Papias i Tinghae Long Ol Toktok Ya Blong Masta

“MI MI no . . . glad long olgeta ya we oli toktok tumas, be mi mi glad long olgeta ya we oli stap tijim samting we i tru.” Papias we i wan Kristin long ol yia wan handred Kristin Taem, i raetem olsem.

Papias i stap laef jes afta nomo long ded blong ol aposol blong Jisas Kraes. Yes, hem i wan fren blong Polycarp, we i stap lan long aposol Jon. From ol samting ya, wetem fasin we Papias i yusum blong kasem save, i mekem se hem i save plante samting.

Fasin Keagud

Long ol faef buk we hem i raetem long saed blong ol toktok blong Masta, yumi luksave we Papias i tosta from trutok. Long stat blong laef blong hem, Papias i tingbaot plante long ol toktok blong trutok we hem i harem. Biaen, taem hem i stap long Frijia, long taon ya blong Hierapolis long Esia Maena, Papias i askem ol olfala blong faenemaot sipos oli bin luk no harem sam long ol aposol blong Jisas. Hem i stap askem kwestin long olgeta mo raetemdaon samting we oli talem.

Papias i eksplenem se: “Bambae mi mi no fraet blong raetemdaon . . . samting we mi mi harem eni taem long ol olfala, mo rimemba gud, mo talemaot gud long yu trutok blong olgeta. From we mi, olsem plante narafala man, mi no laekem olgeta ya we oli toktok tumas, be mi laekem olgeta ya we oli stap tijim trutok; mo mi no laekem olgeta ya we oli stap talem ol tok blong narafala man, be mi laekem olgeta ya we oli stap talem ol tok we Masta i stap talem long ol Kristin mo i kamaot long trutok hem wan. Mo sipos mi faenem wan man we i stap folem ol olfala, bambae mi askem ol toktok we ol olfala oli talem​—wanem samting Andru, no Pita i talem, no wanem samting Filip no Tomas no Jemes, no Jon no Matyu i talem, no eni narafala disaepol blong Masta.”

Wok Blong Hem

Yes i gat plante save long saed blong speret oli stap blong Papias i faenem. Yumi save tingbaot olsem wanem hem i lesingud long ol store blong laef mo minista wok blong wanwan aposol. Kolosap 135 K.T., Papias i raetemdaon olgeta samting we hem i wantem talem, long wan buk blong hem. Sore tumas buk ya i lus finis. Irenaeus, wan Kristin long ol yia wan handred K.T., i tokbaot buk ya, mo long ol yia tri handred man ya blong histri Eusebius i bin tokbaot. Yes, ol man oli stap ridim buk ya yet long ol yia 8 handred K.T. mo maet i stap yet kasem ol yia 13 handred.

Papias i bilif se wan taosen yia Rul blong Kraes bambae i kam. (Revelesen 20:​2-7) Long saed blong Irenaeus, hem i raet i tokbaot wan taem we “olgeta wok blong God, oli kam nyuwan mo oli fri, bambae oli givim plante defren kakae, from wora blong naet mo gudfala graon long wol, olsem we ol olfala, we oli luk Jon, disaepol ya blong Masta, i tokbaot se oli harem Masta i stap tijim olgeta long ol samting ya.” Papias i gohed i se: “Long tingting blong ol man blong bilif, ol samting ya oli mas kamtru. Mo taem Judas, we i salem Jisas, i no wantem bilif mo i askem se, ‘?Olsem wanem Masta bambae i mekem ol samting ya oli kamtru?’ Masta i se, ‘Olgeta we oli laef long taem ya bambae oli luk.’ ”

Papias i stap raet long taem ya we ol man oli stap talem se oli save plante samting long saed blong speret. Ol man ya oli meksemap waes tok blong man, tingting nomo blong man, hiten bilif wetem gyaman Kristianiti. Rili, wok blong Papias blong raetemdaon ol toktok blong Masta, i blong traem stopem bilif blong ol man ya i goaot long olgeta ples. Afta long hem, Irenaeus i gohed blong agensem ol man ya we oli stap gyaman se oli save plante samting long saed blong speret. Ol buk blong olgeta maet oli bigwan mekem se Papias i daonem olgeta se “oli toktok tumas.” Papias i wantem​—blong faetem gyaman toktok wetem trutok.​—1 Timote 6:4; Filipae 4:5.

Tokbaot Ol Gospel

Long smol haf long ol raeting blong Papias we i stap yet, hem i tokbaot ol toktok we Matyu mo Mak tufala i raetem. Eksampel, Papias i tokbaot ol raeting blong Mak se: “Mak, we i stap tanem toktok blong Pita, i raetemdaon long trufala fasin evri samting we hem i tingbaot.” Blong soem moa se Gospel ya i stret, Papias i gohed i se: “Taswe Mak i no mekem wan mastik, taem hem i stap raetemdaon ol samting we hem i tingbaot yet; hem i wantem tumas blong no mestem wan samting we hem i harem, no i talem wan gyaman tok insaed.”

Papias i pruvum se Matyu i raetem Gospel blong hem fastaem long Hibru lanwis. Papias i talem se: “Hem i raetem ol tok ya long Hibru lanwis, nao evriwan oli tanem olgeta olsem we oli naf blong mekem.” I luk olsem Papias i tokbaot ol store long Gospel blong Luk mo Jon, mo tu ol narafala raeting blong Kristin haf blong Baebol. Sipos i olsem, hem i wan long ol faswan wetnes we i talemaot se ol tok ya oli tru mo oli kamaot long God. Sore tumas se smol haf blong ol raeting blong Papias i stap yet.

Hem i Tingbaot Nid Long Saed Blong Speret

Olsem wan man blong lukaot insaed long kongregesen long Hierapolis, Papias i no les nating blong lanem ol samting. Hem i wan man blong stadi strong antap moa hem i soem bigfala intres long Baebol. Papias i talem stret se ol tok blong Jisas mo ol aposol blong Hem long saed blong bilif oli gud moa blong eksplenem bitim ol gyaman toktok we oli stap long ol buk long taem ya blong hem.​—Jud 17.

Ol man oli kilim ded Papias long Pegamam long 161 no 165 K.T. Yumi no save talem stret olsem wanem ol tijing blong Jisas Kraes oli gat paoa long laef mo fasin blong Papias. Be, Papias i wantem tumas blong lanem mo tokbaot Baebol. Sem mak long ol trufala Kristin tede, from we oli stap tingbaot nid blong olgeta long saed blong speret. (Matyu 5:3) Mo olsem Papias, oli tinghae long ol toktok blong Masta.