Yumi Holem Strong Bilif Mo Tingting Blong Yumi i No Stikim Yumi

Ol Stampa Poen Blong Fas Timote

RAONABAOT long yia 56 K.T.,a aposol Pol i talem bakegen long ol elda blong kongregesen blong Efesas se sam long olgeta bambae oli kam olsem “ol wael dog” mo bambae “oli gyaman nomo blong lidim ol man blong Jisas oli biaen long olgeta, oli go krangke.” (Ol Wok 20:​29, 30) Sam yia nomo i pas afta we Jisas i ded, be ol tijing blong ol gyaman aposol oli strong finis. Taswe, Pol i tok strong long Timote blong hem i agensem ol gyaman Kristin we oli stap mekem nogud long saed blong speret. Hem i wantem we Timote i blokem ol tija we tingting blong olgeta i no stret. Long fasin olsem, Kristin kongregesen i save stap klin gud long saed blong speret mo Timote i save halpem ol narafala Kristin blong oli stanap strong long bilif. Hemia nao wan blong olgeta stampa samting we i pusum Pol blong raetem faswan leta blong hem long Timote. Hem i raetem leta ya taem hem i stap long Masedonia, raonabaot long yia 61-64 K.T.

Long leta blong hem, Pol i tijim Timote long ol wok we wan elda i mas mekem mo long ples we God i givim long ol woman. Hem i storeyan tu long ol samting we ol elda mo ol man blong givhan oli mas mekem bifo we oli kasem ol wok ya. Pol i tokbaot plante moa samting bakegen long leta ya blong hem. Ol nambawan advaes we Pol i givim oli gud long yumi tu tede.

Tok Blong Leftemap Bilif Blong Yumi

Pol i statem leta blong hem olsem: Hem i leftemap tingting blong ol Kristin blong oli holem strong bilif mo oli mekem ol stret fasin we tingting blong olgeta i no stikim olgeta from. (1:​1-20) Pol i wantem tumas we Timote i stap moa long Efesas. Pol i talem long hem se hem i mas blokem olgeta we “oli stap tijim ol man long ol tingting we i no stret.” Pol i talem tangkyu long Kraes from we hem nao i putumap hem long minista wok blong hem. Hem i luksave se hem i bin mekem fulap mastik bifo from we hem i no save long ol samting we hem i stap mekem mo hem i no bilif long Jisas. Pol i talem long Timote se hem i mas go mekem faet long saed blong speret, ‘hem i mas faet strong we bilif long hem i no save foldaon,’ be hem i no mas kam olsem olgeta we “bilif blong olgeta i foldaon finis [i olsem sip we i rek finis, NW].”

Advaes Blong Mekem Wosip

Biaen, Pol i talem se ‘wok blong hem i blong talemaot long ol hiten man, fasin ya blong bilif we i tru,’ taswe hem i save givim advaes. (2:​1-15) Hem i enkarajem ol Kristin blong oli prea long saed blong ol king mo ol man we oli gat hae ples, blong oli letem ol Kristin oli gat pis mo kwaet laef. God i wantem se ol man wanwan oli sef, mo wan impoten poen bakegen se Kraes “i givim hem [olsem wan rensam, NW] blong pem rod blong olgeta man oli gofri.” Pol i soemaot tu se ol klos we ol woman oli putum oli mas stret nomo. Fasin ya blong ol woman i mas soemaot se oli gat tingting daon, mo oli no stap mekem bos long man blong olgeta.

Ol samting we i hapen long kongregesen oli mas ron gud, mo oli mas gohed long fasin we i gat oda long hem. (3:​1-16) Pol i storeyan long ol samting we ol elda mo ol man blong givhan oli mas mekem blong kasem wok ya. Ol advaes we Pol i raetem long leta blong hem oli klia nomo mo Timote i save gud wanem fasin nao hem i mas gat long kongregesen we “i [olsem bigfala pos] blong holem trutok i stap gud.”

Pol i givim sam gudfala advaes long Timote blong hem i lukaotgud long ol tok we hem i stap tijim ol man long hem. (4:​1-16) Samtaem biaen, bambae samfala oli lego fasin blong bilif. Be sipos hem i lukaotgud long fasin blong hem mo long ol tok we hem i stap tijim ol man long hem, Timote ‘bambae i save sevem hem, wetem ol man we oli stap lesin long hem.’

Timote i kasem sam advaes blong hem i joengud wetem ol narafala, ol yangfala mo ol olfala. (5:​1-25) Tingbaot eksampel ya: Kongregesen i putumap rod blong givhan long ol olfala Kristin woman we oli lusum hasban blong olgeta. Ol yangfala woman we oli lusum man blong olgeta oli no mas kam woman blong mekem toktok. Ol yangfala woman ya oli mas mared bakegen mo oli mas lukaot long ol pikinini we oli gat. I gud we ol Kristin oli gat respek long ol elda we oli lukaotgud long kongregesen, oli dabolem ona we oli givim long olgeta.

Yumi Wanwan i Fasgud Long God

Long en blong leta blong hem, Pol i givim sam advaes long saed blong fasin fasgud long God. (6:​1-21) “Fasin fasgud long God” mo fasin blong stap glad ‘long wanem samting we yumi gat’ i wan rod blong kasem plante samting. Be sipos man i gat strong tingting blong kam rijman, bambae hem i save lus mo i save bagarap stret. Pol i talem long Timote se: “Yu mas faet strong long gudfala faet ya we yumi stap long hem from we yumi bilif, nao bambae yu save kasem laef ya we i no save finis.” Blong holemtaet long gudfala laef ya, ol rijman oli no mas “putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo.”

[Futnot]

[Bokis blong pija long pej 10]

God i Sevem Ol Woman From We Oli Bonem Pikinini: Long tok ya, taem Pol i talem se God i “sevem” ol woman, hem i no minim rod blong kasem laef blong olwe. Hem i store long wok blong wan woman we i fasgud long God. Hem i talem se: “Be i gat rod blong God i sevem ol woman, from we woman i bonem pikinini. Be woman i mas holemstrong fasin blong bilif mo fasin blong laekem tumas ol man, mo i mas kam wan kwaet woman we i tabu, i woman blong God. Nao sipos woman i mekem olsem, bambae God i sevem hem.” (1 Timote 2:​11-15) Sipos woman i bonem pikinini, mo hem i lukaotgud long ol pikinini mo long haos blong hem, ol wok ya oli “sevem” woman ya blong i no foldaon long sam nogud fasin. Woman ya i no save go storeyan olbaot, mo hem i no save go putum nus blong hem long bisnes blong ol narafala man. (1 Timote 5:​11-15) Hem i bisi long ol wok long haos, mo long minista wok we hem i mekem blong Jeova. Be i no ol woman nomo, olgeta Kristin wanwan oli mas lukaotgud long ol fasin blong ol mo oli mas yusum taem we oli gat long waes fasin.​—⁠Efesas 5:​15, 16.