STATEM WAN STORIAN
LESEN 5
Toktok Long Fasin We i Waes
Stamba Trutok: “Ol tok blong yufala i mas kaen oltaem.”—Kol. 4:6.
?Pol i Mekem Wanem?
1. Wajem VIDEO, o ridim Ol Wok 17:22, 23. Biaen askem ol kwestin ya:
?Wanem tingting blong Pol taem hem i luk ol giaman wosip we ol man oli mekem long Atens?—Yu luk Ol Wok 17:16.
Long fasin we i waes, ?olsem wanem Pol i yusum bilif blong ol man ya blong hem i save serem gud nius long olgeta?
?Yumi Lanem Wanem Long Eksampol Blong Pol?
2. Ol man bambae oli glad moa blong lesin long yumi sipos yumi jusum gud ol toktok blong yumi, mo tingbaot olsem wanem mo wetaem blong talem.
Folem Eksampol Blong Pol
3. Jusum gud ol toktok blong yu. Eksampol, taem yu storian wetem wan man we i no Kristin, maet yu mas yusum wan narafala rod blong tokbaot Baebol o Jisas long hem.
4. Yu no mas kwik blong stretem wan man. Letem man i talemaot ol tingting blong hem. Sipos hem i talem wan samting we i no laenap wetem ol tijing blong Baebol, yu no mas traem blong agiu wetem hem. (Jem. 1:19) Sipos yu lesin gud long hem, bambae yu naf blong faenemaot samting we hem i bilif long hem mo from wanem hem i bilif olsem.—Prov. 20:5.
5. Talem gudfala toktok mo agri wetem man sipos i stret. Maet hem i save gat tingting ya se bilif blong jos blong hem i stret. Traem tokbaot wan samting we yutufala tugeta i agri long hem, mo biaen, yu halpem hem sloslo blong hem i kasemsave long samting we Baebol i rili tijim.