‘Tekem Wan Long Ol Ten Hif i Kam Insaed Long Haos Blong Kipim Ol Samting’
“Testem mi, plis, long samting ya, . . . yu luk bambae mi mi openem doa blong heven blong bambae ol blesing oli kamdaon long yufala.”—MALAKAE 3:10.
1. (a) ?Long faef handred B.K.T., Jeova i askem wanem long ol man blong hem? (b) ?Long faswan handred yia K.T., wanem samting i kamaot taem Jeova i kam long tempel blong klinim?
LONG faef handred yia B.K.T., ol man Isrel oli no stap tru long Jeova. Oli no givim wan long ol ten hif blong ol samting we oli gat mo oli tekem ol anamol we oli sik i go long tempel olsem ol sakrifaes. Nating se oli mekem olsem, Jeova i givim promes se sipos oli givim olgeta wan hif blong ol ten hif samting we oli gat i go insaed long haos blong kipim ol samting, hem bambae i kafsaedem blesing long olgeta gogo oli no moa nidim. (Malakae 3:8-10) Kolosap 500 yia biaen, Jeova i kam insaed long tempel long Jerusalem blong klinim. Jisas, we i man blong karem tok blong kontrak, hem i mekem wok ya long nem blong Jeova. (Malakae 3:1) Ful nesen ya Isrel i no kasem blesing, be sam man we oli kambak long Jeova oli kasem bigfala blesing. (Malakae 3:7) Oli kasem tabu speret we i makemaot olgeta blong oli kam olsem ol pikinini blong Jeova long saed blong speret, wan nyufala wok, “Isrel blong God.”—Galesia 6:16; Rom 3:25, 26.
2. ?Wetaem Malakae 3:1-10 i mas kamtru bakegen, mo from samting ya yumi mas mekem wanem?
2 Kolosap 1,900 yia biaen, Jisas i kam King long Kingdom blong God long heven long 1914, mo ol tok blong God long Malakae 3:1-10 oli stat blong kamtru bakegen. From impoten samting ya we i kamaot, God i askem ol Kristin tede blong tekem wan long ol ten hif blong ol samting we oli gat i kam insaed long haos blong kipim ol samting. Sipos yumi mekem olsem, bambae yumi haremgud long ol blesing gogo yumi no moa nidim.
3. ?Hu ya man blong karem tok we i stap mekemrere rod bifo we Jeova i kam (a) long faswan handred yia? (b) bifo long faswan bigfala faet blong wol?
3 Jeova i tokbaot taem ya we bambae hem i kam insaed long tempel blong hem, i se: “!Luk! Mi mi stap sanem man blong karem tok blong mi. Mo hem i mas mekem wan rod i rere long fored blong mi.” (Malakae 3:1) Tok profet ya i kamtru long faswan handred yia taem Jon Baptaes i kam long Isrel mo i stap prij. Hem i stap talem se ol man oli mas tanem tingting blong olgeta from ol sin blong olgeta. (Mak 1:2, 3) ?Bambae i gat wok blong mekem rod i rere blong Jeova i kam namba tu taem long tempel blong hem? Yes. Long ol yia we oli ron bifo long faswan bigfala faet long wol, ol Baebol Studen nao oli stap tijim ol klin tijing mo oli talemaot klia ol gyaman tijing we oli daonem God, olsem tijing blong Triniti mo helfaea. Oli givimaot woning tu long saed blong en blong taem blong ol Hiten Man long 1914. Plante man oli lesin long ol man ya blong karem laet blong trutok.—Ol Sam 43:3; Matyu 5:14, 16.
4. ?Wanem kwestin i mas gat ansa blong hem long dei blong Masta?
4 Yia 1914 i statem wanem Baebol i kolem: “dei blong Masta.” (Revelesen 1:10, NW) Bambae i gat ol bigbigfala samting oli save kamaot long dei ya, olsem “slef ya we i stret mo waes” i kam long klia ples mo wok blong putumap hem i “lukaot long olgeta samting blong [Masta.]” (Matyu 24:45-47) Long 1914, plante handred skul oli talem se oli Kristin. ?Wanem grup Masta, Jisas Kraes, bambae i luksave, olsem slef ya blong hem we i stret mo waes? Ansa long kwestin ya bambae i kamaot taem Jeova i kam long tempel blong hem.
Hem i Kam Long Tempel Long Saed Blong Speret
5, 6. (a) ?Jeova i kam long wanem tempel blong klinim? (b) ?Krisendom i kasem wanem jajmen long Jeova?
5 ?Be, hem i kam long wanem tempel? I klia we hem i no wan prapa tempel we i stap long Jerusalem. Laswan long ol tempel ya ol man oli spolem finis long yia 70 K.T. Be Jeova i gat wan tempel we i bigwan moa. Tempel long Jerusalem hem i pija nomo blong hem. Pol i tokbaot bigfala tempel ya mo hem i soemaot olsem wanem hem i rili bigwan, ples ya we i tabu we i tabu i stap long heven mo yad blong hem i stap long wol ya. (Hibrus 9:11, 12, 24; 10:19, 20) Hemia nao bigfala tempel long saed blong speret we Jeova i kam insaed blong mekem wok blong klinim—Lukluk Revelesen 11:1; 15:8.
6 ?Wetaem samting ya i kamaot? Hem i kamaot long 1918a olsem ol pruf we oli stap oli soemaot. ?Wanem frut i kamaot from? Long saed blong Krisendom, Jeova i luk hem olsem wan ogenaesesen we han blong hem i fulap long blad, wan rabis fasin blong wosip we i stap joen wetem wol ya, hem i flasem hem wan wetem ol rij samting blong wol mo hem i stap spolem ol puaman, hem i no stap mekem klin wosip be hem i stap tijim ol hiten bilif. (Jemes 1:27; 4:4) Jeova i yusum Malakae blong givim woning se: “Bambae mi mi hareap blong wetnes agens long ol man blong mekem posen mo long ol man blong slip wetem narafala woman we i no woman blong olgeta, mo agens long olgeta we oli stap mekem gyaman promes, mo agens long ol man we oli stap stilim ol pei blong wan man blong wok, wetem wido mo boe we i no gat papa.” (Malakae 3:5) Krisendom i mekem olgeta samting ya mo hem i mekem i nogud moa. Long 1919 i kam klia we Jeova i jajem hem i lus blong olwe wetem ol narafala haf blong Bigfala Babilon, olgeta gyaman skul blong wol. Stat long taem ya, woning i goaot long ol man we hat blong olgeta i stret, i se: “Ol man blong mi, yufala i kam. Yufala i kamaot long hem.”—Revelesen 18:1, 4.
7. ?Jisas i luksave hu we i olsem slef ya blong hem we i stret mo waes?
7 ?Be, hu ya i slef ya we i stret mo waes? Hem i stat long faswan handred yia wetem smol grup blong ol man we oli lesin long wetnes wok blong Jon Baptaes mo Jisas, man blong karem tok blong kontrak. Long taem blong yumi, hemia sam long ol taosen man we oli bin lesin long wok blong mekem rod i rere we ol Baebol Studen oli stap mekem long ol yia we oli ron bifo long 1914. Olgeta ya oli bin stanap strong long ol nogud traem long taem blong faswan bigfala faet long wol, mo oli soemaot se hat blong olgeta i stap wetem Jeova.
Wok Blong Klinim
8, 9. ?Long 1918, slef ya we i stret mo waes i mas klin long wanem samting, mo wanem promes Jeova i mekem long saed ya?
8 Be grup ya i mas kam klin. Sam man we oli bin joen wetem olgeta, biaen oli kam enemi blong bilif ya mo oli mas klinimaot olgeta. (Filipae 3:18) Sam narafala oli no wantem karem ol responsabiliti we i joen wetem wok blong Jeova mo sloslou oli lego. (Hibrus 2:1) Narafala samting tu se, i gat sam fasin blong Babilon we oli mas finis long olgeta. Mo tu wok blong slef ya we i stret mo waes i mas kam klin. Oli mas lanem mo folem fasin ya blong no joen nating long wol ya. Mo taem fasin blong wol ya i stap kam moa nogud, olgeta ya oli mas faet strong blong no letem ol nogud fasin oli kam spolem ol kongregesen long saed blong fasin mo speret.—Lukluk Jud 3, 4.
9 Yes, oli mas kam klin, be Jeova i bin promes long saed blong King Jisas se: “Mo hem i mas sidaon olsem man we i jekem mo klinimaot selva. Hem i mas klinim ol pikinini blong Livae, yes, hem i mas klinim olgeta olsem we man i klinimaot gol mo selva. Nao tru ya, bambae oli kam man blong Jeova, we oli givim wan presen long stret fasin.” (Malakae 3:3) Stat long yia 1918, Jeova i mekem promes blong hem i kamtru. Hem i yusum man ya blong karem tok blong kontrak, mo i klinim ol man blong hem.
10. ?Wanem kaen presen ol man blong God oli givim, mo Jeova i askem olgeta blong mekem wanem?
10 Ol brata blong Kraes we tabu speret i makemaot olgeta mo bigfala hif blong ol man we biaen oli joenem olgeta long wok blong Jeova, evriwan oli kasem blesing from Jeova i klinim olgeta olsem man blong klinimaot selva. (Revelesen 7:9, 14, 15) Oli stap kam long wan ful oganaesesen, yes oli stap kam yet, oli givim wan presen long stret fasin. Mo ‘Jeova i laekem ol presen ya, olsem long ol dei blong bifo, long ol yia we oli pas longtaem finis.’ (Malakae 3:4) Olgeta ya nao we Jeova i askem long profet tok blong hem, se: “ ‘Taem yufala i gat ten hif blong sam samting, tekem wan hif i kam insaed long haos blong kipim ol samting, blong bambae i save gat kakae insaed long haos blong mi. Mo testem mi, plis long samting ya,’ Jeova blong ol ami i talem, ‘yu luk bambae mi mi openem doa blong heven blong bambae ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.’ ”—Malakae 3:10.
Ol Presen Mo Wan Long Ol Ten Hif Blong Sam Samting
11. ?From wanem ol Kristin oli no moa nidim blong folem ol loa blong Moses long saed blong ol presen blong sakrifaes?
11 Long taem blong Malakae ol man blong God oli stap givim ol presen mo wan hif long ol ten hif blong sam samting we oli gat, olsem kakae long garen, frut, mo ol anamol. Mo tu long taem blong Jisas, ol man Isrel we oli stap holemstrong long God oli stap givim ol presen long tempel. Be, afta ded blong Jisas olgeta samting i jenis. Loa i finis, wetem oda ya blong givim ol presen mo wan hif long ol ten hif blong sam samting we man i gat. (Efesas 2:15) Jisas i mekem ol presen blong sakrifaes aninit long Loa we i olsem saen nomo, i kamtru finis. (Efesas 5:2; Hibrus 10:1, 2, 10) ?Be, olsem wanem ol Kristin oli save givim ol presen mo wan hif long ol ten hif blong sam samting we oli gat?
12. ?Wanem presen mo ol sakrifaes long saed blong speret we ol Kristin oli mekem?
12 Long saed blong ol Kristin, fasin blong givim presen i wan samting long saed blong speret. (Lukluk Filipae 2:17; 2 Timote 4:6.) Eksampel, Pol i tokbaot wok blong prij olsem wan sakrifaes, taem hem i talem se: “From samting ya, yumi mas stap joen long Jisas ya, nao oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem. From we evri taem yumi talemaot nem blong Jisas long fes blong ol man, i olsem we yumi givim presen i go long God.” Hem i soemaot wan narafala fasin blong sakrifaes long saed blong speret taem hem i talem se: “Yufala i mas stap mekem ol gudfala fasin, mo yufala i mas stap givgivhan long yufala. From we ol fasin ya tu oli olsem we yufala i stap kilim anamol blong givim i go long God, we hem i glad tumas long olgeta.” (Hibrus 13:15, 16) Taem ol papa mama oli leftemap tingting blong ol pikinini blong olgeta blong oli mekem wok blong paenia, yumi save talem se hemia i olsem we oli givim olgeta olsem sakrifaes long Jeova, olsem we Jefta i givim pikinini gel blong hem olsem “wan sakrifaes we i bonem” i go long God, from we God i givhan long hem blong i winim faet.—Jajes 11:30, 31, 39.
13. ?From wanem ol Kristin oli no mas givim wan hif long ol ten hif blong ol samting we oli kasem olsem mane?
13 ?Be, olsem wanem long wan hif long ol ten hif blong sam samting we man i gat? ?Ol Kristin oli mas putum wan hif long ol ten hif mane we oli kasem mo givim long ogenaesesen blong Jeova, olsem we sam skul blong Krisendom oli stap mekem? Nogat, i no nid blong oli mekem olsem. I no gat wan rul long Baebol we i talem se ol Kristin oli mas mekem olsem. Taem Pol i stap tekem ol presen mane blong givhan long olgeta long Judia we oli nidim, hem i no talemaot stret se hamas mane oli mas givim. Be, hem i talem se: “Nao evri man oli mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem. From we God i laekem tumas man we i save givim long gladhat blong hem.” (2 Korin 9:7) Taem Pol i stap tokbaot olgeta we oli mekem ol spesel minista wok, Pol i soemaot se sam long olgeta oli kasem help from ol presen mane, be hem i rere blong wok mo sapotem hem wan long wok ya. (Ol Wok 18:3, 4; 1 Korin 9:13-15) I no gat samting olsem wan hif long ol ten hif blong sam samting we ol man oli save givim blong givhan long wok olsem.
14. (a) ?From wanem fasin blong tekem wan hif long ten hif blong sam samting we man i kasem i no minim fasin blong givim yumi fulwan long Jeova? (b) ?Fasin ya blong givim wan hif long ol ten hif blong sam samting we man i gat i minim wanem?
14 I klia, se long saed blong ol Kristin, wan hif long ol ten hif blong sam samting i saen blong, no i mining wan samting. From we hem i wan hif long ol ten hif blong sam samting we man i gat, mo oltaem namba ya ten insaed long Baebol i saen blong wan samting long wol we i fulwan, ?samting ya i min se yumi givim yumi fulwan long Jeova? No gat. Taem yumi givim laef blong yumi long Jeova mo yumi soem taem yumi baptaes long wora, hemia nao taem we yumi givim yumi fulwan long hem. Stat long taem ya we yumi givim laef blong yumi long God, evri samting we yumi gat i blong Jeova finis. Be, Jeova i letem ol man wanwan oli givim ol samting we oli gat. Taswe wan hif long ol ten hif blong sam samting we yumi gat i minim sam haf blong ol samting blong yumi we yumi givim long Jeova, no yumi yusum long wok blong Jeova, olsem we i soem lav blong yumi long hem mo we yumi luksave se yumi man blong hem. Tede fasin ya i no minim se yumi mas givim stret wan hif long ol ten hif blong sam samting we yumi gat. No gat, samtaem man i save givim i daon moa long hem. Long sam narafala man bambae oli givim bigwan moa long hemia. Wanwan man i givim samting from we hat blong hem i pusum hem blong givim mo sipos hem i naf blong givim olsem.
15, 16. ?Wanem samting tu i olsem fasin blong givim wan hif long ol ten hif samting we man i gat?
15 ?Wanem samting tu i olsem wan hif blong ol ten hif blong sam samting we man i givim long saed blong speret? Wan samting se, yumi givim taem mo paoa blong yumi long Jeova. Taem we yumi stap spenem long ol miting, ol asembli mo ol distrik asembli, wok blong prij, olgeta samting ya yumi stap givim long Jeova—haf blong wan hif long ol ten hif blong ol samting we yumi gat. Taem mo paoa we yumi spenem blong go luk ol sikman mo givhan long ol narafala man—bakegen, samting ya oli haf blong wan hif long ol ten hif blong ol samting we yumi gat. Wok blong givhan blong bildim Haos Kingdom mo joen blong kipim mo klinim Haos Kingdom oli haf blong samting ya.
16 Presen mane we yumi stap givim hem i olsem wan hif long ol ten hif blong sam samting we yumi gat tu. Long ol yia we i pas i no longtaem ogenaesesen blong Jeova i gru kwiktaem, from samting ya i gat moa nid long saed blong mane. Oli nidim ol nyufala Haos Kingdom, mo tu ol nyufala haos blong branj mo ol nyufala Haos Asembli, mo blong wokem ol narafala i kam bigwan moa. Blong givhan long olgeta we oli wantem mekem ol spesel wok, plante taem oli mekem bigfala sakrifaes blong mekem olsem—hemia tu i wan bigfala traem. Long 1991 mane we oli yusum blong lukaot long ol misinari, ol elda we oli stap goraon, mo ol spesel paenia, i kasem bitim 40 milyan dola (VT 4,500,000,000), mane ya i kamaot long presen mane nomo.
17. ?Wanem samting yumi mas givim olsem wan hif long ol ten hif blong sam samting we yumi gat?
17 ?Yumi mas givim wanem olsem wan hif long ol ten hif blong ol samting we yumi gat long saed blong speret? Jeova i no putum wan mak. Nating se i olsem, tingting blong givim, wan trufala lav long Jeova mo ol brata, mo tu harem save se i impoten blong sevem laef blong ol man, i leftemap tingting blong yumi blong givim olgeta wan hif long ol ten hif blong ol samting we yumi gat long saed blong speret i kam insaed. Yumi wantem mekem wok blong Jeova long fasin we i bigwan olsem we i naf blong mekem. Sipos yumi no wantem givim samting no yumi no glad taem yumi givim laef blong yumi blong mekem wok no taem yumi givim ol mane blong yumi, hemia i sem mak nomo olsem we yumi stap stilim God.—Lukluk Luk 21:1-4.
Kasem Blesing Gogo i No Moa Gat Nid
18, 19. ?Olsem wanem ol man blong Jeova oli kasem blesing from we oli givim olgeta wan hif long ol ten hif blong ol samting we oli gat?
18 Stat long 1919, ol man blong Jeova oli givim taem, paoa mo mane blong olgeta long ol samting we wok blong prij i nidim. Oli rili tekem olgeta wan hif long ol ten hif blong sam samting we oli gat i go insaed long haos blong kipim ol samting. From samting ya, Jeova i mekem promes blong hem i kamtru mo hem i kafsaedem blesing long olgeta gogo olgeta oli no moa nidim. Yumi luk samting ya long bigfala namba we i stap gru. Stat long smol taosen blong ol Kristin we tabu speret i makemaot olgeta we oli stap mekem wok blong Jeova taem hem i kam long tempel blong hem long 1918, olgeta oli stap gru kasem tede we olgeta we tabu speret i makemaot olgeta mo ol fren blong olgeta, ol narafala sipsip, oli kasem bitim fo milyan man long 211 defren kantri. (Aesea 60:22) Olgeta ya tu oli bin kasem blesing from save blong trutok we oli stap gohed i gru yet. Profet tok ya i kam klia moa long olgeta. Bilif blong olgeta long ol wok no plan blong Jeova we oli stap kamtru i kam strong moa. (2 Pita 1:19) Tru ya olgeta ya oli man we “Jeova i tijim olgeta.”—Aesea 54:13.
19 Jeova i yusum Malakae blong talemaot wan narafala blesing bakegen: “Long taem ya, olgeta we oli fraet gud long Jeova oli stap toktok tugeta, wanwan long fren blong hem. Mo Jeova i stap harem toktok ya mo i lesin gud. Nao oli stat raetem tok long buk blong rimemba we i stap long fored blong hem, blong rimemba long olgeta we oli fraet gud long Jeova, mo olgeta we oli tingbaot nem blong hem.” (Malakae 3:16) Long olgeta ogenaesesen we oli stap talem se oli Kristin, ol Wetnes blong Jeova nomo oli stap tingbaot nem blong hem mo oli stap talemaot nem ya long olgeta nesen. (Ol Sam 34:3) !Oli glad blong harem save se Jeova i tingbaot fasin blong olgeta blong holemstrong long hem!
20, 21. (a) ?Wanem gudfala fasin fren we ol trufala Kristin oli stap glad long hem? (b) ?Long saed blong ol man we oli stap talem se oli Kristin, wanem samting i stap kam klia moa blong seraotem trufala Kristin long gyaman Kristin?
20 Smol kampani we tabu speret i makemaot olgeta oli spesel man blong Jeova, mo bigfala hif blong ol man, we oli kam blong joen wetem olgeta, oli kasem blesing blong klin wosip wetem olgeta. (Sekaraea 8:23) Jeova i yusum Malakae blong promes se: “ ‘Bambae olgeta oli kam man blong mi,’ Jeova blong ol ami i talem, ‘long dei ya taem mi mekem wan samting blong mi. Mo bambae mi mi sore long olgeta, olsem wan man we i soemaot fasin sore long pikinini blong hem we i stap mekem wok blong hem.’ ” (Malakae 3:17) !Hemia wan blesing we Jeova i stap tingbaot olgeta!
21 Yes, taem i pas fasin blong trufala Kristin mo gyaman Kristin i kam klia moa. Taem ol man blong Jeova oli stap traehad blong holem ol rul blong hem, Krisendom i stap foldaon i go longwe moa i go long fasin blong wol we i no klin. Tru ya, ol tok blong Jeova oli tru se: “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.”—Malakae 3:18.
22. ?Wanem blesing yumi save sua blong haremgud long hem sipos yumi stap gohed blong givim olgeta wan hif long ol ten hif blong sam samting we yumi gat?
22 I no longtaem, dei ya blong stretem bisnes wetem ol gyaman Kristin bambae i kam. “ ‘!Luk! Dei ya i stap kam we i hot olsem faea blong bonem selva, mo olgeta flas man mo olgeta we oli stap mekem ol rabis fasin oli mas kam olsem sti. Mo dei ya bambae i kam we i save spolem olgeta,’ Jeova blong ol ami i talem.” (Malakae 4:1) Ol man blong Jeova oli save se bambae hem i lukaotgud long olgeta long taem ya, olsem we hem i lukaotgud long nesen blong hem long saed blong speret long yia 70 K.T. (Malakae 4:2) !Olgeta oli haremgud blong save samting ya! Taswe, go kasem taem ya i gud yumi evriwan i soemaot fasin tangkyu blong yumi mo lav long Jeova taem yumi tekem olgeta wan hif long ol ten hif blong ol samting we yumi gat i kam insaed long haos blong kipim ol samting. Nao, yumi save trastem se hem bambae i gohed blong blesem yumi gogo yumi no moa nidim.
[Futnot]
a Blong save moa, lukluk Wajtaoa blong Jun 15, 1987, pej 14 kasem 20 (Engglis no Franis).
?Yu Save Eksplenem?
◻ ?Long taem blong yumi, wetaem Jeova i kam long tempel wetem man blong karem tok blong kontrak?
◻ ?Hu ya slef ya we i stret mo waes, mo wanem samting oli mas kam klin long hem afta long 1918?
◻ ?Wanem ol sakrifaes long saed blong speret we trufala Kristin i save givim long Jeova?
◻ ?Wanem ya wan hif long ol ten hif blong sam samting we ol Kristin oli save tekem i go insaed long haos blong kipim ol samting?
◻ ?Wanem blesing ol man blong God oli haremgud long hem taem oli givim wan hif long ol ten hif blong ol samting we oli gat long saed blong speret?
[Tok Blong Pija Long Pej 15]
Hif long ol ten hif blong sam samting we yumi gat long saed blong speret hemia fasin blong givim paoa blong yumi mo ol samting we yumi gat blong bilidim ol Haos Kingdom
[Tok Blong Pija Long Pej 16]
From we Jeova i stap blesem ol man blong hem, taswe i gat nid blong bildim moa haos, olsem ol Haos Kingdom mo ol Haos Asembli