Ripot Long Wok Blong Kingdom
Stret Fasin i Leftemap Wok Blong Yumi
STRET fasin i wan faswan impoten samting long ol Kristin. Aposol Pol i raetem long Hibrus 13:18 se: “Mifala i no harem olsem we tingting blong mifala i stap jajem mifala, mifala i stap harem gud nomo. Mo mifala i wantem tumas we oltaem mifala i stap mekem i stret nomo.” Stret fasin long wok blong yumi bambae i ‘leftemap tok blong God ya we i sevem yumi, long fes blong ol man.’ (Taetas 2:10) Long kingdom blong Tonga long Saot Pasifik, tufala Kristin oli stap soemaot wan strongfala wetnes long saed blong stret fasin, mo long wok blong talemaot Kingdom. Branj ofis blong ‘Watch Tower’ Sosaeti long Westen Samoa i talem se:
“Long sam yia wan man wetem waef blong hem we tufala i Wetnes, tufala i tokbaot Kingdom blong God long ol man blong fo velej long aelan blong olgeta be oli no luk ol frut blong wok blong tufala. Nao, taem hasban i sik, waef i mas lukaot long plantesin blong tufala mo hem i mas katem kopra mo i mekem i drae, hemia nomo rod blong tufala blong kasem mane. Long taem we ol man blong pem kopra oli kam blong jekemap, wan bag blong wan narafala man i meksap wetem faef bag blong hem. Ol man blong velej oli talem long hem blong tekem bag ya mo blong tingbaot bag ya olsem wan blesing we God i givim. Be, sista ya i no agri mo, nating se oli pem sikis bag, hem i tekem nomo mane ya we i stret long wok blong hem. Oli luksave stret fasin blong hem.
“Biaen, taem hasban blong hem i mas go long wan narafala aelan, man we i stap lukaot long stoa i askem hem blong i pem sam samting long hem. Wetnes ya i mekem olsem man blong stoa ya i talem mo i karem haf mane i kambak long man ya. Man ya i sapraes tumas. Hem i talem se hemia i fastaem blong wan man i karem bak haf mane blong hem. Ol narafala we hem i askem olgeta blong pem ol samting blong hem, oltaem oli tekem haf mane. Long wan narafala taem, taem Wetnes ya i nidim samting long stoa blong man ya, man ya i givim ki blong stoa long hem, i talem long hem se hem i save tekem ol samting we hem i nidim mo hem i save putum mane blong ol samting ya long stoa. Ol narafala man we oli stap oli askem long man blong stoa ya se from wanem hem i save givim ki blong stoa long Wetnes ya be i no givim long olgeta. Man blong stoa ya i talem se long velej ya hem i save trastem Wetnes ya nomo.
“Ol man long velej ya oli tokbaot nambawan wok blong man ya wetem woman blong hem. Ol man oli save ol Wetnes from stret fasin blong olgeta, fasin blong olgeta blong no joen long politik, mo wok blong olgeta blong talemaot Kingdom blong God, we i soemaot se ol bilif blong ol man long velej i defren long ol tijing blong Baebol. Naoia taem i gat sam kwestin long saed blong Baebol, ol man oli kam askem long tufala Wetnes ya blong givim ol ansa. Mo tu hasban ya i bin girap long bed long naet, i go long miting blong wan velej, mo i ansa long ol kwestin we i bin kamaot long saed blong Baebol. Taem wan man i ded long velej, plante taem oli bin askem hem blong go soem wanem samting Baebol i talem long saed blong ded, mo oli agri long ol tok blong hem.”
Ale stret fasin blong tufala Wetnes ya mo wok blong tufala blong talemaot Kingdom i stap givim wan gudfala wetnes long naesfala aelan ya blong Saot Pasifik. Oli hop se bambae ol narafala oli stadi long Baebol mo stanap long saed blong trutok. Sipos oli mekem, i tru se bambae Jeova i blesem olgeta.—Jon 8:32.