?Wanem Stret Nao Gospel?

LONG taem blong Krismas, ol man long plante ples oli harem nyus from, mo wanwan long olgeta oli tokbaot, Gospel. Wod ya i kamaot plante taem. ?Be hem i gat moa mining bitim we plante man oli stap tingbaot? ?Gospel i save mining wan impoten samting we i gud long yu mo ol fren blong yu?

“Gospel” i minim “gud nyus,” mo i tru se, yumi wantem kasem gud nyus long enitaem be i no long Krismas nomo. Taswe, Gospel ya i no wan gud nyus olbaot nomo. Hem i wan gud nyus we i kamaot long saed blong wan spesel samting. I tru, hem i wan mesej we God i givim blong talemaot long olgeta man.

Eugênio Salles, wan ajbisop blong Rio de Janero, Brasil, i tokbaot gud nyus ya taem hem i talem se: “Yumi mas mekem ol samting we Gospel i talem mo ol wok blong yumi oli no mas stanap long ol waes tok we oli kamaot long man nomo.” Ol tok blong ajbisop ya oli stret nomo. Be blong mekem stret olsem we Gospel i talem, i nidim blong yumi save wanem ya Gospel. ?Olsem wanem yumi save lanem samting ya? ?Mo olsem wanem fasin blong folem Gospel i save givhan long yumi?

?Wanem Ya Gospel?

Ol samting we Gospel i tokbaot, plante taem ol man oli no kasem stret save long hem. Long 1918 Bigfala Kaonsel Blong Ol Jyos Blong Kraes long Amerika i pulum ol man blong oli sapotem Ligofnesen we naoia i no moa stap, mo oli talem se hemia i olsem wan politik saen blong Kingdom blong God long wol mo oli talemaot se samting ya i “stanap long Gospel.” Be Ligofnesen i no kasem mak ya blong putum pis. I klia se kaonsel ya i rong. I no gat wan samting nating long Gospel we i tokbaot Ligofnesen.

Long ol yia we oli jes pas, ol man we oli stadi long Baebol oli stanemap wan bilif blong givhan long ol puaman blong oli fri long ol trabol blong olgeta. Blong tokbaot tingting blong olgeta mo blong jenisim politik mo sosaeti blong man, oli yusum Gospel. Taem oli stap mekem olsem, oli no respektem nating trufala Gospel. Wan magasin blong Brasil, Veja i talem se: “Katolik Jyos i stat blong leftemap fasin blong mekem ol man oli haremgud long laef blong olgeta, oli no tingbaot blong givim ol samting we ol man blong olgeta oli nidim long saed blong speret. Olgeta we oli stap lukaot wod ya God taem wan pris i tok long taem blong lames, plante taem oli harem nomo ol bigfala tok agens long ol samting we oli no stret long sosaeti blong man.”

Wan jenis blong mekem laef blong man i gud moa no wan jenis long politik i save kam olsem wan gudfala nyus long sam man. Be hemia i no olsem gud nyus ya, Gospel. Wan bisop i luksave slak fasin blong skul blong hem long saed blong talemaot trufala Gospel, mo i se: “I stat long 1960 mo biaen, yumi no bin lukaotgud blong tijim ol man long saed blong speret, from we yumi joenem ol samting long saed blong bodi long bilif blong yumi.”

Wan ripot long Amerika we i kamaot long magasin ya Time i talem se Protestan tu i no tijim Gospel. Magasin ya i gohed se: “I no se ol bigfala skul oli no naf nomo blong talemaot mesej blong olgeta blong ol man oli kasem save long hem. Be oli no sua se wanem mesej ya.” ?Mesej blong olgeta i mas olsem wanem? ?Wanem ya Gospel?

Stret Mining Blong Gospel

Webster’s Ninth New Collegiate Dictionary i eksplenem mining blong “Gospel” olsem “mesej we i tokbaot Kraes, kingdom blong God, mo rod blong sef.” Wod ya “gospel” oli givim mining olsem tu se “fasin blong eksplenem Kristin mesej (hemia sosol gospel we stampa tingting blong hem se ol Kristin oli mas wok long komuniti blong mekem laef blong ol man i kam moa gud).” “Wan mesej no ol tijing blong wan tija blong jyos.” ?Ol mining blong tok ya oli stret? No gat. I no gat sipos yumi stap tokbaot Gospel ya. Stret Gospel i mas stanap long Baebol. Olsemia nao, faswan long ol trifala mining ya nomo i stret. Tufala laswan mining oli soemaot olsem wanem ol man oli stap yusum wod ya “gospel” tede.

I stret wetem tingting ya, tok blong Vine’s Expository Dictionary of New Testament Words i talem se long Grik Haf blong Baebol (hemia “Nyu Testamen”), Gospel “i soemaot gudfala save long Kingdom blong God mo rod blong sef tru long Kraes, mo blong gat bilif we i stanap long ded blong Hem.” Hem i impoten blong kasem save long samting ya from wan stret save long trufala gud nyus i gat bigfala mining long taem blong yumi tede mo glad we i save kamaot long fyuja.

Mesej We i No Sem Mak Long Ol Narafala Mesej

Olsem ol tok antap oli soemaot, Gospel i laenap gud wetem Jisas Kraes​—⁠from samting ya yumi save kolem fo buk long Baebol we i tokbaot moa laef blong Jisas long wol se fofala Gospel. I stat long taem we hem i bon, ol nyus we oli tokbaot Jisas oli gudfala nyus. Taem wan enjel i talemaot se bambae hem i bon, hem i talem se: “Yufala i no fraet. Mi mi gat wan gud nyus [no, gospel] blong talem long yufala, we i save mekem olgeta man oli harem gud tumas. Long naet ya nomo, long velej ya blong King Deved bifo, i gat wan pikinini i jes bon, we hem bambae i sevem yufala. Hemia man ya we God i promes finis blong sanem i kam. Hem i Mesaea ya we i Masta blong yumi.”​—⁠Luk 2:​10, 11.

Pikinini ya we i jes bon, Jisas, i kam Kraes, Mesaea we God i bin promes se bambae i kam. Hem i soemaot plan blong God blong sevem ol man, i givim laef blong hem we i stretgud olgeta from olgeta man, i laef bakegen, mo hem i kam olsem King we God i jusumaot blong rul long Kingdom blong hem. !Hemia wan gud nyus ya! From samting ya nao yumi save kolem mesej we i tokbaot hem se Gospel.

Blong smoltaem we hem i stap mekem minista wok blong hem long wol ya, Jisas i strong long wok blong talemaot gud nyus. Yumi ridim long Gospel blong Matyu se: “Nao Jisas i stap wokbaot, i stap pas long ol taon mo velej, mo i stap tij insaed long ol haos blong prea blong olgeta [mo i stap talemaot gud nyus blong kingdom, “NW”].” (Matyu 9:35) Wok blong prij we hem i mekem i no blong mekem se ol man oli save haremgud nomo. Mak i raetemdaon ol tok blong Jisas se: “Taem blong hem i stret [mo Kingdom blong God i kam kolosap nao, NW.] Yufala i mas tanem tingting blong yufala from ol sin blong yufala, yufala i mas bilif long gud nyus ya.” (Mak 1:15) Yes, olgeta we oli lesin long gud nyus mo oli obei long hem, oli luk se gud nyus ya i jenisim laef blong olgeta.

Afta long ded blong Jisas, ol man blong hem oli gohed blong talemaot Gospel. Oli no tokbaot Kingdom nomo be oli joenem wetem gudfala nyus ya se Jisas i bin laef bakegen mo naoia hem i stap sidaon long raetsaed blong God long heven mo i givim finis praes blong laef blong hem we i stretgud olgeta from olgeta man. From we God i jusumaot hem blong rul antap long wol olsem King blong Kingdom blong God, bambae God i yusum hem blong spolem ol enemi blong God mo blong mekem wol ya i kam wan paradaes.​—⁠Ol Wok 2:​32-36; 2 Tesalonaeka 1:​6-10; Hibrus 9:​24-28; Revelesen 22:​1-5.

Tede, gud nyus i wan stampa samting we i mas go moa. I stret long ol samting we i fulumap profet tok, Jisas i bin sidaon long bigfala jea blong hem, mo yumi stap laef long ol lasdei blong fasin ya blong naoia. (2 Timote 3:​1-5; Revelesen 12:​7-12) Taem i stap kam kolosap nao we bambae Kingdom ya i mekem wan samting blong agensem ol enemi blong God. ?Wanem gud nyus nao bambae yumi harem?

Bambae yumi luk long nekis stadi olsem wanem Gospel i gat bigfala paoa. Hem i halpem wan woman we i fasgud long wok blong rabis speret blong kam fri bakegen. Hem i givhan long wan man we i stap long kalabus from we hem i stil, blong faenem glad taem. Mo bambae hem i mekem i gud tumas long yu​—⁠sipos yu lesin mo obei long gud nyus.