Jeova i Tingbaot Ol Sikman Mo Ol Olfala

BLONG fesem wan “hadtaem” i no isi nating. (Ol Sam 37:​18, 19) Taem olsem i save kam taem man i stap kam olfala mo paoa blong hem i stap godaon. Samfala oli fesem hadtaem taem oli kasem bigfala sik we oli harem nogud long hem longtaem. Oli save harem se sik blong olgeta i stap bos long laef blong olgeta, i stap rulum tingting mo ol wok blong olgeta.

Be, i gud blong tingbaot se oltaem Jeova i stap lukaot gud long ol man blong hem. Hat blong hem i glad taem hem i luk se oltaem ol man blong hem we oli givim laef blong olgeta long hem oli stap soemaot fasin blong stanap strong mo fasin waes, nating se oli kam olfala, oli kasem sik, no ol narafala samting we oli stap traem olgeta. (2 Kronikel 16:9a; Proveb 27:11) King Deved i givim pruf long yumi se: ‘Oltaem Jeova i stap kolosap long olgeta we oli stap singaot i go long hem, . . . oltaem hem i stap harem krae blong olgeta.’ Yes, hem i save long ol trabol blong olgeta; hem i mekem olgeta oli strong wetem speret blong hem. ‘Mo hem i stap sevem olgeta.’ Hem i tingbaot olgeta mo i givhan long olgeta blong oli stanap strong. (Ol Sam 145:​18, 19) ?Be olsem wanem long yumi? ?Yumi mekem olsem Jeova, yumi tingbaot ol sikman mo ol olfala?

Bodi we i no strong from sik no fasin blong kam olfala oli ol samting we oli stap kamaot long laef blong yumi tede. Oli ol samting we oli mas kasem yumi gogo kasem taem we bambae Jeova i mekem plan blong hem long saed blong wol ya mo olgeta man i kamtru fulwan. Tede, plante moa man oli laef gogo oli olfala tumas, taswe i gat plante long olgeta oli bin harem se oli no moa strong. Mo tu, plante we oli yangfala yet, bodi blong olgeta i nogud from wan akseden we i spolem bodi blong olgeta no from oli sik. Sik mo fasin blong kam olfala bambae oli gohed blong stap olsem bigfala traem long yumi gogo kasem taem we olfala wol ya i lus.

!Yumi glad tumas long ol sikman mo ol olfala blong yumi we oli stap soem eksampel long fasin we “oli harem nogud tumas be tingting blong olgeta i no foldaon”! Yes, “from we olgeta oli stap strong longtaem, yumi talem se God i mekem olgeta oli harem gud.” (Jemes 5:​10, 11) Plante olfala we naoia oli no moa strong, long plante yia we i pas oli bin joen long fasin blong tijim, trenem, mo oli bin soem gudfala eksampel long olgeta we naoia oli stap lidim kongregesen. Sam olfala oli glad tu blong luk se ol pikinini blong olgeta oli bin joen long fultaem Kristin minista wok.​—Ol Sam 71:​17, 18; 3 Jon 4.

Long sem fasin, yumi talem tangkyu long olgeta we oli stap long medel blong yumi we oli sik tumas be, nating se oli harem nogud, oli traehad blong leftemap tingting blong yumi long fasin blong olgeta blong stanap strong. Taem oli stap pruvum se oli gat strong bilif long hop blong olgeta, samting ya i leftemap tingting blong yumi mo i mekem bilif blong yumi i strong. Pis we i stap long tingting blong olgeta mo tingting blong olgeta we i haremgud i soemaot wan tru bilif we yumi save folem.

Wan man i save harem nogud tumas taem hem i kasem kansa, hat atak, no wan narafala samting we i jenisim laef blong hem fulwan. Hem i wan bigfala traem tu long ol papa mama blong luk se pikinini blong tufala i sik no i harem nogud from wan akseden. ?Ol narafala oli save mekem wanem blong givhan? Wan hadtaem olsem i wan traem blong olgeta Kristin brata mo sista. Hem i wan jans blong soemaot se ‘wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.’ (Proveb 17:17) I tru, ol sikman mo ol olfala oli no mas ting se olgeta memba evriwan long kongregesen oli save givhan long olgeta wanwan. Be bambae Jeova i mekem se speret blong hem i pusum plante long olgeta blong givhan long ol defren fasin. Mo ol elda oli save lukaotgud se yumi no mas fogetem wan man olsem.​—Lukluk Eksodas 18:​17, 18.

Traem Kasem Save

Taem yu stap traem blong givhan long wan man, i impoten blong gat gudfala fasin blong toktok, mo samting ya i tekem taem, longfala tingting, mo filing. Olsem wan man blong givim help, oltaem yu wantem ‘mekem man i strong long ol tok blong yu’; be lesingud fastaem bifo we yu talem no mekem wan samting, sipos no bambae yu kam ‘wan gyaman fren.’​—Job 16:​2, 5.

Plante taem i hadwok long ol sikman mo ol olfala blong bos long tingting blong olgeta we i foldaon. Plante oli bin gat hop blong laef tru long taem blong bigfala trabol, mo naoia oli harem se laef blong olgeta i sot nomo, oli harem se oli no save stap kasem taem ya. Mo tu, plante taem trabol blong olgeta i mekem se oli taed mo oli tingting tumas. I no isi blong holemstrong long fasin blong bilif, antap moa sipos wan man i no moa save joen fulwan long Kristin minista wok we hat blong hem i laekem tumas. Wan Kristin elda i visitim wan olfala sista; taem hem i stap prea wetem sista ya, hem i askem long Jeova blong fogetem ol sin blong yumi. Taem prea i finis, hem i luk se sista ya i stap krae. Sista ya i eksplenem se Jeova i mas fogivim hem from we hem i no moa joen long wok blong prij long ol haos wanwan. Yes, filing ya se oli no moa naf blong mekem wan samting, nating se plante taem tingting ya i no stret, i save mekem wan man i harem nogud tumas long tingting blong hem.

Yumi mas save se fasin blong tingting mo taed tumas i save spolem stret tingting. Bodi we i no moa strong from fasin blong kam olfala, no trabol blong sik, i save mekem wan man i ting se Jeova i lego hem, ating hem i talem se: “?Mi bin mekem wanem samting? ?From wanem mi mas harem nogud?” Tingbaot ol tok blong Proveb 12:25 se: “Wari we i stap nomo long hat blong wan man bambae i mekem hat i harem nogud, be gudfala toktok i mekem hat i glad.” Traem faenem ol gudfala tok we oli save mekem man i haremgud. Olsem Job, ol olfala tu we oli harem nogud oli save talem se oli wantem ded. Samting ya i no mas mekem yumi fraet; traem kasem save. Ol toktok olsem oli no pruvum se oli no moa gat bilif no tras. Job i prea long Jeova ‘blong haedem hem long Seol,’ be tok we hem i talem biaen i soemaot strong bilif blong hem se bambae Jeova i mekem hem i laef bakegen. Strong bilif i mekem i isi long yumi blong gotru long ol hadtaem mo tingting we i foldaon, be yumi stap kolosap yet long Jeova.​—Job 14:​13-15.

Soemaot Respek Long Ol Sikman Mo Ol Olfala Man

Hem i impoten tumas blong lukaot long ol sikman mo ol olfala wetem fasin ona mo respek. (Rom 12:10) Sipos oli no hareap blong mekem ol samting olsem bifo no oli no moa save mekem plante samting, yu no mas lusum longfala tingting blong yu. Yu no mas hareap blong mekem wan samting blong bos long olgeta. Nating se yumi wantem mekem i gud long olgeta, sipos yumi wantem rul no bos long olgeta, samting ya i save mekem narafala i daonem hem wan. Long wan buk blong ol dokta we oli prentem long 1988, wan woman blong stadi, Jette Ingerslev, i eksplenem tingting blong wan grup blong man we oli gat 85 yia, se wanem samting i moa impoten blong mekem laef blong olgeta i gud: “Oli talem trifala impoten samting: stap wetem famle blong olgeta; stap gud long saed blong bodi; laswan samting be hemia i no min se i no impoten, oli naf blong mekem ol prapa disisen blong olgeta.” Tingbaot se ol pikinini blong Jekob bifo oli no lego hem taem hem i kam olfala; oli gat respek long ol tingting blong hem.​—Jenesis 47:​29, 30; 48:​17-20.

Yumi mas lukaot long ol sikman wetem fasin ona. Wan elda i lusum paoa blong toktok, rid, mo raet from mastik we oli mekem taem oli katem hem from sik blong hem. Hemia i wan bigfala traem, be ol narafala elda oli mekem disisen blong mekem eni samting we oli save mekem blong blokem tingting ya se hem i no moa naf blong mekem wan samting. Nao oli ridim olgeta leta blong kongregesen long hem mo hem i joen wetem olgeta blong mekem plan blong ol narafala bisnes blong kongregesen. Long ol miting blong ol elda, oli traem blong faenemaot wanem tingting blong hem. Oli mekem hem i save se oli tingbaot hem yet olsem wan elda mo oli gat fasin tangkyu long hem from we hem i stap wetem olgeta. Long Kristin kongregesen, yumi evriwan i save traehad blong mekem se ol sikman mo ol olfala oli harem se yumi no “tanem baksaed” no lego olgeta.​—Ol Sam 71:9.

Help Blong Kam Strong Long Saed Blong Speret

Yumi evriwan yumi nidim kakae long saed blong speret blong mekem bilif blong yumi i stap strong. From samting ya nao yumi mas ridim Baebol mo ol buk we oli tokbaot Baebol evri dei mo blong joen fulwan long ol Kristin miting mo long wok blong prij. Plante taem, ol sikman mo ol olfala oli nidim help blong mekem samting ya, mo i impoten blong mekem samting we i stret long olgeta wanwan. Yes, plante oli save kam yet long ol miting sipos yumi mekem rod blong karem olgeta oli kam mo givhan long olgeta long sam samting long Haos Kingdom. Taem oli kam long ol miting olsem, samting ya i leftemap tingting blong ol brata mo sista bigwan. Fasin blong olgeta blong stanap strong i leftemap tingting blong yumi mo i mekem bilif blong yumi i strong.

Plante taem ol sikman mo ol olfala tu oli save joen long Kristin minista wok. Oli save joen wetem samfala we oli go long trak blong go prij, mo bambae oli haremgud taem oli save mekem sam visit. Taem kolosap we oli no moa save mekem samting ya, oli save glad blong tekem jans blong toktok wetem ol man we oli faenem. Wan sista we i kasem kansa i mekem disisen blong yusum laef we hem i gat yet long rod ya blong mekem gud nyus i go moa. Fasin we hem i gat blong wok strong long wok blong prij i leftemap tingting blong evriwan. Mo tu hem i talem samting we bambae oli mas mekem taem oli berem hem, blong givim gudfala wetnes long ol famle we oli no stap long trutok, ol fren long ples blong wok, mo ol man we oli stap raonabaot. Taswe ol samting we oli mekem hem i harem nogud “oli stap givhan long wok blong gud nyus blong Kraes,” mo strong tingting blong hem blong soemaot bilif mo tras i mekem ol laswan dei blong hem oli gat mining.​—Filipae 1:​12-14.

I gud blong givhan long ol sikman mo ol olfala blong kam strong long saed blong speret. Ol famle oli save askem olgeta blong oli kam joen wanples wetem olgeta taem oli stap joen wanples long aftenun, no oli save seftem haf blong famle stadi blong olgeta i kam long ples we sikman no olfala ya i stap long hem. Wan mama i karem tufala smol pikinini blong hem i kam long haos blong wan olfala sista blong oli save joen blong ridim buk ya My Book of Bible Stories. Samting ya i mekem olfala sista ya i glad tumas, mo tufala pikinini ya oli haremgud long intres we hem i soemaot long tufala.

Be, i gat sam taem we yumi no mas toktok tumas long wan man we i no strong, mo maet samtaem i gud blong ridim buk long olgeta long bigfala voes. Be, tingbaot se sipos wan man i no gat paoa nating blong joen long toktok, man ya i nidim mo i laekem yet sam fasin joen long saed blong speret. Yumi save prea wetem ol man olsem, ridim buk long olgeta, no talemaot sam ekspiryens; be yumi mas lukaotgud blong no stap longtaem tumas we i bitim mak blong olgeta.

I gat wan tabu wok we plante sikman mo plante olfala oli save mekem yet: Prea from ol narafala man. Ol faswan disaepol oli gat bigfala respek long wok ya. Wan taem oli seraot ol wok long kongregesen blong mekem se ol aposol oli save putum tingting blong olgeta long prea. Oli tokbaot Epafras we hem i gat strong bilif olsem hem i wan man ‘we oltaem hem i stap prea from ol narafala man.’ (Kolosi 4:12; Ol Wok 6:4) Prea olsem i impoten mo i gud tumas.​—Luk 2:​36-38; Jemes 5:16.

Jeova i tingbaot ol sikman mo ol olfala mo i lukaotgud long olgeta long hadtaem ya we oli kasem. I stret nomo we hem i askem se yumi tu yumi mas tingbaot samting we yumi save mekem blong givhan mo sapotem olgeta. Tingting we yumi soem i soemaot strong tingting blong yumi blong holem fasin blong stanap strong. Mo yumi glad blong tingbaot ol tok blong King Deved se: “Hae God i stap lukaotgud long olgeta we oli stap obei long hem, mo graon ya bambae i blong olgeta gogo i no save finis.”​—Ol Sam 37:18.

[Bokis blong pija long pej 28]

Givim Help We i Save Wok Wetem save

OL FREN mo ol famle oli mas save ol impoten samting mo ol stret samting olsem wanem blong lukaotgud long ol sikman mo ol olfala. Antap moa, yumi save leftemap tingting blong olgeta blong holemtaet strong tingting long saed blong laef, blong harem se yumi nidim mo yumi glad long olgeta, mo blong gat filing se oli naf blong mekem wan samting. Taswe gudfala fasin blong laef blong olgeta bambae i mekem glad blong olgeta long Jeova i stap, nating se bodi blong olgeta i soa mo oli harem nogud. Oli bin makemgud se plante long ol Wetnes blong Jeova oli stap gogo kasem we oli olfala tumas. Bigfala samting we i givhan long olgeta, hemia intres blong olgeta long hop we i stap long fored, klia mo gudfala tingting, mo fasin blong olgeta blong joen long wok blong Kingdom olsem oli naf blong mekem. Laswan presiden blong ‘Watch Tower’ Sosaeti, Frederick W. Franz, we i ded taem hem i gat wan handred yia, afta wan laef we i givim glad mo i karem plante frut long hem, i wan nambawan eksampel long samting ya.​—Ridim 1 Kronikel 29:28.

Oltaem, fasin blong lukaot long ol stampa bisnes blong laef evri dei i save givhan: klin fasin, stret kakae, i naf wota mo sol, gudfala eksasaes, gudfala win, holem bodi smol, mo toktok we i save leftemap tingting. Stret kakae i save mekem man i lesingud, luklukgud, gudfala fasin blong tingting, mo bodi i strong, i sem mak olsem bodi we i strong blong agensem ol sik. Long ol olfala, fasin blong givim stret kakae mo plante wora i save mekem se hem i no sik mo hem i no kasem krangke fasin blong ol olfala. Maet yu mas tingtinggud blong faenem wan kaen eksasaes long saed blong bodi we i stret long olfala ya. Wan sista we i kam blong ridim buk long wan olfala sista we kolosap hem i no save lukluk, long stat mo long en blong visit blong hem evri wik, hem i danis wetem olfala sista ya long rum blong hem. Teprikoda i rere wetem wan kaset we oli jusum finis, mo tufala evriwan i haremgud long “eksasaes ya.”

Long plante kantri, ol ogenaesesen blong givhan oli save givim ol gudfala help we oli save wok mo oli givim save mo advaes from ol trabol blong olfala mo sikman mo olsem wanem blong winim ol trabol ya. (Yes, wan Kristin i mas keagud oltaem i no blong joen long ol samting we oli save pulumaot hem long trufala Kristin minista wok blong yumi.) Samtaem hospetal i save givim wan spesel bed blong givhan long olgeta, ol samting blong sapotem olgeta, wiljea, samting blong givhan long olgeta blong lesin mo narafala samting bakegen. From we plante olfala oli harem se oli no nidim wan samting no se oli nidim ol nyufala samting olsem, plante taem ol famle oli mas givim gudfala advaes no yusum gudfala toktok blong pulum olgeta. Wan handel blong doa blong ples blong swim i save mekem trufala glad i kamaot bitim wan hif blong ol flaoa.

Fasin blong lukaot long ol olfala i save mekem yu harem nogud tumas long tingting blong yu, antap moa sipos olfala ya i kam krangke. Plante taem fasin krangke ya i kamaot sloslou nomo. Wan man i save traem blong winim samting ya taem hem i blokem olfala ya blong hem i no stap kwaet bitim mak. Wan olfala we i krangke i save kros kwiktaem long wan man we hem i bin joen plante wetem hem. Ol famle oli mas save se wan olfala i save fogetem olgeta samting we oli laenap wetem trutok​—nogud samting ya i kamaot from bodi blong hem i no moa strong, i no wan pruf se hem i lusum bilif.

Sipos olfala ya i stap long wan hospetal no wan ples blong lukaot long ol olfala, i impoten blong toktokgud wetem man we oli lukaot long ples ya blong mekem se ol man blong wok oli save wanem samting blong mekem long saed blong ol betde, Krismas, no sam narafala holidei blong ol man blong wol. Sipos oli mas katem hem from sik blong hem, ol famle oli mas eksplenem mo tokbaot tingting we olfala ya i bin holem long ful laef blong hem long saed blong blad transfyusen.