Yufala i Mas Gat Fasin Blong Bos Long Tingting i Strong Long Laef Blong Yufala
“Yufala i gat fasin blong bilif . . . ale yufala i mas joenem long fasin blong bos long tingting.”—2 PITA 1:5, 6, NW.
1. ?Long wanem rod we i defren maet wan Kristin i givim wan wetnes?
JISAS i talem se: “From we yufala i man blong mi, bambae [ol man] oli save pulum yufala i go stanap long fes blong ol haeman blong gavman mo long fes blong ol king. Be hemia i blong yufala i wetnes blong mi long fes blong olgeta ya, mo long fes blong ol hiten man.” (Matyu 10:18) Sipos oli singaotem yu blong stanap fored long wan haeman blong gavman, wan jaj, no wan presiden, ?bambae yu tokbaot wanem? Maet fastaem yu talem from wanem yu stanap fored long hem, talemaot ol toktok we ol man oli talem agensem yu. Speret blong God bambae i givhan long yu blong mekem olsem. (Luk 12:11, 12) ?Be yu ting se bambae yu tokbaot fasin blong bos long tingting? ?Yu ting se hemia i wan impoten haf blong Kristin mesej blong yumi?
2, 3. (a) ?Olsem wanem Pol i save toktok fored long Filiks mo Drusila? (b) ?From wanem i stret blong Pol i tokbaot fasin blong bos long tingting long taem ya?
2 Tingbaot wan trufala eksampel. Ol soldia oli holem wan long ol Wetnes blong Jeova mo tekem hem i go long kot. Taem oli givim jans long hem blong toktok, hem i wantem eksplenem bilif blong hem olsem wan Kristin, olsem wan wetnes. Yu save lukluk store ya mo bambae yu faenem se hem i tokbaot ‘ol gudfala fasin, mo fasin blong bos long tingting, mo dei ya we God bambae i jajem olgeta man.’ Yumi stap tokbaot wan ekspiryens blong aposol Pol long Sisaria. Fastaem oli traem hem wetem ol kwestin. “I gat sam dei i pas finis, nao Filiks i tekem woman blong hem Drusila i kam. Woman ya i wan woman Isrel. Filiks i talem long olgeta blong oli tekem Pol i kam, nao hem i stap lesin long hem taem hem i stap tokbaot fasin blong bilif long Jisas Kraes.” (Ol Wok 24:24) Histri i soem se Filiks “i stap yusum evri kaen rod blong spolem man mo mekem ol rabis fasin we hem i wantem, hem i yusum paoa blong king wetem prapa fasin blong slef.” Hem i bin mared tu taem finis taem hem i pulum Drusila blong i mekem divos long hasban blong hem (i brekem loa blong God) mo hem i kam namba tri waef blong hem. Maet woman blong hem nao i wantem harem sam samting long saed blong nyufala skul ya, Kristianiti.
3 Pol i gohed blong tokbaot ‘ol gudfala fasin, mo fasin blong bos long tingting, mo dei ya we God bambae i jajem olgeta man.’ (Ol Wok 24:25) Samting ya i blong makem klia we ol rul blong God long stret fasin oli defren tumas long fasin blong stap spolem ol man mo fasin blong jajem nogud ol man we Filiks mo Drusila tufala i stap mekem. Maet Pol i wantem pulum Filiks blong jajem bisnes blong hem long stret fasin. ?Be, from wanem hem i tokbaot ‘fasin blong bos long tingting mo dei ya we God bambae i jajem olgeta man’? Tufala ya we tufala i gat nogud fasin, tufala i wantem save se “fasin blong bilif long Jisas Kraes” i olsem wanem. Taswe tufala i mas save se blong folem Jisas man i mas kontrolem prapa tingting, toktok, mo ol fasin blong hem, hemia nao mining blong fasin blong bos long tingting. God i mas jajem olgeta man from tingting, ol toktok, mo ol fasin we oli stap mekem. Taswe, jajmen we haeman ya mo woman blong hem bambae tufala i fesem fored long God i impoten moa bitim eni jajmen we Filiks i save mekem long bisnes ya blong Pol. (Ol Wok 17:30, 31; Rom 14:10-12) Olsemia nao taem hem i harem mesej blong Pol, “Filiks i seksek gud.”
Hem i Impoten Be i No Isi
4. ?From wanem fasin blong bos long tingting i wan impoten haf blong trufala Kristin fasin?
4 Aposol Pol i luksave fasin blong bos long tingting olsem wan impoten samting long Kristin fasin. Aposol Pita, wan long ol disaepol blong Jisas, i talem samting ya tu. Taem hem i raet long olgeta ya we oli “blong joen long laef blong God” long heven, Pita i askem olgeta blong oli gat sam fasin we oli impoten tumas, olsem bilif, lav, mo fasin blong bos long tingting. Taswe, fasin blong bos long tingting tu i stap long tok ya: “Sipos yufala i gat ol fasin ya oli strong long laef blong yufala, be bambae yufala i no save stap nating bambae yufala i save karem frut long laef blong yufala, olsem we yufala i save moa Jisas Kraes, Masta blong yumi.”—2 Pita 1:1, 4-8.
5. ?From wanem yumi mas tingtinggud long fasin blong bos long tingting?
5 Be, yu save se i isi moa blong talem se yumi mas gat fasin blong bos long tingting, bitim we yumi mas mekem i rili wok long laef blong yumi evri dei. Wan risen se i no plante man we oli stap soem fasin blong bos long tingting. Long 2 Timote 3:1-5 Pol i tokbaot fasin blong laef long taem blong yumi, long “lasdei.” Wan long ol fasin we bambae i makem taem blong yumi, hemia we plante man bambae “oli man blong lusum hed, mo oli wael olgeta.” Yumi stap luk samting ya i stap kamaot raonabaot long yumi.
6. ?Olsem wanem yumi luksave fasin blong no bos long tingting tede?
6 Plante man oli bilif se fasin blong no bos long “filing” no “faerap long kros” i gud long helt blong man. Tingting blong olgeta i kam strong from i luk olsem se ol jampion blong spot mo ol narafala bigman we ol man oli stap savegud long olgeta oli no stap tingbaot fasin blong bos long tingting, oli gohed oli stap mekem olsem we tingting blong olgeta i wantem. Blong eksplenem: Plante man we oli laekem ol spot oli savegud olsem wanem ol filing we oli wael olgeta oli stap kamaot, maet oli faerap long kros. ?Yu save tingbaot, maet long nyuspepa, we i tokbaot ol faet no i soem ol pija blong hif man we oli kros long taem blong spot? Be, poen blong yumi, i no nidim plante taem blong talem bakegen ol eksampel blong ol man we oli no gat fasin blong bos long tingting. Yu save talem plante samting we yumi nidim blong yumi bos long tingting blong yumi long hem—taem yumi kakae mo dring, taem yumi stap wetem woman sipos yumi man, mo olsem wanem blong spenem taem mo mane long ol pleplei. I nogud yumi tokbaot kwiktaem ol samting ya, be i gud yumi lukluk long wan stampa samting we yumi mas gat fasin ya blong bos long tingting long hem.
Bos Long Ol Filing Blong Yumi
7. ?Wanem haf blong fasin blong bos long tingting nao i impoten blong yumi tingtinggud long hem?
7 Plante long yumi, yumi naf blong lukaotgud no bos long ol fasin blong yumi. Yumi no stap stil, yumi no foldaon long ol rabis fasin blong seks, no kilim man i ded; yumi save se loa blong God i olsem wanem long ol nogud samting olsem. ?Be, olsem wanem long fasin blong bos long ol filing blong yumi? Sloslou ol man we oli no stap bos long filing blong olgeta plante taem oli lusum fasin blong bos long tingting long ol fasin blong olgeta. Taswe i gud yumi tingbaot ol filing blong yumi.
8. ?Jeova i wantem se yumi mekem wanem long saed blong fasin blong bos long ol filing blong yumi?
8 Jeova God i no tingbaot yumi olsem ol robot, we yumi no save gat no soemaot eni filing. Jisas i “harem i nogud tumas, we i pulum win blong hem from,” taem hem i stap long gref blong Lasros. Nao “Jisas, hem i krae.” (Jon 11:32-38) Hem i soemaot wan defren filing taem hem i ronemaot ol man we oli stap jenisim mane long tempel, wetem fasin we i stretgud olgeta hem i bos long ol fasin blong hem. (Matyu 21:12, 13; Jon 2:14-17) Ol trufala disaepol blong hem oli soemaot ol dip filing tu. (Luk 10:17; 24:41; Jon 16:20-22; Ol Wok 11:23; 12:12-14; 20:36-38; 3 Jon 4) Be, oli luksave nid blong bos long tingting blong olgeta blong mekem se ol filing blong olgeta oli no save pulum olgeta blong oli mekem sin. Efesas 4:26 i makem klia samting ya, i se: “ ‘Sipos yufala i kros, yufala i no letem we kros ya i lidim yufala, blong yufala i mekem sin.’ Yufala i mas no stap kros, gogo kasem san i godaon.”
9. ?From wanem i impoten tumas blong yumi bos long ol filing blong yumi?
9 I gat trabol i stap se, maet i luk olsem we wan Kristin i stap soem fasin blong bos long tingting blong hem, be rili hem i no stap bos long ol filing blong hem. Tingbaot fasin we i kamaot taem God i agri long sakrifaes blong Ebel: “Nao Ken i kros tumas, mo fes blong hem i kam nogud. Nao Hae God i tok long Ken, se ‘?From wanem yu yu kros olsem? ?Weswe fes blong yu i kam nogud olsem? Sipos fasin blong yu i stret, bambae mi mi glad long yu, be fasin blong yu i no stret. Mo from we fasin blong yu i no stret, fasin nogud ya blong yu i olsem wan wael anamol we i stap kolosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.’ ” (Jenesis 4:5-7) Ken i no moa bos long ol filing blong hem, we i lidim hem blong kilim ded Ebel. Ol filing we man i no bos long hem i save lidim man blong mekem ol fasin we i no bos long olgeta.
10. ?Yu yu lanem wanem long eksampel blong Heman?
10 Tingbaot tu, wan eksampel long taem blong Modekae mo Esta. Haeman ya we nem blong hem Heman i kam kros from we Modekae i no bodaon long hem. Biaen Heman i gat rong tingting se bambae hem i mas kasem ona. “Long dei ya Heman i goaot i glad mo i haremgud long hat blong hem; be taem Heman i luk Modekae long get blong king mo we Modekae i no girap mo i no ona long hem, kwiktaem Heman i kros long Modekae. Be, Heman i stap bos long tingting blong hem wan mo i kam insaed long haos blong hem.” (Esta 5:9, 10) Hem i kwik blong haremgud. Be tu hem i kwik blong kros bigwan taem hem i luk nomo man ya we i no laekem nating. ?Yu ting se taem Baebol i talem se Heman i “stap bos long tingting blong hem wan,” hemia i min se hem i soem gudfala eksampel long fasin blong bos long tingting? No gat. Long smoltaem nomo, Heman i bos long ol fasin blong hem mo filing we i save kamaot, be hem i no bos long fasin kros from jelas. Ol filing blong hem oli lidim hem blong i mekem plan blong kilim man i ded.
11. ?Long kongregesen blong Filipae, wanem trabol i stap mo maet wanem samting nao i mekem se trabol ya i kamaot?
11 Sem mak, tede fasin blong no bos long ol filing i save spolem bigwan ol Kristin. Maet sam oli harem se ‘O be, hemia i no wan trabol insaed long kongregesen.’ Be trabol i bin kamaot finis olsem. Tu Kristin long Filipae we tabu speret i makemaot tufala, tufala i gat bigfala trabol bitwin tufala, Baebol i no talemaot wanem kaen trabol. Tingbaot sipos trabol ya i olsem: Maet Yuodia i invaetem sam brata mo sam sista long wan kakae no blong joen tugeta. Hem i no invaetem Sintike, mo hem i harem nogud. Maet long narafala taem hem i givimbak, hem i no invaetem Yuodia. Nao tufala i stat blong luklukaot mastik blong tufala; sloslou, tufala i no moa toktok long tufala. Long wan taem olsem, ?yu ting se stampa trabol hem i invetesen long wan kakae? No gat. Hemia i olsem stat nomo blong faea. Taem tufala Kristin ya we tabu speret i makemaot tufala, tufala i no bos long ol filing blong tufala, smol faea we i stat, hem i kam wan bus faea. Trabol ya i stap mo i gru gogo wan aposol i mas kam insaed long bisnes ya blong stopem.—Filipae 4:2, 3.
Ol Filing Blong Yu Mo Ol Brata Blong Yu
12. ?From wanem God i givim advaes long Eklesiastis 7:9 long yumi?
12 Blong talem stret, i no isi blong wan man i bos long ol filing blong hem taem i harem se man i ting nating long hem, hem i harem nogud long filing blong hem, no ol man oli daonem hem bitim ol narafala. Jeova i save samting ya, from we hem i stap lukluk olsem wanem ol man oli stap tugeta long stat finis i kam. God i givim advaes long yumi se: “Yu no mas hareap blong kam kros long tingting blong yu, from we kros i stap long jes blong ol krangke man.” (Eklesiastis 7:9) Makem se God i stap lukluk filing blong man fastaem i no fasin we hem i mekem. (Proveb 14:17; 16:32; Jemes 1:19) Askem yu wan se, ‘?Mi mas lukluk moa long fasin blong bos long ol filing blong mi?’
13, 14. (a) ?Long wol ya, oltaem wanem samting i stap kamaot taem ol man i no bos long ol filing blong olgeta? (b) ?Wanem samting maet i save pulum ol Kristin blong holem kros agensem narafala?
13 Plante man long wol we oli no bos long ol filing blong olgeta, oli stat blong agensem narafala blong givimbak—kros bigwan, oli gat raf fasin, oli stap agensem narafala from ol trufala rong no oli ting nomo se narafala i mekem i rong long olgeta no long wan famle blong olgeta. Taem man i no moa bos long ol filing blong hem, ol filing ya oli save spolem tingting blong man ya longtaem. (Lukluk Jenesis 34:1-7, 25-27; 49:5-7; 2 Samuel 2:17-23; 3:23-30; Proveb 26:24-26.) Yes ol Kristin, nomata oli blong wanem kantri no oli gruap long wanem kaen ples, oli mas luksave ol fasin blong agens strong mo fasin blong holem kros longtaem olsem we oli nogud, oli rong, oli no mas mekem. (Levitikas 19:17) ?Yu yu tingbaot fasin blong holem kros longtaem i olsem wan samting we yu mas soem fasin bos long tingting, olsem long filing blong yu?
14 Sem mak long Yuodia mo Sintike, fasin blong no bos long ol filing i save lidim man i go long ol trabol naoia. Maet wan sista i save harem nogud taem oli no invaetem hem i go long wan lafet blong mared. No maet oli no invaetem pikinini blong hem no kasen blong hem. No maet wan brata i pem wan sekenhan trak long wan Kristin fren, nao i no longtaem biaen trak ya i no moa wok. Nating se yumi no save from wanem i olsem, samting ya i spolem ol filing blong man ya, oli no moa bos long ol filing, mo olgeta ya we samting olsem i hapen long olgeta, oli kros. ?Nao wanem i save kamaot from?
15. (a) ?Wanem nogud frut i kamaot from fasin blong holem kros i stap bitwin ol Kristin? (b) ?Wanem advaes blong Baebol i stret long tingting blong holem kros agensem narafala longtaem?
15 Sipos wan man we i kros i no traehad blong bos long ol filing blong hem mo mekem pis wetem brata blong hem, fasin blong stap kros agensem narafala i save stat. I bin gat sam trabol we wan Wetnes i askem blong hem i no go long wan Kongregesen Buk Stadi from we hem i “no laekem” wan Kristin no famle we oli stap go long buk stadi ya. !Sore tumas! Baebol i talem se i rong blong ol Kristin oli stap tekem olgeta i go long ol kot blong wol blong oli jajem olgeta, ?be, yu ting se i rong tu blong no toktok wetem wan brata from we hem i no kaen long yumi bifo no long sam famle blong yumi? ?Ol filing blong yumi oli soem se yumi stap putum famle fastaem long fasin blong mekem pis wetem ol brata mo sista blong yumi? ?Olsem wanem, yumi bin talem se yumi rere blong ded from sista blong yumi, be ol filing blong yumi oli mekem se yumi no save toktok wetem hem naoia? (Lukluk Jon 15:13.) God i talem stret long yumi se: “Sipos i gat man we i mekem i no stret long yufala, bambae yufala i no mekem i no stret long hem bakegen. . . . Oltaem, long saed blong yufala, yufala i mas traehad tumas blong yufala i gat pis wetem olgeta man. Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap.”—Rom 12:17-19; 1 Korin 6:7.
16. ?Ebraham i soem wanem gudfala eksampel blong winim ol nogud filing?
16 I moa gud blong traem blong bos long ol filing blong yumi bakegen hemia blong mekem pis no winim trabol we i kamaot bitim we yumi letem fasin kros agensem narafala man i stap. Tingbaot taem ya we ples blong Ebraham mo Lot i smol tumas blong sapotem ol anamol blong tufala, ale ol wokman blong tufala oli stat rao. ?Ebraham i letem filing blong hem i winim hem? ?No hem i gat fasin blong bos long tingting? Yes, hem i talem wan rod blong winim trabol ya long kwaet fasin; i gud tufala wanwan i gat ol prapa ples blong tufala we i seraot. Mo Ebraham i letem Lot i jusum fastaem. I pruvum se Ebraham i no kros mo we hem i no stap holem kros agensem narafala, biaen hem i go blong faet blong sevem Lot.—Jenesis 13:5-12; 14:13-16.
17. ?Olsem wanem Pol mo Banabas tufala i foldaon long fasin ya long wan taem, be wanem i kamaot biaen?
17 Yumi lanem fasin blong bos long tingting tu long wan samting we i kamaot bitwin Pol mo Banabas. Nating se tufala i bin wok tugeta long plante yia finis, tufala i no agri long bisnes ya blong tekem Mak i go wetem tufala long wan trip. “Nao tufala i rao long bisnes ya, tufala i go wanwan. Banabas i tekem Mak, nao tufala ya i tekem wan sip, tufala i go long aelan ya Saepras.” (Ol Wok 15:39) Fasin ya we tufala bigman ya long speret tufala i no bos long ol filing blong tufala long taem ya i mas givim wan woning long yumi. Sipos samting ya i save hapen long tufala, hem i save hapen tu long yumi. Be, tufala i no letem samting ya i stap seraotem tufala blong olwe no tingting blong givimbak i stat gru. No gat. Store i pruvum se tufala brata ya tufala i bos long ol filing blong tufala bakegen mo biaen tufala i wok tugeta long pis.—Kolosi 4:10; 2 Timote 4:11.
18. ?Sipos yu harem nogud long ol filing blong yu from samting we narafala i mekem long yu, Kristin we i bigman long speret i save mekem wanem?
18 Yumi save se maet i gat ol nogud filing, maet fasin kros tu, i kamaot long medel blong ol man blong God. Fasin olsem oli stap long taem blong ol man Isrel mo long taem blong ol aposol. Mo tu oli stap hapen long medel blong ol man blong Jeova long taem blong yumi, from we yumi evriwan i no stretgud olgeta. (Jemes 3:2) Jisas i askem ol man blong hem blong oli kwik blong stretem ol trabol olsem bitwin ol brata. (Matyu 5:23-25) Be i gud moa blong blokem ol trabol olsem bifo we oli kamaot sipos yumi stap kam gud moa long fasin blong bos long tingting blong yumi. Sipos yu yu kam kros from wan smol samting we brata no sista blong yu i talem no i mekem long yu, i gud yu jes bos long ol filing blong yu mo fogetem nomo. ?Yu ting se i rili gat nid blong yu holem kros agensem narafala, olsem se bambae yu no glad gogo narafala i talemaot rong blong hem long yu? ?Olsem wanem, yu stap gohed blong bos long ol filing blong yu?
!Yu Save Mekem!
19. ?From wanem i stret we yumi tokbaot fasin blong bos long ol filing blong yumi?
19 Yumi bin tokbaot wan haf nomo blong fasin ya blong bos long tingting, hemia bos long ol filing blong yumi. Mo hemia i impoten haf blong hem, from we sipos yumi no bos long ol filing blong yumi samting ya i save lidim yumi blong yumi no bos long ol toktok blong yumi, ol filing we oli stap pulum yumi long saed blong seks, fasin blong kakae blong yumi, mo plante narafala fasin blong laef we yumi mas soem fasin blong bos long tingting long hem. (1 Korin 7:8, 9; Jemes 3:5-10) Be yu mas gat strong tingting, from we yu yu save kam gud moa blong holemtaet fasin blong bos long tingting.
20. ?Olsem wanem yumi sua se yumi save kam gud moa?
20 Jeova i rere blong givhan long yumi. ?Olsem wanem yumi sua long samting ya? Yes, fasin blong bos long tingting hem i wan long ol frut blong speret blong hem. (Galesia 5:22, 23) Taswe, sipos yumi stap traehad bigwan blong kasem mak ya we yumi save kasem tabu speret long Jeova mo blong soem ol frut blong hem long laef blong yumi long fasin we i bigwan, yumi save kam gud moa long fasin blong bos long tingting blong yumi. Neva fogetem tok blong Jisas se: “Papa blong yufala long heven, hem i save go moa olgeta blong [bambae i] givim Tabu Speret long olgeta we oli askem long hem.”—Luk 11:13; 1 Jon 5:14, 15.
21. ?Wanem samting yu tingting strong blong mekem long fyuja long saed blong fasin blong bos long tingting mo ol filing?
21 Yu no mas ting se bambae hem i isi. Mo maet hem i strong moa long olgeta ya we oli gruap wetem ol man we oli no stap bos long ol filing blong olgeta, long olgeta ya we oli save kros kwik, no long olgeta ya we oli neva traem blong gat fasin blong bos long tingting blong olgeta. Long ol Kristin olsem, maet hem i wan strongfala traem long olgeta blong oli letem fasin blong bos long tingting i stap mo i strong long laef blong olgeta. Be oli save mekem olsem. (1 Korin 9:24-27) Taem yumi stap kam kolosap moa long en blong fasin blong naoia, ol trabol mo ol traem bambae oli kam strong moa. !Bambae yumi nidim moa fasin blong bos long tingting, yes yumi nidim moa! Traem jekem fasin blong bos long tingting blong yu wan. Sipos yu luk sam haf long fasin blong yu we i nidim blong yu kam gud moa long hem, wok long hem. (Ol Sam 139:23, 24) Askem God blong hem i givim speret blong hem moa long yu. Bambae hem i lesin long yu mo bambae hem i halpem yu blong mekem se fasin blong bos long tingting blong yu i stap mo i strong.—2 Pita 1:5-8.
Ol Poen Blong Tingtingbak
◻ ?From wanem i impoten tumas blong bos long ol filing blong yu?
◻ ?Yu bin lanem wanem long eksampel blong Heman mo Yuodia mo Sintike?
◻ ?Bambae yu yu rili traehad blong mekem wanem sipos wan man i mekem yu yu kros?
◻ ?Olsem wanem fasin blong bos long tingting i save givhan long yu blong no holem kros agensem narafala longtaem?
[Tok Blong Pija Long Pej 18]
Taem Pol i stap fored long Filiks mo Drusila, hem i tokbaot stret fasin mo fasin blong bos long tingting