?I Nidim Wanem Blong Mekem Yu Yu Glad?

OL MAN blong politik we olgeta” man oli putumap long taem blong vot oli traem blong mekem ol man olsem oli haremgud. Yes, ol wok blong olgeta i dipen long samting ya. Be wan nyus magasin i tokbaot “ol man blong vot” long Polan se “oli no moa wantem harem ol gyaman promes blong ol man blong politik mo oli wantem stap longwe long olgeta. Wan man blong raetem nyuspepa i eksplenem se Amerika i wan sosaeti we i “fulapgud long fasin blong no moa trastem ol spesel toktok blong ol man blong politik.” Wan narafala man blong raetem store i talem long yumi long saed blong “plante moa man long Franis we oli no moa intres long politik.” Fasin olsem we man i no moa intres long politik mo oli no haremgud​—i no kamaot long ol trifala kantri ya nomo​—i soemaot se traehad blong ol man blong politik blong mekem ol man oli haremgud i no kamtru.

Ol lida blong skul tu oli mekem promes long fasin glad, sipos i no long laef naoia, ale hemia we i kam long fyuja. Oli stanap long tingting ya se ol man oli gat wan sol we i no save ded no sol we i go long narafala ples, wan tingting we plante man oli no wantem, from plante risen, mo se Baebol i pruvum klia se i gyaman. Ol jyos we oli emti mo namba blong ol memba we oli stap lego jyos blong olgeta i soem se plante milyan man oli no moa tingbaot jyos se hem i wan impoten samting blong givim fasin glad.​—Skelem wetem Jenesis 2:​7, 17; Esikel 18:​4, 20.

Ol Man Blong Laekem Mane We Oli No Haremgud

?Sipos yumi no faenem glad long ol politik mo long jyos, yumi save faenem weples? ?Ating long fasin blong mekem bisnes? Bisnes tu ol man oli talem se hem i save givim fasin glad. Oli putum ol tok blong hem tru long nyuspepa blong talemaot long pablik, we oli stap talemaot klia se: Glad i kam long fasin blong gat ol gudfala samting long saed blong bodi mo blong gat ol wokman blong yu we yu save pem wetem mane.

Namba blong ol man we oli stap lukaot fasin glad long rod ya i stap kam antap bigwan. Long sam yia we oli pas finis, oli talemaot se, long stret haf blong ol famle [50%] long Jemani oli gat bigfala kaon. Taswe, yumi no sapraes, se spesel nyuspepa blong Jemani, Die Zeit i talem se “plante [long ol man ya] bambae oli neva save fri long ol kaon blong olgeta.” Hem i eksplenem se: “Hem i isi tumas blong tekem mane bitim mak long bang​—mo i had tumas blong kam fri long trap ya blong kaon.”

I sem mak long ol narafala nesen we oli kam antap bigwan tumas long saed blong ol faktri. Sam yia we i pas finis, David Caplovitz, wan man we i gat save long fasin joen blong ol man long Yunivesiti long Taon blong New York, i ting se long Amerika, bitwin 20 milyan mo 25 milyan famle oli gat bigfala kaon. Hem i talem se, “Samting ya i blokem gud olgeta man, mo i stap spolem laef blong olgeta.”

!Samting olsem i had blong harem se i fasin glad! ?Be yumi save ting se wol blong bisnes i save stanemap samting we tu narafala (ol politik mo jyos) oli no save mekem nating? Wan taem King Solomon we hem i rij tumas i raetem se: “Wan man blong laekem mane tumas bambae i no save haremgud long mane, no wan man blong laekem rij samting i haremgud long ol samting we hem i kasem. Hemia tu i wok blong lus nomo.”​—Eklesiastis 5:​10.

Fasin ya blong lukaot glad long ol samting long saed blong bodi i olsem we yu stap drim nomo. Maet yu glad tumas blong drim, be bambae yu kasem trabol sipos yu traem mekem laef blong yu i stanap long olgeta.

?Yumi Save Kasem Fasin Glad Be Olsem Wanem?

Aposol Pol i kolem Jeova se “God ya we. . . i stap haremgud oltaem.” (1 Timote 1:11) Fasin we hem i mekem olgeta man stret long pija blong hem, God ya we i stap haremgud oltaem i givim tingting long yumi blong haremgud tu. (Jenesis 1:26) Be fasin blong olgeta blong haremgud bambae i dipen long fasin blong olgeta blong mekem wok blong God, olsem man ya blong raetem Ol Sam i soemaot se: “Olgeta we Hae God [Jeova, NW] i God blong olgeta, olgeta ya bambae oli haremgud.” (Ol Sam 144:15b) Wanem wok we yumi mekem long God mo olsem wanem fasin blong yumi blong mekem wok blong hem i lidim yumi long trufala fasin blong haremgud, yumi save kasem gud save long hem sipos yumi tingbaot sam long ol 110 ples long New World Translation we ol tok ya “haremgud” mo “glad” i kamaot long hem.

Luksave Ol Nid Long Saed Blong Speret

Jisas Kraes, Pikinini blong God, i talem long bigfala Tok blong hem long Hil se: “Olgeta we oli luksave se oli nidim ol samting long saed blong speret, oli save haremgud.” (Matyu 5:3, NW) Wol ya blong bisnes i traem blong givim gyaman tingting long yumi se ol sas samting we mane i pem i naf blong mekem man i haremgud. Hem i talem long yumi se Fasin blong haremgud i blong gat wan komputa long haos, wan kamera blong tekem video, wan telefon, wan trak, ol nyufala tul blong spot, ol defren fasin blong putum klos. Samting we hem i no talem long yumi se plante milyan man long wol oli no gat ol samting ya be oli no stap harem nogud. Maet oli stap mekem laef blong olgeta i kam moa isi mo i stret, be oli no impoten blong mekem man i haremgud.

Olsem Pol i mekem, olgeta we oli stap tingting long nid blong olgeta long saed blong speret oli talem se: “Oraet, be sipos yumi gat kakae blong yumi mo klos blong yumi, hemia i naf, yumi save haremgud nao.” (1 Timote 6:8) ?From wanem? From fasin blong lukaotgud long ol nid we yumi gat long saed blong speret i samting we i lidim yumi i go long laef we i no save finis.​—Jon 17:3.

?I gat samting i rong long fasin blong haremgud long ol gudfala samting sipos yumi gat mane blong pem olgeta? No gat. Be, hem i givim paoa long yumi long saed blong speret blong lanem blong no laekem evri smosmol samting no blong pem samting from we yumi save pem. Long rod ya yumi lanem fasin glad mo holemtaet fasin blong haremgud, olsem Jisas i mekem, nating se hem i no kasem plante samting we mane i save pem olsem ol hae mak blong wol. (Matyu 8:20) Mo Pol i no harem nogud taem hem i raetem se: “Mo mi no tok olsem from we mi stap sot long sam samting, no gat. Mi mi lanem finis, se long wanem rod we mi stap long hem, be mi save stap gud nomo. Sipos mi trabol, be mi save rod blong samting ya finis. Sipos mi gat plante samting, be mi save rod blong samting ya tu, from we mi gotru long samting ya finis. Nao long wanem rod mi pas long hem, be mi stap haremgud. Sipos mi fulap gud, no mi hanggri, sipos mi gat plante samting, no mi trabol, be nating.”​—Filipae 4:​11, 12.

Trastem Jeova

Man we i tingting strong long nid blong hem long saed blong speret i soemaot wan fasin we hem i wantem trastem God. Fasin ya i mekem hem i glad, olsem King Solomon i eksplenem se: “Man we i stap trastem Jeova i save haremgud.”​—Proveb 16:20.

?Be, i no tru se plante man oli trastem moa mane mo ol samting we oli gat bitim we oli trastem God? Taem yumi tingbaot samting ya, yumi luksave se i no stret blong raetem tok ya se “Long God Yumi Tras” long mane, nating se tok ya i stap long mane blong Amerika.

King Solomon, we hem i no sot long ol gudfala samting we mane i save pem, i luksave se fasin blong trastem ol samting blong bodi i no rod ya blong glad blong olwe. (Eklesiastis 5:​12-15) Mane long bang i save lus taem bang i brokdaon no praes blong ol samting i go antap. Strongfala win i save spolem ol haos we yumi gat. Ol insurens, oli no save mekem yumi kamgud taem yumi kasem trabol we i spolem filing blong yumi, nating se oli save givimbak sam samting we yumi lusum long saed blong bodi. Ol samting we oli hivimap mo ol mane we oli putum long ‘stok mo bond’ oli save kam olsem nating nomo long wan naet taem ‘stok maket’ i foldaon wantaem. Wan wok we ol man blong hem oli kasem bigfala mane​—from plante risen​—i stap tede mo i lus tumora.

From samting ya man we i stap trastem Jeova i luk fasin waes ya blong lesin long woning blong Jisas se: “I nogud yufala i stap hivimap ol gudgudfala samting blong yufala long wol ya blong kam rij man. Long ples ya i gat kakros oli save kakae, mo rosta tu i save spolem ol samting. Mo i gat man blong stil we oli save brekem haos, blong oli stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting. Mo ol man blong stil oli no save kam brekem haos, blong oli stil.”​—Matyu 6:​19, 20.

?Wanem bigfala filing blong stap sef mo glad we wan man i save gat bitim blong save se hem i trastem God ya we i gat olgeta paoa, we oltaem Hem i stap givim ol samting?​—Ol Sam 94:14; Hibrus 13:​5, 6.

Akseptem Fasin Stretem Blong God

Taem wan trufala fren i givim advaes, no fasin stretem from lav we hem i gat, yu mas akseptem. Wantaem wan gyaman fren blong man ya blong God, Job i ting se hem i stret, taem hem i talem long Job se: “Man we God i stretem i save haremgud.” Samting ya i tru, be samting we Elifas i soemaot long ol tok ya—​se Job i gat poen from hem i mekem wan bigfala sin​—i no tru. !Hemia wan ‘gyaman fren’! Be, biaen, taem Jeova i stretem Job long fasin lav, Job i mekem tingting blong hem i stap daon nao i akseptem fasin stretem mo i mekem se hem i stap long wan rod we hem i glad moa.​—Job 5:17; 16:2; 42:​6, 10-17.

Tede, God i no toktok stret long ol man blong hem olsem hem i mekem long Job. Be, hem i yusum Tok mo ogenaesesen blong hem we speret blong hem i lidim blong stretem olgeta. Be, ol Kristin we oli letem ol intres long saed blong bodi i winim olgeta, oli no gat taem, paoa, no tingting blong stadi Baebol oltaem mo blong go long ol miting we ogenaesesen blong Jeova i givim.

Man ya we God i stretem, we i laenap wetem Proveb 3:​11-18, i luksave fasin waes blong akseptem fasin blong stretem olsem: “Man we i faenem waes, hem i hapi, mo man we i kasem fasin luksave, hem tu i hapi. From we i moa gud wan man i winim samting ya, i bitim we hem i winim selva. Mo i moa gud wan man i gat fasin ya, i bitim we hem i gat gol. Samting ya i moa gud bitim ol sas ston, mo olgeta samting we yu glad long hem oli no save kasem mak blong hem. Longfala dei blong laef i stap long raethan blong hem. Long lefhan i gat ol rij samting mo ol gudfala samting. Ol rod blong hem oli rod blong haremgud, mo oli givim pis. Hem i wan tri blong laef long olgeta we oli kasem, mo olgeta we oli holemtaet long hem oli save hapi.”

Stap Klin Mo Laekem Pis

Jisas i tokbaot ol hapi man olsem we “tingting blong olgeta i klin gud” mo “oli man blong mekem pis.” (Matyu 5:​8, 9) !Be long wan wol we i leftemap fasin blong laef blong pem ol samting long saed blong bodi, i isi tumas blong gat fasin blong tingbaot yumi wan nomo, tingting we i doti, i save gat rus long hat blong yumi! !Sipos waes blong God i no lidim yumi, i isi tumas long yumi blong go krangke blong lukaot plante mane blong haremgud long ol rod we oli no stret we bambae oli save spolem gudfala fasin joen blong yumi wetem ol narafala! I gat risen blong Baebol i givim woning se: “Fasin blong laekem mane tumas, hem i stampa blong olgeta fasin nogud. Mo i gat sam man we oli strong blong folem fasin ya, we oli gowe finis long fasin blong bilif. Nao oli stap mekem ol samting we olgeta tu oli harem nogud tumas from.”​—1 Timote 6:10.

Fasin blong laekem mane tumas i mekem man i gat flas tingting we i leftemap fasin we hem i wantem moa samting, hem i no gat fasin tangkyu mo i gat fasin griri. Blong blokem wan rong tingting olsem blong i no kamaot, samfala Kristin bifo oli stap mekem plante desisin blong kasem mane, oli askem ol kwestin olsem long olgeta se: ?Mi mi rili nidim ol samting ya? ?Sas samting ya we mi wantem pem no wok ya we mi kasem bigfala mane from, wan wok we i tekem tumas taem, mi mi nidim, bitim plante milyan man we oli stap laef we oli no gat wok? ?Ating i moa gud blong bambae mi spenem mane blong mi no taem blong mi blong joen moa long trufala wosip; blong sapotem wok blong prij raonabaot long wol; no blong givhan long ol man we oli trabol moa bitim mi?

Soem Fasin Blong Stanap Strong

Wan long ol hadtaem we Job i mas stanap strong long hem, taem hem i sot long mane. (Job 1:​14-17) Olsem eksampel blong hem i soemaot, yumi nidim fasin blong stanap strong long olgeta haf long laef blong yumi. Sam Kristin oli mas stanap strong from ol man oli mekem nogud long olgeta; ol narafala, oli kasem traem; be yet ol narafala, oli kasem smol mane nomo bitim olgeta samting we oli mas pem. Bambae Jeova i givim pei long man we i stanap strong long olgeta traem ya, olsem Kristin disaepol Jemes i raetem blong tokbaot Job se: “Mo from we olgeta oli stanap strong longtaem, yumi talem se God i mekem olgeta oli haremgud.”​—Jemes 5:11.

Fasin ya blong sakemaot ol intres long saed blong speret blong winim plante mane blong mekem laef i kam moa gud i save mekem yumi haremgud blong smoltaem nomo, be ?bambae samting ya i givhan blong mekem tingting blong yumi i klia long Kingdom blong God we i stampa samting blong winim trabol long saed blong mane blong olwe? ?Yumi stap tingbaot samting ya olsem wan denja?​—2 Korin 4:18.

Faenem Glad Naoia Mo Foreva

I klia se samfala man oli toktok agens long tingting blong Jeova se i nidim wanem blong mekem ol man oli haremgud. Oli no luk impoten samting ya we i save mekem oli haremgud longtaem, oli no wantem obei long God from we oli no save luk se oli save winim wan samting from naoia. Oli no luksave se fasin blong trastem ol samting blong bodi i wan wok blong lus nomo mo i mekem oli harem nogud tumas. I stret we man ya blong raetem Baebol i askem se: “Taem ol gudfala samting oli kam plante, ol man blong kakae ol samting ya oli kam plante. ?Mo wanem profit i stap long bigfala man blong lukaot ol samting ya, be hem i stap lukluk olgeta nomo wetem ae blong hem?” (Eklesiastis 5:11; ridim Eklesiastis 2:​4-11; 7:12.) !Kwiktaem nomo intres i lus mo ol samting we yumi ting se i gud yumi mas gat, yumi putumgud i stap mo yumi fogetem!

Wan trufala Kristin bambae i neva letem ol samting ya blong pulum hem i go insaed ‘long fasin ya blong traem mekem hem wan i kam sem mak long narafala’ long saed blong bodi. Hem i save se impoten samting, i no ol samting we hem i gat, be ol gudfala fasin we hem i soemaot long laef. Hem i no gat tu tingting long samting we i blong mekem wan man i glad​—hemia trufala fasin blong haremgud: glad long nambawan fasin fren wetem Jeova mo stap bisi long wok blong Hem.

[Tok Blong Pija Long Pej 20]

Ol samting long saed blong bodi nomo oli no save karem gladtaem blong olwe

[Tok Blong Pija Long Pej 22]

Baebol i talem se: “Olgeta we oli luksave se oli nidim ol samting long saed blong speret oli save haremgud.” (NW)