Stap Fulap Long Glad

“Ol disaepol oli stap fulap long glad mo tabu speret.”​—⁠OL WOK 13:⁠52, “NW.”

1. (a) ?Glad i wanem kaen frut? (b) ?Man i save presem God from wanem gudfala samting we hem i givim?

!GLAD! Taem Pol i tokbaot ol frut blong tabu speret, hem i talemaot Kristin fasin ya. Mo hem i putum wan fasin nomo i fastaem long hem, hemia fasin lav. (Galesia 5:​22-25) ?Wanem i mekem glad ya i kamaot? Hemia gud nyus ya. 1,900 yia finis enjel blong God i talemaot gud nyus ya long sam parakot man we oli man blong lukaot long sipsip. Hem i talem se: “Yufala i no fraet. Mi mi gat wan gud nyus blong talem long yufala, we i save mekem olgeta man oli harem gud tumas. Long naet ya nomo, long velej ya blong King Deved bifo, i gat wan pikinini i jes bon, we hem bambae i sevem yufala. . . . Hem i [Kraes ya, NW] we i Masta blong yumi.” Nao wantaem nomo, i gat fulap enjel blong heven oli kam joen wetem enjel ya, nao olgeta oli glad tumas, oli stap presem God se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i [soemaot gladhat long olgeta, NW].”​—⁠Luk 2:​10-14.

2, 3. (a) ?From wanem i stret nomo we God i sanem fasbon Pikinini blong hem blong sevem ol man? (b) ?Taem Jisas i stap long wol, hem i givhan blong mekem ol plan blong God oli kamtru long wanem narafala rod tu?

² Taem Jeova i mekem rod blong sevem ol man from Masta blong yumi, Kraes ya, hem i soemaot gladhat long olgeta. Fasbon Pikinini ya blong God, hem i nambawan eksampel blong trufala waes. Hem i tokbaot Papa blong hem, taem hem i wokem wol, i se: “Long taem ya, mi mi stap kolosap long hem. Oltaem mi stap wok wetem hem, nao evri dei mi kam fulap moa long glad, oltaem mi stap harem gud long fored blong hem. Mi harem gud long gudfala graon blong wol blong hem. Mo mi glad tumas long ol pikinini blong man.”​—⁠Proveb 8:​30, 31, Rotherham.

³ Taswe i stret nomo we Jeova i sanem Pikinini ya blong hem blong sevem man, from we Pikinini ya i glad tumas long ol pikinini blong man. ?Olsem wanem samting ya i save leftemap nem blong God mo givim ona long hem? Samting ya bambae i openem rod blong hem i save mekem bigfala plan blong hem i kamtru. Hemia plan ya blong fulumap wol wetem ol stret man we oli laekem kwaet fasin. (Jenesis 1:28) Mo tu, taem Pikinini ya, Jisas, bambae i stap long wol, nating we hem i kasem traem we i bigwan moa i bitim enikaen traem we man i save kasem, be bambae hem i soemaot se wan stret man i save stap tru mo obei long Jeova, we hem i Hae Rula mo Masta blong hem. From samting ya, hem i leftemap mo hem i ona long Papa blong hem, se hem i gat raet blong rul antap long ol samting we Hem i bin wokem. (Hibrus 4:​15; 5:​8, 9) Mo tu, from we Jisas i holemtaet bilif blong hem oltaem, hem i givim eksampel long ol trufala Kristin tede, nao oli save biaen long hem.​—⁠1 Pita 2:⁠21.

4. ?Wanem bigfala glad i kamaot from we Jisas i stanap strong gogo ded blong hem? ?Samting ya i mas pulum yumi olsem wanem?

⁴ Taem Jisas i stap mekem wok blong Papa blong hem, hem i harem i glad tumas. Mo hem i stap tingbaot glad we i bigfala moa, we bambae hem i kasem. Aposol Pol i tokbaot samting ya long Hibrus 12:​1, 2: “Yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas stap luk long Jisas we fasin ya blong bilif blong yumi i stap kamaot long hem nomo, i stat long stat blong hem gogo i kasem en blong hem. Taem hem i go blong i ded long [pos, NW], hem i no lego rod blong hem, no gat. Hem i luksave we bambae i save harem gud, nao from samting ya, hem i no moa tingbaot se [pos, NW] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i king, i stap sidaon long bigfala jea blong hem long heven.” ?Wanem glad ya? Hemia glad we Jisas i gat. Hem i glad blong leftemap nem blong Papa blong hem mo blong givim laef blong hem blong ol man oli save fri long ded. Be antap moa, hem i glad blong rul olsem King mo Hae Pris, blong givim laef we i no save finis long Paradaes long wol, long ol man we oli obei.​—⁠Matyu 6:9; 20:28; Hibrus 7:​23-26.

5. ?Hu ya “ol brata” blong Jisas? ?Bambae oli kasem wanem spesel glad wetem hem?

⁵ Yes, oltaem Pikinini blong God i kasem glad from ol samting we hem i mekem blong givhan long ol man. Hem i kasem glad taem hem i givhan long Papa blong hem blong jusumaot kampani blong ol man we oli holemtaet trufala bilif, we hem i stap singaotem olgeta se “ol brata” blong hem. Taem olgeta oli ded, bambae oli laef bakegen, oli go antap long heven. Olgeta bambae oli kasem wan spesel glad wetem Jisas. Olgeta oli “hapi mo tabu,” mo “bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.”​—⁠Hibrus 2:​11, NW; Revelesen 14:​1, 4; 20:⁠6.

6. (a) ?King ya i glad blong singaotem “ol narafala sipsip” blong hem, blong oli mekem wanem? (b) ?Wanem sam blesing we plante blong ol sipsip ya oli harem gud from tede?

⁶ Mo tu, King ya we i stap rul bambae hem i singaot wan bigfala kampani blong “ol narafala sipsip” blong oli kam long hem, nao hem i putum olgeta oli stap long raet saed blong hem. Hem i glad long olgeta, taswe hem i singaot long olgeta, i se: “Yufala i kam. Papa blong mi i blesem yufala finis. Yufala i kam tekem Kingdom ya we longtaem bifo hem i rere finis long yufala, long taem ya we wol i jes stat.” (Jon 10:16; Matyu 25:​34, NW) !Hemia i wan nambawan blesing we i karem bigfala glad! Olgeta we bambae oli kasem laef long wol aninit long rul blong Kingdom ya, naoia oli stap wok wanples wetem olgeta we God i makemaot olgeta wetem tabu speret, mo oli stap mekem plante impoten wok. Long wan profet tok, Jeova i talemaot samting ya finis, i se: “Ol strenja bambae oli stanap, mo bambae oli lidim yufala, olsem man blong lukaot long sipsip i stap lidim ol sipsip long hem. Mo ol strenja ya bambae oli wokem garen blong yufala, mo bambae oli lukaot gud long ol rop blong yufala we yufala i stap mekem waen long frut blong ol rop ya. Long saed blong yufala, bambae oli singaotem yufala se ol pris blong Jeova. Bambae oli save talem se yufala i olsem minista blong God blong yumi.” Olgeta ya oli joen wetem profet Aesea blong talem se: “Mi bambae mi harem gud tumas long Jeova. God blong mi bambae i mekem sol blong mi i glad tumas. From we hem i sevem mi, olsem we hem i kavremap mi wetem klos.”​—⁠Aesea 61:​5, 6, 10.

7. ?From wanem “dei ya” we i stat long 1914 i spesel tumas?

⁷ Naoia yumi stap laef long wan taem we i spesel tumas. Long 1914, Kraes i statem rul blong hem olsem King long heven. Sam 118:​24, 25 i tokbaot taem blong rul blong hem i se: “Dei ya, hem i dei we [Jeova, NW] i win long hem, i gud yumi glad, yumi mekem lafet. [Jeova], yu sevem mifala. Plis yu sevem mifala. [Jeova], plis yu mekem mifala i win.” Dei ya bambae i kasem mak blong hem fulwan, taem Jeova i kilimdaon ol skul we Babilon i stampa blong olgeta, mo hem i joenem ol 144,000 brata blong Kraes wetem King blong olgeta long heven, olsem we oli mared long hem. Bambae olgeta man blong God oli ‘harem gud tumas mo oli glad tumas’ long samting ya. Bambae oli harem gud tumas taem oli luk we Mesaea King blong olgeta i faet long Amageden blong sevem trufala nesen blong hem, nao i givim laef long olgeta long nyufala wol blong hem, we stret fasin nomo bambae i stap long hem. (Revelesen 19:​1-7, 11-16) ?Taem ol man blong Jeova oli stap talemaot gudfala mesej ya we ol man oli save glad long hem, Jeova i mekem se oli win? Ripot long ol nekis haf bambae i ansa long kwestin ya.

Wok Ya i Kam Bigwan Moa Long Olgeta Ples Long Wol

8. (a) ?Olsem wanem ripot we i stat long pej 26 go kasem pej 29 blong magasin ya i soemaot glad wetem tabu speret? (b) Storeyan long sam haf blong ripot ya we oli gud tumas.

⁸ Tede ol Wetnes blong Jeova oli ‘putum tingting blong olgeta i stap strong moa long God oltaem, from we tabu speret i stap givim paoa long olgeta.’ (Rom 15⁠:13) Ripot long pej 26 go kasem pej 29 blong magasin ya i soemaot samting ya. Hemia ripot blong 1990, long saed blong wok blong talemaot Kingdom long olgeta ples long wol. !Yumi harem gud tumas taem yumi luk we yumi kasem wan nyufala namba blong ol minista we oli talemaot gud nyus: 4,017,213! Hemia i 77 % antap long namba we yumi kasem ten yia bifo. Naoia wok blong hivimap ol sipsip i stap spid long 212 kantri blong wol. Namba blong ol man we oli tekem baptaes i kasem mak we i neva kasem long ol las 15 yia we i pas finis: 301,518. Long plante asembli, namba blong olgeta we oli tekem baptaes i antap olgeta. Samting ya i tru moa long ol asembli we ol Wetnes blong Is-Yurop oli go long olgeta. Ol ‘komunis’ oli stap talem se taem ol olfala oli ded, be wosip blong God tu bambae i ded. Be yumi luk se tok ya i no tru nating, from we plante blong olgeta we oli tekem baptaes, oli yangfala nomo.

9. (a) ?Trening we ol papa mama oli givim long pikinini taem oli smol nomo i stap karem wanem gudfala frut, we yumi glad tumas from? (b) ?Wanem ekspiryens we i kamaot long ples blong yufala, no long sam narafala ples, i soemaot samting ya?

⁹ Fulap yangfala oli stap harem tok blong Sam 32:​11, we i talem se: “Yufala we fasin blong yufala i stret, i gud yufala i glad, yufala i harem gud from ol samting ya we [Jeova, NW] i mekem. Yufala we i stap obei long hem, i gud yufala i singsingaot from we yufala i glad.” I luk olsem we plante papa mama oli harem advaes blong Baebol blong trenem ol pikinini blong olgeta ‘taem oli smol nomo.’ (2 Timote 3:15) Oli stap yusum ol buk mo kaset we ogenaesesen blong Jeova i givim blong trenem ol smosmol pikinini blong olgeta. Taem ol pikinini ya oli stat long skul, i no longtaem oli givim gudfala wetnes. Store ya blong wan smol gel Japan we hem i gat eit yia nomo i soemaot samting ya: “Mifala i spel long hot taem. Afta we spel blong mifala i finis, mi mi go long tija blong mi nao mi askem long hem se: ‘?Taem yu yu spel, yu go long gref blong papa blong yu?’ Hem i talem se: ‘Yes, taem papa blong mi i laef, hem i kaengud tumas long mi. Taswe, evri yia mi mi go long gref blong hem.’ Mi mi talem long hem se: ‘Sipos yu yu stadi Baebol mo yu folem ol loa blong God, bambae yu yu save luk kaengud papa blong yu bakegen, long Paradaes long wol ya.’ Afta, mi mi givim My Book Of Bible Stories long hem. Naoia, evri wik long dina, tija blong mifala i ridim wan japta blong buk ya long ol pikinini long klas.”

10. ?Buk ya Young People Ask, i mekem wanem gudfala wok? Talem sam eksampel.

¹⁰ Ol yangfala we oli gat 13 kasem 19 yia, olgeta tu oli stap yusumgud buk ya Questions Young People Ask​—⁠Answers That Work. Wanwan oli stap stadi long hem mo oli stap yusum buk ya blong prij long ol nara yangfala tu. Plante papa mama tu oli glad tumas long buk ya. Long Swiselan, wan sista we hem i haftaem paenia, hem i mekemap tingting blong hem blong visitim ol mama papa blong ol pikinini we oli skul wetem pikinini blong hem. Ale, hem i storeyan gud wetem plante papa mama. Mo hem i givimaot 20 buk (bighaf blong ol buk ya, se Young People Ask), mo 27 magasin. Long Trinidad, wan yangfala gel i givim buk ya long tija blong hem long skul. Nao mama blong hem i go moa, i givim 25 buk long ol 36 tija we oli wok long skul ya. Long nekis manis blong hem, hem i go luk wanwan papa mama we hem i save olgeta. Nao hem i givimaot 92 buk antap bakegen, mo hem i statem sam nyufala Baebol stadi. Long Korea wan tija long skul i yusum buk ya Young People Ask blong givim ol sot tok long ol kwestin olsem hemia: “?Olsem Wanem Mi Save Mekem Ol Mak Blong Mi Long Skul Oli Kam Antap Moa?” Mo “?Olsem Wanem Mi Save Joengud Wetem Tija Blong Mi?” Biaen, hem i soemaot buk long ol studen blong hem. Hem i seremaot 39 buk long olgeta, be biaen, sam papa mama oli tok nogud long hem from. Ale, hedtija blong skul i skelem ol toktok blong buk ya, nao hem i talem se i “nambawan.” Mo hem i odarem wan buk blong givim long gel blong hem.

Beswan Edukesen

11, 12. ?Wanem sam store we oli soemaot se ol buk blong Watch Tower Sosaete oli givim beswan edukesen?

¹¹ Plante man oli luksave se ol magasin blong yumi oli nambawan blong givim edukesen long man. Wan skul long Yunaeted Stet i odarem 1,200 kopi blong Awake! Julae 22, 1990 (hemia i tokbaot drag ya we oli kolem ‘krak’). Oli wantem yusum magasin ya blong tijim ol yangfala long skul. Mo tu, plante man oli laekem tumas gudfala fasin blong ol pikinini blong ol Wetnes blong Jeova long skul. Long Taelan, ol pikinini long wan klas oli stap mekem fulap noes. Nao tija i singaot Raja we hem i gat 11 yia, blong hem i stanap fored blong olgeta long klas. Nao tija ya i talem long hem se hem i gat gudfala fasin, i se: “?From wanem yufala evriwan i no folem eksampel blong boe ya? Hem i traehad long ol skul wok blong hem, mo hem i gat gudfala fasin tu.” Nao hem i go moa, i se: “Ating yufala i mas kam Wetnes blong Jeova olsem Raja blong mekem fasin blong yufala i kam gud moa.”​—⁠Skelem wetem Proveb 1:8; 23:​22, 23.

¹² Long Dominikan Ripablik, wan yangfala sista i raetem leta i se: “Taem mi mi gat fo yia nomo, mi mi rere blong finis long jyos skul blong go long bigfala skul. Long jyos skul ya mi lanem blong rid mo raet. Taem mi finis long ples ya mi givim wan presen long Katolik sista we hem i tija blong mi. Mi givim buk ya Yu Yu Save Harem Gud Blong Olwe Long Paradaes Long Wol. Mo mi raetemdaon wan tok we i talem se: ‘Mi mi tangkyu tumas long yu we yu tijim mi blong rid mo raet. Mi wantem se yu yu kasem save long bilif blong mi. Afta, yu save putum tingting blong yu i stap strong, olsem mi, long promes blong laef blong olwe long wol ya, taem hem i kam wan paradaes.’ From samting ya, oli sakemaot mi long skul ya. Eit yia biaen, mi mitim tija ya bakegen. Hem i storeyan long mi se nating we pris i mekem trabol long hem, be hem i ridim buk ya. Afta, hem i muf i go long wan bigfala taon, mo long ples ya, wan Wetnes i mekem Baebol-stadi long hem. Nao hem i rere blong tekem baptaes long ‘Klin Lanwis’ Distrik Asembli wetem mi.” Olsem profet tok i talem finis, waes i save kamaot long maot blong “ol smosmol pikinini” tu.​—⁠Matyu 21:16; Ol Sam 8:​1, 2.

13. ?Olsem wanem plante yangfala oli stap harem advaes blong Solomon? ?Olsem wanem ripot blong ol Wetnes long olgeta ples long wol i soemaot samting ya?

¹³ Solomon i givim advaes ya we i leftemap tingting blong ol yangfala se: “Yangfala, yu mas harem gud long yang taem blong yu. Mo yu mas letem hat blong yu i mekem i gud long yu long ol yia we yu yu yangfala yet. Mo yu mas wokbaot long ol rod we hat blong yu i lidim yu long olgeta.” (Eklesiastis 11:⁠9) Yumi glad tumas from we tede plante pikinini blong ol Wetnes blong Jeova oli harem ol tok ya. Long yang taem blong olgeta, oli tingrere blong yusum laef blong olgeta fulwan long wok blong Jeova. Taem oli finis long skul, oli jusum wok ya we i moa gud i bitim ol narafala wok long wol. Namba blong ol paenia i stap go antap kwiktaem. Long yia ya, i gat 821,108 paenia. !Sipos yumi joenem namba ya wetem ol 11,092 brata mo sista we oli stap wok long ol haos Betel, hemia 21 % blong olgeta pablisa long wol!

14. ?Ol sista blong yumi oli givhan olsem wanem? ?Mo i stret we yumi leftemap tingting blong olgeta from wanem wok blong olgeta?

¹⁴ Yumi save makem poen ya se long plante kantri, olsem Yunaeted Stet, samwe long 75 % long ol paenia oli sista. Samting ya i givim paoa long tok blong Ol Sam 68:​11, (NW) we i talem se: “Jeova hem wan i talem tok ya. Ol woman we oli stap talemaot gud nyus oli olsem wan bigfala ami.” Mifala i leftemap tingting blong ol sista blong yumi from we oli stap mekem bighaf blong ol wok blong prij. Oli gat gudhan blong tijim ol man long ol Baebol-stadi, mo from samting ya oli stap lidim plante man oli kam long trutok. Mo tu, mifala i presem ol sista we oli mared mo oli sapotem gud hasban blong olgeta we i stap mekem bigfala wok insaed long kongregesen.​—⁠Proveb 31:​10-12; Efesas 5:​21-25, 33.

Edukesen Long Baebol i Stap Gru Kwiktaem

15. (a) ?Long ripot blong ol wok blong ol Wetnes long olgeta ples long wol, olsem wanem sam kantri oli mekem nambawan wok long saed blong ol Baebol-stadi? (b) ?Yu yu save talem wanem ekspiryens, we i soemaot se ol Baebol-stadi oli save karem gudfala frut?

¹⁵ Wok blong tijim ol man long Baebol i stap kam antap kwiktaem naoia. Evri manis long olgeta ples long wol, i gat 3,624,091 Baebol-stadi oli stap gohed. Trutok blong Baebol i save jenisim fasin blong man, olsem ripot ya we i kamaot long Ostrelya i soemaot. Long fas haf blong Janewari long 1987, wan man i finisim 25 manis long kalabus long Ostrelya, from we hem i stil mo hem i mekem sam gyaman pepa blong kasem mane. Nao oli sanem hem i gobak long Nyusilan. Hem i bin yusum drag, mo 17 yia finis hem i bin salem drag. Long nekis yia blong hem, waef blong hem i stat blong stadi Baebol wetem ol Wetnes blong Jeova. Taem save blong hem i stap kam bigwan moa, man blong hem i luk we fasin blong hem i jenis bigwan. Hem i kam moa gud long wok blong waef mo long wok blong mama. Long Jun 1989, waef blong hem i pulum hem blong kam long wan seket asembli. Nao hem i agri blong mekem Baebol-stadi long haos, mo i no longtaem hem i jenisim fasin mo klos blong hem. Nao olgeta seven memba blong famle ya oli stat kam long ol miting. Long Janewari 1990 hem i tekem baptaes. Hem i wan long olgeta we oli folem nambawan advaes blong Pol long Efesas 4⁠:​17-24.

16. (a) ?Olsem wanem ripot blong Memoriol blong 1990 i save givim glad long yumi? (b) ?Yumi luk se yumi mas hareap blong mekem wanem? ?Yumi mas traehad blong givhan olsem wanem?

¹⁶ Wan bigfala samting long ripot blong yia ya, hemia namba blong ol man we oli kam long Memoriol blong ded blong Jisas long Tusde, Epril 10, 1990. I gat 9,950,058 man oli kam. Long ol 212 kantri we wok blong prij i gohed long wol, bitim 70 kantri oli talem se namba blong ol man we oli kam long Memoriol long kantri blong olgeta i tri taem antap long namba blong ol pablisa blong olgeta. Wan eksampel: Long Afrika i gat seven kantri we tugeta oli gat 62,712 pablisa. Nating we i gat sam samting blong blokem olgeta, be oli talem se long Memoriol i gat 204,356 man long ol seven kantri ya. Laebiria i wan trabol ples, be hem i gat 1,914 pablisa long hem. Long Memoriol, oli glad tumas we 7,811 man i kam. Haiti i gat 6,427 pablisa, be long Memoriol i gat 36,551 man. Ol aelan olbaot long Maekronisia oli gat 886 pablisa, be long Memoriol i gat 3,958 man. Sri Lanka i gat 1,298 pablisa, wetem 4,521 long Memoriol. Mo Sambia, we i gat 73,729 pablisa, long Memoriol i gat 326,991 man. Long evri 25 man long Sambia, i gat wan man i kam long Memoriol. Ripot blong olgeta ples long wol i soemaot bakegen se i gat plante milyan gudfala man we oli mas hivap yet wetem ol sipsip blong God. Be wan gudfala hat nomo i no naf. ?Yumi save kam gud moa long fasin blong tijim man long ol Baebol-stadi, blong halpem plante moa man we oli kam long Memoriol blong wokem strong bilif? Yumi wantem se olgeta oli joen wetem yumi long wok blong yumi blong presem Jeova. !Samting ya bambae i sevem laef blong olgeta!​—⁠Ol Sam 148:​12, 13; Jon 17:3; 1 Jon 2:​15-17.

Fulap Long Glad

17. ?Wanem eksampel blong faswan handred yia oli save mekem tingting blong yumi i strong blong holemtaet fasin glad?

¹⁷ Nomata wanem kaen traem yumi kasem, be yumi mas gat strong tingting blong holemtaet fasin glad. Ating bambae yumi no kasem strong traem olsem Steven i bin kasem. Be eksampel blong hem i save givhan long yumi blong stanap strong. Nating we ol man oli agensem hem, oli tok nogud long hem, be Steven i no lego long fasin glad we i stap long hat blong hem. Ol enemi blong hem “oli luk we fes blong hem i kam olsem fes blong enjel.” God i stap kolosap long hem oltaem long trabol ya. Hem i no fraet blong wetnes, from we “Tabu Speret i fulap long hem” gogo oli kilim hem i ded from bilif blong hem. Taem Pol mo Banabas tufala i go prij long ol hiten man, nao olgeta oli harem tok blong tufala, olgeta tu “oli harem i gud tumas, nao oli stap presem tok ya blong Jeova.” Bakegen, trabol i kamaot. Be olgeta we oli gat bilif oli no fraet from. “Ol disaepol oli stap fulap long glad mo tabu speret.” (Ol Wok 6:15; 7:55; 13:​48-52, NW) Nomata wanem trabol ol enemi blong yumi oli mekem long yumi, mo wanem traem yumi kasem evri dei long laef, be yumi neva mas lusum glad blong tabu speret we i stap long yumi. Pol i givim advaes ya se: “Mo from we tingting blong yufala i stap strong long God, yufala i mas harem gud oltaem. Taem yufala i gat trabol, yufala i mas mekem tingting blong yufala i longfala. Mo yufala i mas stap prea oltaem.”​—⁠Rom 12:⁠12.

18. (a) ?Wanem ya Nyufala Jerusalem? ?From wanem ol man blong God oli mas harem gud wetem hem? (b) ?“Nyufala heven mo nyufala wol” bambae i blesem ol man olsem wanem?

¹⁸ !Hop ya i nambawan tumas! Jeova i talem long ol man blong hem se: “Mi mi stap mekem nyufala heven mo nyufala wol. Mo ol samting blong bifo bambae oli no moa kambak bakegen long tingting blong man. Bambae oli no moa kambak bakegen long hat blong hem. Be yufala i mas harem gud, yufala i mas glad blong olwe from samting we mi mi stap wokem.” Masta blong yumi, Kraes ya, wetem “Nyufala Jerusalem” (naioa hem i bigfala taon blong ogenaesesen blong God long heven, we nem blong hem “Jerusalem ya long heven”) mo nyufala wol blong ol man, olgeta samting ya bambae oli mekem ol man oli fulap moa long glad. (Galesia 4:26) Ol dedman oli save girap oli laef bakegen, ol man we oli obei oli save kam stret man mo oli save kasem laef blong olwe. Man i save harem gud long laef ya blong olwe long Paradaes long wol, mo hem i save mekem ol samting we hem i harem gud from. !Hemia i nambawan hop mo risen blong glad! Jeova i ‘glad long Jerusalem mo hem i harem gud long ol man blong hem.’ Taswe profet blong hem i singaot bakegen long ol man blong God, i se: “Yufala we i laekem Jerusalem, yufala i mas harem gud wetem hem, mo yufala i mas glad wetem hem. Harem gud tumas wetem hem.” (Aesea 65:​17-19; 66:10; Revelesen 14:1; 20:​12, 13; 21:​2-4) Oltaem yumi mas stap fulap long glad mo tabu speret, mo yumi mas harem advaes ya blong aposol Pol, se: “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.”​—⁠Filipae 4:⁠4.

Tingtingbak Long Glad Blong Yumi:

◻ ?Jisas i givim wanem eksampel long yumi olsem wanem blong stanap strong wetem fasin glad?

◻ ?Tufala grup blong man we oli givim laef blong olgeta i go long God finis, oli gat wanem risen blong harem gud?

◻ ?Olsem wanem ol yangfala mo ol olfala tede oli stap harem gud long trutok?

◻ ?Taem yumi luklukbak long ripot blong 1990, olsem wanem Jeova i stap ansarem prea ya, se: “Jeova, plis yu mekem mifala i win”?

◻ ?Wetaem bambae yumi kasem glad we i fulwan? ?Olsem wanem?

[Ripot long pej 26-29]

1990 SERVICE YEAR REPORT OF JEHOVAH’S WITNESSES WORLDWIDE

(Lukluk niuspepa)

[Tok Blong Pija Long Pej 23]

Taem enjel blong Jeova i talemaot se Kraes ya we i Masta blong yumi i jes bon, hemia i ‘gud nyus we i save mekem olgeta man oli harem gud tumas’