Ripot Long Wok Blong Kingdom
Tufala i Jes Luksave Long Katmandu
LONG 1980, wan woman blong pentem pija hem i stat blong lukaotem trutok hemia long Britani, Franis. Hem i toktok wetem ol Pentikostel mo stadi tu long ol skul blong Jaena mo India, be hem i no glad yet. Afta hem i stap toktok wetem wan Wetnes blong Jeova be biaen hem i stopem. Woman ya i mitim wan man we hem tu i man blong pentem pija nao hem i stap wetem hem.
Smoltaem biaen tufala ya i gat tingting blong go visitim kantri ya Nepal. Tufala i no mared. Tufala i laekem tumas kantri ya from ples i gud mo i kwaet, be tufala i no glad long fasin seraot long kantri ya. Ol man we oli rij oli no save joen wetem ol man we oli pua. Long lukluk blong ol man long kantri blong Wes, fasin ya i no stret.
Taem tufala i gobak long Franis, woman i talem long man ya blong tufala i stadi Baebol tugeta. Nao hem i sapraes taem man ya i agri. Tufala i askem long Wetnes we bifo, tu yia i pas finis woman ya i stap toktok wetem hem. Long stat olgeta, oli yusum Baebol nomo, be sloslou oli agri blong yusum buk ya Trutok Blong Soemaot Rod Blong Itenel Laef mo biaen bakegen oli yusum buk ya Yu Save Laef Foreva Long Paradaes Long Wol. Long wan yia nomo tufala i no moa tekem ol drag.
Tufala i go long Nepal bakegen blong tu manis. Nao taem tufala i kambak long Franis tufala i gohed blong stadi bakegen. Nao tufala i no moa smok, tufala i no moa go long ples blong dring mo naetklab. Mo tufala i stat blong go long ol miting blong ol Wetnes blong Jeova. Be taem oli finisim buk ya Laef Foreva, tufala i jusum blong no moa stadi.
Nao tufala i gobak bakegen long Nepal mo tufala i stap laef long wan smol haos, kolosap long ol hil ya, Himalaya. Wan dei wan olfala man we i werem sut mo nektae i kam noknok long doa. Woman nomo i stap long haos, mo i ting se maet man ya hem i wan bisnesman we i stap pem ol pija, mo maet i kam long haos blong luk ol pija we tufala i pentem. Be hem i sapraes nomo blong luk se man ya hem i wan Wetnes. Man we i stadi wetem tufala long Franis hem nao i sanem hem. I no longtaem man we i stap wetem hem i kam long haos mo oli toktok long tu haoa.
Sam dei i pas, tufala i go long miting blong ol Wetnes blong Jeova long Katmandu mo oli laekem tumas blong luk se olgeta we oli kam long miting ya oli klin. Mo tufala i luk se fasin lav mo glad we olgeta oli gat long miting ya i sem mak nomo long olgeta long Franis. Mo tufala i luksave tu olsem wanem ol man blong Nepal oli stap joen gud tugeta. Olgeta oli no seraot from we sam oli pua mo sam oli rij. Nao tufala i luksave nomo se hemia i mas ogenaesesen blong Jeova ya.
Wan manis biaen, tufala i gobak long Franis mo kwiktaem nomo tufala i statem Baebol stadi blong tufala bakegen mo go long ol miting. Tufala i mared, mo tufala i joen long wok blong prij, mo biaen tufala i baptaes. Naoia hasban hem i kam wan man blong givhan, mo woman blong hem i stap mekem haftaem paenia. Tru, ol man we oli gat gudhat Jeova hem i save givhan long olgeta wetem speret blong hem blong oli kam man we oli wosipim hem.—Revelesen 7:15-17.
[Foto long pej 26]
Wan maket long Katmandu, Nepal