Harem i Soa Blong Olwe Long Faea—?From Wanem Wan Tijing Olsem i Spolem Tingting Blong Man?

“Mi harem se yu sakemaot pasta blong yu. ?From wanem?”

“Yes, oltaem hem i stap talem se bambae mifala evriwan i go long hel.”

“?Nyufala pasta blong yu i talem wanem?”

“Nyufala pasta i talem se bambae mifala evriwan i go long hel tu.”

“?Be wanem samting i makem se tufala i defren?”

“Yes, hem i defren se pasta ya bifo taem hem i talem samting ya, i olsem we hem i glad long hem; be nyufala pasta taem hem i talem, i olsem we hem i harem nogud tumas from.”

TOK YA i stap long wan buk we i gat ol pija long hem, store ya i soemaot se plante tija blong Baebol, mo tu ol man we oli stap go long jyos, oli no glad wetem tijing ya blong hel. Antap moa, samting ya i makem tok blong man ya blong Kanada, we i stadi long skul, Clark H. Pinnock, taem hem i talem se: “Long olgeta tijing blong mekem man i fraet we ol man oli stadi long hem long plante yia finis, mi ting se i no gat wan we i save mekem man i wari moa i bitim tijing blong hel, olsem man i save harem i soa long bodi mo sol blong hem blong olwe.”

Ol Rabis Fasin

?From wanem plante man oli no glad long ol pija blong faea we Krisendoma i stap soem? (Lukluk bokis.) Tija ya Pinnock i talemaot se: “Tingting ya se man bambae i harem i soa long bodi mo tingting blong foreva i mekem man i wari, mo taem mi tingbaot samting ya se God nao i mekem long olgeta hem i agensem bilif blong mi long saed blong lav blong God.”

Yes, tijing ya se man i stap harem i soa blong olwe long faea i stanemap sam kwestin long saed blong ol fasin blong God. Eksampel, ol trufala Kristin oli tingbaot ol strong kwestin ya we Hans Küng blong Katolik i stanemap se: “?I stret we God blong lav bambae i . . . stap lukluk ol man we hem i wokem oli stap harem i soa blong olwe long faea olsem wan strong panis we i no soem lav no sore nating long olgeta?” Küng i gohed i se: “?Hem i wan God we i no gat filing? . . . ?Wanem tingting yumi save gat long wan man we hem i wantem givimbak long fasin olsem?”b Yes, ?olsem wanem God we i talem long yumi long Baebol se yumi mas laekem ol enemi blong yumi bambae i wantem mekem ol enemi blong hem oli stap harem i soa blong olwe? (1 Jon 4:​8-10) Tru ya, sam man oli luksave se faea blong hel i no laenap wetem fasin blong God, yes bilif ya i no soem stret tingting.

Plante narafala man blong bilif oli no wantem tingbaot ol kwestin ya. Sipos man i no tingbaot ol kwestin ya, be samting ya i no save mekem ol kwestin ya i lus. Taswe yumi mas tingbaot. ?Wanem ol tingting long saed blong fasin blong God we tijing ya i givim? Long buk ya Criswell Theological Review, Tija ya Pinnock i raetem se: “Tijing ya se man i stap harem i soa blong olwe long faea i no stret nating from we bilif ya i mekem God i olsem wan God we i haremgud blong yusum ol nogud fasin blong kilim man mo hem i bos long wan nogud ples we hem i no wantem letem ol man we oli stap long hem oli ded.” Hem i askem se: “?Olsem wanem, wan man we i gat fasin sore i save haremgud long tingting blong mekem wan samting olsem [tijing blong hel]? . . . ?Olsem wanem ol Kristin oli save tingbaot wan God we i gat raf fasin mo i gat fasin blong panisim man olsem?”

Taem Pinnock i soem we tijing blong hel i save jenisim fasin blong ol man blong i kam nogud, hem i se: “Mi stap tingbaot wanem krangke fasin blong ol man we oli bilif long wan God we i stap bonem ol enemi blong hem blong oli harem nogud olwe, oli bin mekem?” Hem i finisim tok blong hem se: “Ating hemia i wan bilif we man i mas tingtinggud long hem fastaem from we hem i save mekem ol man oli wari.” Yes, sipos ol man oli talem se ol raf fasin olsem oli blong God, yumi no sapraes se ol man we oli stap go long jyos oli wantem jekem bakegen tijing blong helfaea. ?Mo wanem samting oli faenemaot? Wan narafala trabol we i agensem tingting ya se man i save harem i soa blong olwe long faea.

Hel mo Stret Fasin

Plante we oli stap tingtinggud long olfala bilif ya blong hel oli faenem se bilif ya i soem se God i olsem we hem i no mekem stret fasin, taswe hem i spolem prapa tingting blong olgeta long saed blong stret fasin. ?Olsem wanem?

Yu save faenem wan ansa taem yu skelem bilif ya we man i stap harem i soa blong olwe long faea wetem stret rul we Jeova God i givim, i se: “Ae i mas jenisim ae, tut i mas jenisim tut.” (Eksodas 21:​24, NW) Long saed ya, skelem bilif ya blong helfaea wetem loa ya we God i givim long Isrel bifo, hemia loa blong givimbak. ?Wanem samting bambae yu lanem long loa ya? Yes ol sinman nomo we oli stap mekem man i harem i soa blong olwe oli save kasem panis blong harem i soa blong olwe​—sipos wan man i stap mekem i soa blong olwe long wan narafala man, man ya i mas mekem hem i harem soa blong olwe tu. Be from we ol man (nating se oli gat ol rabis fasin) oli save mekem man i harem nogud blong smoltaem nomo, nao fasin blong givim panis long olgeta blong oli stap harem i soa blong olwe, hem i bitim panis we i stret blong oli kasem from ol rabis fasin blong olgeta.

Olsemia nao, panis ya i strong tumas long olgeta. Hem i bitim loa ya “ae i mas jenisim ae, tut i mas jenisim tut.” Mo tingbaot se ol tijing blong Jisas oli jenisim tingting ya long saed blong givimbak, maet yu luksave se ol trufala Kristin oli no save bilif se i stret blong God i save mekem man i stap harem i nogud blong olwe.​—Matyu 5:​38, 39; Rom 12:17.

Oli Traem Talem se Bilif Ya i Stret

Nating se i no stret, plante man blong bilif oli stap traehad blong talem se bilif ya i stret. ?Olsem wanem oli mekem? Clive S. Lewis, man blong raetem buk long Engglan, i toktok long saed blong ol man we oli agri long bilif ya, long buk blong hem The Problem of Pain, i se: “Sipos mi mekem jus, bambae mi mi tekemaot bilif ya long Kristiniti, sipos mi mi naf blong mekem olsem. Be Baebol i sapotem fulwan mo, antap moa hem i ol prapa tok blong Masta blong Yumi.” Taswe, ol man we oli sapotem bilif ya oli talem stret se fasin ya we man i stap harem i soa blong olwe i narakaen, be long semtaem, oli ting se oli mas bilif long tijing ya from we oli ting se Baebol i tijim. Pinnock man blong stadi long skul i talem se: “Taem oli talemaot ol nogud samting blong hel, oli hop blong pruvum se oli stap bilif strong long Baebol mo oli flas se oli bilivim wan strong trutok olsem jes from we Baebol i tijim. Oli mekem i luk olsem we man i no moa save trastem Baebol sipos hem i no bilif long tijing ya. ?Be samting ya i tru?”

Maet yu tu yu stap tingting sipos yu mas akseptem bilif ya from we yu yu trastem Baebol. ?Baebol i rili talem wanem long saed blong hel?

[Ol futnot]