Wan Kwestin
?Yumi save talem se Jon we i baptaesem Jisas, hem i “Jon Baptaes” no “Jon we i man blong Baptaesem man”?
Tufala nem ya i stret mo Baebol i sapotem.
Jon i mas “mekemrere ol man, oli rere blong Hae God i kam long olgeta,” mo hem i mekem olsem taem ‘hem i stap prij mo i stap talem se yufala i mas tanem tingting blong yufala from ol sin blong yufala, mo yufala i mas tekem baptaes, nao God bambae i tekemaot ol sin blong yufala.’ (Luk 1:17; 3:3) Aposol Matyu i raetem se: “Long stret taem blong hem, Jon Baptaes i kamtru long drae ples long Judia. Hem i stap prij, i talem se ‘Yufala i mas tanem tingting blong yufala from ol sin blong yufala, from we taem blong God i kam King blong ol man blong hem, hem i kam kolosap nao.’ . . . Nao olgeta man blong Jerusalem mo blong ol velej blong Judia . . . oli kam long hem. Oli talemaot ol sin blong olgeta, nao Jon i baptaesem olgeta long Jodan Reva.”—Matyu 3:1-6.
Makem gud se Matyu i kolem Jon se “Baptaes.” Matyu, we i klia se hem i raetem buk blong hem i go stret long ol man Jyu, i mas haremsave se ol man Jyu oli save se hu stret nao Jon “Baptaes.” Hem i yusum “Baptaes” olsem wan famle nem blong Jon.a Jisas mo ol disaepol blong hem oli yusum “Jon Baptaes,” olsem ol man blong Herod oli mekem.—Matyu 11:11, 12; 14:2; 16:14.
Be, i no gat wan samting we i talem se yumi mas yusum wan no narawan long tufala rod blong tokbaot Jon. Long Mak 6:24, 25, yumi ridim store blong Salome se: “Gel ya i go afsaed, i go askem long mama blong hem i se: ‘?Mbae mi askem wanem samting long hem?’ Mama blong hem i talem se: ‘Yu go askem hed blong Jon ya we i man blong baptaesem ol man.’ (NW) Nao wantaem nomo, gel ya i resis i kambak long King, i talem long hem, se: ‘Mi mi wantem we naoia nomo yu tekem hed blong Jon Baptaes, yu putum long wan plet, yu tekem i kam, yu givim long mi.’ ” Ol vas ya oli yusum tufala nem ya wantaem.
Maet sam man oli kasem save long “Baptaes” folem namba tu mining we i stap long diksonari se: “Wan memba no disaepol blong wan grup blong ol Protestan jyos we oli gat fasin blong joen olsem kongregesen mo we oli baptaesem ol man we oli bilif nomo taem oli draonem olgeta fulwan long wora.” I tru se Jon i no olsem. Taswe, tufala nem ya “Jon Baptaes” mo “Jon we i man blong baptaesem man” oli stret mo yumi save yusum.
[Futnot]
a Man Jyu ya Flavius Josephus we i man blong raetem histri, i raet blong tokbaot “Jon, we Baptaes i kam famle nem blong hem.”Disaepol Mak i talemaot sem fasin blong yusum nem ya “Baptaes.” (Mak 6:25; 8:28) Be taem Mak i stat blong tokbaot Jon, hem i kolem nem blong hem se ‘Jon we i man blong baptaesem ol man.’ (Mak 1:4) Grik wod we i stap long Mak 1:4 i defren lelebet long nem ya we i stap long ol narafala vas. Mak 1:4 i save minim tu se “i stap baptaesem man.” Mak i stap tokbaot samting we Jon i stap mekem; hem nao i stap baptaesem ol man, man blong baptaesem ol man.