“!I Luk Olsem Mitufala i No Save Toktok Tugeta!”

MICHAEL, wan loea, i mas wan nambawan man blong toktok. Hem i nidim fasin blong toktok long wok blong hem. Be 16 yia biaen long mared blong Michael, hem i mas luksave se taem hem i kambak long haos long woman blong hem, Adrian, i luk olsem waes fasin blong hem long saed blong toktok i lus. Michael i talem se: “Oltaem Adrian mo mi mitufala i rao, talem ol smosmol poen we oli no tru, mitufala i no save agri long wan samting mo mi ting se bambae fasin ya i mekem mitufala i taed. Mi stap tingting sipos hemia nao laef blong mared, oltaem faerap long toktok we i blong nating nomo mo mitufala i stap harem nogud oltaem. Sipos hemia nao ol samting we bambae oli kamaot long ful laef blong mitufala, mi wantem fri long samting ya​—mi no tok plei ya. Mi no save fesem fasin ya we i stap kam moa nogud oltaem mo fasin kros olsem blong 20, 30, 40 yia.”

I no Michael mo Adrian nomo we i gat ol tingting olsem. Plante hasban mo waef we plante taem oli stap rao oli gat tingting olsem. Wan isi storeyan nomo i save bosta i kam faet wetem toktok. Oli “harem” ol samting we i no gat man i bin talem. Oli talem ol samting we oli no wantem talem. Tufala i faet mo tok nogud long tufala, biaen tufala i stap kwaet wetem fasin kros. Tufala i no seraot, be tufala i no moa stap olsem “wan bodi nomo.” (Jenesis 2:24) Fasin fren blong tufala i stop. Bambae tufala i seraot sipos fasin fren blong tufala i no moa gohed; blong kamgud, tufala i mas mekem ol defren tingting mo fasin blong tufala oli kamaot long klia ples. Blong blokem fasin blong harem nogud we i save kamaot long tufala rod ya, hasban mo waef tufala i ting se i moa gud blong stap longwe long tufala long saed blong filing.

Hasban mo waef olsem i nidim blong ‘kasem waes advaes we i save lidim’ tufala long mared blong tufala. (Proveb 1:5) Advaes ya blong lidim yumi i stap long Tok blong God, Baebol. Namba tu leta blong Pol long Timote i talem se Baebol i “stret gud blong tijim ol man long trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long stret fasin.” (2 Timote 3:16) Samting ya nao i save mekem fasin blong toktok gud long mared i kam gud bakegen, olsem bambae yumi luk biaen.