Oli Keagud Blong Lukaot Long Ol Smol Sipsip Ya
LONG olgeta anamol we man i stap lukaotem, i no gat wan we i olsem sipsip. Plante anamol oli gat paoa mo oli bon wetem waes se oli mas lukaotem kakae blong olgeta mo trikim ol anamol we oli stap kakae olgeta, be sipsip i defren. I isi nomo blong narafala anamol i kakae hem, hem i no naf blong faet bak. Sipos i no gat man blong lukaot sipsip, sipsip i fraet mo hem i no save lukaot long hem wan. Sipos hem i aot long narafala, i isi nomo blong hem i lus. Taswe ol sipsip we oli kwaet oli harem se oli mas stap kolosap long man we i lukaotem olgeta. Oli save gat smol jans nomo blong laef sipos i no gat man ya blong lukaot sipsip. From ol samting ya, Baebol i yusum pijatok blong sipsip blong tokbaot ol man ya we oli kwaet, oli no save faet bak, mo ol narafala oli stap spolem olgeta.
Blong makemgud, man blong lukaot sipsip i mas wok had blong kasem gudfala pei. Laef blong hem i no isi. Hem i laef tru long hot taem mo kolkol taem, mo hem i no stap slip gud long naet. Hem i mas lukaot long ol sipsip blong ol narafala anamol oli no kam kakae olgeta, plante taem laef blong hem i stap long denja taem hem i mekem olsem. Man blong lukaot sipsip i mas kipim ol sipsip i stap wan ples, from samting ya hem i spenem plante taem blong hem blong lukaotem ol sipsip we oli aot long ol narafala no oli lus. Hem i mas lukaotgud long ol sipsip ya we oli sik no oli kasem kil long bodi blong olgeta. Hem i mas karem ol smol sipsip we oli no strong no oli taed tumas. Oltaem hem i mas tingbaot se oli mas kasem naf kakae mo wora. Plante taem man blong lukaot sipsip i spenem fulnaet long open ples afsaed blong mekem se ol sipsip oli stap sefgud. Taswe, wok blong lukaot sipsip i strong i nidim man we i strong, i laekem wok, mo i gat gudhan blong mekem wok. Antap long ol samting ya, hem i mas soem se hem i rili keagud long ol sipsip ya we oli stap aninit long kea blong hem.
Lukaot Long Ol Sipsip Blong God
Baebol i tokbaot ol man blong God olsem ol sipsip we oli kwaet mo i tokbaot ol man ya we oli stap lukaot long olgeta olsem oli man blong lukaot long sipsip. Jeova hem wan i ‘olsem man blong lukaot sipsip we i lukaot laef blong yumi.’ (1 Pita 2:25) Jisas Kraes, “Gudfala man ya blong lukaot sipsip,” i soem se hem i wantem se man i mas keagud long ol sipsip ya taem hem i talem long aposol Pita se: ‘Yu givim kakae long ol smol sipsip blong mi, yu lukaotgud long ol sipsip blong mi, yu givim kakae long ol sipsip blong mi.’ (Jon 10:11; 21:15-17) Ol Kristin man blong lukaot oli gat responsabiliti ya ‘blong lukaot long kongregesen blong God, olsem we man blong lukaot long sipsip i stap lukaot long ol sipsip blong hem.’ (Ol Wok 20:28) Mo wok blong olgeta blong lukaot sipsip long saed blong speret i nidim ol fasin olsem blong wan gudfala man blong lukaot long prapa sipsip—hem i mas strong, laekem blong wok, gat gudhan, mo antap moa hem i mas rili keagud long laef blong ol sipsip wetem fulhat blong hem.
Long taem blong profet Esikel, bighaf blong ol man blong lukaot sipsip we oli putumap olgeta blong oli lukaot long ol nid blong ol man blong Jeova long Isrel, oli no stap mekem wok blong olgeta. Ol man blong God we oli olsem sipsip oli harem nogud tumas from, mo plante long olgeta oli lego trufala wosip. (Esikel 34:1-10) Tede, ol lida blong Krisendom oli stap mekem olsem se oli man blong lukaot long sipsip long samting we oli kolem Kristin kongregesen, be sik blong hem long saed blong speret i soem se ol lida ya oli olsem ol rabis man ya we oli gat tu fes we oli no stap tingbaot ol man mo oli stap spolem ol man taem Jisas i bin stap long wol. Ol lida blong ol skul long Krisendom oli olsem ‘man we masta i pem hem blong lukaot long ol sipsip’ we “i no kea long ol sipsip ya.” (Jon 10:12, 13) Oli no wantem, oli no save, no oli no naf blong lukaot long ol sipsip ya blong God.
Ol Man Blong Lukaot Long Sipsip We Oli Rili Kea
Jisas i soem wan stret eksampel long olgeta ya we bambae oli lukaot long ol sipsip blong Jeova. Hem i soem lav, kaen, fasin keagud, mo halpem ol disaepol blong hem. Hem i traem faenem ol man we oli gat nid. Nating se Jisas i bisi mo plante taem hem i taed, oltaem hem i tekem taem blong lesin long ol trabol blong olgeta mo leftemap tingting blong olgeta. Fasin ya we hem i rere blong givim laef blong hem from olgeta, hemia nambawan fasin blong soem lav.—Jon 15:13.
Tede, olgeta elda mo ol man blong givhan, oli mekem wok ya long ol sipsip ya. Taswe, jans blong kasem plante samting long narafala kantri i no pulum bighaf blong ol man ya we oli gat responsabiliti blong oli muf i go long narafala ples mo livim ol kongregesen oli stap we i no gat naf help mo fasin blong lukaot. Naoia we ‘laef long wol ya i kam strong tumas,’ ol sipsip ya oli nidim tok blong leftemap tingting blong olgeta mo blong soemaot rod long olgeta. (2 Timote 3:1-5) Naoia i gat bigfala denja moa se sam bambae oli foldaon long trap blong Setan, we hem i “olsem wan laeon we i stap singaot bigfala, i stap lukaot man blong i kakae.” (1 Pita 5:8) Naoia i bitim bifo, hem i impoten se ol Kristin man blong lukaot long ol sipsip oli ‘mas tok strong blong wekemap olgeta we oli stap les, oli no wok. Mekem tingting blong ol man ya we oli fraet, i strong bakegen. Givhan long olgeta we oli no gat paoa.’ (1 Tesalonaeka 5:14) I impoten blong oli stap wekap oltaem sipos oli wantem givhan long olgeta ya we oli no strong blong oli no aot long kampani blong ol sipsip ya.—1 Timote 4:1.
?Olsem wanem ol man ya blong lukaot long ol sipsip oli save luksave taem wan sipsip i nidim help? Sam long ol saen we oli save luk, hemia fasin blong no kam long ol Kristin miting, no joen oltaem long wok blong prij, mo fasin blong no wantem joen wetem ol narafala. Oli save luk ol slak fasin tu taem oli skelemgud fasin blong ol sipsip mo long storeyan blong olgeta. Maet oli stap toktok agens long narafala, maet oli soem ol filing blong kros. Maet oli stap storeyan plante long ol samting we oli stap ronem long saed blong bodi bitim ol mak long saed blong speret. Oli no moa haremgud long laef, oli stap tingting long nogud saed blong ol samting, mo oli lusum glad, samting ya i save minim se bilif blong olgeta i kam slak. Sipos fes blong olgeta i soem se tingting blong olgeta i foldaon maet hem i wan saen se ol famle no ol fren long wol oli agensem olgeta. Taem man blong lukaot sipsip i luksave ol saen ya, nao hem i save tingbaot wanem kaen help man olsem i nidim.
Taem ol Kristin man blong lukaot sipsip oli mekem visit blong givhan long wan narafala man blong bilif, oli mas tingbaot stampa tingting biaen long visit olsem. Hem i no wan visit blong storeyan long ol samting olbaot. Mak we aposol Pol i wantem kasem taem hem i visitim ol brata blong hem, i blong ‘givhan long olgeta blong oli kasem paoa ya we Tabu Speret i stap givim blong mekem olgeta oli strong. Mo bakegen, hem i wantem joen wetem olgeta blong bambae bilif blong olgeta i save givhan long bilif blong hem, olsem we bilif blong hem i save givhan long bilif blong olgeta.’ (Rom 1:11, 12) Blong karem frut long wok ya, oli mas mekem rere fastaem.
Faswan samting blong mekem, luklukgud man ya, mo traem luksave olsem wanem long laef blong hem long saed blong speret. Taem yu faenemaot samting ya, tingting long samting we bambae i moa gud long hem, blong lidim hem, leftemap tingting blong hem, mo givim advaes long hem. Impoten samting blong yusum hemia Tok blong God, Baebol, from we hem i “stap wok.” (Hibrus 4:12) Jekem ol Wajtaoa mo Wekap! magasin blong faenem ol haf we oli stret long ol nid blong ol sipsip we oli kasem sam kaen problem. Yu save faenem ol gudfala ekspiryens long Yearbook of Jehovah’s Witnesses we oli save leftemap tingting. Mak we yu wantem kasem se givim ol samting long saed blong speret we bambae i “gud long olgeta, blong mekem olgeta oli strong moa long fasin blong bilif.”—Rom 15:2.
Mekem Wok Blong Lukaot Long Sipsip We i Leftemap Tingting
Wan man blong lukaot prapa sipsip i save se ol sipsip ya oli dipen long hem blong hem i lukaot long olgeta mo kea long olgeta. Oltaem laef blong sipsip i stap long denja sipos oli lus, oli sik, oli no strong, oli karem kil long bodi, no from ol wael anamol. Long sem fasin ol man blong lukaot sipsip long saed blong speret oli mas luksave mo mekem wan samting long saed blong ol denja olsem we oli save spolem laef blong ol sipsip. I gat sam eksampel blong ol problem we oltaem oli kamaot mo sam advaes long saed blong speret we yu save yusum blong leftemap tingting blong ol narafala we oli gat ol problem olsem.
(1) Olsem sipsip we i no lukaotgud, sam Kristin oli no moa wokbaot wetem ol sipsip blong God from we ol naesfala samting blong pulum ae oli pulum olgeta. Maet samting i pulum tingting blong olgeta mo sloslou oli stap goaot from we oli stap ronem ol samting long saed blong bodi, spel, no pleplei. (Hibrus 2:1) Ol man olsem, yu mas talem long olgeta bakegen se, taem blong yumi hem i impoten tumas, yumi mas stap kolosap long ogenaesesen blong Jeova, mo i impoten blong tingbaot ol intres blong Kingdom long fas ples long laef. (Matyu 6:25-33; Luk 21:34-36; 1 Timote 6:8-10) Gudfala advaes i stap long Wajtaoa (Engglis) Mei 15, 1984, pej 8-11, insaed long haf ya “Keep Your Balance—How?” (?Olsem Wanem Blong Skelemgud Yu Wan?)
(2) Wan man blong lukaot long ol sipsip i lukaotgud long ol sipsip we oli sik. Sem mak, man blong lukaot sipsip long saed blong speret i mas givhan long ol Kristin we oli sik long saed blong speret from we oli kasem sam trabol long laef blong olgeta. (Jemes 5:14, 15) Maet oli no gat wok, maet oli sik bigwan long saed blong bodi, no maet oli kasem ol hadtaem long famle laef blong olgeta. Ol man olsem maet oli no hanggri tumas from ol kakae long saed blong speret mo oli no moa laekem tumas blong joen wetem ol man blong God. Samting ya i mekem se oli wantem stap olgeta nomo mo tingting blong olgeta i foldaon. Oli nidim blong save se Jeova i kea long olgeta mo bambae hem i givhan long olgeta long ol hadtaem ya. (Ol Sam 55:22; Matyu 18:12-14; 2 Korin 4:16-18; 1 Pita 1:6, 7; 5:6, 7) Maet i gud tu blong lukluk bakegen haf ya “Look Straight Ahead as a Christian,” (Lukluk i Go Fored Olsem Wan Kristin) hem i stap long Wajtaoa (Engglis) Jun 1, 1980, pej 12-15 (09/01/80 long Franis).
(3) Man blong lukaot sipsip i mas luksave ol sipsip ya we oli kam slak. Sam oli bin holemstrong longtaem long wok blong Jeova long plante yia finis. Oli bin traehad mo winim plante tes mo traem. Naoia oli soem se oli stap kam slak long ol gudfala wok mo maet oli soem se tingting blong olgeta i hafhaf long nid ya blong wok strong long wok blong prij. I impoten blong mekem tingting blong olgeta i kam strong bakegen, mekem se oli luksave ol glad mo blesing we i kamaot long wok we oli mekem long God wetem fulhat blong olgeta, olsem Jisas Kraes i mekem. (Galesia 6:9, 10; Hibrus 12:1-3) Maet yu save givhan long olgeta blong oli save se Jeova i luksave wok blong olgeta mo i save givim paoa long olgeta blong oli wok long fyuja blong presem hem. (Aesea 40:29, 30; Hibrus 6:10-12) I gud blong tokbaot ol tingting long haf ya “Do Not Give Up in Doing What is Fine,” (Yu No Mas Lego Ol Gudfala Wok We Yu Stap Mekem) we i stap long Wajtaoa (Engglis no Franis) Julae 15, 1988, pej 9-14.
(4) Olsem ol sipsip we oli kasem kil, sam Kristin oli kasem kil from sam samting we oli ting se i no gudfala fasin. Be, sipos yumi gat fasin blong fogivim ol narafala, Papa blong yumi long heven bambae i fogivim yumi. (Kolosi 3:12-14; 1 Pita 4:8) Maet sam brata no sam sista oli kasem sam advaes no fasin stretem we oli ting se hem i no stret. Be, yumi evriwan yumi save kasem sam gudfala samting long advaes mo fasin stretem long saed blong speret, mo yumi haremgud blong save se Jeova i stap stretem olgeta ya we hem i laekem. (Hibrus 12:4-11) Sam narafala oli letem fasin kros i seraotem olgeta long kongregesen, from we oli no kasem ol gudfala wok insaed long kongregesen we oli ting se oli naf blong mekem. Be sipos yumi no stap kolosap long ogenaesesen blong Jeova, i no gat narafala ples blong yumi save go long hem blong kasem sef mo trufala glad. (Lukluk Jon 6:66-69.) Yu save faenem ol gudfala advaes long ol samting ya, long haf ya “Maintaining Our Christian Oneness,” (Holemtaet Kristin Yuniti Blong Yumi) we i stap long Wajtaoa (Engglis no Franis) blong Ogis 15, 1988, pej 28-30.
(5) Ol sipsip oli mas stap sefgud from ol narafala anamol. Long sem fasin, ol famle we oli no bilif no ol fren long wok maet oli agensem mo daonem sam Kristin. Maet fasin blong olgeta blong holemstrong bilif i save kam slak, taem ol trabol long laef oli fosem olgeta blong oli kam slak long wok we oli mekem long God no oli stop blong joen long Kristin minista wok. Be, oli save kam strong sipos yu givhan long olgeta blong oli luksave se, i save gat ol enemi mo samting ya i rili wan long ol pruf se yumi ol trufala disaepol blong Jisas Kraes. (Matyu 5:11, 12; 10:32-39; 24:9; 2 Timote 3:12) I gud blong soemaot se sipos oli holemstrong, bambae Jeova i neva livim olgeta mo bambae i givim pei long olgeta from fasin ya we oli stap stanap strong longtaem. (2 Korin 4:7-9; Jemes 1:2-4, 12; 1 Pita 5:8-10) Haf ya we taetel blong hem se “Enduring Joyfully Despite Persecution” (Glad blong Stanap Strong Longtaem Nating Se i Gat Trabol) insaed long Wajtaoa (Engglis) blong Epril 15, 1982, pej 21-27 (07/15/82 long Franis), i givim sam moa tok blong leftemap tingting.
Ol Man Blong Lukaot Sipsip—Mekemgud Wok Blong Yufala
I gat plante nid blong ol sipsip blong God, mo wok ya blong lukaotgud long olgeta hem i strong. Taswe ol Kristin man blong lukaot long ol sipsip oli mas kaengud, rili tingbaot, mo intres blong givhan. Longfala tingting mo fasin luksave oli impoten. Sam man oli nidim advaes mo fasin stretem, be sam narafala oli save haremgud moa from tok blong leftemap tingting. Samtaem i nidim blong mekem visit nomo long sam, be long sam narafala maet oli nidim blong mekem wan Baebol stadi wetem olgeta. Long evri rod ya, impoten mak blong kasem i blong givhan long olgeta blong oli kasem paoa blong speret ya we i save mekem olgeta oli strong no givim ol advaes we i kaen blong bambae i pusum olgeta blong oli gat gudfala fasin blong stadi, blong oli kam no gohed blong stap kam long ol kongregesen miting oltaem, mo haremgud blong joen long Kristin minista wok. Hemia ol nambawan rod blong givhan long ol narafala man blong bilif mo givhan long olgeta blong oli openem rod blong tabu speret blong Jeova i save wok long olgeta.
Ol man blong lukaot long ol sipsip we oli stap givim help olsem, oli stap mekem wan wok we i impoten moa bitim ol narafala wok long saed blong ol sipsip blong God. (Lukluk Wajtaoa [Engglis no Franis] blong Novemba 15, 1985, pej 23-27.) Wanem we ol man blong lukaot long ol sipsip long saed blong speret oli mekem, ol sipsip ya oli gat fasin tangkyu tumas from. Afta we wan hed blong famle i kasem help olsem, hem i talem se: ‘Afta we mifala i stap long trutok long 22 yia, tingting blong kasem plante samting long saed blong bodi i pulum mifala i go long wol. Plante taem mifala i wantem go long ol miting be i luk olsem se mifala i no save go. Mifala i no rili stret blong stap insaed long ol fasin blong Setan, nao mifala i aot olgeta, mifala i stap mifala nomo. Samting ya i mekem se mifala i les mo tingting blong mifala i foldaon. Mifala i nidim tok blong leftemap tingting. Taem wan elda i kam visitim mifala, mifala i glad blong akseptem Baebol stadi long famle blong mifala. Naoia mifala i stap insaed bakegen long ogenaesesen blong Jeova we i sefgud. !Mi no save olsem wanem blong soemaot glad ya blong mi!’
I gat bigfala glad i kamaot taem ol brata mo ol sista blong yumi we oli aot no tingting blong olgeta i foldaon oli kam strong mo wok bakegen long saed blong speret. (Luk 15:4-7) Stampa tingting blong Jeova long ol man blong hem i kamtru taem oli joen “olsem wan kampani blong sipsip insaed long fenis.” (Maeka 2:12) Long ples ya we i sefgud, oli ‘faenem we tingting blong olgeta i spel’ wetem help blong Gudfala man blong lukaot sipsip, Jisas Kraes. (Matyu 11:28-30) Ol sipsip long fulwol we oli stap joengud oli kasem tok blong lidim olgeta, tingting we i spel, oli stap sefgud mo oli kasem plante kakae long saed blong speret.
Tede, tru long wok ya blong lukaot long sipsip, Jeova i stap mekem wan gudfala wok we i laenap wetem promes ya blong hem bifo se: “Bambae mi mi lukaotem ol sipsip blong mi mo bambae mi keagud long olgeta . . . Bambae mi mi tekemaot olgeta long ples ya we oli lus long hem. Bambae mi mi fidim olgeta long ol gudfala gras . . . Bambae mi lukaotem hemia we i lus. . . . Mo hemia we i brekem wan bun blong hem, bambae mi fasem hem gud long kaliko. Mo hemia we i sik, bambae mi mi mekem hem i strong.” (Esikel 34:11-16) !Yumi haremgud blong save se Jeova hem i Man ya we i stap lukaot long yumi olsem man blong lukaot long sipsip!—Ol Sam 23:1-4.
From ol samting we God i givim blong mekem wok blong lukaot long ol sipsip blong God, olsem ol man blong Jeova yumi gat sem filing olsem Deved, we hem i se: “Hae God. Taem mi mi ledaon, tingting blong mi i kwaet, nao mi mi slip, from we yu nomo yu stap lukaotgud long mi, nao mi mi sef.” (Ol Sam 4:8) Yes, ol man blong Jeova oli harem se oli sefgud long kaen fasin we hem i kea long olgeta mo oli gat fasin tangkyu from we ol Kristin elda oli stap lukaot long ol smol sipsip long fasin we i kaengud.
[Foto Credit Line blong pija long pej 20]
Potter’s Complete Bible Encyclopedia