Jeova i No Tanem Baksaed Long Man We i Mekem Tingting Blong Hem i Stap Daon
“God, sakrifaes blong mi, hem i tingting we i stap daon. Yu yu no save tanem baksaed blong yu long man we i tanem tingting blong hem mo i putum hem i stap daon.”—OL SAM 51:17.
1. ?Wanem tingting blong Jeova long ol man we oli stap wosip long hem we oli mekem bigfala sin be oli tanem tingting blong olgeta long sin ya?
JEOVA i save ‘putum wan klaod blong blokem hem, blong ol prea oli no save kasem hem.’ (Lamentesin 3:44) Be hem i wantem ol man blong hem blong oli save toktok long hem. Sipos wan long ol man we i wosip long hem i mekem bigfala sin be hem i tanem tingting blong hem long sin blong hem, Papa blong yumi long heven i tingbaot ol gudfala wok we man ya i bin mekem. Taswe, aposol Pol i save talem long ol Kristin fren blong hem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i laekem hem tumas.”—Hibrus 6:10.
2, 3. ?Ol Kristin elda oli mas tingbaot wanem taem oli toktok wetem man we i mekem sin?
2 Ol Kristin elda tu oli mas tingbaot wok blong ol narafala man blong bilif we oli bin mekem long God long plante yia finis. Oli save tingbaot tu wok blong man we i mekem wan mastik no hem i mekem wan bigfala sin tu, be hem i tanem tingting blong hem from. Ol Kristin man blong lukaot sipsip oli wantem givim ol samting long saed blong speret long olgeta sipsip blong God.—Galesia 6:1, 2.
3 Wan man we i tanem tingting blong hem from rabis fasin blong hem, i nidim fasin sore blong Jeova. Be, i gat moa samting blong hem i mas mekem. Tok blong Deved long Ol Sam 51:10-19 i mekem i klia.
I Nidim Wan Hat We i Klin
4. ?From wanem Deved i prea from wan klin hat mo wan nyufala tingting?
4 Sipos wan Kristin we i givim laef blong hem finis long God i harem nogud long saed blong speret from sin, ?wanem samting hem i nidim antap long fasin sore mo fasin blong fogif blong Jeova? Yes, Deved i askem se: “Plis yu mekem [hat, NW] blong mi i klin olgeta. Plis yu mekem tingting blong mi i kam nyuwan bakegen, mo i stap strong long yu oltaem.” (Ol Sam 51:10) I klia se, Deved i askem samting ya from hem i luksave se tingting we i pulum hem blong mekem bigfala sin i stap yet long hat blong hem. Maet yumi no mekem ol sin olsem ol sin we oli holemtaet Deved long saed blong Bat-seba mo Uraea, be yumi nidim help blong Jeova blong yumi no foldaon long ol samting blong pulum man, nao yumi save mekem sam bigfala sin. Mo bakegen, maet yumi nidim help blong God blong tekemaot ol rabis tingting long hat blong yumi, ol tingting blong wantem samting blong narafala mo fasin blong no laekem man—hemia ol nogud fasin we oli kolosap sem mak long fasin blong stil mo fasin blong kilim man i ded.—Kolosi 3:5, 6; 1 Jon 3:15.
5. (a) ?Wanem mining blong gat wan klin hat? (b) ?Deved i wantem wanem taem hem i askem wan nyufala tingting?
5 Jeova i wantem se ol man blong hem oli gat ‘wan hat we i klin,’ hemia, klin tingting we i pusum olgeta blong mekem sam samting. Taem Deved i luksave se hat blong hem i no klin olsem, hem i prea blong God i klinim hat blong hem mo blong mekem i laenap wetem ol rul blong God. Man we i raetem Sam ya i wantem wan nyufala stret tingting, no paoa blong tingting we i pusum hem blong mekem evri samting. Hem i nidim wan paoa we bambae i givhan long hem blong blokem ol samting blong pulum man mo givhan long hem blong stap holemstrong long ol loa mo ol rul blong Jeova.
I Nidim Tabu Speret
6. ?From wanem Deved i askem Jeova blong no tekemaot tabu speret blong hem long hem?
6 Taem yumi gat tingting we i trabol from ol mastik no ol nogud fasin blong yumi, yumi save harem se God bambae i lego yumi mo tekemaot tabu speret blong hem long yumi. Deved i harem olsem, taswe hem i askem Jeova se: “Plis yu no ronemaot mi mi gowe long yu, mo yu no tekemaot Tabu Speret blong yu i gowe long mi.” (Ol Sam 51:11) Tingting blong Deved i stap daon, hem i sem tumas from sin blong hem mo hem i harem se sin blong hem i mekem se hem i no naf blong mekem wok blong Jeova. Blong sakemaot hem long fored blong God i min se God bambae i no moa glad long hem, bambae hem i no moa haremgud mo hem i lusum blesing blong God. Blong Deved i kam strong bakegen long saed blong speret, hem i nidim tabu speret blong Jeova. Sipos tabu speret i stap long king ya, hem i save prea blong askem gudfala rod blong folem blong mekem Jeova i glad long hem, hem i save ronwe long sin, mo hem i save rul wetem waes fasin. Taem Deved i luksave sin we hem i mekem agens long Hemia we i stap Givim tabu speret, hem i askem strong long Jeova blong i no tekemaot tabu speret ya long hem.
7. ?From wanem yumi mas prea from tabu speret mo yumi mas lukaotgud blong yumi no mekem tabu speret i harem nogud?
7 ?Olsem wanem long yumi? Yumi mas prea from tabu speret mo yumi mas lukaotgud blong yumi no mekem tabu speret i harem nogud sipos yumi no folem ol rod we hem i soemaot long yumi. (Luk 11:13; Efesas 4:30) Sipos no, yumi save lusum tabu speret ya mo bambae yumi no save soem ol frut blong hem we God i givim olsem lav, glad, pis, longfala tingting, kaen fasin, gud fasin, bilif, kwaet fasin mo fasin blong bos long tingting. Jeova God bambae i tekemaot tabu speret blong hem long yumi sipos yumi no tanem tingting blong yumi mo sipos yumi stap gohed blong mekem sin agens long hem.
Glad Bakegen
8. ?Sipos yumi mekem sin be yumi wantem glad long fasin we God i stap sevem man, yumi mas gat wanem?
8 Wan man blong mekem sin we i kam strong bakegen long saed blong speret from hem i tanem tingting blong hem, i save glad bakegen long ol samting we Jeova i givim blong sevem ol man. Deved i wantem samting ya taswe hem i askem God se: “Plis yu mekem mi mi glad bakegen from we yu yu sevem mi, plis yu mekem mi mi wantem blong obei long yu.” (Ol Sam 51:12) !I gud tumas blong stap glad long trufala hop blong sef we Jeova God i givim! (Ol Sam 3:8) Afta we Deved i mekem sin agens long God, Deved i faenem glad bakegen long fasin ya we God i stap sevem man. Biaen, Jeova i mekem rod blong sevem ol man tru long ransom sakrifaes blong Pikinini blong hem, Jisas Kraes. Sipos yumi ya olsem ol man blong God we yumi givim laef blong yumi finis long hem, yumi mekem bigfala sin be yumi wantem kasem glad ya bakegen blong laef, yumi mas gat tingting ya we yumi wantem tanem tingting blong yumi long sin, blong yumi no mekem sin agens long tabu speret.—Matyu 12:31, 32; Hibrus 6:4-6.
9. ?Deved i askem wanem taem hem i askem God blong givhan long hem “wetem tingting blong obei”?
9 Deved i askem Jeova blong givhan long hem “wetem tingting blong obei.” (NW) I luk olsem se, samting ya i no minim fasin blong God we hem i stap rere nomo blong givhan no i minim tabu speret blong hem, no gat, be hem i minim paoa we i pusum tingting blong Deved. Deved i wantem God i givhan long hem wetem wan tingting blong rere blong mekem samting we i stret mo blong hem i no save foldaon long sin bakegen. Jeova God i stap gohed blong givhan long ol man blong hem mo hem i stap leftemap olgeta we tingting blong olgeta i foldaon from ol defren kaen traem. (Ol Sam 145:14) !I gud tumas blong save samting ya, antap moa sipos yumi mekem sin be yumi sore tumas from mo yumi wantem gohed moa blong mekem wok blong Jeova blong olwe!
?Tijim Ol Nogud Man Long Wanem?
10, 11. (a) ?Deved i save tijim ol nogud man Isrel long wanem? (b) ?Deved i save tijim ol nogud man afta we hem wan i mekem wanem?
10 Sipos God bambae i letem Deved, hem i wantem tumas blong mekem wan samting blong bambae i soemaot fasin tangkyu from fasin sore blong Jeova mo bambae hem i givhan long ol narafala man. King ya we i tanem tingting blong hem i prea long Jeova wetem filing, hem i talem se: “Nao bambae mi tijim ol man nogud long ol tok blong yu nao bambae oli kambak long yu.” (Ol Sam 51:13) ?Olsem wanem Deved i save tijim Loa blong God long ol nogud man? ?Bambae hem i talem wanem long olgeta? ?Wanem gudfala samting i save kamaot from?
11 Taem Deved i soem ol rod blong Jeova long ol man blong mekem sin long Isrel blong hem i traem tanem tingting blong olgeta long ol rabis rod blong olgeta, Deved i save soemaot, olsem wanem sin hem i wan nogud samting, mining blong tanem tingting from sin, mo olsem wanem blong oli kasem fasin sore blong God. From we Deved i bin harem nogud finis taem God i no glad long hem mo from voes blong hat mo tingting blong hem i stikim hem from, bambae Deved i save kam wan man blong tij we i gat fasin sore long ol man we oli tanem tingting blong olgeta, ol man blong mekem sin we oli harem nogud tumas long hat blong olgeta. Yes, hem i save yusum eksampel blong hem blong tijim ol narafala, jes from we hem i bin akseptem ol rul mo i kasem fasin fogif blong Jeova, from olgeta we oli no wantem stap aninit long ol samting we God i wantem oli no gat raet blong ‘tijim ol Loa blong God.’—Ol Sam 50:16, 17.
12. ?Olsem wanem Deved i haremgud long save ya se God i stap tekemaot hem from panis we hem i kilim man i ded?
12 Deved i talemaot tingting blong hem bakegen long narafala fasin, hem i se: “God, oltaem yu yu stap sevem mi. Plis yu letem mi mi gofri, mi no ded, nao bambae mi mi glad, mi stap sing blong talemaot stret fasin blong yu.” (Ol Sam 51:14) Man we i kilim man i ded, oli mas kilim hem i ded tu. (Jenesis 9:5, 6) Taswe taem Deved i save se God ya we i sevem hem i tekemaot hem long panis blong sin ya we hem i kilim Uraea i ded i mekem se Deved i gat pis long hat mo tingting blong hem. Nao hem i save singsing from glad long saed blong stret fasin blong God, be i no blong hem. (Eklesiastis 7:20; Rom 3:10) Deved i no save waepemaot rabis fasin ya blong seks mo hem i no save mekem Uraea i laef bakegen, sem mak wan man tede i no save putumbak klin fasin blong wan man we hem i mekem nogud long hem no hem i save mekem wan man we hem i kilim i ded finis i laef bakegen. I gud yumi stap tingbaot samting ya taem ol samting blong pulum man oli traem yumi. !Mo yumi mas gat fasin tangkyu from fasin sore blong God we hem i stap mekem long yumi long stret fasin! Yes, fasin tangkyu i mas pusum yumi blong lidim ol narafala man i go long Stampa blong stret fasin mo fasin blong fogif.
13. ?Wanem samting nomo i save mekem wan sinman i openem maot blong hem blong presem Jeova?
13 I no gat man blong mekem sin i save openem maot blong hem blong presem Jeova sipos Jeova i no sore long man ya mo openem maot blong hem, blong tokbaot ol trutok blong Hem. Taswe Deved i singsing olsem se: “Masta, plis yu givhan long mi blong tok, nao bambae mi presem yu.” (Ol Sam 51:15) Wetem voes blong hat we i klin from God i fogivim hem, bambae Deved i wantem tumas blong tijim ol man blong brekem loa long ol rod blong Jeova, nao hem i fri blong presem Jeova. Olgeta we God i fogivim sin blong olgeta olsem we hem i mekem long Deved oli mas gat fasin tangkyu long kaengud fasin blong Jeova long olgeta, mo oli mas tekem evri jans blong talemaot trutok blong God mo ‘presem hem.’—Ol Sam 43:3.
Mekem Ol Sakrifaes We God i Laekem
14. (a) ?Long saed blong Loa, wanem sakrifaes man i mas mekem? (b) ?From wanem i no stret blong ting se yumi save mekem God i fogivim yumi long rabis fasin we yumi stap gohed long hem, sipos yumi mekem ol gudfala samting?
14 Deved i kasem dip save we i mekem se hem i talem se: “Sipos yu [Jeova] yu wantem sakrifaes ya we man i bonem we i bon olgeta, no sam narafala sakrifaes, bambae mi mi glad blong mekem, be ol sakrifaes ya oli no save mekem yu yu glad.” (Ol Sam 51:16) Long kontrak blong Loa man i mas mekem sakrifaes blong anamol i go long God. Be sin blong Deved long saed blong slip wetem woman blong narafala man mo kilim man i ded, we panis blong hem hemia ded, ol sakrifaes olsem oli no save tekemaot. Sipos ol sakrifaes oli save tekemaot ol sin ya, hem i save mekem ol sakrifaes blong anamol i go long Jeova. Ol sakrifaes oli nating nomo sipos man i no tanem tingting blong hem from ol sin we hem i mekem. Taswe bambae i no stret blong ting se yumi save mekem God i fogivim yumi long rabis fasin we yumi stap gohed blong mekem sipos yumi mekem ol gudfala samting.
15. ?Wanem tingting blong wan man we i givim laef blong hem finis long God, taem hem i mekem tingting blong hem i stap daon?
15 Deved i gohed i se: “God, sakrifaes blong mi, hem i tingting we i stap daon. Yu yu no save tanem baksaed blong yu long man we i tanem tingting blong hem mo i putum hem i stap daon.” (Ol Sam 51:17) Long saed blong wan man we i tanem tingting blong hem, ‘sakrifaes blong hem’ we God i laekem, ‘hem i tingting we i stap daon.’ Man olsem i no stronghed long fasin blong hem. Hat blong wan man we i givim laef blong hem finis long God mo i harem nogud long tingting blong hem, hem i sore tumas from sin blong hem, hem i gat tingting daon from we hem i haremsave se God i no agri long hem, mo hem i rere blong mekem enikaen samting blong God i glad long hem bakegen. Yumi no save givim wan samting long God we bambae hem i glad long hem gogo yumi tanem tingting from sin blong yumi mo yumi givim hat blong yumi long wosip blong hem nomo.—Neham 1:2.
16. ?Olsem wanem God i lukluk wan man we i harem nogud long hat blong hem from sin blong hem?
16 God i no stap sakem wan sakrifaes olsem tingting we i stap daon. Taswe nating se yumi ol man blong hem yumi kasem sam trabol, i nogud blong foldaon long tingting we i trabol. Sipos yumi foldaon long sam fasin taem yumi folem rod ya blong laef we i mekem se yumi wantem tumas fasin sore blong God, yumi no lus olgeta yet. Sipos yumi mekem wan bigfala sin be yumi tanem tingting blong yumi, Jeova bambae i no tanem baksaed long yumi ya we yumi harem nogud long hat blong yumi. From ransom sakrifaes blong Kraes, Jeova bambae i fogivim yumi mo hem i save glad long yumi bakegen. (Aesea 57:15; Hibrus 4:16; 1 Jon 2:1) Be olsem Deved, prea blong yumi i blong stap olsem we God i glad long yumi bakegen mo i no from we yumi wantem ronwe long fasin stretem we yumi nidim. God i fogivim Deved, be tu hem i stretem hem.—2 Samuel 12:11-14.
Tingbaot Klin Wosip
17. ?Taem man i askem God blong fogivim hem, hem i mas mekem wanem tu?
17 Sipos yumi mekem sam bigfala sin, samting ya bambae i mekem yumi wari tumas, mo wan hat we i sore from sin ya bambae i pusum yumi blong askem God blong i fogivim yumi. Be, i gud tu blong stap prea from ol narafala man. Nating se Deved i stap tingbaot blong mekem wosip we God i agri bakegen long hem, hem i no fogetem ol narafala man taem hem i raetem Ol Sam blong hem. Insaed long Sam ya hem i askem olsem long Jeova, se: “God, plis yu kaen long Saeon, yu halpem hem, yu stanemap bigfala stonwol blong Jerusalem bakegen.”—Ol Sam 51:18.
18. ?From wanem Deved we i tanem tingting blong hem i prea from Saeon?
18 Yes, Deved i stap lukluk i go long taem ya we bambae God i glad bakegen long hem. Be tu prea ya blong Deved we tingting blong hem i stap daon, se ‘God i save mekem i gud long Saeon,’ hemia bigfala taon blong Isrel, Jerusalem, ples we Deved i stap tingting blong bildim tempel blong God long hem. Bigfala sin blong Deved kolosap i spolem ful nesen, from we olgeta man oli save harem nogud from rabis fasin blong king ya. (Lukluk 2 Samuel, japta 24.) I olsem we sin blong hem i mekem se “stonwol blong Jerusalem” i no moa strong, taswe naoia oli mas bildim bakegen.
19. ?Sipos yumi mekem sin be God i fogivim yumi, wanem samting i stret blong yumi prea from?
19 Sipos yumi mekem bigfala sin be yumi kasem fasin fogif blong God, i stret blong yumi prea se hem i save wokemgud bakegen sam trabol we oli kamaot from rabis fasin blong yumi. Maet yumi daonem tabu nem blong hem, maet yumi mekem kongregesen i kam slak, no maet yumi mekem famle blong yumi oli harem nogud. Papa blong yumi long heven we hem i gat lav i save tekemaot ol rabis fasin we oli daonem nem blong hem, hem i save bildimap bakegen kongregesen blong hem wetem tabu speret blong hem, mo hem i save mekem hat blong ol fren blong yumi we oli laekem hem mo oli stap mekem wok blong hem oli haremgud bakegen. Nating se samting ya i kamaot from sin blong yumi no no gat, oltaem yumi mas tingbaot blong leftemap nem blong Jeova mo blong mekem i gud long ol man blong hem.—Matyu 6:9.
20. ?Wanem samting i save mekem Jeova i glad long sakrifaes mo presen we ol man Isrel oli givim?
20 Sipos Jeova i bildim bakegen stonwol blong Saeon, ?wanem narafala samting i save kamaot? Deved i singsing olsem se: “Nao bambae yu [Jeova] yu glad long ol sakrifaes we man i mekem long stret fasin, mo long ol presen blong mifala we mifala i bonem i go long yu. Bambae mifala i stap bonem ol bul long olta blong yu.” (Ol Sam 51:19) Deved i wantem tumas se hem mo nesen ya oli save haremgud from Jeova i glad long olgeta nao Hem i akseptem wosip we oli mekem long hem. Nao God bambae i glad long ol sakrifaes we oli bonem mo ol presen we oli givim. Bambae i olsem from we ol sakrifaes ya oli sakrifaes blong stret fasin. Ol trufala man blong God we oli givim laef blong olgeta finis long hem mo oli tanem tingting blong olgeta finis oli stap mekem. Oli haremgud from God i glad long olgeta. From we oli glad long fasin sore blong Jeova, oli save mekem sakrifaes blong bul long olta—hemia nambawan mo sas sakrifaes. Tede, yumi givim ona long Jeova taem yumi givim nambawan samting we yumi gat long hem. Mo ol samting we yumi stap givim long hem oli olsem “bul we hemia maot blong yumi,” hemia sakrifaes blong presem Jeova, God blong yumi we i gat fasin sore.—Hosea 14:2; Hibrus 13:15.
Jeova i Harem Krae Blong Yumi
21, 22. ?Ol Sam 51 i givim wanem lesen we i save givhan long yumi?
21 Prea blong Deved we i kamaot long hat blong hem i stap long Ol Sam 51, mo i soemaot long yumi se yumi mas tingbaot sin blong yumi wetem wan stret tingting blong tanem tingting blong yumi long sin. Ol Sam ya tu i givim sam samting we yumi save kasem gudfala blesing from. Eksampel, sipos yumi mekem sin be yumi tanem tingting blong yumi, yumi save trastem fasin sore blong Jeova. Be, i gud blong tingbaot fastaem sipos sin we yumi bin mekem i daonem nem blong Jeova. (Vas 1-4) Olsem Deved, yumi save askem Papa blong yumi long heven blong hem i sore long yumi from we yumi sinman. (Vas 5) Yumi mas talem trutok, mo yumi mas lukaot waes blong God. (Vas 6) Sipos yumi sin, yumi mas askem Jeova blong klinim yumi, blong givim wan klin hat, mo gat wan strong tingting blong gohed.—Vas 7-10.
22 Long Ol Sam 51 yumi save luk tu se yumi neva mas kam stronghed long sin. Sipos yumi mekem olsem, Jeova bambae i tekemaot tabu speret no paoa blong hem long yumi. Taem tabu speret blong God i stap long yumi, yumi save tijimgud ol narafala long ol rod blong God. (Vas 11-13) Sipos yumi mekem sin be yumi tanem tingting blong yumi long sin ya, Jeova bambae i letem yumi blong gohed blong stap presem hem from we hem i no save tanem baksaed long man we hem i mekem tingting blong hem i stap daon. (Vas 14-17) Ol Sam ya i gohed blong soemaot se yumi no mas prea from yumi nomo. Be, yumi mas prea from blesing mo laef blong ol narafala we oli stap joen long klin wosip blong Jeova.—Vas 18, 19.
23. ?From wanem Ol Sam 51 i mas pusum yumi blong gat strong tingting mo gudfala tingting long fyuja?
23 Gudfala Sam ya blong Deved i mas pusum yumi blong gat strong tingting mo stret tingting long fyuja. I givhan long yumi blong luksave we yumi no mas ting se yumi lus olgeta sipos yumi foldaon long sin. ?From wanem? From we sipos yumi tanem tingting blong yumi, fasin sore blong Jeova i save sevem yumi long tingting we i trabol. Sipos yumi sore tumas long sin blong yumi mo yumi givim ful laef blong yumi long Papa blong yumi long heven we i gat lav, bambae hem i harem ol krae blong yumi nao hem i save sore long yumi. !Mo hem i gud tumas blong save we Jeova i no tanem baksaed long man we i harem nogud long hat blong hem!
?Olsem Wanem Yu Ansa?
◻ ?From wanem ol Kristin oli nidim wan klin hat mo tabu speret blong God?
◻ ?Olsem wanem man we i tanem tingting blong hem long sin i save tijim ol nogud man long ol loa blong Jeova?
◻ ?Wanem tingting blong Jeova long man we i harem nogud long hat blong hem?
◻ ?Wanem samting yumi save lanem long Ol Sam 51?
[Tok Blong Pija Long Pej 15]
?Yu yu stap prea from tabu speret mo lukaotgud blong yu no mekem tabu speret i harem nogud?
[Tok Blong Pija Long Pej 17]
Soem fasin tangkyu long kaengud fasin blong Jeova taem yu talemaot trutok blong hem