eni narafala wok?
Taem Pol i kam Kristin, hem i kasem samting we i gud moa i bitim samting we hem i lego
SAM MAN OLI SE: “I no nid blong givim laef blong yu long God, yu enjoem laef nomo.”
?From wanem yu ting se i stret blong givim laef blong yu long Jehova?
SAMARI
Lav i pulum yumi blong givim laef blong yumi long Jehova mo baptaes.
Tingtingbak
?From wanem i stret blong yumi lavem Jehova wetem fulhat blong yumi mo wosipim hem nomo?
?Olsem wanem Jehova i blesem ol Witnes blong hem we oli baptaes?
?Yu yu wantem givim laef blong yu long Jehova?
FAENEMAOT
Luk olsem wanem wan woman blong singsing mo wan man blong spot, i jusum blong givim laef long Jehova.
Ol Yangfala Oli Askem—?Bambae Mi Mekem Wanem Long Laef Blong Mi?—Tingbaot Bifo (6:54)
Makem sam narafala risen from wanem i gud blong givim laef blong yu.
“?From Wanem Yu Mas Givim Laef Blong Yu i Go Long Jehova?” (Wajtaoa, 1 Jenuware 2010)
Long miusik video ya, luk olsem wanem olgeta we oli givim laef i go long Jehova oli glad.
Long stori ya “For Years I Wondered, ‘Why Are We Here?’” makem samting we i pulum wan woman blong i tingting gud long samting we i moa impoten long laef.