‘Lukaot Jeova, Yufala We i Gat Tingting Daon’

“YUFALA i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova”.​—Sefanaea 2:3.

Profet Jeremaea i talem ol tok ya i go long “olgeta kwaet man long wol we tingting blong olgeta i stap daon,” mo hem i talem olgeta blong “lukaot tingting daon” blong mekem Jeova i save haedem olgeta “long dei blong kros blong Hem.” Samting ya i mekem i klia se tingting daon i wan samting we yumi nidim blong kasem laef. ?From wanem?

Lukaot Tingting Daon, ?From Wanem?

Tingting daon i minim se man i gat kwaet fasin, hem i no flas mo hem i no tinghae tumas long hem wan. Hem i joen kolosap long ol narafala fasin we i gud tumas, olsem fasin no flas mo kwaet fasin. Olsem ya nao, ol man we oli gat tingting daon oli letem narafala i tijim olgeta mo oli rere blong akseptem fasin stretem we i kamaot long Jeova, nating se i save mekem hem i harem nogud blong smoltaem.​—Ol Sam 25:9; Hibrus 12:​4-11.

Tingting daon i no dipen long edukesen no posisen blong wan man. Be, olgeta we oli gat bigfala save no oli stap win long bisnes blong wol oli save harem se oli naf blong mekem disisen blong olgeta wan nomo long evri samting, long saed blong wosip tu. Hem ya i save blokem olgeta blong letem narafala man blong tijim olgeta long wan samting no blong akseptem advaes mo mekem ol jenis we oli mas mekem long laef blong olgeta. Sam narafala we oli rij long ol samting blong wol oli foldaon long rong tingting ya se ol rij samting ya we oli gat oli save sevem olgeta. Taswe, oli harem se oli no nid blong kam rij long ol samting long saed blong speret we i kamaot long Tok blong God, Baebol.​—Matyu 4:4; 5:3; 1 Timote 6:17.

Tingbaot ol tija blong Loa, ol Farisi, mo ol jif pris long taem blong Jisas. Wan taem oli sanem ol soldia blong holem Jisas, be taem oli kambak oli no kam wetem hem, nao ol Farisi ya oli talem: “?Weswe? ?Hem i gyaman long yufala tu? ?Yufala i luk wan lida blong yumi we i bilif long hem finis? ?No wan Farisi? Ol man olbaot ya oli no save Loa blong Moses nating. Taswe God i kros finis long olgeta.” (Jon 7:45-49) Long narafala tok, long tingting blong olgeta ya nomo we oli man bus mo oli no skul oli save bilif long Jisas.

Nating se oli gat tingting olsem, sam Farisi oli kam long trutok, mo oli stanap long saed blong Jisas mo ol Kristin tu. Tu long olgeta ya hemia Nikodimas mo Gameliel. (Jon 7:​50-52; Ol Wok 5:​34-40) Afta long ded blong Jisas, “kampani blong ol man blong Jisas i stap kam bigwan moa long Jerusalem. Mo plante pris tu oli bilif long Jisas.” (Ol Wok 6:7) Tru ya, eksampel we i nambawan moa hemia eksampel blong aposol Pol. Gameliel i tijim hem mo hem i kam wan man blong leftemap skul blong ol man Jyu, we i gat hae save mo ol man oli respektem hem. Be, biaen taem Jisas Kraes i singaot hem, hem i obei wetem tingting daon.​—Ol Wok 22:3; 26:​4, 5; Galesia 1:​14-24; 1 Timote 1:​12-16.

Samting ya i soemaot se nomata wanem kaen laef yu stap long hem bifo no wanem tingting blong yu naoia long saed blong mesej blong Baebol, ol tok ya blong Sefanaea i stret yet. Sipos wan man we i wantem mekem God i glad long hem mo blong tok blong God i lidim hem, hem i mas gat tingting daon.

Olgeta We Oli “Lukaot Tingting Daon” Tede

Plante milyan man raon long wol oli stap lesin long gud nyus blong Kingdom. Ol Wetnes blong Jeova oli mekem bitim fo milyan Baebol stadi evri wik long haos blong ol man olsem. Ol man ya oli kam long ol defren kaen laef bifo mo samfala oli kamaot long rij famle, samfala long pua famle, mo oli kamaot long ol defren kaen grup blong man no kastom. Be, wan samting we evriwan i gat se oli gat fasin daon i naf blong akseptem mesej blong Baebol we wan man i serem wetem olgeta long prapa haos blong olgeta wanwan no narafala ples. Plante long olgeta oli gohed gud from we oli wantem traehad blong winim samting we i stanap long rod blong olgeta. Yes, tede, oli joen wetem “olgeta kwaet man blong wol we tingting blong olgeta i stap daon.”

Tekem eksampel blong Maria long Meksiko. Long saed blong loa long yunivesiti mo hem i gat plante mane from samting we i kasem long wan famle we i ded. From samting ya, hem i wokem ol tingting we oli akseptem enikaen fasin nomo long laef, nao samting ya i jenisim hem, olsem hem wan i talem, hem i kam wan man blong “agens man, mi spolem man, mi wantem bos long ol narafala, mo mi no bilif long God. Mi kasem tingting ya se mane i save winim enikaen trabol mo God i no impoten. Blong talem stret, mi mi filim se hem i no stap laef sam ples,” Maria i tingting bak. Hem i ademap, “long tingting blong mi skul i samting blong pleplei nomo mo wan samting we yu mekem from we ol narafala man oli ting se yu mas mekem.”

Biaen, Maria i luksave jenis we kasen blong hem i mekem afta we i kam wan Wetnes blong Jeova. “Hem i wan rabis man fastaem, mo naoia hem i wan kwaet man mo i gat stret fasin,” Maria i talemaot klia. “Ol famle oli talem se hem i wan man blong prij mo ridim Baebol, from risen ya hem i no moa dring no ronem woman. Samting ya i mekem se mi wantem hem blong kam ridim Baebol long mi from we long rod ya mi ting se bambae mi faenem pis mo kwaet tingting we mi wantem tumas.” Frut blong samting ya se Maria i akseptem wan Baebol stadi wetem tufala Wetnes we i mared.

Hem i gat plante samting blong winim, mo i hadwok tumas long hem blong akseptem ol tok blong Baebol se hem i mas stap daon ananit long man blong hem. Be hem i mekem ol bigfala jenis long laef blong hem mo tingting blong hem. Hem i talemaot: “Mi ting se stat long taem ya we ol brata oli kam insaed long haos blong mi mo karem wetem olgeta help blong Jeova, i gat fasin glad, pis, mo blesing blong God i stap long haos blong mi.” Tede, Maria i wan Wetnes blong Jeova we i baptaes finis.

Blong folem tru wosip, i gat wan narafala ples we tingting daon, no fasin blong no gat tingting daon, i impoten wok. Plante taem, waef insaed long wan famle i akseptem trutok mo i wantem blong mekem wok blong God, be hasban i no wantem. Ating i hadwok blong sam hasban blong akseptem tingting ya se i gat wan man moa​—Jeova God​—we naoia woman blong hem i mas obei long hem. (1 Korin 11:3) Wan woman long Jiuaua, Meksiko, i askem blong stadi Baebol, mo biaen hem mo seven pikinini blong hem oli kam long trutok. Fastaem hasban blong hem i agensem hem. ?From wanem? From we hem i no wantem we ol famle blong hem oli go prij long ol haos wanwan, mo seraotem ol buk long saed blong Baebol. I luk olsem hem i harem se hemia i daon tumas blong hem i mekem. Be, ol famle blong hem, oli stanap strong long disisen blong olgeta blong mekem wok blong God. Biaen hasban blong hem i stat blong luk se i gat gudfala frut taem man i akseptem ol rod blong God. Be 15 yia i pas bifo we hem i givim hem wan i go long Jeova.

Long Meksiko, i gat plante velej yet we oli stap olgeta nomo we ol man ples oli gat prapa lanwis blong Indian mo ol kastom blong olgeta. Mesej blong Baebol i stap kasem ol man ya mo i stap halpem olgeta blong kam gud long mak blong edukesen blong olgeta from we, sam oli lanem olsem wanem blong rid mo raet taem we oli stap lanem trutok. Be, nating se ol man oli skul smol no oli no gat plante samting blong laef, samting ya i no min se bambae oli glad blong lesin. Samtaem fasin blong tinghae tumas long kantri blong olgeta mo fasin blong holemstrong long kastom i save mekem i hadwok long sam blong akseptem trutok. Hem ya i soemaot tu from wanem long sam velej blong ol Indian, olgeta we oli akseptem trutok oli kasem trabol bakegen long ol narafala man blong velej. Taswe, i gat plante rod blong soem tingting daon.

Obei Wetem Tingting Daon

?Olsem wanem long yu wan? ?Yu yu obei long trutok blong Baebol? ?No i hadwok blong akseptem sam trutok blong Baebol? Ating yu mas luklukgud long yu wan blong faenemaot wanem i stap blokem yu. ?Yu yu no haremgud from we bighaf blong ol man we oli kam long trutok oli no haeman? ?Maet yu gat tingting we yu flas lelebet long yu wan? I gud blong tingtingbak long tok blong aposol Pol se: “Be God i jusumaot ol samting we ol man blong wol oli stap talem se oli krangke, blong mekem ol man we oli gat waes oli sem. Mo hem i jusumaot ol samting we ol man blong wol oli stap talem se oli no gat paoa, blong mekem ol man we oli gat paoa oli sem. Hem i jusumaot ol samting we ol man blong wol oli stap luk olgeta olsem we oli no gat nem, oli rabis nomo. Hem i jusumaot ol samting we oli no kamtru yet, blong tekemaot ol samting we ol man blong wol oli luk se oli stap finis, nao bambae ol samting ya oli no moa stap. Nao from fasin ya, i no gat wan man nating we bambae i save tok flas long fes blong God, from ol samting we hem i gat.”​—1 Korin 1:​27-29.

?Bambae yu no wantem wan sas samting from we yu faenem hem insaed long wan graonpot we i no sas nating? !Nogat i no olsem! Be, hemia nao rod ya we God i jusum blong givim long yumi, trutok blong Baebol we i save sevem laef blong yumi, olsem we aposol Pol i eksplenem: “Mifala i stap holem ol gudgudfala samting ya we God i givim, mifala i olsem ol graonpot nomo. Nao fasin ya i stap soemaot, we paoa ya we i bigfala tumas i blong God, i no blong mifala.” (2 Korin 4:7) Tingting daon mo gat fasin daon bambae i givhan long yumi blong luk samting we i sas i no “ol graon pot nomo,” no ol man we God i yusum blong karem ol samting ya i kam long yumi. Sipos yumi mekem olsem, maet bambae yumi tu i kam moa we yumi save “haed long dei blong kros blong Jeova” mo stap long medel blong olgeta ya we oli gat tingting daon we “bambae oli tekem wol ya.”​—Sefanaea 2:3; Matyu 5:5.