?Bambae Yu Yu Tekem Baptaes?
KOLOSAP wan milyan man we ol Wetnes blong Jeova oli baptaesem long ol tri yia we oli jes pas. Samting ya i kam olsem 824 long wan dei, no 4 man oli tekem baptaes evri 7 menet. ?Oli jes wantem blong folem ol skul blong ol yia 1400 no 1500?
No gat, ol wanwan man ya oli no baptaes from man i fosem olgeta, olsem haf blong wan prea blong jenisim man, no olsem wan samting we hem i mekem from we wan lida blong skul i askem wetem strong filing. Oli baptaes from we Jisas Kraes, Masta mo Hed blong ol Kristin, i talem se oli mas mekem olsem. Oli folem ol rod mo ol fasin we Jisas i soemaot mo wok blong ol aposol we hem wan i jusum mo i trenem olgeta.
Afta we Jisas i laef bakegen long ded mo bifo we hem i go antap long heven, hem i givim wok ya long ol man blong hem se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong papa blong mi, mo long nem blong mi, mi Pikinini blong hem, mo long nem blong tabu speret. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.” (Matyu 28:19, 20) I stat long taem ya i kam, fasin ya nomo blong baptaes long wora we God i agri long hem.
Tru ya, Baebol i talem long yumi se ol faswan man ya blong Kraes oli “go talemaot hem [Jisas] long Jerusalem, mo long olgeta ples long Judia mo Sameria, gogo i finisim olgeta ples long wol.” (Ol Wok 1:8) Olsem Jisas i bin talem, wok blong olgeta blong prij mo blong tij i blong pulum ol man oli bilif mo blong tekem baptaes blong oli save kam olsem ol man blong Kraes tu.
Faswan eksampel we oli bin raetemdaon i bin hapen long Jerusalem long dei blong Pentekos long yia 33 K.T. Long taem ya aposol Pita i “stanap wetem ol narafala leven aposol” mo i tokbaot Jisas we hem i Mesaea long hif blong ol man we i stap. Store ya i soemaot long yumi se ‘taem ol man oli harem tok ya, oli harem we i stikim olgeta tumas,’ mo oli askem se wanem nao bambae oli mekem. Pita i talem long olgeta, i se, “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala.” Samting we i kamaot se “olgeta we oli bilif long tok blong hem, oli tekem baptaes. Mo long dei ya, samting olsem tri taosen man oli joen long kampani blong olgeta.” (Ol Wok 2:14-41) Ol narafala store we i kamaot biaen i soemaot se baptaes we ol disaepol oli mekem i save kamaot afta we man i harem Kristin mesej, i bilif long gud nyus, mo i tanem tingting from ol sin blong hem.—Ol Wok 8:12, 13, 34-38; 10:34-48; 16:30-34; 18:5, 8; 19:1-5.
?Long Wanem Fasin?
?Be olsem wanem ol nyufala disaepol ya oli save baptaes long wora? ?I mas mekem olsem we kafsaedem wora, (kafsaedem long hed), no draonem (draonem fulwan)? ?Ol tok blong Baebol i soemaot wanem? I stat long taem bifo Jisas i bin soemaot fasin ya long yumi “blong bambae yumi biaen long hem.” ?Hem i bin tekem baptaes long wanem fasin?—1 Pita 2:21.
Baebol i soemaot se Jisas i baptaes long Jodan, wan bigfala reva. Afta we hem i tekem baptaes, hem i “kamaot long wora.” (Mak 1:10; Matyu 3:13, 16) Taswe Jisas i bin draon fulwan long Jodan Reva. Jon i baptaesem hem, we, hem i save stret ples blong baptaesem ol man, i jusum wan ples long Jodan kolosap long Salim “long ples ya i gat plante wora i stap.” (Jon 3:23) Yumi save luk fasin ya blong baptaes we ol man blong Jisas oli folem bifo blong draon fulwan long wora, long tok blong man Itiopia we hem i wan haeman. Taem hem i stap lesin long tok blong Filip, hem i talem se: “Yu luk. Hemia wan wora i stap. ?I gat sam samting i stap blokem mi yet se mi no save baptaes?” Ale yumi makem se “tufala i godaon long wora” mo afta “tufala i kamaot long wora bakegen.”—Ol Wok 8:36-39.
?Histri tu i tokbaot fasin blong baptaes blong ol Kristin we oli draonem fulwan long wora? Yes hem i mekem. Mo i gud blong makem se plante bigfala ples blong baptaes we i stret blong draon fulwan oli stap yet long plante ples. Nyuspepa ya Ministry i talem se: “Ol man blong digim graon blong faenem ol samting blong bifo oli faenem plante pruf we i soemaot se fasin blong draon fulwan long wora i bin stap olsem wan stampa fasin blong baptaes long ol yia 1 kasem 1,300.” Hem i gohed i se: “Long medel blong ol faswan Kristin jyos we oli lus finis, mo tu ol jyos blong bifo we oli stap yusum yet, yumi save luk plante pruf blong soemaot fasin blong Kristin baptaes long taem bifo. Ol pija we oli mekem long ol beregraon mo ol jyos, ol pija long floa, ol wol, mo ol ruf blong haos, ol pija we oli katem, mo ol pija blong longtaem bifo long ol olfala hanraet blong Nyu Testeman oli joenem ol toktok blong store ya . . . Hemia i joenem ol pruf we yumi faenem we oli raetem long ol bigfala jyos se draon fulwan long wora hemia nomo i wan fasin blong jyos we oli yusum plante blong tekem baptaes.”
New Catholic Encyclopedia i talem se: “I klia se fasin blong Baptaes we oli mekem long ol faswan Jyos, hemia nao we oli draon fulwan long wora.” Ale, yumi no sapraes se, yumi faenem nyuspepa we i gat ol stampa tok olsem ya: “Ol Katolik Oli Tekem Bakegen Fasin Blong Baptaes We Oli Draon Fulwan Long Wora” (The Edmonton Journal, Kanada, Septemba 24, 1983), “Fasin Blong Baptaes Blong Draon Fulwan Long Wora i Kam Insaed Long Katolik Long Ples Ya” (St. Louis Post-Dispatch, Epril 7, 1985), “Plante Katolik Oli Jusum Fasin Blong Baptaes We i Draon Fulwan Long Wora” (The New York Times, Maj 25, 1989), mo “Fasin Blong Baptaes We Man i Draon Fulwan Long Wora i Kam Strong Bakegen” (The Houston Chronicle, Ogis 24, 1991).
?Baptaes From Wanem?
?From wanem Jisas i talem se ol disaepol blong hem oli mas tekem baptaes? Yes, hem i wan stret saen blong soemaot wetem fulhat blong olgeta se oli givim laef blong olgeta i go long God. Oli mas talemaot “gud nyus” ya long olgeta ples long wol, mo “ol man blong ol nesen” oli save kam olsem ol disaepol. (Matyu 24:14; 28:19) Samting ya i min se God i no moa wok wanples wetem nesen blong ol man Jyu nomo, we oli kam wan man we oli blong hem taem we nesen ya i bon. Konelias wetem famle blong hem oli faswan hiten man no oli no man Jyu we oli agri long trutok long saed blong Jisas Kraes mo oli baptaes.
Fasin blong go aninit long wora i soemaot se olgeta we oli baptaes oli ded long olfala laef we oli bin tingbaot olgeta nomo. Fasin blong olgeta blong girap long wora i soemaot se naoia oli stap laef blong mekem wok blong God mo blong putum long fasples long laef blong olgeta, olsem Jisas i bin mekem. (Matyu 16:24) Blong baptaes ‘long nem blong Papa, mo long nem blong Pikinini, mo long nem blong tabu speret’ i soemaot se oli bin lanem mo akseptem trutok long saed blong Jeova, Jisas, mo tabu spirit mo kasem save long haenem blong olgeta. (Matyu 28:19; skelem wetem Ol Wok 13:48.) Baptaes i wan faswan step blong soemaot fasin obei long God mo blong mekem laef i laenap wetem ol samting we hem i wantem.
Ol tok blong Baebol oli no agri wetem tingting blong ol skul se baptaes i wan tabu mak, hemia nao, wan nambawan mak blong ol skul—hem i gat haenem, i tabu tumas, no i gat frut long saed blong speret—long man we i bin tekem baptaes. Wan eksampel, nyuspepa blong Pop Eugenius IV we sam tok blong hem i stap long narafala haf blong Wajtaoa ya i talem tok ya we i kam biaen we i tokbaot fasin blong baptaes i se: “Samting we i save kamaot from fasin ya blong baptaes i blong tekemaot ol sin, blong bifo mo naoia; i sem mak long ol panis we i save kamaot from sin. Mo from samting ya, i no moa gat ol sin blong bifo i stap long olgeta we oli tekem baptaes; mo sipos oli ded bifo we oli mekem wan sin, oli go wantaem long kingdom blong heven mo stanap long fes blong God.”
Be, Jisas i bin baptaes nating se “hem i no mekem wan samting nogud.” (1 Pita 2:22) Antap moa, olsem ol tok blong Baebol i talem, ransom sakrifaes blong Jisas Kraes nomo i save tekemaot ol sin. Ananaeas i talem long Sol blong Tasas se: “Yu girap, yu prea long [nem blong, NW] Jisas, nao yu tekem baptaes, yu letem hem i wasemaot ol sin blong yu.” (Ol Wok 22:12-16) Yes, rod blong sef i stanap nomo long blad blong Jisas we i ron mo blong “singaot long nem blong hem” wetem bilif.—Hibrus 9:22; 1 Jon 1:7.
Ale, ?olsem wanem long ol tok blong Pita long 1 Pita 3:21? Long ples ya hem i talem se: “Wora ya bifo, hem i saen blong baptaes ya we i sevem yufala naoia. (Be baptaes ya, stampa blong hem i no we yufala i wasemaot ol doti long bodi blong yufala, i we yufala i mekem promes long God we tingting blong yufala i no save jajem yufala from.) Mo baptaes ya i kasem paoa blong sevem yufala from we God i mekem Jisas Kraes i laef bakegen long ded.” Pita i stap skelem fasin blong baptaes wetem fasin blong Noa blong pastru long Bigfala Wora. (Vas 20) Noa i soem fulwan bilif long God, hem i bildim ak blong sevem famle blong hem. (Hibrus 11:7) I sem mak, blong soemaot bilif long Jeova God mo ol samting we hem i mekem blong sevem ol man tru long Kraes Jisas, ol man tede oli save sef from ol nogud fasin blong wol naoia. Oli mas mekem bilif ya i wok long laef blong olgeta tu. Taem oli tanem tingting blong olgeta from ol sin blong olgeta, tanem baksaed long ol nogud rod, mo prea long Jeova God blong givim ful laef blong olgeta i go long hem, oli stap askem God blong gat gudfala voes blong hat mo tingting. Be samting ya i stanap long sakrifaes blong Jisas, mo long laef bakegen blong hem we hem i givim praes blong sakrifaes blong hem long God long heven, se bambae God i save tekemaot ol sin mo ol man oli save kasembak laef.—1 Pita 3:22.
?Bambae Yu Mekem Wanem?
?Yu yu wan long olgeta we i bin joen wetem ol wetnes blong Jeova samtaem? Ating yu bin mekem sam jenis long laef blong yu blong laenap wetem ol rul blong Baebol be yu no bin tekem sam step yet blong givim laef blong yu long Jeova mo baptaes. Maet yu wantem mekem wok blong God be yu fraet se fasin blong baptaes bambae i fosem yu. From samting ya maet yu jusum blong no joen long wok ya mo blong stap olsem we yu no nidim blong talemaot ol samting we yu mekem long fes blong God. Kolosap 11.5 milyan man oli bin kam long Lafet blong Masta long las yia. Be, fulnamba blong olgeta we oli stap joen blong talemaot gud nyus long yia ya i no bitim 4.5 milyan. Samting ya i minim se samwe long 7 milyan man oli soemaot fasin tangkyu long trutok blong God, be oli no Wetnes blong Jeova we oli tekem baptaes. Tru ya, sam long olgeta ya oli ol pikinini mo ol nyuwan we oli intres nomo. Be sam long olgeta we oli stap joen long wok blong prij oli no tekem baptaes yet. Taswe i gat plante man finis we oli bin kasem stret save long saed blong Baebol be oli no bin kasem yet fulwan mak we God i putumap blong kasem laef hemia blong tekem baptaes.
Wan impoten samting blong tingbaot se, hemia save long ol samting we God i wantem yumi blong mekem we i mekem se yumi mas talemaot evri samting long fes blong hem. Jemes 4:17 i talem se: “Man we i save wanem fasin i stret blong mekem, be i no mekem, hem i mekem sin ya.” Esikel 33:7-9 i soemaot se wan man we i harem ol loa blong God mo ol rod blong hem, hem i gat wan wok blong mekem. Ale kwestin i stap se ?man i rili gat trufala lav blong God mo hem i rili wantem mekem God i glad, no no gat? Wan man we i gat trufala lav olsem mo i wantem wan spesel fasin joen wetem Jeova God, i no gat wan samting i save blokem hem blong givim laef blong hem long Jeova. Baptaes i wan fasin blong soemaot long fes blong olgeta man nomo se yu givim laef blong yu finis long Jeova. I wan impoten step blong stap long rod blong laef. Ol trufala man blong bilif oli tekem baptaes.—Ol Wok 8:12.
Ol bigfala samting we God i save mekem long olgeta we oli gat bilif, ol wanwan man we oli givim laef blong olgeta long Jeova, long nyufala wol we i stap kam oli bitim olgeta samting we olfala wol ya i save mekem. Fasin fraet long man i lus taem yumi tingbaot strongfala han blong Jeova God. (1 Korin 10:22; 1 Pita 5:6, 7) I tru tumas, naoia i taem blong askem yu wan, olsem haeman blong Itiopia ya i askem long Filip se: “?I gat sam samting i stap blokem mi yet, se mi no save baptaes?”
[Tok Blong Pija Long Pej 7]
Olsem haeman ya blong Itiopia, yu yu askem yu wan se: “?I gat sam samting i stap blokem mi yet, se mi no save baptaes?”