Lukaot Long Sipsip Wetem Bigfala Man We i Wokem Yumi

“[Jeova, “NW”] i stap lukaot long mi olsem we mi mi sipsip blong hem, mi mi no save sot long wan samting. Hem i stap mekem laef blong mi i nyuwan bakegen. Hem i stap lidim mi long ol stret rod, olsem we hem i bin promes.”​—OL SAM 23:​1, 3.

1. ?Wanem gudfala samting Jeova i givim blong leftemap tingting blong ol man?

‘WAN sing blong Deved,’ long namba 23 Sam, i mekem ol man we oli slak oli kam strong bakegen. Hem i leftemap tingting blong olgeta blong oli gat strong bilif olsem vas 6 i talem, i se: “Mi mi save se oltaem long laef blong mi, bambae yu yu gat sore long mi, mo bambae yu mekem i gud tumas long mi, mo haos blong yu bambae i hom blong mi oltaem, gogo laef blong mi i finis.” ?Yu yu wantem olsem? ?Yu yu wantem stap oltaem long haos wosip blong Jeova mo joen wetem ol man blong hem we naoia oli stap kamaot long olgeta nesen blong wol? Jeova God, Bigfala Man we i Wokem yumi, hem i “man blong lukaot long sipsip, we hem i prapa man blong lukaot long laef blong yufala,” hem bambae i givhan long yufala blong kasem mak ya.​—1 Pita 2:25.

2, 3. (a) ?Olsem wanem Jeova i lukaotgud long ol man blong hem olsem we man blong lukaot long ol sipsip i lukaot long ol sipsip blong hem? (b) ?Olsem wanem ol “sipsip” blong Jeova oli stap kam plante kwiktaem?

² Man we i Wokem “nyufala heven mo nyufala wol” hem tu i Man blong Wokem Plan mo Hae Man blong Lukaot long Kristin kongregesen, hemia “famle ya blong God.” (2 Pita 3:​13, NW; 1 Timote 3:15) Hem i intres tumas blong lukaotgud long ol man blong hem olsem man blong lukaot long sipsip i lukaot long ol sipsip blong hem, olsem Aesea 40:​10, 11 i talem klia, se: “!Yu luk! Hae Masta Jeova bambae hem i kam olsem wan strong man, mo bambae hem i kam wetem paoa blong rul. !Yu luk! Praes blong hem i givim i stap wetem hem, mo pei we bambae hem i givim i stap fored long hem. Olsem wan man blong lukaot long sipsip, God i stap lukaot long ol man blong hem. Wetem han blong hem, hem i hivimap ol smol sipsip blong hem, mo hem i holem olgeta kolosap long hem. Bambae hem i lukaot gud long olgeta we oli gat pikinini we oli stap titi.”

³ Olsemia nao, olgeta “sipsip” hemia olgeta we oli stap wokbaot longtaem finis long trutok mo “smol sipsip” hemia olgeta ya we oli jes kam insaed i no longtaem​—olsem bigfala namba blong ol man we oli baptaes long Afrika mo long Is Yurop. Jeova i hivimap olgeta oli kam long hem mo i lukaotgud long olgeta wetem strong han blong hem. Nating se bifo oli olsem ol sipsip we oli lus, be naoia oli kam frengud wetem God blong olgeta we i Man blong Lukaot long sipsip.

Man Blong Lukaot Long Sipsip Wetem Jeova

4, 5. (a) ?Hu ya “gudfala man ya blong lukaot long sipsip,” mo olsem wanem profet tok ya i poen i go long hem? (b) ?Jisas i stap lukaot long wanem wok blong seraot, mo wanem nambawan frut i kamaot from?

⁴ Jisas Kraes, “gudfala man ya blong lukaot long sipsip,” i stap long raetsaed blong papa blong hem long heven, hem tu i stap lukaotgud long “ol sipsip.” Hem i givim laef blong hem blong sevem fastaem “ol sipsip” we tabu speret i makemaot olgeta mo biaen, bigfala hif blong “narafala sipsip” blong hem tede. (Luk 12:32; Jon 10:​14, 16) Jeova God, Bigfala Man blong Lukaot sipsip, i talem long olgeta sipsip ya, i se: “Naoia, mi wan bambae mi jajem . . . wan sipsip wetem wan narafala sipsip. Mo bambae mi mi leftemap wan man nomo blong lukaot long olgeta, mo bambae hem i fidim olgeta, yes, man blong wok blong mi Deved. Hem bambae i fidim olgeta, mo i kam man blong lukaot long olgeta. Nao mi wan Jeova, bambae mi mi kam God blong olgeta, mo man blong wok blong mi Deved, bambae hem i kam jif long medel blong olgeta. Mi, Jeova, mi tok olsem.”​—Esikel 34:​20-24.

⁵ Tok ya “man blong wok blong mi Deved” i olsem wan profet tok we i stap poen i go long Jisas Kraes, “laen” ya (NW) we bambae i sidaon long jea blong king blong Deved. (Ol Sam 89:​35, 36) Tede long taem blong jajem olgeta nesen, Pikinini blong Deved, Jisas Kraes we i Man blong Lukaot long sipsip wetem Jeova mo i King, i stap gohed blong seraotem “ol sipsip.” Hem i seraotem ol man we oli stap talem se oli “sipsip” be oli gyaman, oli olsem “nani.” (Matyu 25:​31-33) “Wan man nomo blong lukaot” i stanap tu blong fidim ol sipsip. !Yumi glad blong luk se profet tok ya i stap kamtru tede! Taem ol man blong politik oli stap tokbaot blong hivimap ol man tru long wan nyu fasin blong wol, wan Man ya nomo blong Lukaot long sipsip i yusum plante lanwis blong wetnes blong stap hivimap ol sipsip long olgeta nesen. Ogenaesesen blong God nomo long wol i save mekem olsem, i no gat narafala ogenaesesen i save mekem olsem.

6, 7. ?Olsem wanem “slef ya we i stret mo waes” i mekem se kakae i rere blong ‘hem i givim kakae long ol sipsip long stret taem blong hem’?

⁶ Taem mesej blong Kingdom i stap go long ol nyufala teritori, wan Man ya nomo blong Lukaot long sipsip i talem long “slef ya we i stret mo waes” we oli Kristin we tabu speret i makemaot olgeta, se oli mas mekem se kakae i rere “long ol man blong hem blong givim kakae long olgeta long stret taem blong hem.” (Matyu 24:​45, NW) Plante long ol 33 branj blong Watch Tower Sosaeti long olgeta ples long wol we oli stap prentem ol buk, oli stat blong spidimap wok blong prentem ol buk blong givimaot long ol man we oli wantem moa mo oli wantem ol buk mo magasin long saed blong Baebol i kamgud moa.

⁷ Hed Kampani blong ol Wetnes blong Jeova i traehad blong mekem translesen blong 200 lanwis i kamgud moa mo blong statem translesen blong sam moa lanwis olsem we oli nidim blong kavremap olgeta ples long wol. Hemia i blong givhan long wok we Jisas i talem long ol disaepol blong hem long Ol Wok 1:​8, se: “Taem Tabu Speret i kam kasem yufala, bambae yufala i gat paoa. Nao bambae yufala i mas go talemaot mi . . . long olgeta ples . . . gogo i finisim olgeta ples long wol.” Mo tu, Baebol ya New World Translation of the Holy Scriptures, oli bin wokem finis fulwan no haf nomo blong hem, long 14 lanwis mo naoia oli stap tanem i go long 16 narafala lanwis blong Yurop, Afrika, mo long ol kantri long Esia.

Glad Long “Pis Blong God”

8. ?Olsem wanem ol sipsip oli kasem bigfala blesing from kontrak blong pis we Jeova i mekem wetem olgeta?

⁸ Jeova i yusum wan Man nomo blong Lukaot sipsip, Jisas Kraes, blong mekem wan “kontrak blong pis” wetem ol sipsip blong Hem we oli kakae gud. (Aesea 54:10) Ol sipsip oli naf blong wokbaot long laet ya taem oli soemaot bilif long blad blong Jisas we i ron. (1 Jon 1:7) Oli haremgud long ‘pis we God i save putum, hem i bigfala moa, i bitim save blong olgeta. Mo God bambae i putum pis ya long tingting blong olgeta, blong lukaotgud long olgeta ya we i joen long Jisas Kraes.’ (Filipae 4:7) Olsem Esikel 34:​25-28 i gohed blong tokbaot se, Jeova i stap lidim ol sipsip blong hem i go insaed long wan paradaes long saed blong speret, wan gudfala ples blong stap sefgud, oli haremgud long plante samting, mo oli kasem plante frut long wok blong olgeta. Bigfala Man blong Lukaot sipsip ya i talem long ol sipsip blong hem i se: “Bambae oli save se mi ya mi Jeova taem mi brekem aean blong kalabus we i givim hevi baden long olgeta mo bambae mi mi tekemaot olgeta long han blong ol man we oli stap yusum olgeta olsem ol slef nomo. Mo bambae ol nesen oli no moa tingbaot olgeta olsem wan samting we oli save spolem nomo. . . . Mo tru, olgeta bambae oli stap sefgud, mo bambae i no gat man blong mekem oli seksek.”

9. ?Wanem samting i open long ol man blong God taem hem i “brekem aean blong kalabus”?

⁹ Stat finis long ol yia we oli pas i no longtaem, ol Wetnes blong Jeova long plante kantri oli bin haremsave se God i “brekem aean blong kalabus we i givim hevi baden long olgeta.” Oli fri blong prij naoia bitim we oli bin mekem bifo. Mo i gud yumi evriwan, long olgeta kantri, yumi yusumgud fasin sefgud we Jeova i givim long yumi blong gohed blong finisim wok ya. !Jeova i givim hop long yumi taem yumi stap kam kolosap moa long bigfala trabol, we neva ol man long wol oli bin luk bifo kam kasem taem ya!​—Daniel 12:1; Matyu 24:​21, 22.

10. ?Jeova i putumap hu blong givhan long Jisas Kraes, Gudfala Man blong Lukaot long sipsip, mo olsem wanem Pol i tokbaot sam long olgeta?

¹⁰ Blong mekem ol man oli rere long dei ya blong kros blong hem agensem ol rabis man, Jeova i putumap ol narafala man blong lukaot long ol sipsip blong givhan long Jisas Kraes, Gudfala Man blong Lukaot sipsip, blong oli lukaotgud long ol sipsip. Revelesen 1:16 i tokbaot olgeta ya olsem wan ful namba blong “ol seven sta” long raethan blong Jisas. Long faswan handred yia, aposol Pol i tokbaot wan grup blong ol man ya blong lukaot long ol sipsip, i se: “Yufala i mas stap lukaotgud long yufala mo long ol man ya we Tabu Speret i putum olgeta oli stap finis long han blong yufala. Yufala i mas stap lukaot long ol man blong [kongregesen, NW] blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.” (Ol Wok 20:28) Tede, i gat plante handred taosen man blong lukaot sipsip we oli stap mekem wok blong lukaot long ol sipsip long 69,557 kongregesen long ful wol.

!Ol Man Ya Blong Lukaot Sipsip Oli Go Fastaem!

11. ?Olsem wanem sam man blong lukaot long sipsip oli lidimgud wok long ol teritori we oli stap wok long hem plante taem?

¹¹ Long plante ples ol man blong lukaot long ol sipsip oli mas lidim wok long ol teritori we oli stap wok long hem plante taem long ol lasdei ya. ?Olsem wanem oli save mekem tingting blong ol sipsip i stap glad? Ol man ya blong lukaot long ol sipsip oli stap mekem gudfala wok, wan long ol samting we oli karem frut long hem taem oli stap leftemap haftaem mo fultaem paenia. Plante man blong lukaot long ol sipsip oli joen long wok ya, mo ol pablisa we oli no save mekem paenia oli stap soemaot tingting blong paenia, oli wok wetem fasin glad we i givhan long olgeta blong oli winim tingting ya we ol man long teritori oli no moa intres. (Ol Sam 100:2; 104:​33, 34; Filipae 4:​4, 5) Taswe, taem rabis fasin mo fasin blong brekem loa i fulap long wol, plante man we oli olsem sipsip oli laekem hop blong Kingdom.​—Matyu 12:​18, 21; Rom 15:12.

12. ?Wanem bigfala trabol i stap long ol ples we namba blong ol man i gru kwiktaem, mo samtaem oli mekem wanem blong traem winim trabol ya?

¹² Narafala trabol se plante taem i no gat plante man blong lukaot long ol sipsip we oli naf blong lukaotgud long ol sipsip. Long ples we namba blong ol man i gru kwiktaem, olsem long Is Yurop, i gat plante nyufala kongregesen we oli no gat ol elda nating long olgeta. Ol sipsip oli rere blong mekem ol hevi resposabiliti ya, be oli no gat tumas ekspiryens, mo i nidim help blong trenem ol sipsip we oli stap kam insaed long ol kongregesen ya. Long ol kantri olsem Brasil, Meksiko, mo Sair, we namba blong ol man i stap gru kwiktaem, ol yangfala Wetnes nao oli mas mekemrere ol miting mo trenem ol narafala nyuwan. Ol paenia oli givhan bigwan, mo hemia nao wan ples we ol sista oli save trenem ol nyufala sista. Jeova i blesem ol frut we i kamaot wetem tabu speret blong hem. Namba i stap gohed blong gru yet.​—Aesea 54:​2, 3.

13. (a) ?From we i gat plante kakae tumas long garen, ol Wetnes oli mas prea from wanem samting? (b) ?Olsem wanem God i ansa long ol prea blong ol man blong hem bifo mo long taem blong namba tu bigfala faet blong wol?

¹³ Long ol ples we wok blong prij i stap gohed gud long olgeta, long ol ples we naoia oli tekemaot tabu we i stap long hem, mo long ol nyufala teritori we oli jes open, ol tok blong Jisas long Matyu 9:​37, 38 i stret long olgeta, i se: “Tru, i gat plante kakae tumas i stap long garen, be smol man nomo oli stap blong karem i go. Yufala i mas askem strong long Masta blong garen ya, blong hem i sanem sam moa man oli kam blong karem ol kakae ya blong hem.” Yumi mas prea tu, se Jeova bambae i putumap moa man blong lukaot long ol sipsip. Hem i bin soem se hem i naf blong mekem olsem. Bifo mo long taem blong Namba Tu Bigfala Faet Blong Wol, ol strong man blong rul, we oli olsem ol man Asiria oli traem blong finisim ol Wetnes blong Jeova. Be Jeova i ansa long ol prea blong olgeta. Jeova i klinim ogenaesesen blong olgeta, mekem se hem i folem moa tiokratik rod, mo hem i givim “ol man blong lukaot long ol sipsip” we oli nidim.a Hemia i laenap wetem profet tok ya se: “Long saed blong ol man Asiria, taem oli kam insaed long kantri blong yumi mo taem oli kam blong purumbut long ol hae ples we yumi stap laef long hem, yumi mas stanemap tu blong agensem olgeta ol seven man blong lukaot long ol sipsip, yes, eit haeman”​—bambae i gat plante elda blong oli lidim ol man.​—Maeka 5:5.

14. ?Wanem bigfala nid insaed long ogenaesesen, mo wanem samting ol brata oli mas tingbaot?

¹⁴ I gat bigfala nid blong ol Wetnes we oli brata finis blong oli traem blong kasem moa wok insaed long kongregesen. (1 Timote 3:1) Hem i impoten tumas. En blong rabis fasin blong naoia i stap kam kolosap moa. Habakuk 2:3 i talem se: “From we vison ya bambae i kamtru long stret taem blong hem nomo. Bambae hem i hareap blong kasem en blong hem, mo hem i no save gyaman. Nating sipos hem i tektaem, be yu mas rere. From we bambae hem i kamtru. Hem i no save let.” ?Ol brata, yufala i save traehad blong yufala i kam naf blong mekem wok blong lukaot long ol sipsip​—bifo en i kam?​—Taetas 1:​6-9.

Tiokratik Rod Blong Lukaot Long Sipsip

15. ?Olsem wanem ol man blong Jeova oli folem fasin blong tiokratik?

¹⁵ Blong joen fulwan long wok blong mekem ogenaesesen blong Jeova i kam bigwan moa, ol man blong Jeova oli mas gat fasin blong tiokratik. ?Olsem wanem oli save mekem samting ya? Yes, ?wanem mining blong tok ya “tiokratik”? Webster’s New Twentieth Century Dictionary i givim mining blong fasin blong “tiokratik” se “God i stap rulum wan kantri.” Hemia nao from wanem “tabu nesen” blong ol man blong Jeova, i wan tiokratik nesen. (1 Pita 2:​9, NW; Aesea 33:22) Olsem ol trufala Kristin we oli memba no oli joen long tiokratik nesen ya, oli mas obei long Tok blong God mo ol rul blong hem, long laef mo long wok blong hem.

16. ?Olsem wanem yumi save soemaot se yumi man blong tiokratik?

¹⁶ Aposol Pol i eksplenem klia olsem wanem ol Kristin oli mas gat fasin blong tiokratik. Fastaem, hem i talem se olgeta oli ‘mas kasem nyufala laef we God i wokem blong olgeta, we i stret wetem laef blong hem. Ol fasin blong nyufala laef ya oli stret, oli gud, oli tabu, from we oli kam long trutok nomo.’ Ol fasin blong Kristin i mas jenis folem ol stret rul blong God we oli stap long Tok blong hem. Hem i mas stap tru long Jeova mo long ol loa blong Hem. Afta we hem i soemaot olsem wanem man i mas mekem samting ya, Pol i askem strong se: “Yufala i pikinini blong God, we hem i laekem yufala tumas, yufala i mas straehad blong folem fasin blong hem.” (Efesas 4:24 kasem 5:1) Olsem ol pikinini blong God we yumi gat fasin obei, yumi mas folem fasin blong God. !Hemia wok blong trufala fasin blong tiokratik, yumi stap soem se God i rili rulum yumi!​—Lukluk tu long Kolosi 3:​10, 12-14.

17, 18. (a) ?Wanem nambawan fasin blong God we ol tiokratik Kristin oli mas folem? (b) ?Long ol tok we i go long Moses, olsem wanem Jeova i makem nambawan fasin ya blong Hem, be wanem samting tu Hem i talem?

¹⁷ ?Wanem nambawan fasin blong God we yumi mas folem? Aposol Jon i givim ansa long 1 Jon 4:8 i se: “God i stampa blong fasin ya blong laekem tumas ol man.” Long ol eit vas we i kamaot biaen, long vas 16, hem i talem bakegen rul ya se: “God, hem i stampa blong fasin blong laekem tumas ol man. Man we i stap holem fasin ya oltaem, laef blong hem i stap joen long laef blong God, mo laef blong God i stap joen long laef blong hem.” Jeova, Bigfala Man blong Lukaot long ol sipsip hem i lav. Ol tiokratik man blong lukaot long ol sipsip oli folem fasin blong Jeova taem oli soem bigfala lav long ol sipsip blong Jeova.​—Skelem wetem 1 Jon 3:​16, 18; 4:​7-11.

¹⁸ Bigfala Man blong Rul i soemaot hem wan long Moses olsem “Mi mi [Jeova, NW], mi Masta blong yufala. Mi mi no olsem ol narafala god ya. Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap laekem man tumas, mo oltaem mi stap holemstrong promes blong mi. Mi mi stap laekem tumas ol man blong mi, wetem ol pikinini we oli stap kamaot biaen long olgeta, gogo oli no save makem. Mi stap fogivim olgeta, mo mi stap tekemaot ol rabis fasin blong olgeta mo ol sin blong olgeta. Be olgeta we oli stap holem ol fasin nogud, mi mi stap panis olgeta wetem ol pikinini blong olgeta we oli stap kamaot biaen long olgeta, go kasem ol smol bubu blong ol smol bubu blong olgeta.” (Eksodas 34:​6, 7) Yes, Jeova i talemaot ol defren fasin blong nambawan tiokratik fasin blong hem, hemia lav, long semtaem hem i talemaot stret se hem bambae i panisim man from nogud fasin blong hem sipos hem i wantem.

19. ?Olsem wanem ol man blong lukaot sipsip oli mas folem tiokratik fasin, be i no olsem fasin blong ol man Farisi?

¹⁹ Long olgeta we oli gat ol responsabiliti insaed long ogenaesesen, ?olsem wanem oli stap olsem man blong tiokratik? Jisas i talem long ol tija blong loa mo ol farisi long taem blong hem, i se: “Oli stap putum ol hevi samting long solda blong ol man, we i had blong ol man oli karem, be oli no save mekem wan samting nating blong givhan long ol man, blong oli karem ol hevi samting ya.” (Matyu 23:4) !Fasin ya i spolem man mo i no soem lav! Trufala fasin blong tiokratik no rul blong God, i min se man i mas folem ol rul blong Baebol we oli soem lav taem hem i stap lukaot long ol sipsip, be hem i no givim hevi baden long ol sipsip wetem plante smosmol rul we man nomo i mekem. (Lukluk Matyu 15:​1-9.) Mo tu, ol tiokratik man blong lukaot long ol sipsip oli mas folem fasin blong God taem oli stanap strong blong holemtaet klin fasin long kongregesen.​—Lukluk Rom 2:11; 1 Pita 1:17.

20. ?Ol tiokratik man blong lukaot long ol sipsip oli luksave wanem plan blong ogenaesesen?

²⁰ Ol trufala man blong lukaot long ol sipsip oli luksave se long ol lasdei ya, Jisas i putumap slef blong hem we i stret mo waes blong lukaot long ol samting we oli blong hem mo we tabu speret i stap lidim slef ya blong putumap ol elda blong oli lukaotgud long ol sipsip. (Matyu 24:​3, 47; Ol Wok 20:28) Taswe, man blong tiokratik i mas gat dip respek long slef ya, dip respek long ol plan we ogenaesesen blong slef ya i stanemap, mo long plan we ol elda insaed long kongregesen oli mekem.​—Hibrus 13:​7, 17.

21. ?Wanem gudfala eksampel we Jisas i givim long ol man blong lukaot long ol sipsip?

²¹ Jisas i givim wan gudfala eksampel, hem i stap dipen oltaem long Jeova mo Tok blong Hem blong i lidim hem. Hem i talem se: “Mi mi no save mekem wan samting nating long tingting blong mi nomo. Mi mi stap jajem man, be stret olsem nomo we Papa blong mi i stap talem long mi blong mi mekem. Nao taem mi jajem man, mi save mekem i stret, from we mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi, hem i wantem.” (Jon 5:30) Ol man blong lukaot long sipsip aninit long Jisas Kraes oli mas soemaot tingting daon olsem hem. Sipos oltaem wan elda i stap lukluk long Tok blong God blong i lidim hem, olsem we Jisas i mekem, hem i rili wan tiokratik man.​—Matyu 4:​1-11; Jon 6:38.

22. (a) ?Long wanem rod evriwan oli mas traehad blong stap olsem man blong tiokratik? (b) ?Jisas i askem wanem long ol sipsip?

²² !Ol brata, yufala i mas traehad blong kam naf blong kasem ol wok insaed long kongregesen! !Yufala ol sipsip, traehad blong kam man blong tiokratik, folem fasin blong God mo Kraes blong soem lav! I gud we ol man blong lukaot long ol sipsip mo tu ol sipsip oli mas glad blong ansa long tok blong Jisas we i askem yumi, se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”​—Matyu 11:​28-30.

[Futnot]

?Yu Save Eksplenem?

◻ ?Wanem ya olgeta “sipsip” blong God mo hu i stap long hem?

◻ ?Olsem wanem Jisas i olsem “gudfala man blong lukaot long sipsip” long faswan handred yia, mo tede?

◻ ?Wanem impoten wok we ol man blong lukaot long sipsip oli mekem taem oli stap lukaot long ol sipsip?

◻ ?Wanem mining blong tok ya “tiokratik”?

◻ ?Wan Kristin man blong lukaot long ol sipsip​—i mas mekem wanem wok blong i stap olsem wan man blong tiokratik?

[Tok Blong Pija Long Pej 20]

Olsem wan man blong lukaot long sipsip we hem i givim laef blong hem long wok ya, Jeova tu i lukaotgud long ol sipsip blong hem

[Tok Blong Pija Long Pej 23]

Folem nambawan fasin blong Jeova blong laekem tumas ol man hemia trufala fasin blong tiokratik