?God i Stap Laekem Wanem Kaen Man?
YUMI evriwan i wantem se ol fren blong yumi oli laekem yumi. Long saed blong wan Kristin, hem i wantem mekem God i laekem hem. Sam 84:11 i tokbaot Jeova God se: “Yu yu stap blesem mifala long gladhat blong yu, yu stap leftemap nem blong mifala. Yu yu no save holemtaet ol gudgudfala samting blong yu blong yu no givim long olgeta we oli stap mekem ol stret fasin, oltaem yu stap givim ol samting ya i go long olgeta.” Taem Jisas i bon, ol enjel blong heven oli singaot bigfala from glad, oli promes se “!pis i stap wetem ol man long wol we [God] i laekem olgeta!”—Luk 2:14, Moffatt.
?Be God i stap laekem wanem kaen man? ?Ol mak blong God oli sem mak long ol mak blong man? Yumi save se ol mak blong hem oli defren, olsem haf bifo i bin soemaot finis long yumi. Be, from we ol Kristin oli “mas traehad blong folem fasin blong [God],” i gud yumi askem yumi wanwan se, ?Mi mi stap laekem ol man we God i laekem olgeta, no mi mi stap traem skelem ol man folem ol mak blong wol? (Efesas 5:1) Blong mekem Jeova i laekem mo i glad long yumi, yumi mas lukaotgud se yumi stap skelem ol samting olsem we hem i mekem.
Ol Mak Blong God Oli Hae Moa
Aposol Pita i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem.” Mo bakegen aposol Pol i talem klia se God “i stat long wan man nomo, nao i mekem olgeta man blong wol.” (Ol Wok 10:34, 35; 17:26) Taswe i stret nomo blong talem se olgeta man oli sem mak nomo long lukluk blong God, nating se bodi blong olgeta i olsem wanem. Olsemia nao, bambae i no stret sipos wan Kristin i stap laekem moa wan man from kantri, kala no laen blong hem. Be defren nao, bambae hem i folemgud Eksampel blong Jisas Kraes, we ol enemi blong hem oli talemaot stret se hem i no stap tingbaot we sam man i hae moa, no sam oli daon moa.—Matyu 22:16.
Tok ya “afsaed long skin” samtaem oli yusum blong tokbaot samting we i no impoten. Kala blong skin i olsemia. Hem i no impoten. Kala blong man i no soemaot ol fasin blong man no i no soem ol fasin we oli stap insaed long man. Sipos yumi wantem jusum man blong yumi joen, yumi kakae, no yumi sekhan wetem hem, yumi no mas lukluk kala blong man. Tingbaot, gel ya we i talem sam long ol naesfala tok mo ol tok blong lav we neva i gat ol tok we oli bin raetem finis olsemia, hem i tokbaot hem wan i se: “Mi mi wan blak gel, be mi naes, . . . mi mi saen, from we san i saen long mi.” (Sing blong Solomon 1:5, 6) Laen no kala blong man i no wan stret samting blong yumi tingbaot blong laekem man from. Samting we i impoten moa se, sipos man i fraet long God mo i stap mekem ol stret fasin.
?God i tingbaot ol rij samting olsem wanem? God i laekem mo i glad moa long Pikinini blong hem, Jisas Kraes, i bitim ol narafala man. Be, taem Jisas i stap long wol hem i “no gat ples blong [hem], blong go slip long hem.” (Matyu 8:20) Hem i no gat pis graon, ol haos, ol garen, ol tri we oli stap karem frut no ol anamol. No gat, be Jeova i tinghae long hem mo hem i leftemap hem blong kasem wan wok we i antap moa long olgeta man long heven mo wol. Be, God nomo i hae moa long hem.—Filipae 2:9.
God i laekem Jisas Kraes from we hem i rij, i no long saed blong plante samting long bodi be long ol gudgudfala wok. (Lukluk 1 Timote 6:17, 18.) Jisas i talem long ol man blong hem, i se: “I nogud yufala i stap hivimap ol gugudfala samting blong yufala long wol ya blong kam rijman. Long ples ya i gat kakros oli save kam kakae, mo rosta tu i save spolem ol samting. Mo i gat man blong stil we oli save brekem haos, blong oli stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting. Mo ol man blong stil oli no save kam brekem haos, blong oli stil.” (Matyu 6:19, 20) Taswe, ol Kristin oli no mas laekem olgeta ya nomo we oli rij long ol samting blong wol, be bambae oli no mekem i defren long ol man from ol rij samting blong wol we oli gat. Bambae oli laekem olgeta we oli rij long saed blong God nating se oli rij no oli pua long saed blong bodi. Yu no mas fogetem se: “God i jusumaot ol man we ol man oli luk se oli puaman, blong mekem oli kam rijman long fasin blong bilif. Mo hem i givim raet long olgeta ya blong bambae oli go insaed long nyufala wol ya we hem i king long hem.” (Jemes 2:5) Sipos yu holem tingting ya blong God, bambae yu no save foldaon samtaem long fasin ya we ol man oli stap laekem moa ol man we oli rij long saed blong bodi.
Long saed blong edukesen, Baebol i soemaot klia se God i wantem se yumi faenem save mo waes, mo Jisas Kraes i bigfala tija we i bitim ol narafala tija long wol. (Proveb 4:7; Matyu 7:29; Jon 7:46) Be God i stap laekem ol man i no from waes no save blong olgeta long saed blong wol. No gat. Pol i talem long yumi se: “I no gat plante long yufala, we long fes blong ol man, yufala i waes man. . . . Be God i jusumaot ol samting we ol man blong wol oli stap talem se oli krangke, blong mekem ol man we oli gat waes oli sem.”—1 Korin 1:26, 27.
God i laekem olgeta we oli gat gudfala save, i no long ol samting we ol man oli stap lanem long ol hae skul, be save long saed blong “klin lanwis” blong trutok we i stap long Tok blong God, Baebol. (Sefanaea 3:9) Yes, Jeova nao i yusum wan program blong skul we i go long olgeta ples long wol blong tijim ol man blong hem tede. Olsem we profet Aesea i bin talem finis, ol man long olgeta nesen oli harem taem oli talem se: “Yufala i kam, blong yumi go antap long bigfala hil blong Jeova, long haos blong God blong Jekob. Mo hem bambae i tijim yumi long ol fasin blong hem, mo bambae yumi wokbaot long ol rod blong hem.” Taswe, ol Kristin oli no leftemap edukesen long wol, be bambae ol Kristin oli laekem ol man we oli stap soem long toktok mo fasin blong olgeta se oli rili man we “Jeova i tijim olgeta.” Taem oli mekem olsem, bambae oli haremgud long ‘plante pis’ we God i givim.—Aesea 2:3; 54:13.
Yumi Save Mekem God i Laekem Yumi
Yes, ol mak we God i folem blong laekem ol narafala man oli defren tumas long ol mak blong man. Taswe, yumi mas traehad blong folem ol rod blong hem sipos yumi wantem se hem i laekem yumi. Samting ya i minim se yumi mas lanem blong lukluk ol narafala man olsem we God i stap lukluk olgeta be i no olsem tingting blong ol man, olsem we oli stap tingbaot olgeta nomo mo oli stap tinghae long sam man bitim ol narafala. ?Olsem wanem yumi save mekem samting ya?
Jeova God i stap lukluk hat blong man mo hem i laekem olgeta we oli soemaot ol fasin olsem lav, gudfala fasin, fasin kaen, mo longfala tingting. Yumi mas mekem olsem tu. (1 Samuel 16:7; Galesia 5:22, 23) Yumi mas traehad blong lukluk fasin blong man, olsem we yumi naf blong mekem, mo yumi no mas lukluk kala no laen blong man. Yumi no mas laekem olgeta ya nomo we oli rij long saed blong bodi, yumi mas tingbaot tingting blong God long saed blong ol rij samting mo yumi mas traehad blong kam ‘rijman long ol gudfala wok. Yumi mas gat gladhat blong givhan long ol man, mo blong seraot ol samting blong yumi.’ (1 Timote 6:18) Blong yumi mekem God i glad long yumi, yumi mas gohed blong lukaot stret save long saed blong God mo Pikinini blong hem, Jisas Kraes. Yumi mas gat gudfala save long klin lanwis blong trutok. (Jon 17:3, 17) Taem yumi mekem olsem, bambae yumi save stap long medel blong ol man we God i stap laekem olgeta tu.