!Yu Save Faenem Samting We i Moa Gud Bitim Gol!
OL TRUTOK blong Baebol oli kolosap sem mak long gol, selva, no ol narafala gudgudfala samting we oli haed long graon. Maet yu yu neva lukaot gol no selva. Be yu yu save se wok ya i had, mo man i mas gat strong tingting blong gohed, gogo hem i faenem ol sas samting we hem i stap lukaot. Be plante taem ol man we oli lukaot ol sas samting oli traehad bigwan, be oli no faenem. Ale, tingting blong olgeta i kam slak.
Be sipos yumi stap lukaot oltaem ol gudfala samting we oli haed long Baebol, neva tingting blong yumi bambae i kam slak. Baebol i mekem gudfala promes ya long yumi, i se: “Sipos yu yu gohed blong lukaot samting ya olsem we man i lukaot selva, mo sipos yu gohed blong traem faenem hem olsem we man i traem faenem ol gudgudfala samting we oli haed, ale bambae yu yu kasem save long fasin fraet long Jeova mo bambae yu yu faenemaot save blong God.” (Proveb 2:4, 5) Be, blong kasem mak ya, yumi mas lukaot.
‘Yu Go Ridim Baebol Bakegen Mo Yu Luk’
Long faswan handred yia, ol man Jyu we oli Farisi oli givim wan advaes long Nikodimas, we hem tu i man Farisi. Oli talem long hem se: “Yu go ridim Baebol bakegen. Bambae yu tu yu luk we profet i no save kamaot long Galili.” Advaes ya i gud nomo. Yes, i gud yumi ridim Baebol bakegen mo yumi luk, blong yumi save faenem trutok. Mo trutok i moa gud bitim gol.
Be long taem ya, olgeta oli givim advaes blong ‘go ridim Baebol bakegen mo blong luk,’ be oli no mekem olsem. ?From wanem?
Ol lida blong jyos mo ol man Farisi oli sanem sam man blong olgeta oli go holem Jisas Kraes. Be taem ol man ya oli lesin long Jisas we i stap tijim ol man, oli sapraes tumas. Ale, oli kambak, be oli no holem Jisas. Ol man Farisi oli askem long olgeta se: “?Weswe? ?Hem i gyaman long yufala tu?” Nao Nikodimas i tok long olgeta, i se: “?Olsem wanem? ?I stret long Loa blong yumi blong yumi jajem man, we yumi no harem hem fastaem, mo yumi no faenemaot stret fastaem wanem samting hem i stap mekem?” From tok ya we hem i talemaot, Nikodimas i kasem advaes ya, ‘yu go ridim Baebol bakegen mo yu luk.’—Jon 7:32, 45-52.
?From wanem ol pris mo ol man Farisi, oli no folem advaes we oli givim long Nikodimas? Olgeta oli save se Jisas i kam bigman long Galili. Be oli no save, no oli no wantem luksave se hem i bon long Betlehem. Be profet Maeka i bin talem se: “Man ya we i mas kam jif long Isrel, bambae hem i kamaot long yu [Betlehem] mo i kam long mi.” (Maeka 5:2) Ol man ya oli gat haeples, be oli no ridimgud Baebol mo oli no luk ol pruf we oli soemaot se Jisas i wan profet, we bambae i kam jif long Isrel. Plante trabol oli kamaot from fasin ya blong olgeta. Yes, i impoten tumas blong lukaot mo faenem olgeta trutok blong Baebol. ?Be olsem wanem ol man oli stap tingbaot trutok?
Oli Jenisim Trutok
Wan man we i raetem buk samwe long yia 1850 i talem se: “Trutok i olsem tru gol. Taem tufala samting ya i klin tumas, ol man oli no laekem blong yusum olgeta. Oli no wantem we trutok i jenisim ol fasin blong olgeta, taswe oli faenem i moa isi blong jenisim trutok.” !Ol tok ya oli stret gud long saed blong ol jyos! Devel Setan, “stampa blong ol gyaman toktok,” i bos long wan wok blong jenisim ol trutok blong Baebol. (Jon 8:44; Revelesen 12:9) Hem i yusum ol gyaman jyos blong jenisim ol tijing blong Baebol long sam kwestin, olsem: ?God hem i hu? ?Jisas hem i God, no no gat? ?Bambae wanem i hapen long wol ya mo long ol man?
Ol pris mo ol man Farisi oli gat jans blong lukaot mo faenem trutok. Oli save faenem ol sas samting we oli moa gud bitim gol. Yes, oli save faenem trutok long saed blong Jisas sipos ‘oli lesin long hem mo oli save wanem samting hem i stap mekem,’ olsem we Nikodimas i bin talem long olgeta. Sipos oli mekem olsem wetem ful hat blong olgeta, bambae Jisas i talemaot trutok long olgeta, olsem hem i mekem long ol disaepol blong hem. (Mak 4:34) ?Be weples yumi save faenem trutok we i klin tede? ?Yumi gat rod blong kasem save long olgeta trutok, no no gat?
[Tok Blong Pija Long Pej 4]
Sipos oli bin ‘lesin long hem,’ ol lida blong jyos oli save lanem evri trutok long saed blong Jisas