Laef Wan Presen We God i Givim

LONG twantefo haoa long evri dei, hat blong yumi i pamem gudfala blad i ron long olgeta haf long bodi blong yumi. Yumi slip, mo waet leva blong yumi i stap gohed blong pulum win. Yumi kakae, mo bel i tantanem kakae ya hem wan. Yumi no stap tingbaot ol samting ya, be oli stap gohed evri dei. Ol nambawan wok ya we oli haed, plante taem yumi no tinghae long olgeta, be oli haf long presen ya we yumi kolem laef. Long wan fasin, hem i wan presen we yumi save talem se hem i wan merikel.

Tingbaot olsem wanem wan bebi i stap gru long bel blong mama mo i bon. Sipos wan narafala samting i wantem gru long bel blong yumi, oltaem bodi i sakemaot samting ya, be taem wan bebi i stat gru, basket blong bebi long bel blong woman i no mekem olsem. Hem i no sakemaot smol bebi ya olsem we hem i wan narafala samting, be hem i fidim mo i lukaotgud long bebi ya gogo hem i bon. Sipos basket blong bebi i no mekem olsemia, i no save gat sam bebi i bon samtaem.

Mo tu, taem wan bebi i jes bon, laef blong hem bambae i sot nomo sipos wan samting i no hapen insaed long basket blong bebi taem i stap fo manis finis insaed. Long taem ya bebi i stat titi long fingga blong hem, samting ya i mekem se hem i yusum ol masel we biaen hem i mas yusum blong titi long mama. Hemia wan samting nomo long olgeta samting we i hapen bifo we bebi i bon blong mekem se hem i save stap laef afta we hem i bon.

Taem bebi i stap yet long bel blong mama, i gat wan hol i stap long wol blong hat. Be taem bebi i bon, hol ya i sat hem wan. Mo tu wan bigfala string blong karem blad we i stap pas kolosap long waet leva taem bebi i stap long bel blong mama yet, hem i sat taem bebi i bon, nao blad i pastru long waet leva, long ples ya i save karem win taem bebi i stat pulum win.

Be i gat plante moa samting tu. Taem laef i stap gohed, i gat ol nambawan wok we oli stap gohed tu folem prapa plan blong olgeta (olsem wok blong pulum win, blad i ron long ol string, ol nev,a mo wok blong ol homonb). Ol wok ya oli joengud, mo oli nambawan tumas we ol man oli no save kasem save long ol​—⁠ol samting ya i hapen blong man i save stap laef. Yumi no sapraes we wan man long taem bifo i raetemdaon tok ya long saed blong God se: “Yu yu hae tumas, i stret blong man i bodaon long yu i ona long yu, mo mi mi presem yu from. Olgeta samting we yu yu mekem oli narafala mo oli nambawan tu. Mi mi save we mi savegud samting ya.”​—⁠Ol Sam 139:⁠14.

I klia se man we i raetem ol gudfala toktok ya hem i no bilif se laef i kamaot from laki nomo no from wan akseden, no from mangke. No gat. Sipos i bin hapen olsemia, bambae i no gat ol rul we yumi mas folem no ol wok we yumi mas mekem blong yusum laef ya long gudfala fasin. Olgeta haf blong laef oli soemaot klia se laef i folem wan plan, mo sipos i gat wan plan i mas gat wan Man blong mekem plan ya. Baebol i talem rul ya se: “Yes i tru, evri haos oli gat man blong wokem olgeta, be God i wokem olgeta samting we i stap.” (Hibrus 3⁠:4) From samting ya i impoten we “yumi mas tingbaot we Hae God [Jeova, NW], hem i God. Hem nomo i mekem yumi, mo yumi i blong hem.” (Ol Sam 100:⁠3) Yes, laef i no kamaot olsem wan akseden nomo, hem i wan presen we God hem wan i givim long yumi.​—⁠Ol Sam 36:⁠9.

?Sipos i olsem, i gat sam samting we yumi mas mekem long Man ya we i Givim laef long yumi? ?Hem i wantem se yumi yusum laef blong yumi olsem wanem? Bambae yumi tokbaot ol kwestin ya long nekis haf blong magasin ya.

[Ol futnot]