“?Hu i Olsem Jeova, God Blong Yumi?”
“?Hu i olsem Jeova, God ya blong yumi, we i stap sidaon long ples blong hem antap?”—OL SAM 113:5, “NW.”
1, 2. (a) ?Wanem tingting blong ol Wetnes blong Jeova long saed blong God mo Baebol? (b) ?I gud blong tingbaot wanem kwestin?
OL MAN we oli stap presem Jeova oli rili kasem blesing. !Hem i gud blong stap long medel blong kampani ya blong ol man we oli hapi! Olsem yumi ol Wetnes blong hem, yumi akseptem ol advaes, ol loa, ol tijing, ol promes, mo ol profet tok long Tok blong God, Baebol. Yumi glad blong lanem ol samting long Baebol mo yumi glad we “God ya bambae i tijim” yumi.—Jon 6:45.
2 From we ol Wetnes blong Jeova oli gat dip respek long God, oli save askem se: “?Hu i olsem Jeova, God ya blong yumi?” (Ol Sam 113:5, NW) Ol tok blong man ya blong raetem Ol Sam oli soem bilif. ?Be, from wanem ol Wetnes oli gat bilif olsem long God? ?Mo from wanem oli presem Jeova?
I Stret Blong Gat Bilif Mo Presem God
3. ?Wanem ya ol Halel Sam, mo from wanem oli givim nem ya long olgeta?
3 I stret nomo blong bilif long Jeova from we hem i God ya we i defren olgeta. Ol Sam 113, 114, mo 115, we oli haf blong sikis ‘Halel Sam’ oli soemaot samting ya. Skul blong Hilel we ol tija blong Loa oli stap go long hem i talem se, ol man oli singsing Ol Sam 113 mo 114 long taem blong Pasova afta we oli kafsaedem namba tu kap blong waen mo eksplenem mining blong lafet ya blong Pasova we ol man Jyu oli stap mekem. Ol man oli stap singsing long Sam 115 go kasem 118, afta we oli kafsaedem namba fo kap blong waen. (Lukluk Matyu 26:30.) !Oli givim nem ya “Halel Sam” from we oltaem oli stap yusum bakegen tok ya Aleluia!—“!Presem Ja!”
4. ?Wanem mining blong tok ya “Aleluia,” mo hamas taem i kamaot long Baebol?
4 “!Aleluia!” i kamaot long wan Hibru tok we i stap 24 taem long Ol Sam. Long narafala ples long Baebol, wan Grik tok blong hem i kamaot fo taem long saed blong glad we ol man oli kasem taem Bigfala Babilon, hemia olgeta gyaman skul blong wol oli lus olgeta mo fasin glad long taem ya we Jeova God i statem rul olsem King. (Revelesen 19:1-6) Taem yumi stap lukluk tri long ol Halel Sam ya, maet i gud yumi tingbaot se yumi stap singsing long ol singsing ya blong presem Jeova.
!Presem Ja!
5. Ol Sam 113 i ansa long wanem kwestin, mo tok ya long Ol Sam 113:1, 2 i stret long hu?
5 Sam 113 i ansa long kwestin ya se, ?From wanem yumi mas presem Jeova? Hem i stat wetem oda ya se: “!Yumi presem [Jeova, NW]! Yumi ol man blong wok blong [Jeova, NW], yumi presem nem blong hem. Bambae yumi presem nem blong hem oltaem, i stat naoia, gogo i no save finis.” (Ol Sam 113:1, 2) “!Aleluia!” Yes, “!Presem Ja!” Oda ya i stret long ol man blong God long “taem blong en.” (Daniel 12:4) Stat naoia mo gogo i no save finis, ol man bambae oli leftemap nem blong Jeova long olgeta ples long wol. Ol Wetnes blong hem naoia oli stap talemaot se Jeova i God, Kraes i King, mo Kingdom i stanap finis long heven. Devel Setan mo ogenaesesen blong hem oli no save blokem fasin ya blong presem Jeova.
6. ?Olsem wanem fasin blong presem Jeova i stat ‘long saed blong is go kasem long saed blong wes’?
6 Singsing blong presem God bambae i gohed gogo kasem taem ya we Jeova bambae i mekem i fulumap wol. “Yumi evriwan, i stat long is, i go kasem long wes, yumi presem nem blong [Jeova, NW].” (Ol Sam 113:3) Samting ya i minim moa long fasin blong wosip we ol man long wol oli stap mekem evri dei. San i stap girap long saed blong is mo i stap godaon long saed blong wes, i kavremap olgeta ples long wol. Long olgeta ples we san i saen long hem, bambae i no longtaem ol man we oli fri long kalabus long gyaman skul mo ogenaesesen blong Setan oli presem nem blong Jeova. Yes, ol Wetnes blong Jeova we tabu speret i makemaot olgeta wetem olgeta we bambae oli kam pikinini blong King, Jisas Kraes, long wol, naoia oli singsing finis long singsing ya bambae i no save finis samtaem. !Hemia wan gudfala wok blong olgeta olsem ol man blong singsing blong presem Jeova!
Jeova i Hae Tumas
7. ?Wanem tu samting we i makem se God i hae moa olsem Ol Sam 113:4 i makem?
7 Man blong raetem Ol Sam i gohed blong talem se: “Hem nomo i stap rulum olgeta man long evri ples, nem blong hem i hae we i hae, i bitim skae antap.” (Ol Sam 113:4) Samting ya i soem tu samting we i makem se God i hae moa: (1) Long saed blong Jeova, Wan we i Hae Olgeta, “i stap rulum olgeta man long evri ples,” olgeta man oli olsem wan drop blong wora long wan baket mo oli olsem ases nomo long skel, (Aesea 40:15; Daniel 7:18) (2) nem blong hem i hae moa bitim skae antap, from we ol enjel oli stap mekem wil blong hem.—Ol Sam 19:1, 2; 103:20, 21.
8. ?From wanem mo olsem wanem Jeova i gat fasin daon blong lukluk ol samting long heven mo long wol?
8 From we God i hae tumas, man ya blong raetem Ol Sam i talem se: “?Hu i olsem Jeova, God ya blong yumi, we i stap sidaon long ples blong hem antap? Hem i gat fasin daon blong hem i stap antap long heven mo lukluk i kamdaon long wol.” (Ol Sam 113:5, 6, NW) God i hae tumas from samting ya hem i mas mekem hem i stap daon blong hem i luk ol bisnes we oli stap kamaot long heven mo long wol. Nating se God i no daon moa long wan man no i stap aninit long ol narafala man, hem i soem fasin daon taem hem i stap soem fasin sore mo gat filing long ol sinman we oli daon moa. Hem i givim Pikinini blong hem, Jisas Kraes, olsem “wan sakrifaes blong kavremap ol sin” blong ol Kristin we tabu speret i makemaot olgeta mo olgeta man long wol. Hemia i wan saen blong soem fasin daon we Jeova i gat.—1 Jon 2:1, 2, NW.
Jeova i Sore Long Ol Man
9, 10. Olsem wanem God ‘i mekem ol man we oli no gat nem, oli save kampani wetem ol pikinini blong king’?
9 Blong makem fasin sore blong God, man blong raetem Ol Sam i gohed blong talem se Jeova i “stap leftemap ol puaman, i stap tekemaot olgeta long ol trabol blong olgeta. Hem i stap mekem olgeta ya oli kampani wetem ol pikinini blong king, we oli haeman blong ol man blong hem. Hem i stap mekem ol woman we oli no save karem pikinini oli stap long hom blong olgeta, oli glad. Hem i stap mekem olgeta oli karem pikinini, nao oli glad tumas from.” (Ol Sam 113:7-9) Ol man blong Jeova oli bilif se hem i save givhan long ol stret man we oli pua, hem i save mekem se oli haremgud long laef blong olgeta, mo hem i save givim ol samting we oli rili nidim mo ol samting we oli wantem. ‘Hemia we i Hae mo i Antap Olgeta i stap leftemap tingting blong ol man we oli no gat nem mo mekem olgeta we oli harem nogud long hat blong olgeta oli haremgud bakegen.’—Aesea 57:15.
10 ?Olsem wanem Jeova i stap ‘leftemap ol puaman mo mekem olgeta oli kampani wetem ol pikinini blong king’? Sipos God i wantem, hem i save mekem ol man blong hem oli gat hae ples we i stret long ol pikinini blong king. Hem i mekem olsem wetem Josef, we hem i kam man blong lukaot long kakae long Ijip. (Jenesis 41:37-49) Long Isrel, fasin blong sidaon wetem ol pikinini blong king, no ol man we oli gat paoa long medel blong ol man blong Jeova, hem i wan samting blong tinghae long hem. Ol man ya olsem ol Kristin elda tede, God i stap givhan mo blesem olgeta.
11. ?From wanem yumi save talem se Ol Sam 113:7-9 i stap tokbaot ol man blong Jeova long taem blong yumi?
11 ?Olsem wanem blong ‘mekem woman we i no save karem pikinini i glad’? God i givim wan boe long Ana, woman ya we i no save karem pikinini—boe ya nao Samuel, we Ana i givim blong mekem wok blong God. (1 Samuel 1:20-28) Bigfala mining se, stat wetem Jisas mo long taem ya we tabu speret i kafsaed long ol disaepol blong hem long Pentekos long yia 33, woman blong God we i minim Saeon long heven, i stat blong karem ol pikinini long saed blong speret. (Aesea 54:1-10, 13; Ol Wok 2:1-4) Mo olsem we God i stanemap bakegen ol man Jyu long ples blong olgeta afta we oli bin kalabus long Babilon, long 1919 God i mekem ol tabu haf blong “Isrel blong God” i aot long kalabus long Babilon mo i blesem bigwan olgeta long saed blong speret, taswe ol tok blong Ol Sam 113:7-9 i stret long olgeta. (Galesia 6:16) Smolhaf blong Isrel long saed blong speret we oli trufala Wetnes blong Jeova mo ol fren blong olgeta we oli gat hop blong laef long wol oli talem wetem fulhat blong olgeta ol las tok blong Ol Sam 113 se: “!Oltaem yumi mas presem [Jeova, NW]!”
Soem We Jeova i Hae Moa
12. ?Olsem wanem Ol Sam 114 i soemaot we Jeova i hae moa?
12 Ol Sam 114 i tokbaot ol defren samting we oli hapen long ol man Isrel blong soem se Jeova i hae moa. Man blong raetem Ol Sam i singsing olsemia se: “Yumi ya, yumi ol man Isrel, yumi ol laen we i kamaot long Jekob, yumi ol pikinini we i kamaot biaen long Juda. Be taem yumi aot long Ijip, ples ya we i no ples blong yumi, God i mekem yumi kam tabu, yumi man blong hem nomo, we hem nomo i God blong yumi.” (Ol Sam 114:1, 2) God i mekem Isrel i kam fri long wok slef long ol man Ijip, we lanwis blong olgeta i no sem mak long lanwis blong ol man Isrel. Fasin blong mekem ol man blong Jeova hemia Juda mo Isrel long tok ya oli fri, i soemaot we God i save mekem ol man blong hem tede oli fri.
13. ?Olsem wanem Ol Sam 114:3-6 i soemaot we Jeova i gat paoa mo fasin blong hem i stret long ol samting we Isrel i kasem?
13 Hae rul blong Jeova long olgeta samting we hem i wokem, i klia nomo long ol tok ya se: “Red Si i lukluk, nao i ronwe, mo Jodan Reva tu, hem i no moa ron. Ol bigbigfala hil oli stap jyajyam olsem ol man sipsip, mo ol smosmol hil oli stap jyajyam olbaot olsem ol pikinini blong sipsip. !Red Si! ?Wanem nao i mekem yu yu ronwe? !Jodan Reva! ?From wanem yu no moa ron? !Ol bigbigfala hil! ?From wanem yufala i stap jyajyam olsem ol man sipsip? !Ol smosmol hil! ?From wanem yufala i stap jyajyam olbaot olsem ol pikinini blong sipsip?” (Ol Sam 114:3-6) Red Si “i ronwe” taem God i openem rod long ol man blong hem oli pastru long hem. Nao Isrel i luk bigfala paoa blong Jeova agensem ol man Ijip taem oli ded long wora we i kambak bageken. (Eksodas 14:21-31) Long wan rod we i sem mak blong soem paoa blong God, Jodan Reva i “no moa ron,” i letem ol man Isrel i gokros blong go insaed long Kenan. (Josua 3:14-16) ‘Ol hil oli stap jyajyam olsem ol man sipsip’ taem smok i kavremap Hil blong Sinae mo i muvmuf long taem ya we God i givim Loa. (Eksodas 19:7-18) Kolosap long en blong singsing blong hem, man blong raetem Ol Sam i askem ol kwestin, maet hem i stap soemaot se solwora, reva, ol bigbigfala hil, mo ol smosmol hil oli seksek taem oli luk paoa blong Jeova.
14. ?Paoa blong Jeova i mekem wanem long Meriba mo Kades, mo olsem wanem samting ya i gat paoa long laef blong ol man blong hem tede?
14 Man blong raetem Ol Sam i gohed yet blong singsing blong tokbaot bigfala paoa blong Jeova se: “!Graon! God ya we i Masta blong yumi, hem i save mekem ol ston oli kam hol blong wora, mo i save mekem ol klif oli kam springwora. Taem hem bambae i kamtru, i gud yu ona long hem, yu seksek, yu foldaon long fes blong hem.” (Ol Sam 114:7, 8) Man blong raetem Ol Sam i soemaot olsem wan saen nomo se ol man oli mas fraet long Jeova, Masta ya mo Hae Rula blong heven mo wol. Hem i “God blong Jekob,” no Isrel, sem mak olsem we hem i God blong Isrel long saed blong speret mo ol fren blong olgeta we oli gat hop blong laef long wol. Long drae ples long Meriba mo Kades, Jeova i soem paoa blong hem taem hem i wokem merikel blong givim wora long ol man Isrel, hem i “mekem ol ston oli kam hol blong wora, mo i save mekem ol klif oli kam springwora.” (Eksodas 17:1-7; Namba 20:1-11) Ol tok ya blong mekem ol man oli tingtingbak long bigfala paoa blong Jeova mo fasin blong hem blong lukaotgud long ol man i mekem se ol Wetnes blong hem oli bilif long hem.
Hem i No Olsem Ol Narafala God We Ol Man Oli Wokem
15. ?Olsem wanem oli singsing long Ol Sam 115?
15 Sam 115 i pulum yumi blong presem Jeova mo trastem Hem. Sam ya i talem se blesing mo help oli stap kamaot long hem nomo mo i pruvum se ol narafala god oli no save givhan long ol man. Maet ol man oli mekem tu grup blong singsing long Sam ya. I olsem se, maet wan man i singsing olsem se: “Yumi evriwan we yumi stap mekem wosip long Hae God, yumi mas trastem hem.” Nao maet kongregesen i ansa se: “Oltaem hem i stap givhan long yumi, i stap lukaotgud long yumi.”—Ol Sam 115:11.
16. ?Wanem samting i defren long saed blong Jeova mo ol narafala god blong ol nesen?
16 Yumi no mas leftemap nem blong yumi wanwan, be yumi mas leftemap nem blong Jeova, God we i gat kaengud fasin, mo trufala lav, mo fasin we hem i stap tru oltaem. (Ol Sam 115:1, NW) Maet ol enemi oli tok blong daonem hem se: “?Wehem God ya blong yufala?” Be ol man blong Jeova oli save ansa se: ‘God blong mifala, hem i stap long heven, mo hem i save mekem evri samting we hem i wantem mekem.’ (Vas 2, 3) Be ol narafala god blong ol nesen oli no save mekem wan samting, from we oli stap wokem olgeta long selva mo gol. Nating se oli gat ol maot, ol ae, ol sora, be oli no save toktok, oli no save lukluk, oli no save harem wan samting. Oli gat ol nus be oli no save smelem wan samting, oli gat leg be oli no save wokbaot, oli gat trot be oli no save toktok. Olgeta we oli stap mekem ol god ya we oli no gat paoa mo tu olgeta we oli stap trastem olgeta bambae oli kam olsem ol god ya.—Vas 4 kasem 8.
17. ?From we ol dedman oli no save presem Jeova, yumi mas mekem wanem, mo wetem wanem tingting?
17 Nekiswan tok i mekem se ol man oli trastem Jeova olsem Man blong Halpem man mo olsem Sil we i protektem ol man Isrel, ol pris long haos blong Eron, mo olgeta we oli stap fraetgud long God. (Ol Sam 115:9-11) Yumi ya we yumi fraetgud long Jeova, yumi save onagud long God mo yumi fraet blong mekem hem i harem nogud long yumi. Mo tu yumi bilif se Hemia we “i mekem heven mo wol” i stap blesem ol trufala man blong wosip long hem. (Vas 12 kasem 15) Heven i ples we jea blong king we hem i sidaon long hem i stap, be wol ya God i mekem blong ol trufala man blong hem mo olgeta we oli stap obei long hem oli stap long hem. From we ol dedman oli no save toktok, oli no moa gat tingting blong presem Jeova, yumi we yumi stap laef yet, yumi mas presem Jeova long fasin fasgud mo stap tru long hem fulwan. (Eklesiastis 9:5) Olgeta ya nomo we oli stap presem Jeova bambae oli haremgud long laef we i no save finis mo oli save “presem [Jeova, NW]” gogo i no save finis, oli save leftemap hem “gogo i no save finis.” Taswe yumi save joen fulwan wetem olgeta we oli stap folem tok ya se: “!Oltaem yumi mas presem [Jeova, NW]!”—Ol Sam 115:16-18.
Ol Gudfala Fasin Blong Jeova
18, 19. ?Olsem wanem ol fasin blong Jeova oli makemaot hem se hem i defren long ol gyaman god?
18 Jeova i no olsem ol narafala god we oli no gat laef, hem i God we i laef, i gat ol gudfala fasin. Hem i stampa blong fasin ya blong laekem tumas ol man mo hem i ‘gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap laekem man tumas.’ (Eksodas 34:6; 1 Jon 4:8) !Hem i defren long rabis god ya blong ol man Kenan, Molek, we ol man oli stap bonem ol pikinini olsem sakrifaes i go long hem! God ya Molek we oli wokem i gat bodi olsem man mo hed blong hem i olsem buluk. Oli stap bonem faea insaed long god ya gogo i hot we i hot, mo oli sakem ol pikinini i go long ol han we oli wokem olsem we i wantem kasem wan samting, mo ol pikinini oli foldaon i go insaed long ples we faea i stap bon long hem aninit. Be tingting ya blong bonem ol man olsem sakrifaes “neva hat blong [Jeova] i tingbaot samting ya” from we Jeova i gat lav mo i stap sore long ol man.—Jeremaea 7:31.
19 Ol nambawan fasin blong Jeova tu hemia stret fasin, waes, mo bigfala paoa. (Dutronome 32:4; Job 12:13; Aesea 40:26) ?Olsem wanem long ol store blong ol god blong ol hiten man? Ol god mo ol woman god blong ol man Babilon oli no gat stret fasin, oli stap givimbak long ol man. Ol god blong ol man Ijip oli no soemaot waes be oli gat ol slak fasin olsem ol man nomo. Yumi no sapraes long samting ya, from we ol man we oli stap talem se oli waes, be oli “no moa gat hed” oli stap wokem ol gyaman god mo ol woman god ya. (Rom 1:21-23) Ol god blong ol man Grik oli stap agensem olgeta nomo. Eksampel, long ol kastom store, god ya Seus i yusum paoa blong hem blong tekemaot papa blong hem, Kronus, long jea blong king, we hem i agensem stret papa blong hem, Uranus. !Hem i wan blesing blong presem mo mekem wok blong Jeova, God ya we i laef mo i tru, we hem i soemaot lav we i stretgud olgeta, stret fasin, waes, mo paoa!
I Stret Blong Presem Jeova Blong Olwe
20. ?Wanem olgeta risen we King Deved i givim blong ol man oli presem nem blong Jeova?
20 Olsem ‘Halel Sam’ i soemaot se, yumi mas presem Jeova gogo i no save finis. Sem mak, taem Deved mo ol fren blong hem long Isrel oli givim ol samting blong olgeta blong bildim tempel bakegen, hem i talem fored long kongregesen se: “O Jeova God blong Isrel, papa blong mifala, i gud blong presem yu gogo i no save finis. From we Jeova, yu yu bigfala tumas mo yu yu gat paoa mo yu yu gud tumas mo yu yu hae mo yu yu gat nem. From we evri samting long heven mo long wol oli blong yu. O Jeova, kingdom hem i blong yu, mo Hemia we i stap leftemap yu olsem hed blong olgeta samting, hem tu i blong yu. Olgeta rij mo ol gudfala samting oli kamaot long yu, mo yu yu jif antap long evri samting. Mo long han blong yu i gat paoa, mo yu yu gat gudhan blong mekem samting i bigwan mo blong givim paoa long olgeta samting. Mo naoia, O God blong mifala, mifala i stap talem tangkyu long yu mo mifala i stap presem nem blong yu.”—1 Kronikel 29:10-13.
21. Revelesen 19:1-6 i soemaot wanem long saed blong olgeta long heven we oli presem Jeova?
21 Bambae olgeta long heven oli presem mo gohed blong talemaot ol gudfala wok blong Jeova gogo i no save finis. Aposol Jon i harem “plante man tumas oli stap long heven, oli stap singaot” se: “!Yumi presem God! God blong yumi, hem i sevem yumi finis, nem blong hem i hae we i hae, mo olgeta paoa i blong hem nomo. Fasin blong hem blong jajem man i tru, mo i stret olgeta. Woman ya blong rod [Bigfala Babilon] we i nogud we i nogud, we i stap mekem wol i kam nogud long ol rabis fasin blong hem, God i jajem hem finis, i givim panis long hem finis. God i givimbak long hem finis, from ol man blong hem, from we woman ya i kilim olgeta oli ded.” Mo bakegen oli talem se: “!Yumi presem God!” Nao oli mekem, “ol twantefo elda ya wetem ol fo anamol ya.” Wan tok we i kamaot long bigfala jea blong God, i talem se: “Olgeta man blong wok blong God, wetem olgeta we oli stap mekem wosip long hem, olgeta we oli haeman wetem olgeta we oli no gat nem, yufala i mas presem God blong yumi.” Nao Jon i gohed, i talem se: “Nao mi harem wan noes we i olsem we plante man oli stap singaot bigfala, i olsem noes blong bigfala solwora we i stap brok long rif, i olsem noes blong bigfala tanda. Mi harem olgeta oli stap talem se ‘Hae God ya we i Masta blong yumi mo i gat olgeta paoa, [hem i stat finis blong rul olsem king, NW].’ ”—Revelesen 19:1-6.
22. ?Olsem wanem ol man bambae oli presem Jeova long nyufala wol ya we hem i promes long hem?
22 !I stret nomo we bigfala kampani blong heven i presem Jeova! Long nyufala wol blong hem we naoia i kolosap, olgeta we bambae oli laef bakegen long ded bambae oli joen long olgeta we oli laef tru long en blong rabis wol ya blong oli presem Ja. Ol bigfala hil bambae oli leftemap hed blong olgeta blong singsing blong presem God. Ol hil we ol gras oli gru long hem mo ol tri we oli stap karem frut bambae oli singsing blong presem hem. !Yes, evri samting we God i wokem we oli stap laef mo oli stap pulum win bambae oli presem nem blong Jeova long bigfala singsing blong Aleluia! (Ol Sam 148) ?Bambae voes blong yu i kamaot tu long medel blong hif man ya? Bambae i olsem sipos yu stap mekem wok blong Ja wetem ol man blong hem. Yu yu mas mekem olsem long laef blong yu, from we i no gat man we i olsem Jeova, God ya blong yumi.
?Bambae Yu Ansa Olsem Wanem?
◻ ?From wanem yumi mas presem Jeova God?
◻ ?Olsem wanem Jeova i no olsem ol narafala god?
◻ ?Wanem i soem se Jeova i gat fasin sore?
◻ ?Olsem wanem Jeova i defren long ol narafala god we oli no laef mo ol gyaman god?
◻ ?From wanem yumi save talem se bambae olgeta long heven mo long wol oli presem Jeova gogo i no save finis?
[Tok Blong Pija Long Pej 9]
Ol man oli stap singsing long Halel Sam long taem blong lafet blong Pasova