Yufala i Mas Mekem We Tingting Blong Yufala i Stap Kwaet Mo i Kliagud—En i Kolosap
“Yumi kam kolosap finis long taem we ol samting blong wol ya bambae i lus. From samting ya, yufala i mas mekem we tingting blong yufala i stap kwaet, mo i kliagud, [mo yufala i mas stap wekap gud blong mekem prea, “NW”].”—1 PITA 4:7.
1. (a) ?Wanem samting we i no bin kamtru long wan lida blong skul wetem ol man blong hem? (b) ?From samting we oli stap wet long hem i no kamtru, yumi save askem ol wanem kwestin?
“MI KASEM wan tok we God i givim long laswan prea long naet ya. Hem i talem se bambae 116,000 man oli go antap long heven mo beregraon blong 3.7 milyan man blong bilif we oli ded bambae i open blong oli go antap long skae.” Hemia nao tok we wan lida blong ‘Misin blong Ol Dei We oli Stap Kam’ i talem long en blong dei Oktoba 28, 1992, dei blong jajmen we oli talemaot finis. Be, taem Oktoba 29 i kamtru, i no gat wan man nating we i bin go antap long heven, mo i no gat wan beregraon blong ol dedman we i bin open. Oli no go antap kwiktaem long heven long fasin blong rapja, be olgeta man Koria we oli bilif long jajmen dei ya, oli jes luk wan narafala dei nomo we i sem mak long ol narafala dei. Dei ya blong jajem ol man we oli talem i kam mo i go, be ol man blong talemaot dei ya blong jajmen tingting blong olgeta i no foldaon from. ?Ol Kristin oli mas mekem wanem? ?Oli mas stop blong bilif se en i stap kam kwiktaem?
2. ?Hu i tokbaot dei blong jajmen, mo wetaem nao oli kasem save long samting ya?
2 Blong givim ansa, i gud yumi tingbaot taem ya we Jisas i stap toktok wetem ol disaepol blong hem taem olgeta nomo oli stap. Long ples ya, long eria blong Sisaria Filipae, we i stap long not is long Solwora blong Galili, we bigfala hil ya Hemon i stap biaen, oli harem we hem i talem stret se bambae oli kilim hem i ded. (Matyu 16:21) Biaen hem i talem sam narafala tok we i save mekem man i tingting dip. Afta we hem i eksplenem long olgeta se blong kam disaepol i minim se oli mas gat tingting blong sakrifaes oltaem, Jisas i givim woning se: “Bambae mi, mi Pikinini blong Man, mi kam wetem ol enjel blong mi, long bigfala paoa blong Papa blong mi, nao bambae mi mi givim pei long evri man, stret long ol wok we olgeta oli mekem.” (Matyu 16:27) Jisas i tokbaot taem we bambae hem i kam. Be, long taem ya, bambae hem i wan Jaj. Long taem ya bambae evri samting i dipen long wanem we bambae hem i faenem se i gat wanwan man we oli gat strong bilif blong stap folem hem no no gat. Jajmen blong Jisas bambae i stanap long ol fasin we olgeta oli mekem, nating se oli gat plante samting no oli no gat wan gudfala samting blong wol ya. Ol disaepol blong hem oli mas tingting strong oltaem long samting ya. (Matyu 16:25, 26) Taswe, hemia Jisas Kraes hem wan we i talem long ol man blong hem blong lukaot nambawan taem we bambae hem i kam, wetem fasin blong jajem man.
3. ?Olsem wanem Jisas i soemaot pruf se bambae hem i kam?
3 Nekis samting we Jisas i talem i soemaot pruf se bambae hem i kam. Hem i talem strong se: “Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi King blong ol man blong mi.” (Matyu 16:28) Sikis dei biaen ol tok ya oli kamtru. Ol disaepol blong Jisas oli luk samting olsem wan drim, bigfala laet i saen raon long Jisas taem bodi blong hem i jenis, mo i mekem olgeta oli sapraes tumas. Wantaem nomo oli luk fes blong Jisas i saen olsem san mo ol klos blong hem oli kam waet we i waet. Fasin we bodi blong Jisas i jenis, i blong soemaot bigfala paoa blong Kraes taem bambae hem i rul long Kingdom blong hem. !Samting ya i mekem tingting blong olgeta long saed blong ol profet tok blong Kingdom i kam strong moa! !Samting ya i gat paoa blong pusum ol disaepol blong oli mas mekem we tingting blong olgeta i stap kwaet mo i kliagud!—2 Pita 1:16-19.
Risen From Wanem i Impoten blong Mekem Tingting i Stap Kwaet mo i Klia Gud
4. ?From wanem ol Kristin oli mas wekapgud long saed blong speret long taem we bambae Jisas i kam?
4 Kolosap wan yia biaen, yumi luk Jisas i stap sidaon antap long Hil blong ol Oliftri, bakegen hem i stap toktok wetem ol disaepol blong hem we i no gat ol narafala man i stap. Taem oli stap lukluk i go long taon blong Jerusalem, hem i eksplenem wanem saen we bambae i soemaot taem blong hem blong stap mo biaen i givim woning se: “Ale, from samting ya, yufala i mas lukaot gud. From we yufala i no save long wanem dei, mi, mi Masta blong yufala, bambae mi kamtru.” Ol man blong hem oli mas wekapgud from we oli no save stret taem we bambae hem i kam. From samting ya oli mas rere oltaem.—Matyu 24:42.
5. ?Wanem pijatok i soemaot nid blong lukaotgud oltaem?
5 Fasin we bambae Masta i kam long hem, i sem mak long fasin blong wan man blong stil. Hem i gohed blong talem se: “Yufala i no fogetem hemia. Man blong stil i brekem haos blong masta, from we masta ya i no save wanem taem man ya bambae i kam, nao hem i no stap lukaotgud. Be sipos masta ya i save, nao i stap lukaot gud, bambae hem i rere blong man ya i kam.” (Matyu 24:43) Wan man blong stil i no save talem wan mesej blong mekem man ya blong haos i save se bambae hem i kam; bigfala tul blong hem i blong mekem man i sek. From samting ya, man ya blong haos i mas reregud oltaem. Be, long ol Kristin we oli gat strong bilif, strong tingting we i kliagud i no kamaot from we oli fraet. Be, strong tingting se oli wantem tumas blong luk taem ya we Kraes bambae i kam long bigfala paoa blong hem blong openem rod long Wan Taosen Yia Rul blong hem we i gat pis, i pusum olgeta blong mekem olsem.
6. ?From wanem yumi mas mekem we tingting blong yumi i stap kwaet mo i kliagud?
6 Nating se oli stap lukaotgud oltaem, i no gat wan man we bambae i save talem stret dei we bambae hem i kam long hem. Jisas i talem se: “From samting ya, yufala i mas stap rere. From we mi, mi Pikinini blong Man, bambae mi kamtru long taem we yufala i no tingbaot.” (Matyu 24:44) Taswe oli mas mekem tingting blong olgeta i stap kwaet mo i kliagud. !Sipos wan Kristin i ting se long stret dei ya, bambae Kraes i no kam, ating long stret dei ya nao bambae hem i kam! Tru ya, ol Kristin blong bifo we oli gat strong bilif oli traehad blong save wetaem bambae en i kam. Be plante taem bakegen woning blong Jisas i kamaot tru se: “Be dei blong samting ya, mo taem blong hem, i no gat man naoia we i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.”—Matyu 24:36.
7. ?Blong kam ol man blong Kraes, laef blong yumi i mas olsem wanem?
7 From samting ya, ?yumi tingting olsem wanem? Se blong stap olsem man blong Kraes, oltaem long laef blong yumi, yumi mas bilif se en blong ol fasin nogud blong wol ya i kolosap tumas.
8. ?Wanem wan mak blong Kristin skul i stat bifo olgeta?
8 Oltaem tingting olsem i bin stap olsem wan mak blong ol Kristin, olsem ol man blong raetem histri mo ol man blong stadi long Baebol oli talem. Eksampel, ol man blong raetem The Translator’s New Testament, aninit long tok ya “Dei” long fastok blong olgeta i talem se: “Ol Kristin long taem blong Nyutestaman oli stap wet long Dei ya (hemia taem ya) we wol blong naoia wetem ol trabol blong hem mo rabis fasin bambae oli lus mo bambae Jisas i kambak long wol blong jajem olgeta man, blong statem wan nyufala taem blong pis mo i statem wok blong hem blong Masta antap long olgeta ples long wol.” Encyclopædia Britannica i makemgud se: “Bigfala samting ya we i stap hapen, se namba blong ol skul we oli stap talem se oli Kristin i kam antap, hem i joen stret wetem tingting blong ol Kristin blong wet long taem ya blong en, olsem oli gat strong tingting se Kraes bambae i kambak i no longtaem. Fasin blong wan Kristin blong wet long taem blong en i neva minim se wan isi fasin blong lukaot Kingdom blong God we i stap kam.”
Mining blong Tok Ya Mekem we Tingting i Stap Kwaet mo i Klia Gud
9. ?Nating se sam tingting blong Pita long saed blong Mesaea i no stret, from wanem tingting blong hem i save stap strong?
9 Tate yia biaen long ol gudfala toktok ya we Jisas i mekem wetem ol disaepol blong hem we oli stap kolosap tumas long hem, aposol Pita i no taed blong stap wet long en blong i kam. Nating se hem mo ol disaepol blong Jisas oli stap gat ol tingting long saed blong Mesaea we oli no stret fastaem, oltaem hem i trastem se lav mo paoa blong Jeova bambae i mekem hop blong olgeta i kamtru. (Luk 19:11; 24:21; Ol Wok 1:6; 2 Pita 3:9, 10) Hem i talem wan poen we plante taem yumi harem long Grik haf blong Baebol taem hem i talem se: “Yumi kam kolosap finis long taem we ol samting blong wol ya bambae i lus.” Ale hem i talem long ol Kristin brata blong hem se: “From samting ya, yufala i mas mekem we tingting blong yufala i stap kwaet, mo i kliagud, [mo yufala i mas stap wekapgud blong mekem prea, NW].”—1 Pita 4:7.
10. (a) ?Blong mekem we tingting i stap kwaet mo i kliagud i minim wanem? (b) ?Blong yumi luksave olsem wanem wan bisnes i joen wetem wil blong God, yumi mas mekem wanem?
10 Blong “mekem we tingting blong yufala i stap kwaet mo i kliagud” i no minim se blong gat bigfala save mo waes blong wol. Jeova i talem se: “Waes blong ol man we oli gat waes bambae mi mekem i lus olgeta. Mo save blong ol man we oli gat save bambae mi mekem i nating nomo.” (1 Korin 1:19) Tok we Pita i yusum i save minim se “man i save skelemgud mo tinghevi long ol samting.” Fasin ya long saed blong speret blong skelemgud mo tinghevi long ol samting i joen wetem wosip blong yumi. From samting ya, taem yumi gat tingting we i kwaet mo i kliagud, yumi luk olsem wanem ol samting i laenap wetem wil blong Jeova mo yumi kasem save ol samting we oli impoten mo samting we oli no impoten. (Matyu 6:33, 34) Nating se en i kolosap tumas, fulap fasin blong laef tede oli no spolem yumi; mo yumi no fogetem bigfala mining blong taem we yumi stap laef long hem. (Skelem wetem Matyu 24:37-39.) Be, yumi mas mekem tingting mo fasin blong yumi i stret mo i skelgud, yumi mas soemaot long God fastaem (“yufala i mas stap wekapgud blong mekem prea”) mo biaen long ol man we i stap raonabaot long yumi (“yufala i mas stap laeklaekem yufala tumas”).—1 Pita 4:7, 8.
11. (a) ?I minim wanem blong “mekem tingting blong [yumi] i kam nyuwan olgeta”? (b) ?Olsem wanem nyufala paoa blong tingting i mekem i givhan long yumi blong mekem ol gudfala desisin?
11 Mekem tingting i stap kwaet i joen wetem fasin ya blong mekem “tingting blong [yumi] i mas kam nyuwan olgeta.” (Efesas 4:23) ?Mekem tingting i kam nyuwan from wanem? Yumi sinman taem yumi bon mo i gat fulap rabis fasin i stap raonabaot long yumi, taswe fasin we i agens long samting long saed blong speret i bos long tingting blong yumi. Paoa ya i pusum strong ol tingting mo hat blong laekem ol samting long saed blong bodi, rod ya we man i tingbaot hem wan nomo. Taswe, taem wan man i kam wan Kristin, hem i nidim wan nyufala paoa, no wan nyufala fasin we i bos long tingting, we bambae i pusum tingting blong hem long stret rod, rod ya long saed blong speret, blong gat wan fasin blong rere oltaem blong givim hem wan olsem sakrifaes. Taswe, taem hem i mas mekem wan desisin, eksampel, long saed blong edukesen, wanem rod we hem i jusum blong folem long laef blong hem, long wok, long pleplei, long spel, fasin blong putum klos, no narafala samting olsem, faswan samting bambae hem i skelem bisnes ya long saed blong speret bitim long saed blong bodi, we hem i tingbaot hem wan nomo. Nyufala tingting ya i mekem se i moa isi blong mekem desisin long ol bisnes wetem tingting we i stap kwaet mo i kliagud mo wetem wan strong tingting se en i kolosap.
12. ?Olsem wanem yumi save stap we “fasin blong bilif blong [yumi] i mas stret gud”?
12 Tingting we i stap kwaet mo i kliagud i soemaot se yumi strong long saed blong speret. ?Olsem wanem yumi save stap strong olsem we “fasin blong bilif blong [yumi] i mas stret gud” oltaem? (Taetas 2:2) Yumi mas fidim tingting blong yumi wetem stret kakae. (Jeremaea 3:15) Kakae we i olsem trutok long Tok blong God wetem help blong tabu speret blong hem bambae i givhan long yumi blong holemtaet fasin blong skelemgud ol samting long saed blong speret. From samting ya, stadi wanwan oltaem, mo wok blong prij, prea, mo Kristin miting, oli impoten tumas.
Olsem Wanem Tingting we i Stap Kwaet mo i Klia Gud i Save Blokem Yumi
13. ?Olsem wanem tingting we i stap kwaet mo i kliagud i save blokem yumi blong no mekem ol krangke mastik?
13 Tingting we i stap kwaet mo i kliagud i save blokem yumi blong no mekem wan krangke mastik we i save tekemaot laef blong yumi we i no save finis. ?Olsem wanem samting ya i save blokem yumi? Aposol Pol i tokbaot “loa blong tingting.” (NW) Long wan man we i strong long bilif, samting we i bos long loa ya blong tingting mo we hem i laekem tumas, hemia “Loa ya blong God.” Tru ya, “loa blong sin” (NW) i mekem faet agens long loa ya blong tingting. Be, wan Kristin i save win wetem help blong Jeova.—Rom 7:21-25.
14, 15. (a) ?Wanem tufala paoa we oli stap traehad blong bos long tingting? (b) ?Olsem wanem yumi save winim faet ya long tingting?
14 Pol i gohed blong soemaot klia se tingting we bodi we i gat sin i bos long hem, we i wantem haremgud long ol samting blong laef nomo, i defren olgeta long tingting we speret blong God i bos long hem, we i wantem givim hem wan olsem sakrifaes long wok blong Jeova. Pol i raetem long Rom 8:5-7 i se: “Olgeta we oli stap mekem ol rabis fasin we tingting nomo blong olgeta i wantem, tingting blong olgeta ya i fasgud long ol rabis fasin ya. Be olgeta ya we oli stap mekem ol gudfala fasin we tabu speret i wantem, tingting blong olgeta ya i fasgud long ol gudfala fasin ya. Sipos tingting blong man i fasgud long ol rabis fasin ya we tingting nomo blong hem i wantem, bambae hem i ded from. Be sipos tingting blong man i fasgud long ol gudfala fasin ya we tabu speret i wantem, bambae hem i gat laef mo pis from. Sipos tingting blong man i fasgud long ol rabis fasin we tingting nomo blong hem i wantem, bambae hem i kam olsem enemi blong God nao. Bambae hem i no mekem ol samting we loa blong God i talem. Hem i no save mekem ol samting ya.”
15 Biaen, long vas 11, Pol i eksplenem olsem wanem tingting we i joen wetem tabu speret i winim faet ya: “Mo from we speret blong God ya we i mekem Jisas i laef bakegen long ded i mekem ples blong hem blong yufala, bambae yufala i gat laef. God ya we i mekem Kraes i laef bakegen long ded, hem bambae i mekem bodi blong yufala i laef bakegen, from we speret blong hem i stap long yufala.”
16. ?Tingting we i stap kwaet mo i kliagud i blokem yumi long wanem doti samting we i save pulum yumi?
16 From samting ya, wetem tingting we i stap kwaet mo i kliagud, bambae ol doti samting blong wol ya we i no gat mak long fasin ya blong laekem tumas ol samting we olgeta nomo oli wantem haremgud long hem oli no save daonem yumi, ol samting long saed blong bodi, mo rabis fasin long saed blong seks. Tingting blong yumi we i stap kwaet mo i kliagud bambae i talem long yumi blong “no moa mekem fasin nogud wetem woman” mo ronwe long ol rabis frut blong hem. (1 Korin 6:18) Tingting blong yumi we i stap kwaet mo i kliagud bambae i pusum yumi blong putum intres blong Kingdom fastaem mo bambae i lidim tingting blong yumi taem yumi kasem traem taem oli wantem givim wan wok blong kasem mane long yumi we i save spolem fasin fren blong yumi wetem Jeova.
17. ?Olsem wanem wan paenia sista i soemaot tingting we i stap kwaet mo i kliagud taem hem i kasem wan trabol long saed blong mane?
17 Eksampel, long wan hot kantri long Saot is Esia, i gat wan yangfala sista we i putum intres long Kingdom long fasples long tingting blong hem. Hem i bin gat wan tingting we hem i laekem tumas blong mekem fultaem wok blong talemaot gud nyus. Long kantri ya kolosap olgeta fultaem wok blong kasem mane i tekem sikis no seven dei. Afta we yangfala sista ya i kamaot long yunivesiti, papa blong hem, we hem i no wan Wetnes blong Jeova, i wantem se bambae sista ya i mas winim plante mane blong famle. Be from we sista ya i laekem tumas blong mekem wok blong paenia, hem i faenem wan haftaem wok mo i stat blong mekem wok blong paenia. Samting ya i mekem papa blong hem i kros, nao hem i talem se bambae hem i sakemaot ol samting blong sista ya long rod. From fasin blong man ya blong plelake, hem i gat bigfala kaon blong pem, mo hem i gat tingting se bambae gel blong hem i pem ol kaon ya. Yangfala brata blong sista ya i stap stadi long yunivesiti, mo from ol kaon ya, i no gat mane blong pem skul fi blong hem. Yangfala brata ya i promes se sipos sista blong hem i givhan long hem, bambae hem i lukaot long famle taem hem i kasem wan wok. I gat tufala samting long hat blong sista ya se lav long brata blong hem mo lav long wok blong paenia. Afta we hem i tingtinggud long bisnes ya, hem i strong blong gohed long wok blong paenia mo i lukaot wan defren wok. Olsem wan ansa blong ol prea blong hem, hem i faenem wan gudfala wok we hem i save givhan long famle mo brata blong hem long saed blong mane be tu hem i save gohed wetem wok blong paenia we hem i laekem moa.
Lukaot Help long Jeova blong Mekem Tingting i Stap Kwaet mo i Klia Gud
18. (a) From wanem tingting blong sam man i foldaon? (b) ?Wanem ol vas blong Baebol we i save mekem olgeta we tingting blong olgeta i foldaon i kamgud bakegen?
18 Maet sam man blong Kraes oli faenem se i hadwok blong mekem tingting blong olgeta i stap kwaet mo i kliagud. Maet longfala tingting blong olgeta i stap lus from rabis wol blong naoia i stap longtaem bitim we oli stap tingbaot. Maet tingting blong olgeta i foldaon from samting ya. Be, bambae en i mas kam. Hemia promes blong Jeova. (Taetas 1:2) Mo promes blong hem long saed blong wol we i kam paradaes bambae i kamtru. Jeova i mekem tok ya i strong. (Revelesen 21:1-5) Taem nyufala wol i kam, bambae i gat “wan tri blong laef” blong olgeta we oli bin mekem tingting blong olgeta i stap kwaet mo i kliagud.—Proveb 13:12.
19. ?Olsem wanem yumi save mekem we tingting i save stap kwaet mo i kliagud?
19 ?Olsem wanem yumi save mekem tingting i stap kwaet mo i kliagud? Lukaot help blong Jeova. (Ol Sam 54:4) Stap kolosap long hem. !Yumi glad se Jeova i laekem tumas blong frengud wetem yumi! Disaepol Jemes i raetem se: “Yufala i mas kam stap kolosap long God, nao hem bambae i kam stap kolosap long yufala.” (Jemes 4:8) Pol i talem se: “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad. Yufala i mas soemaot long olgeta man, we yufala i kwaet man. Bambae i no longtaem Masta blong yumi i kamtru. I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” (Filipae 4:4-7) Mo taem ol baden blong ol fasin blong wol ya we kolosap i lus i kam bigwan moa blong karem, putum olgeta long Jeova, mo bambae hem i blokem yu i sevem yu.—Ol Sam 55:22.
20. ?Yumi mas gohed long wanem rod, olsem 1 Timote 4:10 i talem?
20 !Yes, en i kolosap, taswe yufala i mas mekem we tingting blong yufala i stap kwaet mo i kliagud! Hemia wan gudfala advaes blong 1,900 yia bifo; hem i wan impoten advaes tede. I gud yumi gohed blong yusum gudfala tingting blong yumi we i kwaet mo i kliagud blong presem Jeova taem hem i stap gohed blong lidimgud yumi blong go insaed long nyufala wol.—1 Timote 4:10.
?Yu Ansa Olsem Wanem?
◻ ?Wanem ya mekem tingting i stap kwaet mo i kliagud?
◻ ?From wanem i impoten tumas blong mekem tingting i stap kwaet mo i kliagud kwiktaem?
◻ ?Olsem wanem yumi save mekem tingting blong yumi i kam nyuwan olgeta?
◻ ?Wanem faet yumi gat oltaem long tingting blong yumi?
◻ ?Olsem wanem yumi save mekem tingting blong yumi i stap kwaet mo i kliagud?
[Tok Blong Pija Long Pej 15]
Kam kolosap long God long prea, i save givhan long yumi blong mekem tingting blong yumi i stap kwaet mo i kliagud
[Tok Blong Pija Long Pej 17]
Sipos tingting blong yumi i stap kwaet mo i kliagud, ol doti samting blong wol ya oli no save spolem yumi