Ol Eksampel Blong Tingting Daon We Yumi Save Folem

‘Tingting daon nomo blong yu bambae i leftemap mi.’​—OL SAM 18:35.

1. ?Wanem pruf long fasin ya blong soem tingting daon yumi save luk long man ya we i bin presiden blong Watch Tower Society bifo?

JOSEPH F. RUTHERFORD i gat gudfala saes blong bodi, hem i longfala bitim 180 sentimita mo hem i gat moa long 90 kilo. Mo tu hem i gat wan voes we i gat paoa, mo hem i yusum voes ya i no blong talemaot nem blong Jeova nomo olsem we oli no bin talemaot bifo be tu hem i soemaot klia, fasin tu fes blong ol lida blong ol skul blong Krisendom, i kolem skul blong olgeta se “wan trap mo wan kruked bisnes.” Be nating se ol tok blong hem i gat paoa, taem hem i prea wetem Betel famle long hedkwota, voes blong hem i olsem wan smol boe we i stap toktok long papa blong hem, olsemia nao hem i soemaot pruf se hem i gat wan dip fasin fren wetem Man we i Wokem hem mo hem i gat tingting daon. Yes, hem i gat tingting daon olsem wan smol pikinini.​—Matyu 18:​3, 4.

2. ?Long wanem spesel fasin ol man blong Jeova oli defren olgeta long ol man blong wol?

² Tru ya, ol trufala man blong Jeova God oli gat tingting daon. Long saed ya, oli defren olgeta long ol man blong wol. Tede, bitim bifo, wol ya i fulap wetem ol man we oli gat fasin flas. Ol haeman mo ol strong man, ol rijman mo ol man we oli gat hae save, mo plante puaman tu mo olgeta we oli stap harem nogud long ol narafala samting oli gat fasin flas.

3. ?Yumi save talem wanem long saed blong ol frut blong fasin flas?

³ Fasin flas i mekem plante tumas faet mo fasin blong harem nogud i kamaot. Tru ya, olgeta trabol long heven mo long wol oli stat from wan enjel i kam flas, i wantem se ol man oli wosip long hem long sem fasin we oli mas wosip nomo long Man we i Wokem olgeta samting, Jeova God. (Matyu 4:​9, 10) Antap moa, enjel ya we i mekem hem wan i kam Devel Setan, i trikim faswan woman, Iv, taem hem i talem samting we i agri wetem fasin flas blong Iv. Setan i promes long hem se sipos hem i kakae frut blong tri ya we God i putum tabu long hem, bambae hem i kam olsem God, bambae hem i save samting we i gud mo samting we i nogud. Sipos Iv i bin gat tingting daon, hem i mas talem se, ‘?From wanem mi mas wantem blong kam olsem God?’ (Jenesis 3:​4, 5) !Taem yumi skelem ol hadtaem we olgeta man oli stap kasem, long saed blong bodi, tingting, mo fasin, ol man oli no gat wan risen nating blong flas from! !Yumi no sapraes blong ridim se Jeova i no laekem nating “fasin we man i leftemap hem wan mo fasin flas”! (Proveb 8:13) Samting we i defren olgeta long ol man we oli gat fasin flas, hemia eksampel blong ol man we oli gat tingting daon we yumi faenem long Tok blong God, Baebol.

Tingting Blong Jeova God i Stap Daon

4. ?Wanem ol vas blong Baebol we i soem se Jeova i gat tingting daon?

⁴ Jeova God​—we i Hae Olgeta, Hae Rula blong Heven mo Wol, King blong olwe—​tingting blong hem i stap daon. (Jenesis 14:22) ?I stret we hem i gat fasin ya? !Yes! Olsem King Deved i talem long buk blong Ol Sam 18:35 se: ‘Hae God, yu yu stap lukaotgud long mi, yu stap sevem mi. Tingting daon nomo blong yu bambae i leftemap mi, mo mi stap sef long paoa blong yu.’ I klia nomo, King Deved i presem tingting daon blong Jeova, samting ya nao i leftemap hem, Deved. Mo bakegen, yumi ridim long buk blong Ol Sam 113:6 se Jeova “i glad blong lukluk i kamdaon long skae mo graon.” Ol narafala translesen oli talem se, “bendaon blong luk,” (New International Version) “mekem tingting blong hem i daon blong i lukluk i kamdaon olgeta.”​—The New English Bible.

5. ?Wanem ol samting ya we oli bin hapen we i soem tingting daon blong Jeova?

⁵ Jeova God i mekem tingting blong hem i stap daon long fasin ya we hem i gat wetem Ebraham, i letem Ebraham blong askem kwestin long saed blong stret fasin blong Hem long tingting we hem i gat blong spolem tufala rabis taon ya Sodom mo Gomora.a (Jenesis 18:​23-32) Mo taem Jeova i talem se hem i wantem spolem nesen blong Isrel​—wan taem from fasin blong wosip long aedol, narafala taem from fasin rebol​—long tufala taem ya, Moses i toktok gud wetem Jeova olsem we hem i stap toktok wetem wan narafala man. Long tufala taem ya, Jeova i glad blong lesin. Hem i soem tingting daon taem Hem i agri blong mekem samting we Moses i askem long Hem long saed blong ol man blong Hem Isrel. (Eksodas 32:​9-14; Namba 14:​11-20) Yumi save luk ol narafala eksampel blong tingting daon we Jeova i soem long ol man wanwan, long fasin fren we hem i gat wetem Gideon mo Jona, olsem i stap long Jajes 6:​36-40 mo Jona 4:​9-11.

6. ?Wanem fasin blong Jeova i gohed blong soem tingting daon blong hem?

⁶ Tru ya, bitim naen taem we Baebol i tokbaot Jeova se hem i no “save kros kwik.”b Fasin blong Jeova blong gat longfala tingting, mo no save kros kwik long ol man ya we oli no stret gud olgeta long plante taosen yia we i pas finis, i givim moa pruf se tingting blong hem i stap daon. Ol flas man oli no gat longfala tingting, oli save kros kwik, i defren olgeta long fasin ya blong gat longfala tingting. !Tingting daon blong Jeova i mekem fasin flas blong ol man we oli no stret gud olgeta i kam olsem wan krangke samting nomo! Baebol i talem se yumi ‘mas folem fasin blong God from we yumi pikinini blong hem,’ taswe yumi mas gat tingting daon olsem we Jeova i gat tingting daon.​—Efesas 5:1.

Eksampel Blong Kraes Blong Holem Tingting Daon

7, 8. ?Baebol i talem wanem long saed blong tingting daon we Jisas Kraes i gat?

⁷ Namba tu bigfala eksampel long saed blong tingting daon we yumi save folem, hemia long 1 Pita 2:21 se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” Longtaem bifo we hem i kam long wol olsem wan man, profet tok i bin tokbaot hem long buk blong Sekaraea 9:9 se: “Singaot wetem glad, O dota blong Jerusalem. !Yufala i luk! King blong yufala, hem i stap kam long yufala. Hem i gat stret fasin, yes, i gat laef; tingting blong hem i stap daon, mo hem i stap ron long wan dongki.” Sipos Jisas i bin gat fasin flas, maet hem i akseptem samting we Devel Setan i wantem givim long hem, hemia olgeta kingdom blong wol ya sipos Jisas i mekem wan samting nomo blong wosip long hem. (Matyu 4:​9, 10) Mo tu hem i soem tingting daon taem hem i givim olgeta ona long Jeova from se ol tijing blong hem oli kam long Jeova nomo: “Long taem ya we bambae yufala i leftemap mi, mi Pikinini blong Man, blong mi hang antap, bambae yufala i save nao we mi ya, mi stap we mi stap. Mo bambae yufala i save we mi mi no mekem wan samting nating, mi wan. Mi mi stap talemaot ol samting ya nomo we Papa blong mi i tijim mi finis long hem.”​—Jon 8:28.

⁸ I stret nomo we hem i talem long ol man we oli stap lesin long hem se: “Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel.” (Matyu 11:29) !Mo hem i soem nambawan eksampel long tingting daon taem hem i wasem leg blong ol aposol blong hem long laswan sapa we hem i stap wetem olgeta olsem wan man! (Jon 13:​3-15) I stret nomo, we long Filipae 2:​3-8, aposol Pol i givim advaes long ol Kristin blong ‘mekem tingting blong olgeta i stap daon,’ mo hem i tokbaot Jisas Kraes olsem eksampel se: “Tingting blong yufala i mas kam stret gud wetem tingting we Kraes i gat. Nating se fastaem, bifo olgeta, hem i gat semkaen bodi olsem God, be hem i no tingbaot blong tekemaot paoa long God, olsem we hem i wantem kam sem mak wetem God, no gat. Hem nomo i lego ol samting blong laet ya, nao i kam olsem man blong wok nomo. Hem i bon long wol ya, i kam olsem man. Hem i karem fasin blong man, mo i mekem tingting blong hem i stap daon blong i obei long God, gogo i ded. Mo long ded blong hem, ol man oli nilim hem long pos.” (NW) Taem hem i fesem hadtaem we i bigwan olgeta long laef blong hem, hem i prea long Papa blong hem wetem tingting daon se: “Yu no mekem olsem we mi mi wantem, yu mekem olsem we yu nomo yu wantem.” (Matyu 26:39) Yes i tru tumas, blong yumi folem fasin blong Jisas Kraes, blong folemgud trak blong leg blong hem, yumi mas gat tingting daon.

Aposol Pol, Wan Nambawan Eksampel Blong Tingting Daon

9-12. ?Long ol wanem rod aposol Pol i soem wan nambawan eksampel blong tingting daon?

⁹ Aposol Pol i raetem se: “Mo yufala i mas folem fasin blong mi, olsem we mi mi stap folem fasin blong Kraes.” (1 Korin 11:1) ?Aposol Pol i folem fasin ya blong Kraes blong gat tingting daon, mo from samting ya, hem i givim wan narafala eksampel blong folem tingting daon? Yes hem i mekem. Faswan samting, hem i gat tingting daon blong luksave se hem i wan man blong wok blong Jisas Kraes. (Filipae 1:1) Pol i talemaot long ol elda blong Efesas ‘we hem i man blong wok blong Masta blong yumi, we tingting blong hem i stap daon. Mo oltaem wora blong ae blong hem i stap ron. Mo oltaem hem i gat hadtaem, from we ol man Isrel oli stap mekem plan blong spolem hem.’ (Ol Wok 20:​17-19) Sipos hem i no bin gat tingting daon, neva hem i save raetem ol tok ya we yumi faenem long Rom 7:​18, 19 se: “Mi mi save finis we fasin blong mekem ol gudgudfala samting, hem i no stap long tingting blong mi nating. . . . Oltaem mi no mekem ol gudgudfala fasin ya we mi wantem mekem, be mi stap mekem ol rabis fasin ya, we mi no wantem mekem.”

¹⁰ Tok we Pol i raetem long ol Kristin long Korin tu i soemaot tingting daon we hem i gat, olsem long 1 Korin 2:3 se: “Taem mi stap long yufala, mi no gat paoa nating. Oltaem mi stap fraet, mi stap seksek from.” Hem i gat tingting daon taem hem i tokbaot bakegen ol fasin blong hem, bifo we hem i kam wan Kristin, hem i raetem se: “Bifo, mi mi stap tok nogud long hem, mi stap ronem hem, mi stap mekem i nogud long hem. . . . Jisas Kraes i kam long wol ya blong sevem ol man nogud. . . . Mo mi mi nambawan long ol man nogud ya.”​—1 Timote 1:​13, 15.

¹¹ Hem i gohed blong soem tingting daon taem hem i talem se Jeova God nomo i stap mekem hem i win long ol wok we hem i traehad long hem. Long saed blong minista wok blong hem, hem i raetem se: “I olsem we mi mi brekem graon, nao Apolos i planem yam, be God nomo i stap mekem ol yam ya oli gru gud. Man we i brekem graon, mo man we i planem yam, tufala i olsem nating nomo. Stampa blong wok ya i stap long God nomo, from we hem i stap mekem yam i gru.” (1 Korin 3:​6, 7) Mo tu hem i askem ol brata blong hem blong prea from hem blong hem i save givim wan gudfala wetnes, olsem yumi ridim long Efesas 6:​18-20: ‘Oltaem nomo yufala i mas stap prea . . . from mi, blong bambae God i givim paoa long mi blong tok . . . blong mi save mekem tingting blong mi i strong, blong talemaot [tok haed blong gud nyus ya] olsem we i stret nomo blong mi mekem.’

¹² Mo tu Pol i soem tingting daon long rod ya we hem i wokgud wanples wetem ol narafala aposol: “Jemes, mo Pita, mo Jon . . . trifala i kam sekhan long mi mo Banabas, olsem we mitufala i wan mak wetem olgeta. Nao mifala evriwan i agri blong seraot ol wok, olsem we mitufala bambae i go prij long ol hiten man, mo olgeta bambae oli go prij long ol man Isrel.” (Galesia 2:9) Hem i gohed blong soem se hem i glad blong wok wanples wetem ol elda long kongregesen blong Jerusalem taem hem i joen wetem fo yangfala man blong go long tempel mo pem ol kaon blong olgeta taem oli mekem wan strong promes i kamtru.​—Ol Wok 21:​23-26.

13. ?Wanem i mekem tingting daon we Pol i gat i nambawan tumas?

¹³ Tingting daon blong Pol i nambawan moa taem yumi tingbaot olsem wanem Jeova God i yusum hem blong mekem ol bigbigfala wok. Eksampel, yumi ridim se “God i stap yusum Pol blong mekem ol merikel we oli narafala olgeta.” (Ol Wok 19:​11, 12) Antap long samting ya, God i soemaot long hem ol samting olsem drim mo ol narafala samting tu we Hem i soemaot long hem. (2 Korin 12:​1-7) Mo tu yumi no mas foget se tabu speret i bin pusum hem blong raetem 14 long ol 27 buk (rili ol leta) long Kristin Grik haf blong Baebol. Tingting blong hem i no go antap tumas from ol samting ya. Tingting blong hem i stap daon nomo.

Ol Eksampel Long Taem Blong Yumi

14-16. (a) ?Olsem wanem faswan presiden blong Watch Tower Society i soem wan nambawan eksampel blong tingting daon? (b) ?Eksampel blong hem i defren olgeta long eksampel blong hu?

¹⁴ Long Hibrus 13:​7, yumi ridim advaes blong aposol Pol se: “Bambae yufala i no fogetem ol man ya we bifo oli stap lidim yufala, we oli talemaot tok blong God long yufala. Yufala i mas stap tingbaot fasin blong olgeta, we laef blong olgeta i olsem wanem, mo olgeta oli ded olsem wanem. Nao yufala i mas biaen long olgeta, long fasin blong bilif blong olgeta.” Blong folem rul ya, yumi save tingbaot wan eksampel long taem blong yumi, hemia faswan presiden blong Watch Tower Bible and Tract Society, Charles Taze Russell, we yumi save folem bilif blong hem. ?Hem i wan man we tingting blong hem i stap daon? !Yes hem i gat tingting daon! Olsem plante man oli luksave finis, long ol prapa hanraet blong hem long saed blong Studies in the Scriptures, sikis volyum we i gat 3,000 pej, hem i no raetem wan tok nating long saed blong hem wan. Ol buk blong Watch Tower Bible and Tract Society tede, oli folem rul ya blong no talem nem blong ol man we oli bin raetem ol haf, blong pulum ol man blong lukluk i go long man nomo.

¹⁵ Wan taem long Watch Tower, Russell i talem se hem i no save nating long samting ya “Ruselism” mo “Ruselaet,” tufala nem we ol enemi blong hem oli yusum be hem i no agri nating long ol nem ya. Hem i raetem se: “Wok blong mifala . . . i blong tekem ol haf blong trutok we oli stap wanwan i kam wanples mo blong givim olgeta long ol man blong Masta​—i no olsem nyufala samting, i no olsem blong mifala nomo, be olsem i blong Masta. . . . Wok ya we Masta i glad blong yusum smol save blong mifala long hem, i no we hem i yusum mifala olsem stampa blong wok ya, be hem i yusum mifala blong stanemap bakegen, jenisim, mekem i laenap.” Tru ya, hem i talem bakegen ol tingting blong aposol Pol, olsem i stap long 1 Korin 3:​5-7.

¹⁶ Tingting blong hem i defren olgeta long tingting blong Charles Darwin. Long faswan namba blong magasin ya blong hem The Origin of Species long 1859, plante taem, Darwin i tokbaot tingting blong “mi,” hem i no wantem tokbaot nating ol samting we ol man bifo long hem oli bin talem long saed blong evolusen. Wan man blong raetem buk long taem ya, Samuel Butler, hem i tok strong blong agensem Darwin, i talem se plante narafala man bifo oli bin leftemap tingting ya long saed blong evolusen; Darwin i no stampa blong hem.

17. ?Wanem ol narafala eksampel long tingting daon we Brata Rutherford i soem?

¹⁷ Wan narafala man we i stap tru long God long taem blong yumi we Jeova God i yusum hem long ol bigbigfala wok, hemia Joseph F. Rutherford, we yumi tokbaot hem long stat. Hem i no fraet blong talemaot trutok blong Baebol mo antap moa nem blong Jeova. Nating se plante man raonabaot long wol oli kolem hem se Jaj Rutherford, hem i wan man we i gat fasin daon long hat blong hem. Eksampel, wan taem hem i talemaot stret sam tingting blong hem se bambae sam samting i kamtru long ol Kristin long yia 1925. Taem i no gat samting i kamtru olsem we hem i bin talem, wetem tingting daon, hem i talemaot long famle blong Bruklin Betel se samting ya we hem i bin mekem i no waes nating. Wan tabu Kristin we i bin kampani wetem hem oltaem i talem se plante taem bakegen, hem i harem we Brata Rutherford i stap talem sore from mastik blong hem, wetem tingting we i stap long Matyu 5:​23, 24, samtaem long pablik ples mo samtaem long ples haed, from we hem i bin mekem wan Kristin i harem nogud from sam toktok we hem i talem we i spolem hem. Wan man we i gat hae posisen i nidim tingting daon blong talem sore long ol man we oli stap aninit long hem. Brata Rutherford i soem wan nambawan eksampel long olgeta elda, nating se long wan kongregesen, long wok blong visitim ol kongregesen, no long wan long ol branj blong Sosaeti.

18. ?Wanem tok blong namba tri presiden blong Sosaeti i soem tingting daon we hem i gat?

¹⁸ Namba tri presiden blong Watch Tower Bible and Tract Society, Nathan H. Knorr, i soem tu se nating we hem i wan bigfala man long medel blong ol man blong Jeova, hem i no harem se hem i antap long ol narafala from posisen blong hem. Nating se hem i nambawan long fasin blong mekemrere evri samting folem wan plan mo blong toktok long pablik, hem i gat bigfala respek long ol samting we ol narafala oli mekem. Taswe, wan taem hem i visitim wan memba blong Raeting Dipatmen long ofis blong hem mo i talem se: “Long ples ya nao oli stap mekem wok we i moa impoten mo i moa had bitim ol narafala wok. Hemia nao from wanem mi mekem smol nomo long wok ya.” Yes, wetem tingting daon hem i stap folem advaes ya long Filipae 2:​3, se ‘wetem tingting we i stap daon, wan man i mas stap luk ol narafala man olsem we oli gud moa long hem.’ Hem i luksave se nating we wok we hem i stap mekem olsem presiden blong Sosaeti i impoten, plante narafala wok tu oli impoten. Hem i nidim tingting daon blong gat filing olsem mo blong soemaot klia long toktok blong hem. Hem i wan narafala nambawan eksampel long evriwan blong folem, antap moa, olgeta we oli gat wan hae posisen blong lukaot long wan wok.

19, 20. (a) ?Namba fo presiden long Sosaeti i soem wanem eksampel long saed blong tingting daon? (b) ?Nekis haf bambae i givim wanem help long yumi blong soem tingting daon?

¹⁹ Namba fo presiden blong Sosaeti, Fred W. Franz, i wan nambawan eksampel tu blong soem tingting daon. Olsem vaes presiden blong Sosaeti blong 32 yia, hem i wok plante blong raetem ol magasin mo ol program blong asembli; be hem i neva leftemap hem wan from wok ya, hem i neva traem blong kasem nambawan ples. Maet yumi save talem wan eksampel blong bifo we i sem mak. Taem Joab i winim ol man Amon long Raba, hem i mekem sua se King Deved i kasem ona from faet ya we hem i winim.​—2 Samuel 12:​26-28.

²⁰ Tru ya, i gat plante nambawan eksampel, long taem bifo mo long taem blong yumi, we oli givim ol strong risen long yumi blong gat tingting daon. Be, i gat plante moa risen from wanem yumi mas gat tingting daon, mo long haf we i kam biaen, bambae yumi stadi moa long ol risen ya mo ol help we yumi save kasem blong gat tingting daon.

[Ol futnot]

?Yu Yu Tingbaot?

◻ ?Wanem ol frut we oli bin kamaot from fasin flas?

◻ ?Hu i bin soem eksampel long tingting daon we i nambawan olgeta?

◻ ?Wanem i soem long yumi hu nao i namba tu eksampel long fasin blong tingting daon?

◻ ?Pol i soem wanem gudfala eksampel long saed blong tingting daon?

◻ ?Wanem ol bigfala eksampel long saed blong tingting daon we yumi gat long taem blong yumi?

[Tok Blong Pija Long Pej 15]

Jisas i soem nambawan eksampel long tingting daon

[Tok Blong Pija Long Pej 16]

Pol i soem nambawan eksampel long tingting daon

[Tok Blong Pija Long Pej 17]

Brata Russell i no leftemap hem wan from ol samting we hem i raetem