Fraet Long Jeova, Man Blong Harem Prea
“O yu, yu Man blong harem prea, olgeta man long olgeta ples bambae oli kam long yu.”—OL SAM 65:2, “NW.”
1. ?From wanem yumi save se Jeova i stanemap sam rul we man i mas folem sipos hem i wantem prea long hem?
JEOVA GOD hem i “King blong Olwe.” Mo tu hem i “Man blong harem prea.” “Olgeta man long olgeta ples bambae oli kam” long hem. (Revelesen 15:3, NW; Ol Sam 65:2, NW) ?Be oli mas kam long hem olsem wanem? Sipos wan man i wantem stanap long fored blong wan king no haeman blong wol ya, i gat sam rul we hem i mas folem long saed blong dres mo fasin blong hem. Taswe i klia se yumi mas folem sam rul tu blong kam long fored blong “King blong Olwe,” blong askem sam samting long hem, mo blong talem tangkyu long hem.—Filipae 4:6, 7.
2. ?Wanem ol kwestin we oli stanap long saed blong prea?
2 ?Wanem ol rul we “King blong Olwe” i wantem se yumi folem, taem yumi prea long hem? ?Hu i save prea long God, mo God i harem hem? ?Mo ol man olsem oli save prea long saed blong wanem?
Rod Blong Prea Long King Blong Olwe
3. ?Yu save talem sam eksampel blong prea we ol man blong God oli mekem long taem bifo? ?Prea blong olgeta i pastru long wan narafala man?
3 Adam i “pikinini blong God.” Taem hem i no sin yet, i klia se hem i toktok wetem “King blong Olwe.” (Luk 3:38; Jenesis 1:26-28) Pikinini blong Adam, Ebel, hem i tekem sam “fasbon blong ol sipsip blong hem,” nao hem i kilim olgeta blong givim i go long God. Taem hem i mekem olsem ya, yumi save se hem i mas prea long God tu blong askem sam samting long hem mo blong presem hem. (Jenesis 4:2-4) Noa, Ebraham, Aesak, mo Jekob, olgeta oli bin bildim sam olta, mo oli kam kolosap long Jeova long prea taem oli mekem sakrafaes long hem. (Jenesis 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Mo ol prea blong Solomon, Esra, mo ol man we oli raetemdaon toktok blong God long Ol Sam, oli soemaot se ol man Isrel oli prea stret long God nomo. Prea blong olgeta i no pastru long narafala.—1 King 8:22-24; Esra 9:5, 6; Ol Sam 6:1, 2; 43:1; 55:1; 61:1; 72:1; 80:1; 143:1.
4. (a) ?Long faswan handred yia, God i mekem wanem nyufala rod blong man i save kam kolosap long hem long prea? (b) ?From wanem i stret nomo we man i prea long nem blong Jisas?
4 Long faswan handred yia K.T.,a God i mekem wan nyufala rod we man i mas yusum blong kam kolosap long hem long prea. Prea i mas pastru long Pikinini blong hem, Jisas Kraes, we hem i gat spesel lav long ol man. Taem Jisas i no kam long wol yet, hem i glad blong wok long heven olsem “wan nambawan man blong wok.” Mo tu hem i laekem ol samting we oli joen wetem laef blong man long wol. (Proveb 8:30, 31) Taem hem i stap long wol, Jisas i soemaot se hem i laekem ol man. Hem i givhan long ol sinman long saed blong speret, hem i mekem bodi blong plante sikman i kamgud bakegen, mo hem i mekem samfala oli laef bakegen long ded. (Matyu 9:35-38; Luk 8:1-3, 49-56) Antap long ol samting ya, Jisas i ‘givim laef blong hem blong pem rod blong plante man oli gofri.’ (Matyu 20:28) Taswe i stret nomo se ol man we oli wantem kasem blesing from sakrafaes blong Jisas, oli mas pastru long hem we i laekem ol man tumas, blong kam kolosap long God. Naoia man i save prea long “King blong Olwe” long rod ya nomo, from we Jisas i talem se: “I no gat man i save kam long Papa blong mi, sipos mi mi no tekem hem.” Mo: “Sipos yufala i askem samting long Papa blong mi long nem blong mi, bambae hem i save givim long yufala.” (Jon 14:6; 16:23) Sipos yumi askem samting long God long nem blong Jisas, hemia i min se yumi luksave se Jisas nomo i rod blong kam kolosap long Man blong harem prea.
5. ?God i tingting olsem wanem long ol man blong wol? ?Mo olsem wanem samting ya i laenap wetem prea?
5 I impoten tumas we yumi gat tangkyu long Jeova from lav we hem i soemaot, taem hem i givim Pikinini blong hem blong pemaot ol man. Jisas i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Toktok blong man we i raetemdaon Ol Sam i soemaot se lav blong God i bigfala tumas. Hem i se: “Fasin ya blong hem we oltaem hem i stap laekem tumas ol man we oli ona long hem, hem i gud tumas. Lav ya blong hem i bigfala tumas, i winim skae antap. Ol sin ya blong yumi, hem i stap tekemaot olgeta oli go longwe tumas long yumi, olsem we saed blong is i stap longwe tumas long saed blong wes. Fasin blong [Jeova, NW] oltaem hem i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta. Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.” (Ol Sam 103:11-14) Traem tingbaot. Papa blong yumi we i gat bigfala lav olsem ya i save harem prea blong ol Wetnes blong hem we oli givim laef blong olgeta i go long hem finis, nao oli prea long nem blong Pikinini blong hem. !Yumi save harem gud tumas from!
Blesing Ya i No Blong Evriwan
6. ?Taem man i kam kolosap long Jeova long prea, hem i mas gat wanem fasin?
6 Ol king blong wol oli no letem evri man i kam insaed long haos blong king. Man i mas talemaot hem fastaem. Blesing ya blong toktok wetem king, i no blong evri man. Sem mak long saed blong prea we i go long “King blong Olwe.” Olgeta we oli gat respek mo oli tinghae long bigfala paoa mo hae nem blong God, nao oli kam long hem long nem blong Jisas Kraes, God i save harem prea blong olgeta. Blong kam kolosap long “King blong Olwe,” man i mas gat tingting daon, we i ona mo i wosip long God. Mo olgeta we oli wantem se God i harem olgeta, oli mas “fraetgud long Jeova.”—Proveb 1:7.
7. ?Fasin “fraetgud long Jeova” hem i olsem wanem?
7 ?Man i mas mekem wanem blong “fraetgud long Jeova”? Hem i mas gat bigfala ona long God, mo hem i mas fraet blong mekem wan samting we God i no glad long hem from. Gudfala fraet mo ona ya i kamaot from we man i gat bigfala tangkyu long lav mo kaengud fasin we God i stap soemaot. (Ol Sam 106:1) Mo tu, man ya i mas luksave se God i “King blong Olwe.” Hem i gat raet mo paoa blong panisim man we i no obei long hem. Mo hem i save kilim man i ded tu. Ol man we oli fraet gud long Jeova oli save bilif se God bambae i harem prea blong olgeta.
8. ?From wanem God i harem prea blong olgeta we oli fraetgud long hem?
8 God i no save ansarem prea blong ol rabis man, we oli no wosip tru long hem, mo we oli ting se oli stret man long fes blong God. (Proveb 15:29; Aesea 1:15; Luk 18:9-14) Jeova i save harem prea blong ol man we oli fraet long hem, from we oli obei long ol stret rul blong hem. Mo oli bin mekem sam samting moa tu. Ol man we oli fraet long Jeova oli bin givim laef blong olgeta i go long God long prea, mo oli bin tekem baptaes blong soemaot samting ya. Taswe oli save kasem blesing ya blong prea long God, mo hem i no save blokem olgeta.
9, 10. ?Ol man we oli no tekem baptaes yet, oli save bilif se God bambae i harem prea blong olgeta?
9 Sipos man i wantem se God i harem prea blong hem, ol samting we hem i tokbaot long prea blong hem oli mas laenap wetem wil blong God. Yes, hem i mas tru long hat blong hem. Be hem i mas go moa tu. Aposol Pol i talem se: “Be sipos man i no bilif long God, hem i no save mekem God i harem gud. From we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) ?Be olsem wanem nao? ?I stret blong pulum man we hem i no tekem baptaes yet blong i prea long God wetem tingting se God i save harem hem?
10 King Solomon i save se blesing ya blong prea i no blong evri man. Taswe hem i askem long Jeova blong harem prea blong ol strenja we oli lukluk i go long haos prea blong God long Jerusalem nomo, taem oli stap prea. (1 King 8:41-43) Plante handred yia biaen, wan strenja we hem i no man Isrel, nem blong hem Konilyas, “oltaem hem i stap prea long God.” Hem i wan man blong prea. Taem hem i kasem stret save, Konilyas i givim laef blong hem i go long God, nao God i givim tabu speret long hem. Biaen, Konilyas mo sam narafala hiten man tu oli tekem baptaes. (Ol Wok 10:1-44) Tede sam man oli olsem Konilyas, oli stap traehad blong gohed gogo oli save givim laef blong olgeta i go long God. Yumi save pulum olgeta blong oli prea. Be maet wan man i stadi Baebol, be hat blong hem i no tru, mo hem i no save ol rul blong God long saed blong prea, mo hem i no soemaot fasin we God i glad long hem yet. I klia nao we man olsem i no fraetgud long Jeova, hem i no gat bilif, mo hem i no stap traehad blong faenem God. Taswe hem i no save mekem prea we God i glad long hem.
11. ?Wanem i hapen long samfala we fastaem oli stap traehad blong kasem mak we oli givim laef blong olgeta i go long God? ?Olgeta oli mas tingbaot wanem?
11 I gat samfala we fastaem oli stap gohed gud, oli stap traehad blong kasem mak we oli givim laef blong olgeta i go long Jeova. Be biaen, taem oli no kasem mak ya yet, maet i gat wan samting i stap blokem olgeta. Sipos oli no laekem God inaf blong givim laef blong olgeta i go fulwan long hem, oli mas tingbaot sipos oli stil holem nambawan blesing ya, prea. I luk olsem we oli no moa gat blesing ya, from we olgeta we oli wantem kam long God oli mas traehad blong faenem hem, mo oli mas lukaotem stret fasin mo tingting daon tu. (Sefanaea 2:3) Man we hem i rili fraet long Jeova, hem i man we i bilif. Nao hem i givim laef blong hem i go long God, mo hem i tekem baptaes blong soemaot samting ya. (Ol Wok 8:13; 18:8) Mo ol man blong bilif we oli tekem baptaes finis, olgeta ya nomo, God i no save blokem olgeta. Oli save kam kolosap long “King blong Olwe” long prea.
“Stap Prea Wetem Tabu Speret”
12. ?Olsem wanem man i save “prea wetem tabu speret”?
12 Taem wan man i givim laef blong hem i go long God finis mo hem i tekem baptaes finis blong soemaot samting ya, nao hem i save ‘prea wetem tabu speret.’ Long saed ya, Jud i talem se: “Ol fren. Yufala i mas hadwok blong kam strong moa long fasin blong bilif blong yufala. Fasin ya blong bilif i kamaot long God mo i klin gud. Yufala i mas stap prea [wetem tabu speret, NW]. Yufala i mas stap long laef ya we God i stap laekem yufala tumas, mo yufala i mas stap luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis.” (Jud 20, 21) Man i prea wetem tabu speret taem hem i prea aninit long paoa blong speret blong God, mo taem prea blong hem i laenap wetem ol samting we i kamaot long Tok blong God. Taem ol man oli raetemdaon Baebol, oli stap aninit long paoa blong tabu speret blong Jeova. Baebol i talem long yumi olsem wanem blong prea mo wanem samting yumi save askem long prea. Wan eksampel: Long prea, yumi save askem long God blong givim tabu speret blong hem long yumi. (Luk 11:13) Taem yumi prea wetem tabu speret, ol prea blong yumi oli soemaot gudfala fasin blong hat blong yumi, mo Jeova i laekem yumi tumas from.
13. ?Sipos yumi prea wetem tabu speret, bambae yumi no mekem wanem? ?Bambae yumi harem wanem advaes blong Jisas?
13 Taem yumi prea wetem tabu speret, ol prea blong yumi oli no fulap wetem ol bigfala wod mo flas tok. Mo yumi no lanem ol prea baehat. No gat. Oli no olsem ol tok blong presem God we oli blong mekem flas nomo, mo oli no gat mining nating. Mo yumi no talem ol tok we i no kamaot long hat blong yumi blong presem God. Ol prea olsem ya oli fulap long Krisendomb mo ol narafala haf blong ol gyaman skul blong wol, we nem blong olgeta se Bigfala Babilon. Be ol trufala Kristin oli harem advaes blong Jisas we i talem se: “Taem yu prea, i nogud yu folem fasin blong olgeta ya we oli gat tu tingting. Olgeta ya oli laekem tumas blong stanap blong prea insaed long ol haos blong prea, mo afsaed long ol open ples, blong ol man oli save luk olgeta. . . . Mo taem yufala i prea, i nogud yufala i stap talem plante tok olsem we ol hiten man oli stap mekem. Ol hiten man ya oli ting se ol god blong olgeta bambae oli harem olgeta from we oli talem plante toktok. [Be tingting ya i rong.] Bambae yufala i no folem fasin blong olgeta.”—Matyu 6:5-8.
14. ?Sam man oli talem wanem waes tok long saed blong prea?
14 Jisas mo ol man we oli bin raetemdaon Baebol oli talem plante samting long saed blong prea. Mo plante narafala man tu oli talem sam waes tok long saed blong prea. Wan eksampel: Wan man Engglan we hem i raetem plante buk, nem blong hem John Bunyan (1628-88) hem i talem se: “Prea i minim fasin blong toktok we i tru, i stret mo klia, i gat filing long hem. Long prea, man i openem hat blong hem long God long nem blong Kraes, long paoa blong Tabu Speret, blong askem ol samting we God i promes finis.” Pasta blong wan skul blong bifo we oli folem ol strong rul long saed blong fasin mo skul, nem blong hem Thomas Brooks (1608-80) hem i talem se: “God i no stap lukluk long ol wod we yumi yusum long ol prea blong yumi, mo olsem wanem yumi joenem olgeta. Hem i no stap lukluk long saes blong ol prea blong yumi, se oli longfala olsem wanem. Mo hem i no stap lukluk long namba blong ol prea blong yumi, hamas prea yumi stap mekem. Mo hem i no stap lukluk sipos evri samting we yumi askem long prea i stap long stret ples blong hem. Be hem i stap luk sipos ol prea blong yumi oli kamaot stret long hat blong yumi, mo oli tru.” Yumi save ademap wan tok blong Bunyan bakegen, se: “Long prea blong yumi, i moa gud we yumi gat filing long hat blong yumi, nating we i no gat plante toktok wetem, bitim we yumi gat fulap toktok be yumi no gat filing i go wetem.” ?Be olsem wanem nao? Nating we yumi tok tru, we prea i kamaot stret long hat blong yumi mo yumi folem ol rul we God i putum, ?be olsem wanem yumi save se “King blong Olwe” bambae i harem prea blong yumi?
Hem i No Save Tanem Baksaed
15. ?Long Luk 11:5-8, Jisas i talem wanem?
15 Jeova God i no save satem sora blong hem, blong hem i no harem ol prea blong ol man blong hem we oli givim laef blong olgeta i go long hem finis. Jisas i soemaot samting ya, i klia, long ol gudfala tok we hem i talem long ol disaepol blong hem, taem oli askem long hem olsem wanem blong prea. Haf blong toktok blong hem i olsem: “Long medel naet, wan fren blong yu we i stap wokbaot, hem i kamtru long haos blong yu, mo yu yu no gat kakae blong givim long hem. Nao yu girap, yu go askem long wan man ples blong yu, se ‘?Brata, yu gat sam hafkakae i stap, we yu save letem long mi? Wan fren blong mi i jes kamtru long mi naoia, mo mi mi no gat kakae nating blong givim long hem.’ ?Bambae man ples ya i save talem olsem wanem? ?Yu ting se hem i save talem se ‘A, yu gowe. Mi mi satem doa finis. Mi wetem ol pikinini blong mi, mifala i slip finis. Mi no save girap bakegen blong givim kakae long yu’? Mi mi talem long yufala, maet hem i no wantem girap blong givim kakae long yu from we yu man ples blong hem. Be from we yu no gat sem blong askem, askem, askem long hem, bambae hem i save girap blong givim evri samting long yu we yu yu sot long hem.” (Luk 11:1, 5-8) ?Wanem mining blong pija tok ya?
16. ?Long saed blong prea, Jisas i wantem se yumi mekem wanem?
16 Jisas i no minim se Jeova i no wantem givhan long yumi. No gat. Jisas i wantem se yumi trastem God fulwan, mo yumi laekem hem olsem we yumi prea long hem oltaem, yumi neva stop. Taswe Jisas i gohed olsem se: “Mi mi talem tok ya long yufala. Taem yufala i wantem wan samting, yufala i mas askem, nao bambae yufala i save kasem, mo yufala i mas lukaot, nao bambae yufala i save faenem, mo yufala i mas kilkilim doa, nao bambae doa i save open. From we man we i stap askem samting, oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.” (Luk 11:9, 10) Taswe i klia nomo se sipos ol man oli mekem trabol long yumi, no sipos yumi harem nogud from wan nogud fasin we yumi stap traehad blong winim, no sipos yumi kasem sam narafala traem bakegen, oltaem yumi mas gohed blong prea. Oltaem Jeova i stap rere blong givhan long ol trufala man blong hem. Hem i no save talem long yumi se: “A, yu gowe.”
17, 18. (a) ?Olsem wanem Jisas i pulum yumi blong askem God blong givim tabu speret long yumi? ?Wanem samting i givim moa paoa long ol tok ya blong Jisas? (b) ?Olsem wanem Jisas i talem se ol samting we papa mama i mekem long pikinini blong tufala oli olsem ol samting we God i mekem?
17 Sipos yumi wantem frengud wetem God, yumi nidim tabu speret we i paoa blong hem. Taswe Jisas i gohed se: “?I gat wan papa long yufala we taem pikinini blong hem i askem fis long hem, be hem i no save givim fis, i givim snek long hem? ?No i gat wan papa we taem pikinini blong hem i askem eg long hem, be hem i save givim skopion long hem? Yufala i man nogud, be yufala i save givim ol gudgudfala presen long ol pikinini blong yufala. Be Papa blong yufala long heven, hem i save go moa olgeta blong givim Tabu Speret long olgeta we oli askem long hem.” (Luk 11:11-13) Matyu 7:9-11 i talem se man ya i no givim bred long pikinini blong hem, be i givim wan ston long hem nomo. Ol tok ya blong Jisas i gat moa paoa sipos yumi tingbaot wan samting: Long taem bifo, long ol ples we ol man long Baebol oli stap long olgeta, oli wokem bred we i flat mo i raon, i luk olsem ston. Mo tu, sam snek oli luk olsem sam kaen fis. Mo i gat wan kaen skopion we i waet, i luk olsem eg nomo. Be sipos wan pikinini i askem long papa blong hem blong givim bred, no fis, no eg, nao papa blong hem i givim ston, snek, no skopion long hem, ?papa blong hem i olsem wanem?
18 Nao Jisas i gohed blong talem se fasin we papa mama i mekem long pikinini blong tufala i olsem fasin we God i mekem long ol memba blong famle blong hem, we oli stap wosip long hem. Taem yumi bon, yumi sinman finis, taswe yumi rili man nogud. Be yumi save givim ol gudgudfala presen long ol pikinini blong yumi. Oraet nao traem tingbaot: ?Olsem wanem long Papa blong yumi long heven? ?Yu ting se hem i save givim nambawan presen ya tabu speret long ol trufala man blong hem we oli askem long hem wetem tingting daon? !Tru ya, hem i save givim!
19. (a) ?Long Luk 11:11-13 mo Matyu 7:9-11, Jisas i stap talem wanem long yumi? (b) ?Sipos tabu speret i stap lidim yumi, bambae yumi tingbaot ol traem we yumi kasem olsem wanem?
19 Jisas i stap talem long yumi se yumi mas askem long God blong hem i givim moa tabu speret long yumi. Sipos tabu speret i stap lidim yumi, yumi no save ‘toktok nogud from ol samting we oli kamaot long laef blong yumi.’ Yumi no save tingbaot ol traem we yumi kasem mo ol samting we yumi harem nogud from olsem we oli rili mekem i nogud tumas long yumi. (Jud 16) Tru, “laef blong man, we woman i bonem hem, i sot nomo, mo i fulap long trabol.” From samting ya, plante man oli no laef longtaem i naf blong luk en blong ol trabol blong olgeta mo ol samting we tingting i hevi from. (Job 14:1) Be yumi neva mas tingbaot ol traem we yumi kasem olsem ston, snek, mo skopion we Man blong harem prea i givim long yumi. No gat. Hem i nambawan eksampel blong lav, mo hem i no stap traem man wetem samting nogud. Defren olgeta, hem i stap givim ‘evri samting we oli gud mo evri presen we oli nambawan.’ Bambae hem i stretem evri samting long laef blong olgeta we oli laekem hem mo oli fraet long hem. (Jemes 1:12-17; 1 Jon 4:8) Ol man we oli wokbaot long rod blong trutok plante yia finis, oli bin kasem sam strong traem. Be oli luk se taem oli yusum prea mo bilif blong winim ol bigbigfala traem we oli bigwan moa bitim ol narawan, long en blong ol traem ya oli kasem gudfala frut. Mo tu, ol traem ya oli mekem se ol frut blong tabu speret blong God oli kam fulap moa long laef blong olgeta. (3 Jon 4) Tru ya, i no gat wan narafala rod we i moa gud, blong lanem yumi blong dipen long Papa blong yumi long heven. Mo i no gat wan narafala rod we i moa gud, blong givhan long yumi blong wokem ol frut blong tabu speret, olsem lav, glad, pis, longfala tingting, kaen fasin, gud fasin, bilif, kwaet fasin, mo fasin blong bos long tingting blong yumi.—Galesia 5:22, 23.
20. ?Ol tok blong Jisas long Luk 11:5-13 oli mas gat paoa long yumi olsem wanem?
20 Taswe ol tok blong Jisas long Luk 11:5-13 oli stap soemaot long yumi bakegen se Jeova i laekem yumi mo i kea gud long yumi. From samting ya, hat blong yumi i mas fulap long tangkyu mo lav. Samting ya i mas mekem bilif blong yumi i kam strong moa, mo i mas mekem se oltaem yumi wantem kam long fes blong “King blong Olwe,” blong yumi save stap longtaem lelebet kolosap long hem we i laekem yumi. Mo tu, ol tok blong Jisas oli stap soemaot long yumi bakegen se hem i no save tanem baksaed long yumi, no sanemaot yumi we han blong yumi i olsem we i emti. Papa blong yumi long heven i glad tumas sipos yumi sakem ol baden blong yumi i go long hem. (Ol Sam 55:22; 121:1-3) Mo yumi, ol trufala man blong hem we yumi givim laef blong yumi i go long hem finis, taem yumi askem long hem blong givim tabu speret long yumi, hem i save givim fulap long yumi, i no gat mak blong hem. Hemia nao God blong yumi we i laekem yumi tumas. Mo yumi save bilif fulwan se hem i Man blong harem ol prea blong yumi.
[Ol futnot]
a K.T. i min se Kristin Taem.
b Krisendom i minim ol gyaman Kristin skul.
?Yu Yu Save Rimemba?
◻ ?Long prea, yumi mas kam long God long nem blong hu? ?From wanem?
◻ ?From wanem prea i wan blesing we i no blong olgeta man, i blong samfala nomo?
◻ ?Taem yumi ‘prea wetem tabu speret,’ hemia i minim wanem?
◻ ?Wanem sam vas long Baebol we yu save yusum blong pruvum se Jeova i stap harem prea blong ol trufala Wetnes blong hem we oli tekem baptaes finis?
[Tok Blong Pija Long Pej 14]
Olsem we ol papa oli save givim ol gudgudfala presen long ol pikinini blong ol, Jeova tu i save givim tabu speret long olgeta we oli stap askem long hem