Ol “Tijing Blong God” Distrik Asembli
OLGETA we oli wantem Jeova i tijim olgeta oli stap lukluk i go long ol Distrik Asembli ya, “Tijing Blong God.” Fo dei program ya bambae i givim plante save long saed blong Baebol we i save lukaotgud long ol Kristin long ol wanwan trabol we oli kasem mo long ol bigbigfala trabol we oli stap kasem wol. Program ya bambae i givhan long olgeta blong stanap strong agens long “man we i mekem narafala fasin we i brekem ol toktok we i stret.” (1 Timote 1:10) !Bambae asembli ya i leftemap tingting blong olgeta man we oli kam long hem blong oli save kam ol gudfala man blong tijim Tok blong God!
!I gat ol gudfala eksampel we yumi save folem! !I no gat wan Tija we i hae sem mak long Jeova hem wan! Taswe, i stret nomo we Elaehu i talem long Job se Jeova “i wan God we i stap tijim yumi bitim ol anamol blong wol ya, mo hem i stap givim waes long yumi bitim ol pijin we oli stap flae antap long skae.” Mo tu hem i askem kwestin long saed blong Jeova se: “?Hu i save tijim ol man olsem hem i mekem?” (Job 35:11; 36:22) Mo tu Aesea 30:20 i talem se God i olsem “Wan Bigfala Man Blong Tijim Man.”
Namba tu man biaen long Jeova olsem wan tija hemia Pikinini blong hem nomo, Jisas Kraes. Ol man oli savegud hem olsem wan “Tija” mo olsem “Wan Man Blong Tijim Man,” (NW) olsem ol Gospel oli tokbaot hem 50 taem. Nating se Jisas i mekem narafala wok olsem blong fiksimap ol sik mo ol narafala merikel, ol man oli no tingbaot Jisas olsem wan Dokta be olsem wan Tija, Man Blong Tijim Man.—Matyu 8:19; Luk 5:5; Jon 13:13.
I stret nomo, Jisas i tijim ol disaepol mo ol aposol blong hem blong kam ol tija olsem hem. Yumi save luk samting ya long Matyu 10:5 kasem 11:1 mo Luk 10:1-11. I no longtaem bifo we hem i go antap long heven, Jisas i givim wok ya blong tijim man long ol disaepol blong hem olsem yumi luk long Matyu 28:19, 20 se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala.” Buk blong Ol Wok, i sem mak long ol narafala leta we oli raetem long Grik haf blong Baebol we oli kamaot from tabu speret, i tokbaot fasin blong ol faswan man blong Jisas taem oli stap tijim ol man se oli wok strong, oli gat gudhan mo oli holemstrong long wok ya.
Wok ya blong tijim ol man i spid moa tede bitim bifo. Yumi stap laef long ol las dei blong ol fasin blong naoia, mo from samting ya, laef blong ol man i stap long denja. Blong ol man oli no joen long ol sin ya we Bigfala Babilon i stap mekem, mo blong panis wetem hem, oli mas kasem tijing mo help blong kamaot long Babilon mo blong mekem disisin blong olgeta blong mekem wok blong Jeova mo Kingdom blong hem.—Revelesen 18:4.
Blong givhan long ol Wetnes blong Jeova long ol traehad blong olgeta blong mekem wok ya blong tijim ol man, Jeova i yusum ogenaesesen blong hem blong givim Distrik Asembli ya “Tijing Blong God.” Ol fo dei Distrik Asembli ya bambae i stat long ol ples blong not blong wol long stat blong hot taem blong 1993. I gud wanwan man we i givim laef blong hem i go long Jeova oli save kam joen long wan asembli ya, stap mo lesingud stat long faswan singsing mo prea long Tasde aftenun kasem we i finis long laswan prea long Sande aftenun.