Wan Kwestin

◼ ?From wanem Jisas i stanemap Memoriol wetem ol aposol blong hem nomo, mo i no mekem wetem ol narafala disaepol we olgeta tu oli mas kam aninit long nyufala kontrak?

Ating kwestin ya i stanap long wan rong tingting. Samfala oli ting se taem Jisas Kraes i hivap long naet wetem ol aposol blong hem, hem i stanemap Lodsapa wetem kongregesen blong ol Kristin we God i makemaot finis, we oli stap finis long nyufala kontrak. Be samting ya i no tru. Long Naesan 14, long yia 33 K.T.,a Kristin kongregesen i no stap yet. Mo Jisas i joen wetem ol aposol blong hem blong mekem Pasova nomo, wan lafet we ol man Jyu oli stap mekem evri yia.

Jisas i gat 12 aposol. Be i klia we hem i gat narafala disaepol tu. Wan yia bifo we hem i ded, hem i sanem 70 disaepol oli go prij. Afta we hem i laef bakegen long ded, “hem i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem.” Mo long dei blong Pentekos, i gat “olsem wan handred twante” disaepol we oli hivap wanples. (1 Korin 15:6; Ol Wok 1:​15, 16, 23; Luk 10:​1-24) Be naoia, yumi save tokbaot grup ya we Jisas i joen long hem blong stanemap lafet blong Lodsapa.

Luk 22:​7, 8 i talem wetaem samting ya i kamtru. Hem i talem se: “Nao i kam kasem dei blong lafet ya we oli kakae bred we i no gat is long hem. Long dei ya, ol man oli stap kilim ol smol sipsip blong mekem lafet blong Pasova. Nao Jisas i singaot Pita mo Jon, i talem long tufala, i se ‘Yutufala i go, yutafala i mekem ol samting ya blong Pasova oli rere, blong bambae yumi kakae.’ ” Biaen, hem i gohed, nao hem i talem se: “Nao bambae yutufala i talem long masta blong haos ya, se ‘?Tija i sanem mifala blong askem long yu se rum ya we hem wetem ol man blong hem bambae oli mekem lafet blong Pasova long hem, hem i stap wea?’ ” Olsem nao, long naet ya, Jisas i stap wetem ol 12 aposol blong mekem lafet blong ol man Jyu. Hem i talem long olgeta, i se: “Long tingting blong mi, mi mi wantem tumas blong yumi kakae kakae ya blong Pasova fastaem, nao biaen bambae olgeta oli mekem mi mi harem nogud long bodi blong mi.”​—⁠Luk 22:​11, 15.

I stat long Ijip, Pasova i wan lafet we ol man Isrel oli mekem wetem famle blong olgeta. Taem God i stanemap Pasova, hem i talem long Moses se long evri haos, oli mas kilim wan sipsip. Sipos famle i smol mo hem i no save kakae sipsip ya fulwan, oli save askem long wan famle we i stap kolosap long olgeta blong oli kam kakae wetem olgeta. Taswe, i stret nomo se long Pasova blong yia 33 K.T., bighaf blong ol disaepol blong Jisas oli hivap wetem prapa famle blong ol blong mekem lafet ya.

Be long laswan naet bifo we hem i ded, Jisas i “wantem tumas” blong kakae laswan Pasova ya wetem ol man blong hem we oltaem oli joen wetem hem long minista wok blong hem. Taem oli stap finisim kakae ya blong Pasova, Jisas i tokbaot nyufala lafet we bambae ol man blong hem oli mas folem. Bambae long Kristin lafet ya, waen i pija blong blad blong “nyufala kontrak” ya we i mas tekem ples blong kontrak blong Loa.​—⁠Luk 22:⁠20, NW.

Be long naet ya blong Naesan 14, 33 K.T., nyufala kontrak i no wok yet, from we Jisas i no givim laef blong hem yet olsem wan sakrafaes. Kontrak blong Loa i stil stap. God i no nilim hem long pos yet. Antap bakegen, ol disaepol oli no luksave se olfala kontrak wetem ol man Isrel hem i finis, mo kontrak wetem Isrel long saed blong speret i tekem ples blong hem. Long dei blong Pentekos nomo, bambae oli kasem save long samting ya.​—⁠Galesia 6:16; Kolosi 2:⁠14.

From samting ya, long naet ya ol 11 gudfala aposol, mo ol narafala disaepol tu, oli no stap aninit long nyufala kontrak. Mo taem Jisas i letem ol narafala disaepol oli hivap wetem prapa famle blong ol blong mekem lafet blong Pasova, hem i no soemaot se hem i no agri wetem olgeta.

[Futnot]