Jeova i Givim Paoa Long Mi

STORE BLONG EKUMBA OKOKA

MI MI bon long Sentrol Afrika. Papa mama blong mi oli “Kristin” mo taem mi gruap, oli tijim mi long lav blong God. Long taem ya, papa blong mi i no wan pris, be i wan prija yet. Hem i strong long wok ya. Plante taem, mi mi go wetem hem taem hem i go tijim ol man long skul, mo taem hem i go prea long ol haos. Ol man oli luk mi olsem wan yang boe we i fasgud long God. Taswe, sam narafala prija oli jusum mi blong mi stap kolosap long pris taem hem i mekem Lames. Oli talem tu se bambae mi save kam wan pris.

Be long semtaem, long naet mi mi go singsing mo danis long wan string band, nem blong hem Matumba-Ngomo. Plante man oli kam luk mi. Mi folem ol nogud fasin blong ol yang boe mo mi mekem ol rabis fasin wetem ol yang gel we oli stap long ples blong mi. Be long semtaem, mi stap wet long taem ya we bambae mi mi save gat wan woman nomo mo mi mi save go stap long heven wetem “ol tabu man.” Mi no ting se mi mas klinim laef blong mi from we tijing blong Katolik skul i talem se God i fogivim ol sin blong mi taem mi go talemaot olgeta long pris long Sarede naet.

Trabol i Stat Kam

Long 1969, taem mi mi stadi yet long haeskul, mi mi stat harem i soa long ol joen blong mi. Mi mi no save from wanem mi mi harem i soa olsem, be taem ol manis oli pas, mi mi harem i soa moa. Nating se mifala i Katolik, be ol papa mama blong mi oli tekem mi blong go luk defren kaen kleva. Olgeta ya oli talem se wan man i mekem posen long mi, be sipos oli prea long mi mo oli givim sam meresin long mi, bambae mi mi save kamgud bakegen. Nating se oli mekem olsem, be mi mi stat wokbaot nogud long wan leg. Mo long 1970, kolosap mi no moa save wokbaot, nating se mi mi yusum wan stik. Long taem ya nao, mi mi stat tingbaot se bambae mi mi no moa save wokbaot nating.

Long Febuwari 1972, papa blong mi i karem mi mi go long haospetal blong Wembo Nyama. Mi mi stap longtaem long haospetal ya. !Taswe, ol man oli singaot mi Masta blong haospetal ya! Ol man oli kam long haospetal blong winim sik blong olgeta. Nao biaen, oli kamgud bakegen mo oli livim haospetal. Samtaem biaen, oli kambak wetem wan narafala sik, be mi mi stap yet long haospetal. Papa blong mi i gohom from we taem i kam blong tekem raes long garen. Be long taem ya nao, mi mi mared finis mo mi gat tu pikinini. Taswe woman blong mi we i gat 21 yia blong hem, i lukaot long mi mo i wok blong bambae mifala i save gat ol samting we mifala i nidim.

Be ol samting ya oli mekem tingting blong mi i sik. Mi gat 24 yia, be bodi blong mi i stap kam nogud moa. Mi luk we ol fren blong mi oli gat wan wok nao oli gat wan gudfala laef. Taswe mi ting se i moa gud we mi kilim mi bakegen. Olsem nao, mi stat blong seremaot ol samting we mi gat long ol pikinini blong mi mo long ol brata blong mi. Mi no talem long olgeta wanem samting mi wantem mekem. Mi mi no holem wan samting blong mi nating, mi mi holem wan sot nomo we mi mi laekem from we mi mi wantem se ol man oli berem mi wetem hem.

Wan Nyufala Laef i Stat

Long taem ya nao, wan Wetnes blong Jeova i kam slip long bed kolosap long bed blong mi. Man ya i blaen wansaed, mo kolosap hem i no moa save luk long narafala ae blong hem. Be kwiktaem, hem i stat storebaot Jeova mo Kingdom wetem Baebol. Sam dei biaen, hem i livim haospetal. Be hem i askem long ol Wetnes we oli kam visitim hem, se oli kam luk mi. Mifala i toktok plante taem tugeta, be biaen oli gobak tu. Wan long olgeta i raetem leta i kam blong stadi Baebol wetem mi. Hem i givim sam buk long mi we oli tokbaot Baebol, nao mi mi harem gud blong ridim olgeta.

Olsem nao, mi mi kasem ol gudfala kakae long saed blong speret, mo mi mi stat blong harem gud bakegen. Nao mi harem olsem we skul blong mi i givim samting we i “konkon” nomo blong mi mi dring long hem. Be naoia mi harem se mi kasem wora blong laef we i fri nomo. Mi tangkyu long Jeova long hat blong mi from we hem i mekem mi kam fri long ol kastom store olsem Triniti, sol we i no save ded, fraet blong man, mo wosip blong ol bubu.

Long taem ya nao, mi mi wantem livim haospetal. Be mi harem nyus we tu fultaem minista bambae oli kam long Wembo Nyama blong prij. Taswe mi ting se i gud we mi stap long haospetal gogo oli kam. !Mi mi harem gud tumas taem oli kam faenem mi long haospetal! Nao mi mi save gohed blong stadi Baebol wetem wan man. Mi no moa stadi wetem ol leta.

Mi bin ridim long wan magasin se ol Wetnes blong Jeova oli mekem miting long Haos-Kingdom blong olgeta. Taswe, sam dei biaen mi askem long olgeta sipos mi mi save go long wan miting olsem. Wetem kaen fasin, oli ansa se oli mekem ol miting blong olgeta long wan haos blong tufala we oli wokem long natanggura. Oli talem se bambae oli glad tumas blong karem mi mi go longwe wetem baskel. Nating se mi harem i soa long bak blong mi, mo long olgeta joen long mi, be mi mi glad blong go long olgeta miting. Ol fasin blong mi oli kam gud, nao long Epril 1974, mi mi go prij. Mi mi no baptaes yet, be mi mi kam wan pablisa we i mekem wan ripot evri manis.

Tri manis biaen, mi mi givim laef blong mi i go long Jeova, nao mi tekem baptaes. Mi mi prij long olgeta nas mo olgeta dokta long haospetal, long ol sikman, long ol Protestan misinari we oli kam visitim ol sikman. Mo tu, nating se ol memba blong famle blong mi oli agensem mi tumas, be mi mi givim wetnes long olgeta. Long taem ya, mi mi givim wetnes taem mi mi stap ledaon long bed blong mi, mo taem mi mi sidaon long wiljea we haospetal i givim long mi, gogo kasem mi save pem prapawan blong mi.

Mifala i Stanap Strong, Nao Mifala i Kasem Frut

Nating se famle blong mi i agensem mifala bigwan, be mi gohed blong folem ol rod blong Jeova mo mi kasem plante blesing. Woman blong mi i joen long trutok, nao hem i tekem baptaes long 1975. Biaen, mifala i go stap long Katako-Kombe from we wan kongregesen i stap long ples ya finis. Ol papa mama blong mi oli wari from we sam man oli bin talem long olgeta se bambae olgeta Wetnes oli mas ded long 1975. Taem oli luk we mifala i no wantem lego bilif blong mifala, oli no moa sanem kakae long mifala. Nao mifala i no moa gat ol samting we mifala i nidim blong laef. Mi rimemba se wan dei, ae blong yang boe blong mi i kam dak from we hem i no kakae. Tru ya, trabol ya i hapen from we long wan dei haf, mifala i no kakae. Be biaen, ol Kristin brata oli karem fis mo kakae long mifala. Biaen, ol papa mama blong mi oli stat halpem mifala bakegen, be ol Kristin brata blong mifala oli neva stop blong givim ol kakae we mifala i nidim.

Long Febuwari 1975, raethan blong mi i no moa save muf. Nao han ya i stap kam nogud. Be, mi holemstrong bilif blong mi, tru ya, tingting blong mi i strong blong gohed blong mekem wok blong God wetem fasin glad. Biaen mi mi glad from we han blong mi i kam strong bakegen, mo kasem tede, mi save muvum hem. From samting ya, mi mi save openem Baebol mo ol buk blong Sosaete.

Tingting Blong Mi i Strong Long Fes Blong Ol Haeman

Long 1977, wan haeman blong polis i agensem mi long fes blong wan komiti we i lukaot long ol trabol long ples blong mifala. Komiti ya i jes holem wan spesel paenia blong wan kongregesen we i stap kolosap long kongregesen blong mi. Nao wan dei, wan soldia i kam long haos blong mi wetem wan pepa blong holem mi. Mi prea long God wetem famle blong mi, mo mi leftemap tingting blong olgeta man long kongregesen. Biaen, mi folem soldia ya. Speret blong Jeova i givhan long mi, nao tingting blong mi i strong blong save ansa long ol gyaman tok we oli putum long mi. Mi toktok longtaem wetem ol haeman blong gavman mo blong ami, gogo oli letem mi mi gofri wetem spesel paenia ya.

Sam manis biaen, wan narafala haeman blong polis i holem mi. Mo bakegen, Jeova i halpem mi, nao tingting blong mi i strong blong leftemap gud nyus wetem glad fasin. Mi mi toktok longtaem wetem man ya, mo taem mitufala i finis blong toktok tugeta, hem i letem mi mi gofri. Mo tu, hem wan i pusum wiljea blong mi afsaed long ofis blong hem. Nao biaen, hem i toktok smol nao i talem long mi, i se: “Yu kam long haos blong mi long sapa.” Mi go visitim hem plante taem, mo mi stat stadi Baebol wetem hem. Olsem nao, mi mi lidim seven Baebol stadi wetem sam haeman blong gavman. Bighaf blong olgeta oli go long ol miting blong kongregesen.

Wok Blong Spesel Paenia

Nating se mi mi sik, be mi mekem wan promes long Jeova blong mekem wok blong hem wetem olgeta paoa blong mi. Nao mi askem long Jeova blong hem i halpem mi. Ale, mi mi no fulumap pepa, be mi stat mekem wok blong haftaem paenia fastaem. Jeova i halpem mi, nao mi win. From samting ya, mi fulumap wan pepa blong save mekem wok ya long ol manis Jun go kasem Oktoba. Biaen, mi fulumap wan pepa blong kam fultaem paenia, mo Sosaete i agri. Mi statem wok ya long Novemba 1976. Long Septemba 1977, mi mi glad tumas taem mi mi kasem wan pepa blong Sosaete we i talem se mi save mekem wok blong spesel paenia long kongregesen blong Katako-Kombe.

?Olsem wanem mi mi save mekem wok ya? Mi mi go long teritori blong prij wetem wiljea blong mi. Gudfala waef blong mi i halpem mi wetem ol brata blong kongregesen. Samtaem, mi mi go prij mi wan nomo, nao mi holem tu stik blong save wokbaot. Wan no tu taem mi foldaon. ?Taem samting ya i hapen, mi mi mekem wanem? Mi mi wet nomo, mi mi no save muf long graon. Mi mi stap olsem gogo wan man i pas mo i halpem mi blong mi girap, nao hem i givimbak ol stik long mi. Oltaem mi mi rimemba strong tingting blong ol aposol mo disaepol blong Jisas bifo. (Ol Wok 14:​21, 22; Hibrus 10:​35-39) Evritaem we mi foldaon, mi mi prea long Jeova blong halpem mi, blong tingting blong mi i no foldaon. Mi prea long hem blong hem i givim paoa long mi nao mi save gohed blong mekem wok blong hem. Mi mi rimemba nambawan promes we i stap long profet tok blong Aesea we i talem se: “Bambae man we leg blong hem i nogud, i save klaem olsem dia.”​—⁠Aesea 35:⁠6.

Mi mi wok strong long wok blong prij, taswe mi mi naf blong winim ol trabol we mi gat long saed blong bodi. Long 1978, mi kasem wan nambawan blesing. Yes, mi mi save go long Kingdom Ministri Skul blong Lubumbashi. Blong go long ples ya, mi mi mas mekem wan trep blong kolosap 2,000 kilomita. Blong mekem trep ya, mi mi tekem kameong, sip, mo tren. Tru ya, taem mi mekem trep ya, Jeova i givim paoa long mi. (Aesea 12:2; 40:29) Tede, sipos mi mi livim ol stik blong mi mo mi hadwok tumas, mi mi save wokbaot long 100 mita long tufala leg blong mi nomo. Mi mi savegud se Jeova i lesin long prea we mi mekem long 1973 taem mi askem long hem blong hem i givim paoa long mi blong mi save mekem wok blong hem. Yes, hem i givim paoa long mi blong mi save kam strong blong mekem wok ya.

Wan Nyufala Teritori

Long 1984, afta we mi stap seven yia long kongregesen blong Katako-Kombe, Sosaete i sanem mi mi go long kongregesen blong Loja-Senta. Wan yia biaen, mifala i statem wan nyufala Buk Stadi we i stap long 11 kilomita longwe blong Loja-Senta. Mo i no longtaem biaen, mi mi statem wan narafala Buk Stadi we i stap long 32 kilomita longwe long faswan Buk Stadi. Laswan Buk Stadi ya i kam olsem wan grup we i save wok hem wan nomo. Mo biaen, long 1988, hem i kam wan kongregesen, mo long ples ya nao mi stap mekem wok olsem elda.

Wok blong paenia i mekem i gud long mi long saed blong speret mo long saed blong bodi. Taem mi mi go prij wetem ol stik blong mi, ale, mi mi trenemgud bodi blong mi olsem ol dokta oli talem long mi blong mekem. Tede, bodi blong mi i strong moa i bitim long taem ya we mi stat mekem wok blong paenia. Mo mi mi strong blong gohed blong mekem wok ya go kasem en. Mi mi wantem tumas blong luk taem ya we bambae Jeova i mekem mi mi “klaem olsem wan dia.” Mi wet long taem ya we bambae mi no moa save harem i soa from sik blong mi.

Wetem olgeta hat blong mi, mi mi tangkyu tumas long God blong heven from we hem i givim paoa long mi, hem i mekem tingting blong mi i strong, mo hem i mekem mi mi naf blong mekem fultaem wok blong hem. Tede, mi gat 36 yia blong mi, mo mi mekem wok blong fultaem paenia long 11 yia. Mi hop se bambae mi mi save gohed blong mekem olsem, nating se trabol i save hapen long mi. Tingting blong mi i strong blong yusum olgeta paoa blong mi blong givim ona long Hae God Jeova mo blong presem hem.