?Yu Yu Wantem Mekem Wok Long Kongregesen?
“Sipos wan man i wantem mekem wok blong elda long kongregesen, man ya i wantem wan gudfala wok.”—1 TIMOTE 3:1, “NW.”
1. ?Ol Wetnes blong Jeova oli wantem kasem wanem bigfala wok?
OL WETNES blong Jeova oli wantem mekem sam gudfala wok, long wan fasin we God i glad long ol. Yumi no mas sapraes long samting ya from we God tu i wantem mekem sam gudfala wok, mo oltaem hem i mekem ol plan blong hem oli kamtru. (Aesea 55:8-11) Ol man blong Jeova oli no olsem plante narafala man we oli no wantem mekem sam gudfala wok mo oli gat wan laef we i olbaot nomo. Ol man ya oli no mekem plante samting blong halpem narawan. Be ol Wetnes blong Jeova oli no olsem ol man ya, oli gat wan gudfala wok we i impoten tumas. Oli mas talemaot mesej blong Kingdom mo oli mas tijim ol narafala man long Tok blong God.—Ol Sam 119:105; Mak 13:10; Jon 17:3.
2. ?Long 1 Timote 3:1, Pol i tokbaot wanem wok we ol Kristin man oli save kasem?
2 Long ogenaesesen blong Jeova, ol memba blong hem oli save kasem sam narafala gudfala wok. Aposol Pol i tokbaot wan wok olsem. Hem i talem se: “I gat wan tok we i stret, hemia: Sipos wan man i wantem mekem wok blong elda long kongregesen, man ya i wantem wan gudfala wok.” (NW) Wan man olsem i wantem mekem wan samting blong halpem narafala. Hem i wantem “wan gudfala wok,” hem i no wantem wan isi laef mo haenem. Wan narafala translesen i talem se: “I tru blong talem se taem wan man i wantem tumas lidim ol man, hem i wantem tumas wan gudfala samting.”—1 Timote 3:1, Phillips.
?Ol Elda Oli Mas Lukaot Long Wanem Denja?
3, 4. ?From wanem wan man we i wantem tumas kam wan elda, hem i mas lukaotgud long tingting blong hem?
3 ?From wanem wan man we i wantem kam wan Kristin elda, hem i “wantem tumas wan gudfala samting”? Taem wan man i “wantem tumas” kasem wan wok, hemia i min se hem i laekem wok ya. I tru, sam man oli gat sam gudfala wok we oli wantem kasem, be sam narafala oli wantem mekem wok we i nogud nomo. Wan man we i gat tingting daon mo i wantem kam elda blong halpem ol narafala, hem i gat stret tingting blong mekem wok long kongregesen. Bambae, wok blong hem i save blesem ol narafala man long saed blong speret. Be hem i mas lukaot gud long prapa tingting blong hem.—Proveb 4:23.
4 Sam man oli wantem tumas se ol narafala oli leftemap olgeta. Sam man oli wantem rulum narafala. Tufala tingting ya oli nogud olgeta. Oli olsem ol rus blong wan tri we oli rotin. Ating i luk olsem we tri ya i gud nomo. Be bambae hem i mas foldaon from we ol rus blong hem oli nogud. Long sem fasin, wan Kristin i save foldaon long wan trap. Yes, sipos hem i wantem tumas kam elda blong kasem paoa mo haenem long kongregesen, ale tingting blong hem i rong. Tru, hem i no gat stret tingting blong mekem wok. (Proveb 16:18) Aposol Jon i talem se: “Mi mi raetem wan sotfala leta i go finis long ol Kristin man long ples blong yu. Be Diotrefes, hem i laekem tumas blong i lida blong olgeta [hem i wantem bos long olgeta samting, Phillips], nao hem i no save lesin long tok blong mifala. Oraet, be sipos mi kam, bambae mi talemaot long ol man blong jyos wanem fasin we hem i stap mekem, mo bambae mi talemaot ol gyaman toktok we hem i stap talem blong spolem mifala. Be rabis fasin blong hem i no finis long ples ya tu. Hem i no save tekem ol brata ya blong yumi oli kam long haos blong hem, be antap bakegen, i stap blokem olgeta we oli wantem tekem ol brata ya oli go long haos, mo i stap ronem olgeta oli goaot long jyos.” (3 Jon 9, 10) Fasin ya blong Diotrefes i no Kristin. Hem i flas tumas mo hem i wantem rulum ol narafala. Ol tru disaepol blong Jisas oli no mas soemaot tufala fasin ya.—Proveb 21:4.
5. ?Ol elda oli mas soemaot wanem kaen tingting taem oli mekem wok blong ol long kongregesen?
5 Ol Kristin elda we oli mekem wok blong ol wetem wan gudfala tingting, oli no wantem kasem wan haeples. Ol elda oli gat wan gudfala wok blong mekem. Wok ya i kam long God, taswe oli mas lukaot gud long ol sipsip blong hem. ‘I nogud oli mekem wok ya we tingting blong olgeta i no glad. Mo i nogud oli mekem blong kasem pei long hem. Oli mas mekem from we tingting blong olgeta i glad long hem. Bambae oli no kam olsem bigfala masta blong olgeta ya we God i putum olgeta long han blong ol. Oli mas soemaot ol stret fasin long ol man blong olgeta blong oli save folem, olsem we ol sipsip oli folem man blong lukaot long olgeta.’ (1 Pita 5:2, 3) Tru, ol elda oli no mas kam flas mo oli no mas strong tumas taem oli lidim narafala.
6. ?From wanem wan elda i no mas kam olsem bigfala masta long ol narafala man blong God?
6 Wan elda i no mas kam olsem bigfala masta blong ol narafala Kristin from we hem i man blong wok wetem olgeta. Hem i no ‘masta blong bilif blong olgeta.’ (2 Korin 1:24, NW) Bifo, sam aposol oli wantem haenem. Nao, Jisas i talem long olgeta, i se: “Sipos wan long yufala i wantem kam we i haeman blong yufala, hem i mas kam olsem man blong wok blong yufala. Mo sipos wan man i wantem kam lida blong yufala, hem i mas kam olsem slef nomo blong yufala. Bambae i mas olsem we mi mi mekem. Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli gofri.” (Matyu 20:20-28) Wan elda i no Nambawan Man blong Lukaot long Sipsip, be hem i namba tu nomo. Sipos hem i kam olsem bigfala masta long ol sipsip, hem i soemaot se hem i flas. Sipos hem i wantem kasem haeples, mo hem i pulum ol narafala Kristin blong oli sapotem hem, bigfala trabol i save kamaot. Wan proveb i talem se: “Wan man we i gat flas tingting, hemia wan samting we Jeova i no laekem nating. Wan han i save joen long narafala han. Be bambae man i no save ronwe long panis blong hem.”—Proveb 16:5.
7, 8. (a) ?From wanem ol elda oli mas gat tingting daon? (b) Tokbaot eksampel blong wan elda we i soemaot tingting daon.
7 Ol Kristin elda oli mas ‘putum olgeta i stap daon, aninit long han blong God ya we i gat bigfala paoa.’ Taem wan man i flas, hem i no save givhan long saed blong speret. Tru ya, God i wantem se ol man ya nomo we oli gat tingting daon oli mekem wok blong hem. “God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.” (1 Pita 5:5, 6) Yes, Jeova i blesem ol man we oli gat tingting daon. Ol man ya nomo, sipos oli naf, oli save mekem wok blong Kristin elda.
8 Long taem blong yumi, histri blong ol Wetnes blong Jeova i tokbaot plante gudfala man we oli mekem wok long kongregesen wetem tingting daon. Yumi save tokbaot eksampel blong W. J. Thorn we i seket elda bifo, mo i wok plante yia long Betel. Man ya i kaen tumas. Wan Kristin woman i tokbaot hem olsemia, i se: “Bambae mi neva, neva fogetem wan tok we Brata Thorn i talem long mi. Tok ya i halpem mi kasem tede. Hem i talem se: ‘Samtaem, mi stat blong ting se mi mi wan gudfala man, nao mi tinghae long mi. Be kwiktaem, mi stap tingtinggud mo mi askem long mi wan, mi se: “!E! Yu yu wan smosmol das nomo. ?Yu yu flas from wanem?” ’ ” !Hemia nao wan gudfala tingting! !I gud ol elda mo ol narafala Kristin oli soemaot tingting ya! Tru, “sipos wan man i gat tingting daon mo hem i fraetgud long Jeova, bambae hem i kasem frut. Yes, bambae hem i kam rij, hem i kasem haenem mo laef.”—Proveb 22:4.
Tingting Blong Mekem Wok Ya i Kam Long God
9. ?From wanem yumi save talem se God i givim tingting long ol man blong hem blong oli wantem mekem wok blong elda?
9 ?Olsem wanem? ?God i givim tingting long ol man blong hem blong oli wantem mekem wok long kongregesen olsem elda? !Yes! Tabu speret blong Jeova i halpem olgeta blong oli kam strong mo oli gat paoa we oli nidim blong mekem wok ya. Hemia nao wan eksampel: Bifo, ol man oli ronem ol man blong Jisas from we oli prij. Ale, olgeta oli prea long God blong hem i givim paoa long olgeta, blong oli strong blong prij. ?Wanem i hapen nao? “Taem oli prea finis, haos ya we oli stap long hem, i seksek. Nao Tabu Speret i kam fulap long olgeta, nao oli stat talemaot tok blong God, we tingting blong olgeta i strong.” (Ol Wok 4:27-31) Tru ya, tabu speret i rili mekem olgeta oli strong. Sem mak tede, hem i save pulum wan man blong hem i wantem kam elda.
10. (a) ?Wanem samting i save blokem wan Kristin, nao hem i no wantem kam elda? (b) ?Sipos God i givim wan wok long yumi, bambae yumi mas luksave wanem samting?
10 Ating wan brata i strong long speret, be hem i no wantem kam elda. ?Wanem samting i blokem hem? Nating we hem i gat ol gudfala fasin blong speret, be maet hem i ting se hem i no naf. (1 Korin 2:14, 15) I tru, yumi no mas tinghae long yumi, i bitim mak. Yumi mas savegud wanem yumi naf blong mekem, mo wanem yumi no naf blong mekem. Olsem ya nao, yumi no save bitim mak. (Maeka 6:8) Yes, yumi no mas flas, mo yumi no mas ting se yumi nomo i naf blong mekem wan wok long kongregesen. Mo tu, i gud yumi stap tingbaot se “waes i stap wetem ol man we oli gat tingting daon.” (Proveb 11:2) Ol samting ya oli tru. Be yumi mas luksave tu se sipos God i givim wan wok long yumi, bambae hem i givim paoa we yumi nidim blong mekem wok ya. Hemia nao from wanem Pol i talem se: “Mi save mekem evri samting, long paoa blong Kraes ya we i stap mekem mi mi strong.”—Filipae 4:13.
11. Maet wan Kristin man i no wantem mekem wok long kongregesen from we hem i ting se hem i no waes inaf, i no save givim advaes. ?Kristin ya i save mekem wanem?
11 Ating wan Kristin i no wantem mekem wok blong elda from we hem i ting se hem i no waes inaf, i no save givim advaes. Sipos i olsem, hem i mas stadi moa Tok blong God blong kam moa waes. Mo tu, hem i save prea long God blong hem i givim waes long hem. Jemes i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem. From we fasin blong God, hem i no save tok nogud long man we i askem samting long hem, hem i stap givim presen long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf, from we man we tingting blong hem i hafhaf, hem i olsem solwora nomo. Taem win i blu, solwora bambae i save go olbaot, olsem we win i pusum. Man we tingting blong hem i hafhaf olsem, we oltaem hem i stap tingbaot blong go long tu rod, i nogud hem i ting se bambae i save kasem sam samting long Masta blong yumi.” (Jemes 1:5-8) Bifo, God i ansa long prea blong Solomon, nao hem i givim “waes mo fasin blong tingtinggud” long hem. Taem hem i jajem ol man, samting ya i halpem hem blong save wanem i gud mo wanem i nogud. (1 King 3:9-14) I tru, olgeta man oli no olsem Solomon. Be sipos ol man we oli gat wok long kongregesen oli stadi gud Tok blong God, mo sipos God i givhan long olgeta, ale bambae oli naf blong givim stret advaes long ol narafala. “Jeova hem wan i givim waes. Save mo fasin blong luksave, oli kamaot long maot blong hem.”—Proveb 2:6.
12. Ating wan Kristin man i fraet blong mekem wok blong elda. ?Wanem samting i save halpem hem?
12 Ating wan man i no wantem kam elda from we hem i fraet long sam samting. Hem i save ting se hem i no naf blong karem ol hevi responsabiliti we wan elda i mas karem. Pol hem wan i talem se: “Oltaem mi harem olsem wan samting we i hevi long mi, from we evri dei mi stap tingting tumas long ol memba blong jyos long olgeta ples.” (2 Korin 11:28) Be taem aposol Pol i wari olsem ya, hem i save wanem samting hem i mas mekem. Hem i talem se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” (Filipae 4:6, 7) Tru ya, sipos yu prea long God mo sipos yu trastem hem, ale tufala samting ya oli save halpem yu blong yu no moa wari tumas.
13. ?Sipos wan man i fraet blong mekem wok blong elda, hem i save talem wanem prea?
13 Sipos wan brata i fraet yet, nao hem i no wantem kam elda long kongregesen, hem i save mekem sem prea we Deved i mekem bifo. Hem i talem se: “God, plis yu luklukgud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem. Sipos i gat sam samting nogud long laef blong mi, plis yu traem faenemaot, nao yu lidim mi long rod ya we i no save lus.” (Ol Sam 139:23, 24) Ating yumi gat plante ‘samting we yumi stap tingting long hem,’ be God i save halpem yumi blong winim olgeta, nao yumi save gohed gud long speret. (Lukluk The New International Version.) Wan narafala Sam i tokbaot samting ya, hem i talem se: “Hae God, taem mi talem se ‘!Mi mi glis! !Mi foldaon!,’ be yu yu holem mi mi stap gud, from we oltaem yu yu laekem mi tumas. Taem we mi mi wari, mi stap tingting tumas, oltaem yu yu mekem tingting blong mi i kamgud bakegen, yu stap mekem mi mi glad.”—Ol Sam 94:18, 19.
Yumi Glad Blong Mekem Wok Blong Jeova Olsem Hem i Wantem
14. ?From wanem wan man we i no wantem gat wan wok long kongregesen, hem i mas prea blong kasem tabu speret blong God?
14 Olsem yumi luk finis, samtaem wan Kristin i no traem kam elda from we hem i fraet long wan samting, hem i ting se hem i no naf no hem i no rili wantem mekem wok ya. Sipos i olsem, i gud we hem i prea long God blong hem i givim tabu speret long hem. Jisas i talem se: “Yufala i man nogud, be yufala i save givim ol gudgudfala presen long ol pikinini blong yufala. Be Papa blong yufala long heven, hem i save go moa olgeta blong givim Tabu Speret long olgeta we oli askem long hem.” (Luk 11:13) Pis mo fasin blong bos long tingting oli frut blong tabu speret blong God. From samting ya, speret ya i save halpem yumi blong yumi no moa wari mo blong yumi no moa ting se yumi no naf long wok ya.—Galesia 5:22, 23.
15. ?Wanem kaen prea i save halpem ol man we oli no wantem mekem wok long kongregesen?
15 ?Olsem wanem nao sipos wan man i no rili wantem mekem wok ya? Yumi baptaes finis, yes, yumi Kristin, taswe yumi mas prea long God blong hem i pulum yumi, blong yumi mekem ol samting we hem i harem gud long ol. Deved i talem se: “Jeova, plis, yu mekem mi mi save ol prapa rod blong yu, . . . Plis, yu mekem mi mi wokbaot long trutok blong yu mo yu tijim mi.” (Ol Sam 25:4, 5, NW) Ol prea olsemia oli save halpem yumi blong yumi no wokbaot long nogud rod. Sipos yumi no wantem tumas mekem wok blong elda long kongregesen, yumi save prea long God olsemia. Yumi save askem long Jeova blong hem i mekem yumi wantem wok long kongregesen. Tru ya, yumi mas prea blong kasem tabu speret blong God mo yumi mas letem hem i lidim yumi. Sipos yumi mekem olsem, taem bambae ol elda oli askem long yumi blong mekem wok long kongregesen, bambae yumi agri. Yes, ol man blong God oli no wantem blokem speret blong hem.—Efesas 4:30.
16. ?Wanem tingting i save pulum wan man, blong hem i wantem tumas mekem wok long kongregesen?
16 Yumi “kasem tingting blong Kraes finis.” Taswe, yumi glad blong mekem wok blong God. (1 Korin 2:16) Jisas i gat sem tingting olsem Deved, we i talem se: “God blong mi, mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Ol Sam 40:8) Kraes tu i talem se: “God, mi mi stap rere. Mi kam blong mekem ol samting ya we yu yu wantem.” Mo hem i mekem wok blong God gogo kasem we hem i ded long pos. (Hibrus 10:9, 10) Taem wan man i wantem traehad long wok blong Jeova, tingting ya i save pulum hem strong blong mekem wan spesel wok long kongregesen.
Yumi Luk i Go Long Fyuja
17. (a) Sam Kristin brata oli no moa save wok strong olsem bifo long kongregesen from wan trabol. ?From wanem tingting blong olgeta i no mas kam slak? (b) ?Wanem wok i gudfala moa, i bitim ol narafala wok?
17 Ating sam Kristin we oli karem wok long kongregesen oli kasem trabol long bodi blong olgeta, no oli kasem sam narafala trabol. From samting ya, oli mas livim wok ya. Be oli no mas kam slak, tingting blong olgeta i no mas foldaon. Plante stret man we oli wok strong bifo, oli no moa save wok olsem tede. Be ol man ya oli gohed blong mekem ol samting we God i askem long ol, oli obei oltaem long hem. (Ol Sam 25:21) Tru, ol elda we oli gat tingting daon, mo oli mekem wok long kongregesen long plante yia finis, oli gat plante ekspiryens. From samting ya, oli save stap wetem ol narafala elda blong halpem ol brata sista. Sam elda oli save kam sik, no oli kam olfala. Be samting ya i no min se oli mas lego wok blong ol. I gud sipos olgeta Wetnes blong Jeova oli laekem mekem wok ya we i gudfala moa, i bitim ol narafala wok. Hemia wok blong ‘tokbaot mo leftemap rul blong Jeova’ mo nem blong hem.—Ol Sam 145:10-13, NW.
18. (a) ?Sipos wan Kristin i no moa elda, no hem i no moa man blong givhan, hem i save mekem wanem? (b) ?Wan man we i no moa elda i mas soemaot wanem gudfala tingting?
18 ?Olsem wanem sipos bifo yu yu elda no man blong givhan, be naoia yu no moa mekem wok ya? Yu mas bilif strong se God i stil intres long yu, mo ating bambae yu sapraes blong kasem sam wok long fyuja bakegen. (1 Pita 5:6, 7) Sipos yu mas jenisim sam fasin blong yu we oli no stret, yu mas rere blong luksave ol mastik blong yu, mo bambae God i givhan long yu blong kam moa gud. I gat sam Kristin we oli elda bifo, nao ol brata oli tekemaot wok ya long olgeta. Biaen, oli no traem kamgud bakegen, be oli gohed long nogud fasin blong ol. Sam oli no moa prij, mo sam narafala oli lego trutok. Fasin ya i no waes. !I moa gud sipos oli bin folem eksampel blong sam narafala Kristin we oli kasem trabol ya, be oli soemaot gudfala tingting! Yumi save tokbaot eksampel blong wan elda we i mekem wok ya long plante yia long Sentrol Amerika. Biaen, ol man oli tekemaot wok ya long hem. Long taem ya, hem i talem se: “Mi mekem wok blong elda longtaem finis. Naoia, mi harem nogud tumas from we mi no moa save mekem wok ya. Be bambae mi wantem wok had blong mekem olgeta samting we ol brata oli askem long mi blong mekem. Bambae mi wok strong blong kam elda bakegen.” Samtaem biaen, brata ya i mekem wok blong elda bakegen.
19. ?Wanem advaes oli save halpem olgeta Kristin we oli no moa elda no man blong givhan?
19 Ating yu no moa wan elda no wan man blong givhan. Be wan samting: Tingting blong yu i mas stap daon. Tingting blong yu i no mas kam konkon. Tru, sipos tingting blong yu i konkon, bambae yu no save mekem wok ya bakegen. Yu mas fasgud long God, nao bambae ol man oli save respektem yu. Yes, tingting blong yu i no mas foldaon, be yu mas tingtinggud blong luk olsem wanem Jeova i stap blesem wok we yu mekem taem yu prij, mo olsem wanem Jeova i blesem famle blong yu. Yu save halpem famle blong yu blong hem i kam moa strong long speret, yu save visitim ol sikman, mo halpem olgeta we oli slak long trutok. Antap bakegen, oltaem yu mas leftemap nem blong God mo yu mas talemaot gud nyus from we yu yu wan Wetnes blong Jeova. Yu no mas lego wok ya, be yu mas laekem hem.—Ol Sam 145:1, 2; Aesea 43:10-12.
20. ?Olsem wanem ol elda oli save halpem wan Kristin we i no moa elda no man blong givhan?
20 Ol elda oli mas savegud se wan Kristin we i no moa elda no man blong givhan, hem i save harem nogud tumas. Tingting blong hem i save foldaon olsem, nating se hem nomo i tekem disisin blong lego wok ya. Taem ol elda oli no putumaot brata ya long kongregesen, mo oli luksave se tingting blong hem i foldaon, ?oli save mekem wanem blong givhan long hem? Oli mas soemaot lav long hem, oli mas halpem hem long saed blong speret. (1 Tesalonaeka 5:14) Oli mas halpem hem blong hem i luksave se kongregesen i nidim hem. Ating ol elda oli givim advaes long hem, oli stretem hem. Be samting ya i no min se oli mas wet longtaem bifo we oli askem long hem blong kam wan elda no man blong givhan bakegen. No gat. Sipos man ya i gat tingting daon mo hem i gat fasin tangkyu long ol advaes blong ol brata, nao hem i folem olgeta, ale kwiktaem bambae hem i save tekem wok ya bakegen.
21. ?Long Baebol, wanem man oli wet bifo we God i givim wok long olgeta? ?Mo tede, ol man we oli wantem mekem wan wok long kongregesen oli save folem wanem advaes?
21 Ating yu wantem mekem wan wok long kongregesen, be yu mas wet longtaem lelebet bifo we yu save mekem wok ya. Yu no mas harem nogud from. Moses i bin wet 40 yia bifo we God i talem long hem se hem i mas lidim ol man Isrel oli aot long Ijip. (Ol Wok 7:23-36) Josua i bin wok kolosap long Moses blong halpem hem, mo longtaem biaen hem i stat blong lidim ol man Isrel. (Eksodas 33:11; Namba 27:15-23) Bifo we Deved i rulum Isrel olsem king, hem i wet tu. (2 Samuel 2:7; 5:3) I luk olsem we samtaem ol brata oli mas stretem Pita mo Jon Mak. (Matyu 26:69-75; Jon 21:15-19; Ol Wok 13:13; 15:36-41; Kolosi 4:10) Ating yu no stap mekem wan wok yet long kongregesen. Maet Jeova i mekem olsem from we hem i wantem trenem yu fastaem, blong yu save kam moa gud long sam fasin mo tingting blong yu. Be wan samting. Yu mas askem long God blong hem i givhan long yu, mo long semtaem yu mas wantem tumas mekem wan wok long kongregesen. Ating bambae hem i blesem yu, nao yu save mekem sam moa wok. Be fastaem yu mas wok had blong kasem ol mak long saed blong speret, blong bambae yu karem responsabiliti insaed long kongregesen. Mo tu, yu mas soemaot se yu gat sem tingting olsem Deved we i talem se: “Oltaem bambae mi mi presem [Jeova]. Nem blong hem i tabu, mo i gud olgeta samting we hem i mekem oli stap presem hem oltaem, gogo i no save finis.”—Ol Sam 145:21.
?Bambae Yu Yu Ansa Olsem Wanem?
◻ ?Ol Kristin elda oli mas lukaot gud long wanem denja?
◻ Sam Kristin brata oli fraet no oli ting se oli no naf blong kam elda. ?Be wanem samting i save halpem olgeta blong oli wantem mekem wok ya?
◻ ?Wanem samting i save pulum wan man blong hem i wantem mekem wok long kongregesen?
◻ ?Ol Kristin we oli no moa elda no man blong givhan, oli mas tingbaot fyuja olsem wanem?
[Tok Blong Pija Long Pej 23]
W. J. Thorn i wan elda we i soemaot tingting daon. Hem i wan eksampel blong yumi
[Tok Blong Pija Long Pej 25]
?Yu yu wantem traehad tumas long wok blong Jeova, olsem Jisas i mekem bifo?