“Singaot Ol Elda”

“?I gat wan long yufala we i sik? I gud hem i singaot ol elda blong [kongregesen, “NW”] blong oli kam luk hem.”​—JEMES 5:14.

1, 2. (a) ?Wanem trabol ol man blong Jeova naoia oli fesem, mo maet oli save harem olsem wanem from? (b) ?Wanem ol kwestin we yumi mas ansa long olgeta?

NAOIA “laef blong wol ya i kam strong tumas.” Ol man oli stap tingbaot olgeta nomo, ronem ol samting blong bodi, oli flas, plante taem oli stap mekem trabol long ol “Lasdei” ya. (2 Timote 3:​1-5) Yumi olsem ol Kristin we yumi stap laef long medel blong rabis fasin blong naoia, yumi faenem se i gat trifala samting oli stap agensem yumi: Devel Setan, ol rabis man blong wol, mo ol slak fasin blong sin we yumi bon wetem.​—Rom 5:12; 1 Pita 5:8; 1 Jon 5:19.

² From ol trabol ya we oli stap agensem yumi, maet samtaem tingting blong yumi i foldaon. ?Nao weples yumi save faenem help blong stanap strong longtaem? ?Bambae yumi lukluk i go long hu, taem yumi fesem ol disisin long saed blong Kristin wok mo wosip blong yumi?

Help i Stap

3. ?Hu i save givim save we i mekem yumi haremgud mo sef, mo olsem wanem?

³ Save ya se Jeova i Stampa blong paoa blong yumi i mekem yumi haremgud mo sef. (2 Korin 1:​3, 4; Filipae 4:13) Man blong raetem Sam, Deved, we hem i kasem help long God, i talem se: “Yu mas givim laef blong yu long [Jeova], yu mas trastem hem, nao bambae hem i halpem yu.” “Yufala i mas putum ol trabol blong yufala long [Jeova], nao hem bambae i blokem yufala, i sevem yufala. Hem i no save letem stret man i lus.” (Ol Sam 37:5; 55:22) !Yumi glad long help olsem!

4. ?Olsem wanem tok blong Pita mo Pol i mekem ol man oli haremgud?

⁴ Yumi save haremgud tu long save ya se i no yumi nomo i stap fesem ol traem mo ol trabol. Aposol Pita i talem long ol Kristin fren blong hem se: “Yufala i mas stanap strong long bilif blong yufala, blong blokem [Devel Setan]. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:9) Yes, olgeta Kristin oli wantem stanap strong long bilif. Tru ya, plante taem maet yumi harem se “i gat trabol,” olsem aposol Pol i harem. Be, “i klia se tingting blong hem i no foldaon.” Olsem hem maet tingting blong yumi i fasfas “be neva se yumi lus olgeta.” Nating sipos ol man oli ronem yumi, “be neva se yumi no gat fren blong yumi.” Sipos “ol man oli stap kilim yumi,” yumi no “ded olgeta.” From samting ya, ‘neva tingting blong yumi i kam nogud long ol trabol we i kasem yumi.’ Yumi stap traehad blong ‘no moa tingbaot ol samting ya we yumi save luk long ae blong yumi. Yumi stap tingbaot ol samting ya we yumi no save luk.’ (2 Korin 4:​8, 9, 16, 18) ?Olsem wanem yumi mekem samting ya?

5. ?Wanem trifala samting we Jeova i givim blong givhan long man?

⁵ Jeova, Man blong “harem ol prea,” i givim tri samting blong givhan long yumi. (Ol Sam 65:​2, NW; 1 Jon 5:14) Faswan samting, hem i yusum Tok blong hem, Baebol, blong soem rod long yumi. (Ol Sam 119:105; 2 Timote 3:​16) Seken samting, tabu speret blong hem i givim paoa long yumi blong mekem wil blong hem. (Lukluk Ol Wok 4:​29-31.) Mo namba tri samting, ogenaesesen blong Jeova long wol i rere blong givhan long yumi. ?Yumi mas mekem wanem blong kasem help?

“Ol Presen oli Go Nomo long ol Man”

6. ?Jeova i givim wanem long ples ya Taberah, mo olsem wanem hem i mekem?

⁶ Wan samting we i bin kamaot long taem blong profet Moses i givhan long yumi blong gat fasin tangkyu long lav blong Jeova taem hem i givim sam samting blong halpem ol man blong Hem. Samting ya i kamaot long ples ya Taberah, we i minim “faea i bon; i laet; i hot.” Long drae ples ya blong Sinae, God i mekem faea i bonem ol man Isrel we oli stap toktok smol. “Plante narafala man” we oli goaot wetem ol man Isrel long Ijip oli joen long fasin ya blong no laekem kakae we God i givim. Moses we i luksave kros blong God mo i gat strong filing blong responsabiliti long saed blong ol man ya mo ol nid blong olgeta, i singaot bigwan se: “Mi wan, mi no save karem olgeta man ya, from we oli hevi tumas long mi. Sipos hemia samting we yu yu stap mekem long mi, plis kilim mi mi ded, sipos yu yu glad long mi, mo yu no letem mi mi luk trabol blong mi.” (Namba 11:​1-15) ?Jeova i ansa olsem wanem? Hem i makemaot “sevente man long medel blong ol olfala blong Isrel” mo i putum speret blong hem long olgeta blong oli save givhan blong mekem wok blong lukaot wetem Moses. (Namba 11:​16, 17, 24, 25) Wetem ol man ya we oli gat gudhan, help i rere long ol man Isrel wetem “ol narafala man tu [we] oli go wetem olgeta we oli plante tumas.”​—Eksodas 12:38.

7, 8. (a) ?Olsem wanem Jeova i givim “ol presen i go nomo long ol man” long taem blong Isrel bifo? (b) ?Olsem wanem Pol i yusum Ol Sam 68:18 long faswan handred yia?

⁷ Afta we ol man Isrel oli stap long Promes Lan long plante yia, Jeova i go antap long hil ya Saeon mo i mekem Jerusalem i bigfala taon blong wan kingdom we Deved i king long hem. Blong presem God ya we i “gat olgeta paoa,” Deved i leftemap voes blong hem mo i singsing se: ‘Yu yu go antap long hil ya we i hae, yu tekem ol man we yu winim olgeta long faet oli go antap wetem yu, oli go kalabus, [mo yu givim ol presen i go nomo long ol man.]’ (Ol Sam 68:​14, 18) Yes, ol man we oli holem olgeta blong go kalabus taem oli faet blong winim Promes Lan, oli kam givhan long ol Livaet blong mekem ol wok blong olgeta.​—Esra 8:20.

⁸ Long faswan handred yia K.T., Kristin aposol Pol i pulum tingting i go long profet tok ya blong man blong raetem Sam se i kamtru. Pol i raetem se: “Long yumi evriwan wanwan, Kraes i givim paoa finis blong mekem wok blong hem, stret long mak blong gladhat blong hem. Baebol i talem se ‘Taem hem i go antap long heven, hem i go olsem king we i winim ol enemi blong hem finis, mo i givim ol presen oli go nomo long ol man.’ ?Be tok ya we i talem se ‘Hem i go antap,’ hem i min wanem? Tok ya i min se fastaem, hem i bin godaon olgeta. Hem i kamdaon finis long wol ya. Ale, man ya we fastaem i kamdaon long wol, hem i sem man nomo we biaen i go antap olgeta, i go antap long heven, mo bakegen, i go antap moa yet, blong hem bambae i save fulumap olgeta ples we God i mekem.” (Efesas 4:​7-10) ?Hu ya “man ya”? Hemia man ya nomo we i wok long nem blong Jeova, Bigfala Deved mo Mesaea King, Jisas Kraes. Hem nao we God i mekem hem i laef bakegen long ded mo “i givim nem long hem we i hae moa long ol narafala nem.”​—Filipae 2:​5-11.

9. (a) ?Hu ya ol man we oli olsem presen blong faswan handred yia? (b) ?Tede, hu ya ol man we oli olsem presen?

⁹ ?Hu olgeta we oli olsem “ol presen [we] oli go nomo long ol man” (no, “ol man”)? Pol i eksplenem se Bigfala Man we i wok long nem blong God i givim “long sam man, . . . paoa blong oli aposol. Mo long sam narafala man, hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli pasta mo tija insaed long jyos. Kraes i mekem olsem blong bambae ol man blong hem oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.” (Efesas 4:​11, 12) Olgeta man blong Kraes we oli wok olsem ol aposol, ol profet, ol man blong talemaot gud nyus, ol man blong lukaot sipsip, mo ol tija, oli stap mekem wok blong olgeta folem tiokratik rod. (Luk 6:​12-16; Ol Wok 8:12; 11:​27, 28; 15:22; 1 Pita 5:​1-3) Long taem blong yumi, tabu speret i putumap ol man we oli naf blong oli mekem wok olsem man blong lukaot long kolosap 70,000 kongregesen blong ol Wetnes blong Jeova long olgeta ples long wol. Olgeta ya oli olsem ol presen we i go nomo long ol man. (Ol Wok 20:28) Wetem wok blong talemaot Kingdom long olgeta ples long wol we naoia i stap gohed kwik, plante moa brata oli stap “wantem wan gudfala wok” mo mekem ol responsabiliti we i joen wetem wok blong “man blong lukaot.” (1 Timote 3:​1, NW) Taem oli jusum olgeta, olgeta ya tu oli kam olsem ol presen we oli go nomo long ol man.

10. ?Olsem wanem tok blong Aesea long saed blong ol “prins” i sem mak long wok blong ol Kristin elda tede?

¹⁰ Ol Kristin elda ya, no ol man ya we oli olsem ol presen we i go nomo long ol man, i laenap wetem profet tok blong Aesea we i stap tokbaot wok blong “ol prins,” ol man blong lukaot bisnes aninit long rul blong Kingdom. Evriwan oli mas kam olsem “wan ples blong haed long hem taem i gat bigfala win, mo olsem wan sef ples taem bigfala ren i foldaon. Bambae oli olsem ol wora we i ron long draeples, mo olsem sado blong bigfala ston long ples we i hot tumas.” (Aesea 32:​1, 2) Samting ya i soemaot olsem wanem ol elda ya oli stap givhan mo oli laekem blong lukaot gud long ol narafala. ?Olsem wanem yu save kasem blesing fulwan from samting ya?

Yu Yu Mas Mekem wan Samting Fastaem

11. ?Taem yumi foldaon long saed blong speret, olsem wanem yumi save kasem help?

¹¹ Wan man we i draon long wora i no stap wet bifo hem i singaot from help. Taem kolosap man i ded, i no nid blong wan man i pusum hem blong singaot from help. Oltaem Deved i stap singaot long Jeova blong givhan long hem. (Ol Sam 3:4; 4:1; 5:​1-3; 17:​1, 6; 34:​6, 17-19; 39:12) Sem mak long yumi, taem yumi no moa strong long saed blong speret, no maet tingting blong yumi i foldaon, yumi mas askem Jeova long prea mo blong hem i lukaot gud long yumi wetem tabu speret blong hem. (Ol Sam 55:22; Filipae 4:​6, 7) Yumi lukaot ol Tok blong Baebol blong haremgud long hem. (Rom 15:4) Yumi lukluk long olgeta Kristin buk blong ‘Watch Tower Society’ blong kasem ol advaes we yumi save folem long laef blong yumi. Samting ya i save givhan long yumi blong winim ol trabol blong yumi wanwan. Nating se tingting blong yumi i save foldaon bigwan from ol hadtaem we yumi fesem, yumi save askem advaes tu blong ol elda long kongregesen. Yes, samtaem yumi rili nidim blong “singaot ol elda.” ?From wanem yumi mas singaot ol elda? ?Olsem wanem oli save givhan long olgeta ya we oli nidim ol samting long saed blong speret?

12-14. (a) ?Wanem rod yumi mas folem taem yumi sik? (b) ?Long saed blong Jemes 5:​14, ol Kristin man we oli “sik” oli mas mekem wanem? (c) ?Jemes 5:14 i stap tokbaot wanem kaen sik, mo from wanem yu ansa olsem?

¹² Taem yumi sik, yumi spelgud blong mekem bodi i kasem paoa bakegen blong mekem wok. Sipos sik blong yumi i stap yet, yumi go luk ol gudfala dokta blong givhan long yumi. ?Yu ting se i sem mak sipos yumi no strong long saed blong speret?

¹³ Makem advaes ya we disaepol Jemes i givim long yumi long saed ya. Hem i talem se: “?I gat wan long yufala we i sik? I gud hem i singaot ol elda blong [kongregesen, NW] blong oli kam luk hem. Nao ol elda ya oli save prea long hem, mo oli save kafsaedem oel i go long hem long nem blong [Jeova, NW].” (Jemes 5:14) ?Jemes i stap tokbaot wanem kaen sik long ples ya? Sam man blong Baebol oli talem se hem i stap tokbaot sik long saed blong bodi, oli talem se fasin blong putum oel long bodi hemia wan fasin long taem ya we oli yusum olsem meresin. (Luk 10:34) Oli bilif tu se Jemes i stap tingbaot merikel blong mekem man i kamgud bakegen long sik. ?Be, olsem wanem long ol narafala vas raonabaot, oli soemaot wanem?

¹⁴ “Gudfala tingting” (NW) i defren olgeta long fasin blong “harem nogud from rabis fasin.” Samting ya i soem se Jemes i stap tokbaot sik long saed blong speret. (Jemes 5:13) Oli no mas singaot ol dokta no olgeta we oli kasem presen blong mekem merikel blong sikman i kamgud bakegen, be oli mas singaot “ol elda blong [kongregesen, NW].” ?Mo ol elda ya oli mas mekem wanem? Jemes i talem se: “Oli save prea long hem . . . mo prea blong man we i bilif bambae i sevem sik man ya.” (Jemes 5:​14, 15; lukluk Ol Sam 119:​9-16.) Samting we i pruvum se Jemes i stap tokbaot sik long saed blong speret se hem i stap leftemap tingting blong olgeta we oli sik olsem blong talemaot ol sin blong olgeta blong oli save kam gud bakegen. Hem i raetem se: “From samting ya, i gud yufala i stap talemaot ol sin blong yufala long yufala, mo i gud yufala i stap prea long yufala, blong bambae God i mekem yufala i gud bakegen.” Sipos wan bigfala sin i stampa blong ol sik long saed blong speret, wan rod nomo blong man ya i save kam gud bakegen sipos hem i lesin long ol advaes we i kamaot long Tok blong God, i tanem tingting blong hem, mo i tanem baksaed long sin we hem i stap mekem.​—Jemes 5:16; Ol Wok 3:19.

15. ?Wanem samting man i mas mekem olsem Jemes 5:​13, 14 i talem?

¹⁵ I gat narafala samting tu blong makem long advaes we Jemes i givim. Taem wan man i harem nogud from rabis fasin, Kristin man ya i mas “prea strong.” Sipos hem i harem gud, “i gud blong hem i singsing blong presem God.” Long evri samting​—sipos wan man i harem nogud from rabis fasin no hem i harem gud long tingting blong hem​—hem i mas mekem wan samting. Hem i mas prea taem hem i harem nogud, mo tu hem i mas singaot from glad taem hem i haremgud. Taswe, ?yumi gat wanem tingting taem Jemes i askem se: “?I gat wan long yufala we i sik?” Bakegen hem i mas mekem wan samting, yes hem nao i mas mekem faswan samting. “I gud hem i singaot ol elda blong [kongregesen] blong oli kam luk hem.” ​—Ol Sam 50:15; Efesas 5:19; Kolosi 3:16.

Olsem Wanem “Ol Elda” Oli Givhan

16, 17. ?Olsem wanem ol elda oli givhan long yumi blong folem ol rul blong Baebol?

¹⁶ Samtaem i hadwok long yumi blong save olsem wanem blong mekem ol rul blong Baebol oli wok taem yumi fesem sam samting long prapa laef blong yumi. Long saed ya ol Kristin elda oli save givhan bigwan. Eksampel, oli prea long man we i sik long saed blong speret mo ‘putum oel long hem long nem blong Jeova’ taem oli givim ol gudfala advaes we i kamaot long Tok blong God blong mekem hem i haremgud. Olsemia nao ol elda oli givhan bigwan long yumi blong kam gud bakegen long saed blong speret. (Ol Sam 141:5) Plante taem, yumi nidim nomo blong ol elda oli talem long yumi se yumi gat stret tingting. Taem yumi talemaot trabol blong yumi long wan Kristin elda we i gat ekspiryens, samting ya bambae i mekem yumi gat strong tingting moa blong mekem samting we i stret.​—Proveb 27:17.

¹⁷ Taem ol Kristin elda oli mekem visit, oli mas “mekem tingting blong ol man ya we oli fraet i strong bakegen.” Bambae oli “givhan long olgeta we oli no gat paoa” tu. (1 Tesalonaeka 5:14) Fasin frengud olsem, bitwin “ol elda” mo olgeta we oli “sik” i save mekem man i kam strong bakegen long saed blong speret.

Prapa Responsabiliti blong Yumi mo Prea

18, 19. ?Ol Kristin elda oli mekem wanem wok we i laenap wetem tok blong Galesia 6:​2, 5?

¹⁸ Ol Kristin elda oli mas mekem responsabiliti blong olgeta long ol sipsip blong God. Oli mas gat fasin blong givhan. Eksampel, Pol i talem se: “Ol brata mo sista. Sipos wan long yufala i foldaon, i mekem samting we i no stret, yufala we speret blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin. Mo yufala tu i mas lukaot gud long yufala, blong sam samting bambae i no kam traem yufala. Yufala i mas stap givgivhan long yufala long ol trabol blong yufala. Long fasin ya, bambae yufala i save mekem ol samting we loa blong Kraes i talem.” Aposol Pol i raetem tu se: “Evri man i gat basket blong hem blong karem.”​—Galesia 6:​1, 2, 5.

¹⁹ ?Olsem wanem yumi save givhan long yumi long ol trabol blong yumi mo semtaem yumi wanwan i mas karem basket blong yumi? Tu defren mining long ol tok ya we oli tanem i kam “ol trabol (baden)” mo “basket” oli givim ansa long yumi. Sipos wan Kristin i kasem trabol long saed blong speret we i mekem trabol (baden) long hem, ol elda mo ol narafala man blong bilif bambae oli givhan long hem, olsemia nao oli givhan long “ol trabol” blong hem. Be, wanwan man i mas karem “basket” blong responsabiliti blong hem long God.a Ol elda oli glad blong givhan long “ol trabol” blong ol brata taem oli leftemap tingting blong olgeta, oli givim advaes long Baebol, mo oli prea. Be, ol elda oli no tekemaot prapa “basket” blong responsabiliti long saed blong speret blong yumi wanwan.​—Rom 15:1.

20. ?From wanem yumi no mas fogetem prea?

²⁰ Prea hem i impoten tumas mo yumi no mas fogetem samting ya. Be, plante Kristin we oli sik long saed blong speret oli faenem i had blong prea. Taem ol elda oli prea wetem bilif from olgeta ya we oli sik long saed blong speret, ?wanem tingting biaen long fasin ya? “[Jeova] bambae i mekem bodi blong hem i strong bakegen,” olsem we tingting blong hem i no moa foldaon, bambae hem i mekem hem i strong blong folem rod blong trutok mo stret fasin. Wan Kristin we i sik long saed blong speret i save gat wan rong tingting be maet hem i no mekem bigfala sin, from we Jemes i talem se: “Sipos hem i bin mekem sam sin, [Jeova] bambae i fogivim hem from.” Samtaem Baebol advaes blong ol elda mo prea blong olgeta i save pulum man we i slak long saed blong speret blong i talemaot bigfala sin we maet hem i mekem mo blong soem se hem i tanem tingting blong hem. Samting ya i save mekem se God i save fogivim hem from.​—Jemes 5:​15, 16.

21. (a) ?From wanem sam Kristin oli no wantem singaot ol elda? (b) ?Wanem samting yumi save lukluk long hem long nekis stadi?

²¹ Naoia we plante nyuwan oli kam insaed long Kristin kongregesen, ol elda we oli tingtinggud oli bisi blong lukaotgud long olgeta ya. Tru ya, ol presen ya oli nambawan samting we Jeova i givim blong givhan long yumi blong stanap strong long ol hadtaem ya. Be, sam Kristin oli no wantem singaot ol elda blong givhan long olgeta, oli ting se ol brata ya oli bisi tumas no oli gat tumas wok finis long saed blong trabol blong ol narafala. Nekis stadi bambae i givhan long yumi blong luksave se ol man ya oli glad blong givhan, from we oli rere blong mekem wok ya olsem ol man blong lukaot sipsip insaed long Kristin kongregesen aninit long Jisas.

[Futnot]

?Yu Ansa Olsem Wanem?

◻ ?Taem yumi nidim help, wanem trifala samting we God i givim?

◻ ?Tede, hu ya ol man we oli olsem presen?

◻ ?Wetaem yumi mas singaot ol elda?

◻ ?Wanem help yumi save kasem from ol Kristin elda?

[Tok Blong Pija Long Pej 15]

?Yu yu harem gud long blesing long saed blong speret we yu kasem from prea, Baebol stadi, mo help blong ol Kristin elda?