“Bambae Yu Yu Stap Wetem Mi Long Paradaes”
MAN blong brekem loa we i stap hang long pos kolosap long Jisas i askem se: “Jisas, taem we bambae yu yu kam insaed long kingdom blong yu, plis yu tingbaot mi bakegen.” Man ya i harem nogud long bodi blong hem mo kolosap hem i ded. Nating we Jisas tu i harem soa long bodi blong hem mo kolosap hem tu i ded, hem i ansa long man ya i se: “Tru mi mi talem long yu tede, se bambae yu yu stap wetem mi long Paradaes.” (Luk 23:42, 43, NW) !Hemia wan gudfala tok blong givim hop long wan man we kolosap hem i ded!
Tok blong Jisas we yumi ridim finis long faswan paragraf i kamaot long New World Translation Baebol. Ating yu luk wan smol mak afta long tok ya “tede.” Hemia i givim wan mining se, nating se long dei ya Jisas i mas ded long hem, hem i save mekem wan promes blong laef long Paradaes, long man ya blong brekem loa. Be Baebol ya The New English Bible i raetem ol tok ya blong Jisas olsem: “Mi talem long yu: tede bambae yu yu stap wetem mi long Paradaes.” Plante translesen blong Baebol oli agri wetem ol tok ya long The New English Bible we i givim tingting olsem se, Jisas mo man blong brekem loa ya tufala i go long Paradaes long sem dei ya we tufala i ded long hem. ?From wanem hem i defren? ?Mo weswan mak i stret?
Long ol Baebol we oli raetem long Grik lanwis, i no gat ol mak we i seraotem ol toktok insaed. Nao, taem ol man oli stat blong yusum ol mak ya, ol man blong mekem kopi long Baebol mo ol man we oli stap tanem i go long narafala lanwis oli putum ol mak long ol ples we oli ting se i stret. Samting ya i dipen long save we oli gat long Baebol. ?Olsem wanem, fasin blong raetem ol tok ya bifo hem i stret? ?Jisas mo man blong brekem loa, tufala i go long Paradaes long dei ya we tufala i ded long hem?
No gat, Baebol i soemaot se tufala i go long ples we oli kolem long Grik lanwis Haʹdes mo long Hibru lanwis Sheʹol, tufala ples ya i minim beregraon nomo blong ol man. (Luk 18:31-33; 24:46; Ol Wok 2:31) Olgeta we oli stap long beregraon Baebol i tokbaot olgeta i se: “Be ol dedman oli no save wan samting nating. . . . From we i no gat wok no plan no save no waes long Seol [Grik, Haʹdes], ples ya we bambae yu yu go long hem.” !I no Paradaes!—Eklesiastis 9:5, 10.
Long tri dei biaen Jisas i girap bakegen long Hades. Nao, kolosap long sikis wik hem i stap soemaot hem wan long ol man blong hem long ol defren ples long Palestin. Long wan taem Jisas i talem long Meri se: “Mi mi no go antap long Papa blong mi yet.” (Jon 20:17) Yes, long taem ya Jisas i no go nating long wan ples we i olsem paradaes.—Revelesen 2:7.
Afta tu handred yia K.T.—kwiktaem nomo ol man oli meksemap Kristin tijing mo ol ol waes tok blong ol man Grik —Origen i raetem ol tok blong Jisas olsem se: “Tede bambae yu stap wetem mi long Paradaes blong God.” Long ol yia bitwin 300 K.T. mo 400 K.T. ol man blong raetem ol samting blong ol jyos oli stap rao mo oli no wantem putum wan smol mak afta long tok ya “tede.” Samting ya i soemaot se olfala fasin blong raetem ol tok blong Jisas i stat longtaem finis i kam. Be long ol yia bitwin 300 K.T. mo 400 K.T., i gat sam man we oli stap ridim tok ya blong Jisas olsem we oli raetem long New World Translation Baebol.
Tede, nating se plante man blong tanem Baebol i go long narafala lanwis oli putum mak long Luk 23:43 long fasin we i stret long jyos blong olgeta, sam man oli stap putum mak long ples we i olsem long New World Translation. Eksampel, long wan Baebol blong ol man Jemani we Profesa Wilhem Maekelis i tanem, oli raetem ol tok ya blong Jisas i olsem se: “Tru, mi mi talemaot stret long yu tede: Bambae yu (long wan dei) yu stap wetem mi long Paradaes.”
?Tok ya blong Jisas i minim wanem long man blong brekem loa ya? Maet man ya i harem we ol man oli talem se Jisas i King ya we God i promes blong givim. Mo tu hem i save long ol tok we Paelet i mekem ol man oli raetem mo hangem kolosap long hed blong Jisas. Hemia ol tok ya se, “king blong ol man Isrel.” (Luk 23:35-38) Nating se ol lida blong jyos oli stronghed mo oli no wantem Jisas, man blong brekem loa ya hem i tanem tingting blong hem mo i soemaot bilif blong hem long Jisas taem hem i se: “Jisas, taem we bambae yu yu kam insaed long kingdom blong yu, plis yu tingbaot mi bakegen.” (NW) Hem i no tingting blong i go rul wetem Jisas, nogat. Be hem i wantem kasem ol gudfala samting aninit long rul blong Jisas. Nating se Jisas i kasem wan hadtaem long dei ya, hem i mekem promes long man blong brekem loa ya se bambae hem i stap wetem hem long Paradaes.
?Be weswan paradaes? Baebol i tokbaot faswan Paradaes we i olsem wan gudfala garen, hemia long Iden we tufala faswan papa mama tufala i lusum. Baebol i mekem promes se wol ya bambae i kam Paradaes bakegen taem Kingdom blong God we Jisas i King long hem i rulum. (Ol Sam 37:9-11; Maeka 4:3, 4) Taswe Jisas bambae i stap wetem man ya blong brekem loa mo plante dedman we Jisas bambae i mekem olgeta oli laef bakegen long beregraon, blong oli kasem laef long paradaes long wol ya. Hem i givim jans long olgeta blong oli lanem blong mekem ol samting we God i wantem mo kasem laef we i no save finis.—Jon 5:28, 29; Revelesen 20:11-13; 21:3, 4.