Stap Wekap Long “Taem Blong En”
“Yufala i mas lukaot gud, oltaem yufala i mas [stap wekap, “NW”], from we yufala i no save taem ya we olgeta samting ya bambae oli kam.”—MAK 13:33.
1. ?Wanem samting yumi mas mekem taem ol samting oli stap kamtru long “taem blong en”?
?WANEM tingting blong ol Kristin taem oli luk ol samting oli stap kamtru long “taem blong en”? (Daniel 12:4) Olgeta oli save mining blong ol samting ya. Jisas i talem wan profet tok we i soemaot ol saen we oli stap kamtru long taem blong yumi. Hem i stap tokbaot ol saen we oli makem taem ya stat long 1914 se hem i defren long ol narafala taem. Jisas i savegud profet tok blong Daniel long saed blong “taem blong en.” Afta we hem i talem bigfala profet tok blong hem, hem i talem long ol disaepol blong hem se oli mas “stap wekap.”—Luk 21:36, NW.
2. ?From wanem i impoten tumas we yumi mas stap wekap long saed blong speret?
2 ?From wanem oli mas stap wekap? From we naoia hem i hadtaem blong olgeta man, bitim ol taem bifo. Ol Kristin oli save kasem trabol sipos oli stap slip long saed blong speret. Sipos yumi stap wantem haremgud long laef nomo no yumi letem hat blong yumi i trabol from ol wari long laef, yumi save kasem bigfala trabol. Long Luk 21:34, 35, Jisas i givim woning long yumi i se: “Yufala i mas lukaot gud. Sipos yufala i letem tingting blong yufala i kam slak, from we yufala i stap ronem lafet, mo yufala i stap drong mo yufala i stap tingting tumas long laef ya long wol, bambae dei ya blong mi i kam kasem yufala wantaem, olsem we trap i sat. From we bambae dei ya i save kamtru long olgeta man long wol.”
3, 4. (a) ?Jisas i minim wanem taem hem i talem se dei blong kros blong God bambae i kam long ol man wantaem nomo, olsem “we trap i sat”? (b) ?From we God i no mekem wan trap, olsem wanem dei ya bambae i kamtru long ol man taem oli no stap tingbaot?
3 Jisas i talem se dei blong Jeova bambae ‘i kam kasem yumi wantaem, olsem we trap i sat,’ pija tok ya i stret nomo. Plante taem wan trap hem i gat wan rop blong hem, mo hem i blong kasem ol pijin mo ol anamol. Trap ya i gat wan triga, mo sipos wan man i wokbaot long hem, hem i mekem triga ya i kamaot. Nao trap ya i kam sat, mo hem i kasem wan samting. Ol samting ya i hapen kwiktaem nomo. Long sem fasin, Jisas i talem se olgeta we oli slak long saed blong speret bambae oli sapraes mo bambae oli save lus long “dei blong kros” blong God.—Proveb 11:4.
4 ?Jeova God hem i putumap trap ya blong ol man? No gat, hem i no stap wet blong kasem ol man taem oli no rere mo spolem olgeta. Be dei ya bambae i kasem ol man from we oli no stap tingbaot Kingdom blong God fastaem long ol narafala samting. Oli stap go long prapa rod blong olgeta blong ronem ol samting blong laef, oli no luksave mining blong ol samting we oli stap hapen raonabaot long olgeta. Be samting ya, i no save jenisim plan blong God. Hem i gat stret taem blong hem blong givim pei long ol man. Mo from fasin sore blong hem, hem i no letem se ol man oli no save dei ya blong jajmen blong hem.—Mak 13:10.
5, 6. (a) ?From jajmen ya we bambae i kam, God we i wokem yumi i givim wanem presen long ol man? ?Be wanem bambae i kamaot long ol man? (b) ?Wanem samting bambae yumi tingbaot blong givhan long yumi blong stap wekap?
5 Woning we hem i givim finis long ol man i soemaot se God ya we i Wokem Olgeta Samting hem i gat fasin lav blong givim woning long ol man fastaem, hem i intres long laef blong ol man long wol ya we i olsem ples blong putum leg blong hem long hem. (Aesea 66:1) Hem i laekem tumas ol man we oli laef long ples we hem i stap putum leg blong hem long hem. Taswe hem i yusum ol man blong hem long wol ya olsem ambasada mo ol man blong karem tok blong hem, nao oli talemaot woning blong hem long olgeta man, long ol samting we bambae oli kamaot long fyuja. (2 Korin 5:20) Be, nating se ol woning ya oli go long ol man, ol samting ya bambae oli mas kamtru long ol man olsem we oli no tingbaot, olsem we oli go insaed long wan trap. ?From wanem? From we bighaf blong ol man oli stap slip long saed blong speret. (1 Tesalonaeka 5:6) Smol namba blong ol man nomo oli harem woning ya mo bambae oli laef i go long nyufala wol blong God.—Matyu 7:13, 14.
6 ?Nao, olsem wanem yumi save stap wekap tede long taem blong en, blong yumi save stap long medel blong olgeta we bambae oli kasem sef? Jeova i stap givim help we yumi nidim. I gat seven samting we yumi save mekem.
Agensem Ol Samting Blong Pulum Man
7. ?Wanem woning we Jisas i givim long saed blong ol samting we oli save pulum ol man?
7 Faswan samting, yumi mas agensem ol samting we oli stap pulum man. Long Matyu 24:42, 44, Jisas i talem se: “Ale, from samting ya, yufala i mas lukaot gud. From we yufala i no save long wanem dei, mi, mi Masta blong yufala, bambae mi kamtru. From samting ya, yufala i mas stap rere. From we mi, mi Pikinini blong Man, bambae mi kamtru long taem we yufala i no tingbaot.” Tok we Jisas i yusum long ples ya i soemaot se long taem ya we laef i strong, bambae i gat plante samting blong pulum man, mo ol samting ya oli save mekem se man i lus. Long taem blong Noa, plante samting i pulum tingting blong ol man blong oli bisi long hem. From samting ya, ol man ya we ol samting ya oli pulum tingting blong olgeta, oli “no save” wanem i stap hapen raonabaot long olgeta, nao Bigfala Wora i karemaot olgeta. Taswe, Jisas i givim woning se: “Long taem ya we mi, mi Pikinini blong Man bambae mi kamtru, bambae i olsem.”—Matyu 24:37-39.
8, 9. (a) ?Olsem wanem fasin blong ronem ol samting long laef i save pulum yumi? (b) ?Wanem ol woning we Pol mo Jisas i givim long yumi?
8 Tingbaot tu se long woning blong Jisas long Luk 21:34, 35, Jisas i stap tokbaot ol samting we ol man oli stap mekem long laef, olsem kakae, dring, mo ol wari blong man i stap laef. Hemia ol samting we olgeta man oli stap mekem, ol disaepol blong Masta Jisas tu oli mekem. (Lukluk Mak 6:31.) Ol samting olsem oli no save mekem trabol, be sipos yumi letem, bambae oli save pulum yumi, oli save mekem yumi bisi tumas long olgeta, nao oli save mekem yumi slip long saed blong speret.
9 Taswe, yumi no mas fogetem samting we i impoten moa—hemia blong mekem God i glad long yumi. I nogud yumi stap bisi long ol samting blong laef, be yumi mas yusum olgeta long fasin we i no bitim mak blong yumi stap laef nomo. (Filipae 3:8) Ol samting ya oli no mas mekem intres blong yumi long Kingdom i kam smol. Long Rom 14:17 i talem se, “kakae mo dring, hemia i no bigfala samting long laef blong ol man we God i king blong olgeta. Ol man ya we God i king blong olgeta, hemia olgeta we Tabu Speret i stap mekem olgeta oli gat stret fasin, oli stap long pis, mo oli stap harem gud long tingting blong olgeta.” Tingbaot ol tok blong Jisas taem hem i talem se: “Fastaem yufala i mas lukaotgud blong obei long God we i king blong yufala, mo blong mekem ol stret fasin we hem i wantem. Nao biaen hem i save givim olgeta samting ya tu long yufala.” (Matyu 6:33) Mo bakegen, long Luk 9:62, (NW) Jisas i talem se: “Man we i stap holem stik blong brebrekem graon long garen mo i stap luklukbak long ol samting biaen long hem, hem i no stret long kingdom blong God.”
10. ?Wanem i save hapen sipos yumi no stap lukluk i go nomo long praes ya we i stap long fored blong yumi?
10 Hemia i wan pija tok. Taem yumi stat blong yusum stik blong brebrekem graon blong garen, yumi mas lukluk i go long fored long wan stret laen. Wan man blong brebrekem graon we i stap lukluk i go biaen long hem, bambae i no brekem graon long wan stret laen. Ol samting oli pulum tingting blong hem mo i isi blong hem i goaot long stret rod no hem i save stop from samting i blokem hem. I nogud yumi mekem olsem waef blong Lot, we hem i lukluk biaen long hem mo hem i no kasem sefples. Yumi mas lukluk i go long fored long praes we i stap. Blong mekem olsem yumi mas agensem ol samting we oli stap pulum tingting blong man.—Jenesis 19:17, 26; Luk 17:32.
Prea Strong Wetem Ful Hat
11. ?Jisas i tokbaot wanem impoten poen afta we hem i givim woning long saed blong ol samting we oli save pulum yumi?
11 Yumi save mekem moa blong stap wekap. Seken impoten samting hemia se: Prea strong wetem ful hat blong yumi. Afta we Jisas i givim woning long yumi blong agensem ol samting we oli save pulum yumi blong ronem ol samting blong laef, Jisas i givim advaes ya se: “Be oltaem, yufala i mas stap [wekap, NW]. Yufala i mas prea blong bambae yufala i gat paoa blong ronwe long olgeta trabol ya, blong bambae yufala i save stanap long fes blong mi, mi Pikinini blong Man.”—Luk 21:36.
12. ?Wanem kaen prea yumi mas mekem, mo wanem frut i save kamaot from?
12 Taswe, yumi mas prea strong oltaem from denja we yumi stap long hem mo yumi mas wekap. I gud yumi askem oltaem long God long prea wetem ful hat blong yumi. Pol i talem long Rom 12:12 i se: “Yufala i mas stap prea oltaem.” Mo yumi ridim long Efesas 6:18 i se: “Wetem ol samting ya, yufala i mas prea, yufala i mas askem long God blong i givhan long yufala. Oltaem nomo yufala i mas stap prea long paoa blong Tabu Speret. . . . blong yufala bambae i no slak, mo ae blong yufala bambae i no hevi.” Prea olsem hem i no wan samting blong nating nomo, hem i impoten tumas. Laef blong yumi i save lus. Taswe yumi mas askem strong long God wetem ful hat blong yumi, blong hem i givhan long yumi. (Lukluk Hibrus 5:7.) Long rod ya bambae yumi save stap oltaem long saed blong Jeova. I no gat wan samting we i save givhan long yumi bitim we yumi ‘prea oltaem.’ Nao Jeova bambae i mekem se yumi stap wekap mo yumi rere. !I impoten tumas, blong stap prea oltaem!
Stap Kolosap Long Ogenaesesen Blong God Mo Wok Blong Hem
13. ?Yumi mas joen oltaem long wanem blong yumi stap wekap?
13 Yumi wantem stap sef taem ol samting ya oli kamtru long wol ya. Yumi wantem stanap long fes blong Pikinini blong man, we hem i glad long yumi. Olsemia nao i gat namba tri samting we yumi save mekem: Stap oltaem long tiokratik ogenaesesen blong Jeova. Yumi mas joen fulwan long ogenaesesen ya mo joen long ol wok blong hem. Long rod ya yumi save soemaot se yumi olsem ol Kristin we yumi stap rere.
14, 15. (a) ?Yumi mas joen long wanem wok we bambae i givhan long yumi blong stap wekap? (b) ?Hu bambae i talem wetaem wok blong prij bambae i finis, mo yumi mas gat wanem tingting long saed blong wok ya? (c) ?Afta long bigfala trabol, wanem samting bambae yumi tingbaot taem yumi luklukbak long wok blong prij we yumi mekem?
14 Namba fo samting we i save givhan long yumi blong stap wekap, hem i kolosap sem mak. Yumi mas stap long medel blong ol man we oli stap givim woning long olgeta man long trabol we bambae i finisim rabis fasin blong naoia. Yumi mas “talemaot gud nyus ya se God i king blong olgeta man” go kasem mak ya we Hae God i wantem nao biaen en blong rabis wol ya i save kam. (Matyu 24:14) Ol Wetnes blong Jeova oli no save talem wetaem wok blong prij bambae i finis. Jeova nomo i gat raet blong talem. (Mak 13:32, 33) Be, yumi wantem wok strong naoia taem yumi gat taem mo talemaot gud nyus long saed blong nambawan gavman we ol man oli save gat, hemia Kingdom blong God. Taem “bigfala trabol” i kam, yumi stap gohed yet long wok ya. (Matyu 24:21) Nao long fyuja, olgeta we oli sef bambae oli luklukbak mo oli save talem se Jisas Kraes hem i no wan gyaman profet. (Revelesen 19:11) Wok blong prij bambae i kasem mak we i bitim mak long tingting blong olgeta we oli stap mekem wok ya.
15 From samting ya, long taem ya we wok bambae i kasem mak we God i glad long hem, ating namba blong ol man we oli stap mekem wok ya bambae i bitim long taem bifo. !Bambae yumi glad tumas we yumi bin joen long bigfala wok ya! Aposol Pita i talem long yumi se Jeova “i no wantem blong ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Taswe, paoa blong Hae God i stap wok moa tede i bitim taem bifo, mo ol Wetnes blong Jeova oli wantem gohed long wok ya we speret i stap pusum olgeta blong mekem. Taswe yu mas stap kolosap long ogenaesesen blong Jeova, mo bisi long wok blong prij. Samting ya bambae i givhan long yu blong stap wekap.
Luklukgud Long Laef Blong Yu Wan
16. ?From wanem yumi mas luklukgud long laef blong yumi blong luksave fasin blong yumi long saed blong speret naoia?
16 I gat namba faef samting we yumi save mekem blong stap wekap. Yumi wanwan, yumi mas luklukgud long laef blong yumi naoia. Samting ya i stret blong mekem naoia bitim long taem bifo. Yumi mas soemaot se yumi stap stanap long saed blong hu. Long Galesia 6:4, Pol i talem se: “Evri man wanwan i mas traem ol wok we hem nomo i mekem.” Skelem laef blong yu wan wetem ol tok blong Pol long 1 Tesalonaeka 5:6-8 se: “I no stret blong yumi stap slip olsem ol narafala man. I stret blong yumi wekap, we hed blong yumi i klia gud. Naet, hem i taem we man blong slip i save slip, mo we man blong dring i save drong. Be yumi ya i man blong delaet, mo hed blong yumi i mas klia gud. Yumi mas holem fasin blong bilif mo blong laekem tumas ol man. Hemia i olsem klos blong faet blong blokem bodi blong yumi, ara i no save kasem yumi. Mo yumi mas putum tingting blong yumi long God blong hem i sevem yumi. Hemia i olsem hat blong faet blong yumi.”
17. ?Taem yumi stap luklukgud long laef blong yumi, wanem ol kwestin we yumi mas askem long yumi wanwan?
17 ?Olsem wanem long yumi? ?Taem yumi skelem laef blong yumi wetem Baebol, yumi luk se yumi stap wekap, yumi gat hat blong faet olsem hop blong yumi se bambae God i sevem yumi? ?Fasin blong yumi i defren long fasin blong wol ya mo yumi no moa gat ol tingting blong hem? ?Yumi rili gat tingting we i laenap wetem ol fasin blong nyufala wol blong God? ?Yumi luksave se fasin blong wol naoia bambae i lus? Sipos yes, bambae dei blong Jeova i no save kasem yumi olsem we yumi ol man blong stil.—1 Tesalonaeka 5:4.
18. ?Wanem ol narafala kwestin we yumi mas askem long yumi wanwan, mo wanem frut i save kamaot from?
18 ?Olsem wanem sipos yumi luklukgud long laef blong yumi nao yumi luksave se yumi stap traehad blong gat wan naes, gudfala laef we i isi? ?Olsem wanem sipos yumi faenemaot se ae blong yumi long saed blong speret hem i kam hevi mo yumi slip? ?Olsem wanem, yumi stap drim long ol samting blong wol ya, yumi stap ronem ol samting ya? !Sipos yes, naoia yumi mas wekap!—1 Korin 15:34.
Tingting Dip Long Ol Profet Tok We Oli Stap Kamtru
19. ?Wanem profet tok yumi luk se oli kamtru finis?
19 Naoia yumi kam long namba sikis samting we bambae i givhan long yumi blong stap wekap: Tingting dip long plante profet tok we oli stap kamtru long taem blong en. Yumi gotru 77 yia finis stat long taem ya we taem blong ol hiten man i finis long 1914. Taem yumi luklukbak long ol yia ya, yumi luk olsem wanem ol profet tok oli stap folfolem olgeta blong kamtru—olsem fasin blong stanemap trufala wosip bakegen, smol kampani blong ol Kristin we tabu speret i makemaot olgeta oli aot long kalabus, wetem ol fren blong olgeta, oli go long paradaes long saed blong speret, wok blong talemaot gud nyus blong Kingdom long olgeta ples long wol, bigfala hif blong ol man i kamaot. (Aesea 2:2, 3; japta 35; Sekaraea 8:23; Matyu 24:14; Revelesen 7:9) Wok i stap gohed blong talemaot nem blong Jeova mo hae rul blong hem, mo tu hemia we i smol i stap kam taosen mo hemia we i smol i stap kam wan bigfala nesen, we Jeova i stap spidimap long prapa taem blong hem. (Aesea 60:22; Esikel 38:23) Mo ol vison we aposol Jon i luk long Revelesen naoia kolosap oli kamtru fulwan.
20. ?Ol Wetnes blong Jeova oli bilif long wanem, mo samting ya i pruvum wanem?
20 Taswe, naoia bitim bifo ol Wetnes blong Jeova oli bilif se save blong olgeta long mining blong ol samting we oli stap kamaot long wol stat long 1914 i stret nomo. Tingting ya we oli gat, i pruvum se Hae God i stap yusum olgeta. Hem i givim wok ya long olgeta blong talemaot mesej blong Hem tede. (Rom 10:15, 18) Yes, tok blong Jeova long saed blong taem blong en i stap kamtru. (Aesea 55:11) Samting ya i mas wekemap tingting blong yumi blong stap gohed go kasem taem ya we yumi luk ol promes blong God oli kamtru fulwan, tru long Jisas Kraes.
Taem Blong Kasem Sef i Kolosap Moa Bitim Taem Ya We Yumi Kam Man Blong Bilif
21. ?Wanem namba seven samting we i save givhan long yumi blong stap wekap long saed blong speret?
21 Laswan samting blong givhan long yumi blong stap wekap, hemia namba seven samting se: Tingbaot se taem blong kasem sef i kolosap moa naoia i bitim taem we yumi kam man blong bilif. I impoten moa, se dei blong leftemap hae rul blong Jeova mo soemaot nem blong hem i kolosap moa bitim bifo. Taswe yumi mas stap wekap naoia bitim bifo. Aposol Pol i talem se: “Yufala i save taem ya we yumi stap long hem naoia. Hemia i taem blong yufala i wekap, yufala i no moa slip bakegen. Fastaem, long taem we yumi jes bilif long Kraes nomo, taem ya we bambae hem i sevem yumi i stap longwe yet long yumi. Be naoia, taem ya i stap kam kolosap. I kolosap nomo we tudak bambae i finis, delaet i kamtru long yumi.”—Rom 13:11, 12.
22. ?Wanem samting yumi mas mekem taem yumi tingbaot se kolosap nao God bambae i sevem yumi?
22 !From we taem ya we bambae God i sevem yumi i kolosap, yumi mas stap wekap! Yumi no mas letem ol prapa intres blong yumi wanwan no ol intres blong wol ya oli putum baden long yumi blong yumi no luksave samting we Jeova i stap mekem long ol man blong hem long taem ya blong en. (Daniel 12:3) Naoia yumi mas soemaot strong tingting bitim taem bifo blong yumi no save livim rod ya we Tok blong God i stap talem long yumi. (Matyu 13:22) Ol samting i klia nomo se wol ya i stap long ol las dei blong hem. I no longtaem bambae fasin blong wol ya i finis blong olwe blong mekem rod blong nyufala wol blong stret fasin i kam.—2 Pita 3:13.
23. ?Jeova bambae i givhan long yumi long wanem rod, mo wanem blesing yumi save kasem from?
23 From samting ya, yumi mas traehad blong stap wekap. I no olsem bifo, yumi mas luksave wanem taem yumi stap long hem naoia. Tingbaot, Jeova bambae i neva slip long bisnes ya. Be, hem bambae i givhan long yumi blong stap wekap long taem ya blong en. Naet, kolosap i finis. Delaet i stap kam kolosap. !Taswe yufala i mas stap wekap! !I no longtaem bambae yumi kasem ol nambawan dei, taem Kingdom blong Mesaea i mekem ol plan blong God i kamtru long wol ya!—Revelesen 21:4, 5.
?Wanem Ol Ansa Blong Yu?
◻ ?Jisas i minim wanem taem hem i talem se dei blong kros blong God bambae i kam long olgeta man olsem “we trap i sat”?
◻ ?From wanem yumi mas agensem ol samting we oli save pulum yumi, mo olsem wanem yumi save mekem olsemia?
◻ ?Wanem kaen prea yumi mas mekem blong stap wekap?
◻ ?I impoten we yumi joen oltaem long wanem?
◻ ?From wanem yumi mas luklukgud long laef blong yumi, long ol samting long saed blong speret?
◻ ?Olsem wanem ol profet tok oli givhan long yumi blong stap wekap?