Wan Kwestin

From we Baebol i talem long yumi se: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf.” Olsem wanem, i stret long wan Kristin i serem bisnes wetem man we i no Kristin?

Yumi faenem advaes ya long 2 Korin 6:​14-16 se: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf. Fasin ya i no save stanap. ?Olsem wanem stret fasin mo rabis fasin, tufala i save mekem fren? ?Olsem wanem delaet mo tudak, tufala i save stap wanples? ?Olsem wanem Kraes mo Setan, tufala i save agri? ?Olsem wanem man we i bilif mo man we i no bilif, tufala i save joen long wan tingting? ?Olsem wanem haos blong God i gat ples blong ol narafala god oli save stap insaed?”

I no gat wan risen blong bilif se aposol Pol i givim advaes ya wetem plan blong stanemap sam stret rul, olsem blong agensem fasin ya we wan Kristin i serem bisnes wetem man we i no Kristin. Be, advaes blong hem i stret long samting ya, mo ol narafala samting long laef tu.

Pol i raetem advaes ya i go long ol Kristin brata blong hem Korin bifo. From we oli stap long wan taon we i fulap long kruked fasin, evri dei oli mas traehad blong blokem ol denja we i save spolem olgeta long saed blong gudfala fasin mo long saed blong speret. Sipos oli no lukaotgud, sloslou paoa blong rabis samting we oli luk i save spolem disisen blong olgeta blong stap olsem wan grup blong man we i defren, ‘God i bin jusumaot olgeta blong bambae oli laen blong hem. Oli olsem ol pris blong king. Oli olsem ol man blong wan ples nomo, we oli tabu man blong God.’​—1 Pita 2:9.

Bifo we Pol i raetem ol tok ya long 2 Korin 6:​14-16, hem i bin stretem wan bigfala problem long medel blong ol brata blong hem long Korin. Oli bin letem man we i joen fulwan long fasin blong slip olbaot i stap long medel blong olgeta, ale Pol i talem long olgeta blong putumaot man ya blong mekem sin we i no tanem tingting blong hem from sin blong hem. (1 Korin 5:1) Fasin nogud blong man ya i soem se rabis fren no fasin blong joen long ol tingting blong wol i save pulum ol Kristin.

Ol Kristin long Korin oli mas stap longwe long man ya we kongregesen i putumaot, ?be samting ya i min se oli no mas joen nating wetem ol man we oli no Kristin? ?Oli no mas toktok nating no joen long eni bisnes wetem ol man ya we oli no Kristin, olsem wan skul we ol memba blong hem oli no save joen wetem ol narafala man, olsem ol man Jyu we oli go stap olgeta nomo long Kumran kolosap long Ded Si? Yumi letem Pol i ansa: “Long leta ya we mi raetem finis long yufala, mi talem long yufala se, yufala i mas no go joen wetem ol man we oli stap mekem ol fasin nogud wetem woman. Be mi mi no min se yufala i mas no go joen wetem ol man we oli no Kristin . . . Sipos yufala i wantem we yufala i no go joen wetem olgeta ya samtaem, bambae yufala i mas livim wol ya olgeta.”​—1 Korin 5:​9, 10.

Mining blong ol tok ya i stret nomo. Pol i luksave se ol Kristin oli stap yet long wol ya, oli stap long medel blong ol man mo kolosap evri dei oli toktok wetem olgeta we oli no Kristin we fasin blong olgeta i no gudwan tumas mo ol rul we oli stap folem long laef oli defren. From we ol Kristin oli no save ronwe nating long ol samting ya, oli mas lukaotgud long denja we i save kamaot from fasin blong stap wanples wetem ol man we oli no Kristin.

Naoia i gud yumi lukluk bakegen long seken leta blong Pol long ol man Korin. Hem i soemaot se ol tabu Kristin oli stret blong kam olsem ol man blong wok blong God, ol ambasada we oli mekem wok olsem Kraes. Hem i talem long olgeta blong oli lukaotgud long eni samting blong mekem man i foldaon we i save spolem minista wok blong olgeta. (2 Korin 4:​1 kasem 6:3) Pol i talem stret long ol brata blong hem long Korin, we oli olsem ol pikinini blong hem long saed blong speret, se oli mas go moa blong soem lav long ol man. (2 Korin 6:13) Afta long samting ya hem i talem se: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf.” Hem i yusum plante strong pijatok blong makem poen ya.

Ol vas raonabaot i soem se Pol i no stap tokbaot stret samting long laef, olsem bisnes no fasin blong wok, mo i no putumap wan stret rul blong blokem samting ya. No gat. Be, hem i givim ol nambawan, isi advaes we oli save givhan long ol brata we hem i laekem olgeta tumas.

Eksampel, ?wan Kristin we i intres long mared i save folem advaes ya? Yes hem i save folem. Long fas leta blong aposol Pol, hem i givim advaes long ol man Korin blong mared long wan we “i mas wan man blong Masta blong yumi.” (1 Korin 7:39) Hem i makem waes fasin blong ol tok ya long leta we hem i raetem biaen, olsem i stap long 2 Korin 6:​14-18. Sipos wan Kristin man no woman i gat tingting blong mared long wan we hem i no wan man blong Jeova mo i no wan disaepol blong Kraes, yumi save tingbaot hem olsem wan man no woman we i joen wetem wan man no woman we i no Kristin. (Ridim Levitikas 19:19; Dutronome 22:10.) I klia nomo, fasin we man mo woman tufala i no gat sem tingting long mared i save mekem problem i kamaot, long saed blong speret tu. Eksampel, maet naoia no long fyuja man ya we i no Kristin i save gohed blong mekem wosip long wan gyaman god. Pol i askem se: “?Olsem wanem Kraes mo Setan, tufala i save agri?”

Be, ?olsem long ol narafala samting long laef​—serem bisnes wetem man we i no Kristin? Maet long sam fasin wan Kristin i save harem se hem i mas serem bisnes wetem wan man we i no Kristin, blong hem i save kasem mane blong lukaot long famle blong hem. (1 Timote 5:8) Tingbaot ol eksampel ya:

Maet wan Kristin i wantem statem wan bisnes blong salem wan kaen samting we i kam long defren ples, be wan rod nomo se hem i mas serem bisnes wetem wan man we i gat ol samting no mane we hem i nidim. Wan narafala Kristin i wantem mekem plantesin (no i wantem fidim wan kaen anamol); be hem i no gat graon blong mekem samting ya, ale hem i save joen blong mekem samting ya wetem wan man we i wantem givim wan pis graon long hem blong rentem mo man blong graon ya i save kasem sam profit from bisnes ya. Ating wan Kristin i no save mekem bisnes blong fiksimap ol haos from we gavman i givimaot smol namba blong laesens nomo, mo ol man oli tekem finis; rod ya nomo blong folem i blong joen wetem wan famle blong hem we i no Kristin we i gat laesens finis.​—Mak 12:17.

Hemia ol eksampel nomo. Yumi no stap traem blong blokem ol samting ya, no blong mekem wan toktok blong agri long hem no blong no agri long hem. Be wetem ol eksampel ya long tingting blong yu, ?yu luk from wanem i impoten blong no fogetem advaes we i stap long 2 Korin 6:​14-18?

Wan Kristin we i mekem bisnes wetem man we i no Kristin, nating se i wan famle no i no famle blong hem, maet hem i save fesem ol problem mo ol traem we hem i no tingbaot. Ating man ya i talem long Kristin ya se rod blong mekem moa profit i blong no raetem stret mane we oli kasem long bisnes no raetem daon pei blong ol wokboe nating sipos fasin ya i brekem ol rul blong gavman. Maet hem i glad blong pem doti mane long man we i karem ol samting ya we oli no stap long invoes. ?Bambae wan Kristin i save joen long fasin ya no wan narafala kruked fasin olsem? ?Mo wan Kristin man i save mekem wanem long taem ya we hem mo man ya we i no Kristin i mas saenem wan pepa blong takis no wan narafala pepa blong mekem gavman i save olsem wanem bisnes blong tufala i stap gohed?​—Eksodas 23:1; Rom 13:​1, 7.

No maet man ya we i no Kristin we yutufala i serem bisnes i wantem sanem sam samting blong mekem ol hiten holede, i sanem wan kad blong holede long nem blong kampani, flasem bisnes from ol holede blong skul. Pol i askem se: “?Olsem wanem haos blong God i gat ples blong ol narafala god oli save stap insaed? Be yumi ya, yumi olsem haos blong God ya we i laef we i no save ded.” Tok ya i stret nomo: Jeova i talem se, “Yufala i mas gowe long olgeta, yufala i mas stap yufala nomo, olgeta oli mas stap olgeta nomo. !Yufala i no save go joen long ol samting ya we oli no klin, nao bambae mi mi glad blong tekem yufala!” (2 Korin 6:​16, 17) Blong folem waes advaes ya, plante Kristin oli bin jusum sam kaen wok blong winim mane we i no save mekem tumas problem long olgeta.​—Hibrus 13:​5, 6, 18.

Kongregesen i no lukaot long bisnes ya blong wajem no blong faenemaot olgeta samting we ol Kristin oli stap mekem long wok blong olgeta blong winim mane, nating se oli ol man blong wok no ol bos blong bisnes. Yes, sipos kongregesen i save se wan Kristin i stap joen long fasin we i no stret, olsem fasin blong leftemap gyaman wosip no sam fasin blong gyaman no fasin blong stil, kongregesen i mas tekem wan aksin blong holemtaet ol rul blong Jeova.

Be, bigfala poen long advaes ya we tabu speret i pusum Pol blong raetem se, “Bambae yufala i no joen wetem ol hiten man blong mekem wok, we yufala i karem haf, olgeta oli karem haf,” i save givhan long ol Kristin blong stap longwe long ol problem mo fasin stretem blong ol elda. Ol Kristin we oli waes bambae oli folem advaes ya mo oli no save jusum wok we i gat ol traem we i save mekem se oli brekem ol rul blong Baebol. Sipos wan man i harem se hem i mas serem bisnes wetem man we i no Kristin, ol narafala oli no mas hareap blong jajem no toktok agens long hem, oli mas save se bambae hem i karem responsabiliti we hem i jusum. Rili, Pol i no putumap wan rul, wan strong rul agens long fasin blong serem bisnes wetem man we i no Kristin. Be, yumi no mas fogetem advaes blong hem. Advaes ya i kam long God mo i mekem oli raetem long Baebol blong givhan long yumi. Yumi waes blong folem advaes ya.