?Yu Yu Gat Tangkyu Long Ol Samting We God i Mekem Finis?

“Man we i wantem kam biaen long mi i mas blokem ol samting we hem nomo i wantem, nao evri dei i mas karem [pos, NW] blong hem, i mas biaen long mi.”​—⁠LUK 9⁠:23.

1. ?Wanem sam nambawan presen we God i givim long yumi finis?

GOD i givim laef long yumi. Sipos hem i no bin wokem man fastaem, yumi no save bon. Be i no laef nomo we God i wokem. Hem i mekem yumi blong yumi save harem gud long plante samting: Yumi save testem kakae, stap wom long san, harem myusek, harem freswin long wan gudfala dei, mo harem gud long lav we narafala i soem long yumi. Antap moa, God i givim wan bren long yumi, mo hem i mekem se yumi wantem lanem moa long saed blong hem. Hem i givim ol toktok long ol man we oli raetem Baebol. Mo ol tok long Baebol i save lidimgud yumi, i save soemaot long yumi olsem wanem blong harem gud moa long laef, mo i save givim hop long yumi se bambae yumi save stap laef blong olwe long nyufala wol we stret fasin nomo bambae i stap long hem. Mo tu, God i stap givim tabu speret blong hem, i stanemap kongregesen we yumi save joen wetem hem, mo hem i givim ol man mo woman we oli olfala moa long yumi, blong givhan long yumi long fasin lav, blong yumi save stanap strong long wok blong God.​—⁠Jenesis 1:​1, 26-28; 2 Timote 3:​15-17; Hibrus 10:​24, 25; Jemes 5:​14, 15.

2. (a) ?Wanem samting we God i mekem long yumi we i bigwan moa i bitim ol narafala samting? (b) ?Yumi save kasem laef from we yumi mekem ol gudfala wok nomo?

² Antap long ol samting ya, God i sanem fasbon Pikinini blong hem i kam blong talem moa long yumi long saed blong ol samting we Papa blong yumi long heven i wantem blong yumi mekem. Mo hem i kam blong givim laef blong hem blong pemaot ol man we oli bilif long hem, blong “oli save gofri.” (Efesas 1:7; Rom 5:18) Pikinini ya Jisas Kraes, i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3⁠:16) Blad blong Kraes i save sevem ol man, mo fasin ya i gat bigfala praes moa i winim ol narafala samting. Taswe man i no save mekem sam kaen wok we i pem presen ya, no gat. Mo samting ya i tru moa long saed blong ol wok we Loa blong Moses i putum long ol man. Taswe Pol i talem se: “Man i no save kam stret man long fes blong God samtaem, from we i stap folem Loa blong ol man Isrel. Man we i bilif long Jisas Kraes, hem nomo God i save talem se i stret.”​—⁠Galesia 2:16; Rom 3:​20-24.

Bilif Mo Wok

3. ?Jemes i talem wanem long saed blong bilif mo ol wok we oli joen wetem?

³ Bilif i save sevem yumi. Be bilif mo tangkyu from ol samting we God i mekem finis long yumi, tufala samting ya i mas pusum yumi blong mekem sam samting. Yumi mas mekem sam samting blong soemaot bilif blong yumi. Brata blong Jisas, Jemes, hem i talem se: “Fasin blong bilif blong yumi i olsem. Sipos hem i stap hem wan, i no gat ol gudfala fasin i stap wetem, hem i ded nomo.” Hem i go moa i se: “Sipos yu soemaot long mi we yu no mekem ol gudfala fasin, be yu yu man blong bilif, mi bambae mi soemaot long yu we mi mi man blong bilif from ol gudfala fasin we mi stap mekem.” Jemes i talem se ol rabis speret tu ‘oli bilif mo oli stap seksek from.’ Be i klia nomo se ol rabis speret ya oli no mekem ol gudfala fasin mo wok. Long defren fasin, Ebraham i gat bilif, be hem i gat wok we i go wetem. “Bilif blong hem i joen wetem ol wok blong hem, mo from ol wok blong hem, bilif blong hem i kam stret gud olgeta.” (NW) Nao Jemes i talem bakegen se: “Fasin blong bilif we i no gat fasin blong laef [ol wok] i go wetem, hem tu i ded.”​—⁠Jemes 2:​17-26.

4. ?Jisas i talem se olgeta we oli wantem biaen long hem oli mas mekem wanem?

⁴ Jisas tu i soemaot olsem wanem ol gudfala wok oli impoten. Hem i se: “Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.” Mo tu hem i talem se: “Man we i wantem kam biaen long mi i mas [tanem baksaed long hem wan, NW], nao evri dei i mas karem [pos, NW] blong hem, i mas biaen long mi.”a Sipos yumi “tanem baksaed” long yumi wan, yumi mas lego plante samting we yumi nomo i wantem. Yumi mas luksave se yumi kam long God from evri samting we hem i givim. Taswe yumi givim laef blong yumi long hem olsem we yumi slef blong hem. Yumi traehad blong lanem mo blong mekem ol samting we hem i wantem, olsem Jisas i bin mekem.​—⁠Matyu 5:16; Luk 9:23; Jon 6:38.

Tangkyu i Gat Paoa Long Laef Blong Yumi

5. (a) ?Pita i talem se wanem samting i mas gat paoa long olgeta samting long laef blong yumi? (b) ?Hem i talem se yumi mas mekem wanem gudfala wok?

⁵ Pita i talem se blad blong Kraes we hem i givim blong pemaot yumi, “i gud tumas.” Praes blong hem i bigwan moa i bitim ol narafala samting. Taswe long evri samting we yumi mekem long laef blong yumi, yumi mas soemaot tangkyu from. Aposol ya i talem plante samting we fasin tangkyu i mas pusum yumi blong mekem. Hem i givim advaes se: “Yufala i mas finis long ol rabis fasin.” “Yufala i mas olsem smol pikinini we i jes bon we i wantem titi tumas. Yufala i mas wantem melek ya we i klin gud, we i blong tingting blong yufala.” “God i tekem yufala i blong hem nomo . . . blong bambae yufala i save talemaot ol gudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.” “Livim ol fasin nogud blong mekem ol gudfala fasin.” “Sipos man i askem long yufala from wanem yufala i putum tingting blong yufala i stap long Kraes, bambae yufala i mas rere blong talemaot.” “Nao i stat naoia, bambae yufala i no moa letem ol rabis samting we tingting blong yufala i wantem, oli bos long yufala. Ol samting we God i wantem, oli mas bos long yufala.”​—⁠1 Pita 1:19; 2:​1, 2, 9; 3:​11, 15; 4:⁠2.

6. (a) ?Olsem wanem ol Kristin long faswan handred yia oli soemaot bilif blong olgeta? (b) ?Olgeta oli givim wanem eksampel long yumi?

⁶ Ol Kristin long faswan handred yia oli mekem bilif blong olgeta i wok long laef blong olgeta. Samting ya i jenisim fasin blong olgeta mo i jenisim tingting blong olgeta long saed blong fyuja. Mo tu, samting ya i pusum olgeta blong mekem laef blong olgeta i laenap wetem wil blong God. Ol man oli mekem trabol long olgeta, oli sakem olgeta long kalabus, oli stonem olgeta, oli wipim olgeta, oli holem olgeta, mo oli kilim samfala oli ded. Nating we oli mekem olsemia, be ol Kristin ya oli no lego bilif blong olgeta. (Ol Wok 7:​58-60; 8:1; 14:19; 16:22; 1 Korin 6:​9-11; Efesas 4:​22-24; Kolosi 4:​3; Faelimon 9, 10) Wan man Rom we i raetemdaon histri, nem blong hem Tacitus, hem i bon long 56 K.T.b Mo hem i talem se ol Kristin long taem ya, “ol man oli sakem olgeta long faea, oli bonem olgeta blong mekem laet i saenaot, taem ples i tudak finis.” !Be bilif blong ol Kristin ya i no seksek nating!​—⁠The Annals, Buk 15, haf 44.

7. ?Samfala oli stap olsem wanem?

⁷ Long sam kongregesen, yumi save luk samfala we oli stap kam long ol miting plante yia finis. Olgeta oli laekem tumas ogenaesesen blong Jeova, oli ting se ol man blong hem oli moa gud i bitim ol narafala man long wol, mo oli tokbaot trutok long gudfala fasin. Mo sipos sam narafala oli tok agens long trutok, olgeta oli girap, oli stanap long saed blong trutok nomo. Be wan samting i stap blokem olgeta, blong oli no gohed moa. Olgeta oli no mekem samting ya we 3,000 man long dei blong Pentekos oli mekem. Mo man Itiopia i askem kwestin long saed blong samting ya tu. Mo taem Sol, we fastaem hem i kilim ol Kristin man, i luksave se Jisas hem i trufala Mesaea, Ananaeas i talem long hem se hem tu i mas mekem samting ya. (Ol Wok 2:41; 8:36; 22:16) ?Olgeta tede we oli no mekem samting ya yet, oli sot long wanem? ?From wanem olgeta oli no mekem samting ya yet we Baebol hem i talem se hem i blong “askem long God blong hem i mekem we voes blong hat mo tingting” blong olgeta i klin? (1 Pita 3:​21, NW) Sipos yu yu wan long olgeta ya we oli save trutok finis, be yu stap slou blong tekem disisin blong yu, yu save tingbaot haf ya long magasin ya olsem wan spesel haf we mifala i mekemrere blong soemaot lav long yu nomo.

Winim Ol Samting We Oli Mekem We Yu No Tekem Baptaes Yet

8. ?Sipos i hadwok long yu blong stadi, yu yu waes sipos yu mekem wanem naoia?

⁸ ?Wanem sam samting we oli stap blokem yu? Faswan stadi long Wajtaoa ya i soemaot we i hadwok long samfala blong stadi wanwan. God i givim wan gudfala bren long yumi evriwan, mo hem i wantem se yumi yusum bren ya blong mekem wok blong hem. I gat samfala we fastaem oli no save rid. Nating we i hadwok long olgeta, be oli lanem blong rid blong oli save kasem moa save long God mo ol plan blong hem. ?Olsem wanem long yu? Ating yu yu save rid finis. ?Be yu yu stap stadi gud? ?Yu yu mekem olsem ol man Berea bifo, we “evri dei, oli stap ridimgud ol tok blong Baebol,” blong traem save sipos ol samting ya we oli harem oli tru no oli no tru? ?Yu yu stap stadi gud long trutok blong faenemaot se “hem i big olsem wanem, hem i long olsem wanem, hem i hae olsem wanem mo hem i dip olsem wanem”? ?Yu yu stap go dip insaed long Tok blong God? ?Yu yu faenemaot finis se Tok blong God i gudfala olsem wanem? ?Yu yu wokem wan tingting we yu wantem tumas blong save wil blong God? ?Yu yu rili hanggri long trutok?​—⁠Ol Wok 17:​10, 11; Efesas 3:18.

9. ?Sipos yu gat wan trabol wetem wan memba blong kongregesen, i stret blong yu yu mekem wanem?

⁹ Samfala oli no stap gohed from we oli gat wan problem wetem wan man long kongregesen, no maet oli ting nomo se oli gat wan problem. ?I gat wan man long kongregesen we i mekem wan bigfala samting agens long yu? Sipos i olsem, yu mas folem advaes we Jisas i givim se: “Yu mas go luk hem, nao yutufala nomo i stap, yu mas talemaot long hem, samting nogud ya we hem i mekem.” (Matyu 18:15) Taem yu mekem olsemia, maet yu sapraes blong faenemaot se man ya i no save se yu yu harem nogud long samting ya we hem i mekem. Be nating we hem i save no i no save, sipos yu go luk hem, yu save “mekem hem i kam brata blong yu bakegen,” olsem Jisas i talem. Mo tu samting ya i save blokem hem blong i no mekem wan narafala long kongregesen i harem nogud bakegen samtaem. Traem tingtinggud: ?Yu yu rili stap wosip long hu​—⁠long man ya no long God? ?Sipos yu save letem wan mastik nomo blong wan narafala man i blokem yu blong yu no moa laekem God, maet samting ya i min se yu laekem God smol nomo?

10, 11. ?Sipos wan sin we i stap haed i stap blokem yu blong yu no save gohed long trutok, yu mas mekem wanem?

¹⁰ Wan sin we man i stap haedem i save blokem hem, blong hem i no save gohed gogo hem i tekem baptaes. Maet sin ya i wan samting we i hapen longtaem finis, no maet hem i wan rong samting we hem i stap mekem naoia. ?Sipos yu yu stap trabol long wan samting olsemia, yu ting se naoia i stret taem blong stretem bisnes ya? (1 Korin 7:​29-31) Plante man we oli man blong Jeova naoia, oli mas jenisim sam fasin we oli bin mekem long laef blong olgeta fastaem. Baebol i talem se: “Oraet, nao yufala i mas tanem tingting blong yufala from ol sin blong yufala, yufala i mas luk long God blong hem bambae i tekemaot ol sin blong yufala.”​—⁠Ol Wok 3:19.

¹¹ Nomata wanem sin we yu bin mekem finis, yu save tanem tingting blong yu from sin ya, mo jenisim fasin blong yu, mo askem God blong fogivim yu. Baebol i talem se: “Yufala i mas kilimaot ol fasin ya blong yufala, we oli blong laef ya long wol nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. . . . Yufala i [mas] tekemaot olfala laef ya blong yufala . . . wetem ol fasin blong hem, mo yufala i [mas] putum nyufala laef blong yufala, olsem prapa klos blong yufala. Nyufala laef ya, God nomo i stampa blong hem. Mo oltaem, God i stap mekem laef ya i kam nyufala bakegen, blong mekem yufala i save hem tru, mo blong mekem yufala i kam moa olsem we yufala i pija blong hem.” Yes, yu yu save mekem laef blong yu i joen long ol loa blong God. Yu save harem gud from we voes blong tingting blong yu i no jajem yu. Mo yu save hop se bambae yu kasem laef blong olwe long nyufala wol we i stret nomo. ?Yu ting se ol blesing ya oli naf blong pusum yu blong traehad blong mekem ol samting we God i wantem?​—⁠Kolosi 3:​5-10; Aesea 1:​16, 18; 1 Korin 6:​9-11; Hibrus 9:14.

12. ?Sipos voes blong tingting blong yu i no klin from we yu smok tabak, no yu dring tumas alkol, no yu yusum drag, yu yu mas mekem wanem?

¹² Maet yu yu stap smok tabak yet, no maet yu drong samtaem yet, no maet yu stap yusum drag yet. ?Wan long trifala samting ya i stap mekem we voes blong tingting blong yu i stap jajem yu long fes blong Jeova? ?Ol fasin ya we oli stap spolem laef mo bodi blong yu, oli stap soemaot respek long nambawan presen we God i givim long yumi, se laef, no no gat? Sipos wan fasin olsem i stap blokem yu, i klia se naoia i taem blong stretem. Yu yu save lusum laef blong yu from sam nogud fasin olsemia. ?Yu wantem we samting ya i hapen? Pol i talem se: “Yumi mas mekem yumi klin. Yumi mas putumaot olgeta samting long bodi blong yumi mo long tingting blong yumi, we oli stap mekem yumi doti long fes blong God. Yumi mas traehad blong mekem fasin blong yumi i klin, i tabu, yumi blong God olgeta, from we yumi stap onagud long hem.” ?Yu yu tinghae long ol klin mo stret fasin blong God? ?Yu yu gat inaf fasin tangkyu long hat blong yu blong pusum yu blong obei long vas ya?c​—⁠2 Korin 7:⁠1.

Olting Blong Wol

13, 14. (a) ?Baebol i talem wanem long fasin blong wantem kam rij? (b) ?From wanem i impoten blong tingbaot ol samting blong heven fastaem?

¹³ Tede ol man blong wol oli ting se i impoten blong kam rij, mo ‘oli flas tumas long ol samting we oli gat.’ Olgeta oli ting se ol samting ya i moa impoten i bitim ol narafala samting blong laef. Jisas i talem se i gat sam man we “oli trabol tumas long laef ya long wol, oli wantem kam rijman mo oli wantem tumas ol narafala samting.” Hem i talem se ol fasin ya oli olsem “rop we i gat nil blong hem,” we i stap blokem Tok blong God, blong i no save karem frut long laef blong ol man ya. Mo tu, Jisas i askem se: “?Sipos wan man i kasem olgeta samting blong wol, be i lusum laef blong hem, hem bambae i save winim wanem?”​—⁠1 Jon 2:16; Mak 4:​2-8, 18, 19; Matyu 16:26.

¹⁴ Jisas i talem se God i stap givim kakae long ol pijin mo hem i stap flasemgud ol flaoa tu. Nao hem i se: “Be long fes blong hem, yufala i moa long ol pijin. . . . ?Yufala i ting se bambae [God] i no save givim klos long yufala?” Jisas i givim waes advaes long yumi blong no “stap tingting tumas from ol samting blong laef.” Mo hem i talem se: “[Oltaem yufala i mas lukaot Kingdom blong hem, NW], nao bambae hem i save givim olgeta narafala samting ya tu long yufala.” Hem i talem se yumi mas tingbaot ol samting blong heven fastaem, from we ‘long ples ya we ol gudgudfala samting blong yumi i stap, be tingting blong yumi tu bambae i stap oltaem long ples ya.’​—⁠Luk 12:​22-31; Matyu 6:​20, 21.

Mekem Wok Blong God Wetem Help Blong God

15. ?Eksampel blong ol Kristin long faswan handred yia i leftemap tingting blong yumi olsem wanem?

¹⁵ ?I hadwok long yu blong go long wok blong prij oltaem? ?Fasin blong sem i stap blokem yu? Sipos i olsem, i impoten we yu tingbaot ol Kristin long faswan handred yia. Olgeta tu oli gat semkaen tingting mo filing olsem yumi tede. God i no jusumaot ol man we oli waesman, no oli gat paoa, no oli haeman. No gat. Hem i jusumaot “ol samting we ol man blong wol oli stap talem se oli no gat paoa, blong mekem ol man we oli gat paoa oli sem.” (1 Korin 1:​26-29) Ol lida blong ol skul we oli gat paoa oli agensem ol man ya we oli “no gat nem.” Oli tok strong long olgeta blong oli no moa prij. ?Ol Kristin ya oli mekem wanem? Olgeta oli prea. Oli askem long God blong mekem tingting blong olgeta i strong blong talemaot ol tok blong hem. Mo God i mekem olsem. !From samting ya, Jerusalem i kam fulap long mesej we oli stap talemaot, mo biaen, i kasem olgeta ples long wol!​—⁠Ol Wok 4:​1-4, 13, 17, 23, 24, 29-31; 5:​28, 29; Kolosi 1:23.

16. ?‘Bigfala kampani blong ol wetnes’ we Hibrus japta 11 i tokbaot, oli lanem wanem long yumi?

¹⁶ Taswe fraet blong man i neva mas blokem yumi long wok blong God. Hibrus japta 11 i tokbaot ‘wan bigfala kampani blong ol wetnes’ we oli no fraet long man, oli fraet long God nomo. Yumi mas gat semkaen bilif. Aposol ya i talem se: “Be yumi ya, yumi gat ol wetnes ya blong God oli stap raonabaot long yumi, we kampani blong olgeta i bigfala tumas. Nao from samting ya yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.”​—⁠Hibrus 12:⁠1.

17. ?God i yusum Aesea blong talem wanem toktok we i leftemap tingting blong yumi?

¹⁷ God i save givhan bigwan long ol man blong hem. Man ya we i wokem heven mo wol i talem long Aesea se: “Olgeta we oli hop long Jeova bambae oli kasem paoa bakegen. Bambae i olsem we oli gat wing, olsem ol igel, blong go antap. Bambae oli resis, be bodi blong olgeta bambae i no slak. Bambae oli wokbaot, be oli no taed.”​—⁠Aesea 40:31.

18. ?Sipos yu yu sem blong go talemaot Kingdom, yu yu save winim trabol ya olsem wanem?

¹⁸ Long kongregesen blong yu, yu yu save luk plante hapi Wetnes we oli gat strong tingting blong gohed long wok blong God. Be hemia i wan smolhaf nomo blong ol Wetnes long wol. Long ful wol i gat moa long tri mo haf milyan man blong God we oli stap wok strong long wok blong hem. Oli glad tumas blong mekem wok we Jisas Kraes i bin talemaot se: “Nao bambae ol man oli stap talemaot gud nyus ya [blong Kingdom blong God, NW] blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae [en, NW] i save kam.” Maet yu yu naf gud blong talemaot Kingdom ya, be i hadwok long yu blong go long wok blong prij. Sipos i olsem, i gud yu askem wan narafala Wetnes we i wok gud long minista wok blong hem blong tekem yu yu go wetem hem long wok blong prij. Tru, God i save givim “paoa ya we i bigfala tumas.” Taem hem i givim samting ya, maet bambae yu yu sapraes long bigfala glad we yu kasem long wok blong hem.​—⁠Matyu 24:14; 2 Korin 4:7; lukluk long Ol Sam 56:11; Matyu 5:​11, 12; Filipae 4:13.

19. ?Jisas i talem long olgeta we oli folem hem se oli mas mekem wanem wok blong tijim ol man?

¹⁹ Jisas i wantem se olgeta we oli gat tangkyu from mesej blong Kingdom oli mekem wan samting. Hem i talem se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala.”​—⁠Matyu 28:​19, 20.

20. Sipos yu yu stap gohed gud long saed blong speret, ?ating i stret taem blong yu askem wanem kwestin?

²⁰ ?Yu yu gat tangkyu long God from ol blesing blong hem, from blad blong Jisas we “i gud tumas,” mo from nambawan hop blong kasem laef blong olwe? ?Mo tangkyu ya i pusum yu blong mekem sam samting? (1 Pita 1:19) ?Yu yu mekem laef blong yu i joen wetem ol stret loa blong God finis? ?Yu yu stap go oltaem long wok blong mekem disaepol? ?Yu yu tanem baksaed long yu wan finis, mo yu yu givim laef blong yu i go olgeta long God finis? Sipos yu talem yes long olgeta kwestin ya, ating naoia i stret taem blong yu askem wan elda long kongregesen blong yu sem kwestin ya we man Itiopia we i gat bilif i askem long Filip, se: “?I gat sam samting i stap blokem mi yet, se mi no save baptaes?”​—⁠Ol Wok 8:36.

[Ol futnot]

?Yu Yu Save Rimemba?

◻ ?Wanem sam spesel risen blong yumi gat tangkyu long God?

◻ ?Bilif mo fasin tangkyu i mas pusum yumi blong mekem wanem?

◻ ?Wanem sam problem we oli save blokem yumi blong yumi no obei long God? ?Mo yumi save mekem wanem blong winim olgeta?

◻ ?Samfala we oli no tekem baptaes yet oli save tingtinggud long wanem kwestin?

[Bokis blong pija long pej 26]

‘?Mi Mi Wanem Kaen “Graon” Ya?’

Jisas i talem wan parabol long saed blong wan man we hem i sakem sid. Sam sid oli foldaon long rod, mo biaen ol pijin oli kam, oli kakae. Sam sid oli foldaon long ples we i gat ston daon, be i no gat tumas graon antap. Ale, oli gru kwik, be taem san i kam antap, hem i bonem ol gru blong olgeta, oli drae wantaem. Sam narafala sid oli foldaon long ples blong rop we i gat nil long hem. Biaen, rop ya i kam bigfala, i kavremap ol gru blong olgeta gogo oli ded. Jisas i talem mining blong trifala grup ya se: Faswan, hem i man we i harem tok ya blong Kingdom blong God, “be i no save mining blong hem.” Sekenwan, hem i man we i harem tok ya, mo i glad long hem. Be “sipos i gat hadtaem, no sam man oli ronem hem from tok ya,” bambae hem i foldaon wantaem. Mo namba tri, hem i man we “i tingting tumas from laef blong hem long wol ya, mo i wantem kam rijman. Nao ol fasin ya oli kam blokem tok ya, i no karem frut long laef blong man ya.”

Mo tu, Jisas i tokbaot sam narafala sid we i foldaon long gudfala graon. Hem i talem se: “Hemia i olsem man we i harem tok ya, mo i save mining blong hem. Ol man olsem oli gat frut blong tok ya long laef blong olgeta.”​—⁠Matyu 13:​3-8, 18-23.

I gud we yumi evriwan i askem long yumi se: ‘?Mi mi wanem kaen “graon”?’

[Bokis blong pija long pej 27]

Oli Ded From Bilif, Blong Olgeta

?Yu yu save wan man we hem i ting se i moa gud blong ded i bitim we hem i lego bilif blong hem? Plante taosen Wetnes blong Jeova oli bin mekem samting ya. Dokta Christine E. King i raetem wan buk (The Nazi State and the New Religions: Five Case Studies in Non-Conformity), hem i talem se: “Long evri tu Wetnes long Jemani, oli sakem wan i go long kalabus. Mo long evri fo Wetnes, i gat wan i lusum laef blong hem.”

Long 1945, taem ol raf fasin blong ol rabis presin ya i finis, “namba blong ol Wetnes i go antap i bitim bifo, mo oli no lego bilif blong olgeta nating.” J. S. Conway i raetem wan buk (The Nazi Persecution of the Churches), mo long saed blong ol Wetnes, hem i talem se: “I no gat wan narafala skul no grup blong man nating we i stanap strong olsem ol Wetnes long fes blong ful paoa blong raf fasin blong ol Gestapo.”

Olgeta oli no mekem raf fasin ya long ol Wetnes blong Jeova from politik no from kala blong olgeta. No gat. Ol Wetnes oli kasem trabol ya from we oli laekem God nomo, mo from we oli no save mekem wan samting we i agensem voes blong tingting blong olgeta we i laenap wetem Baebol.