Kam Long Jeova Blong Hem i Lukot Long Yu
“Hae God, mi mi kam long yu blong yu lukaot long mi.”—OL SAM 31:1.
1. ?Olsem wanem Sam 31 i tokbaot tras we yumi save gat se Jeova i save givim sefples?
WAN voes blong singsing we i tokbaot wan man we, nating se hem i trabol tumas long tingting mo bodi, hem i letem hem wan long Jeova. Ol tok blong tabu singsing ya oli talem se, bilif i win. Long han blong Hemia we i gat Olgeta Paoa we i stap wet, man ya i faenem ples blong haed long ol man blong mekem nogud we oli stap ronem hem. Ol sam blong hem i gohed i se, “Hae God, mi mi kam long yu blong yu lukaot long mi. Plis yu no letem ol enemi blong mi oli winim mi. Yu yu God we fasin blong yu i stret. Mi mi prea long yu, plis yu sevem mi.”—Ol Sam 31:1.
2. (a) ?Yumi save putum tras blong yumi long Jeova olsem strong haos blong yumi we i stanap long wanem tufala pos? (b) ?Jeova i wanem kaen God?
2 !Man blong raetem ol sam i gat wan ples blong haed—we i nambawan! Hem i gat tu tingting long ol narafala samting, be trutok ya i stap se: Jeova i strong haos ya blong hem, i sefples blong hem. Fasin trastem blong hem i stanap long tufala stampa pos we hem i save sua long tufala. Faswan, bilif blong hem, we Jeova bambae i no mekem hem i sem, mo namba tu, stret fasin blong Jeova, we i min se neva bambae Hem i lego man blong Hem olgeta. Jeova i no wan God we i save mekem ol man blong hem we oli stap tru long hem oli sem; hem i no wan God blong brekem promes. Defren olgeta, hem i wan God blong trutok mo wan God blong givim pei long ol man we oli stap trastem hem oltaem. !Long en, man we i stap holem bilif bambae i kasem pei! !Bambae God i sevem hem!—Ol Sam 31:5, 6.
3. ?Olsem wanem man blong raetem ol sam i leftemap Jeova?
3 Taem man ya blong raetem ol sam i stap mekem myusek blong hem wetem ol nambawan tiun we i kamaot from voes we i harem nogud mo bilif we i trabol, hem i kasem paoa long tingting blong hem. Hem i leftemap Jeova from trufala lav blong hem. Hem i singsing se, “!Mi mi presem Hae God! Taem ol enemi blong mi oli ronem mi, oli faet long mi, hem i soemaot we oltaem hem i laekem mi tumas, from we hem i mekem ol gudgudfala fasin blong givhan long mi.”—Ol Sam 31:21.
Strongfala Kores Blong Ol Man Blong Talemaot Kingdom
4, 5. (a) ?Wanem strongfala kores we i stap presem Jeova tede, mo olsem wanem oli bin mekem samting ya long sevis yia we i pas? (Lukluk bokis long pej 12-15.) (b) ?Long wanem rod ol man we oli kam long Memoriol i soemaot se plante moa man oli rere blong kam joen long kores blong ol man blong talemaot Kingdom? (Lukluk tu long bokis.) (c) ?Wanem grup long kongregesen blong yu we oli rere blong joenem kores?
4 Tede, ol tok blong sam ya oli kamtru bakegen long wan narafala fasin. I no gat wan rabis man blong agens, wan disasta, no wan trabol long saed blong ekonomi, i save blokem ol singsing ya blong presem Jeova; tru ya, kaengud fasin blong Jeova i kam wan nambawan samting long ol man blong hem. Raonabaot long wol long laswan sevis yia we i pas, wan strongfala kores, wan namba blong 4,709,889 man long 231 kantri, oli singsing long mesej blong Kingdom blong God. Gavman blong Jeova long heven we Jisas Kraes i rulum i wan sefples we bambae i no save mekem tingting blong olgeta i foldaon. Las yia, ol man ya blong talemaot Kingdom long 73,070 kongregesen, oli spenem wan total blong 1,057,341,972 haoa long wok blong talemaot gud nyus. Frut blong samting ya se 296,004 man oli tekem baptaes long wora blong soem se oli givim laef blong olgeta fulwan long God. !Mo ol man we oli kam long Intenasnal Asembli Tijing blong God long Kiev, Yukren, long manis Ogis we i pas, oli harem gud tumas long nambawan taem ya! !Oli luk wan impoten samting long histri blong ol wetnes blong Jeova, we i soem wan grup blong ol trufala Kristin we i bigwan moa bitim bifo, oli tekem baptaes! Olsem profet tok ya long Aesea 54:2, 3, i talem, namba blong ol man blong God i stap gohed nomo blong gru.
5 Be yet, plante moa man we oli wantem stap aninit long Kingdom blong God oli stap wet blong joenem kores ya. Las yia, wan bigfala namba blong 11,865,765 man oli kam long Memoriol blong tingbaot ded blong Jisas. Yumi hop se, plante long olgeta ya bambae oli kam inaf blong singsing long singsing ya blong Kingdom long ol haos wanwan long sevis yia ya. !Hop ya i mekem se enemi blong trutok, Devel Setan, i kros tumas!—Revelesen 12:12, 17.
6, 7. Eksplenem olsem wanem wan man we i intres i winim trabol blong rabis speret wetem help blong Jeova.
6 Setan bambae i traem blong blokem ol narafala blong no joenem voes blong olgeta long strongfala kores ya. Eksampel, long Taelan, ol pablisa oli faenem moa man we rabis speret i stap mekem trabol long olgeta. Be, plante we oli gat stret fasin oli bin fri from help blong Jeova. Afta we wan man we i jes wantem save olsem wanem ol rabis speret oli wok i visitim wan kleva, hem i bin stap aninit long paoa blong ol rabis speret blong ten yia. Hem i traehad blong kam fri long paoa blong ol rabis speret wetem help blong wan lida blong skul, be hem i no luk wan trufala jenis. Wan fultaem kristin minista blong ol Wetnes blong Jeova i statem Baebol stadi wetem man ya mo i yusum Baebol blong tijim hem long wan rod nomo blong kam fri long paoa blong rabis speret—hem i kasem stret save blong trutok, i bilif long Jeova God, mo blong prea long hem wetem tingting daon.—1 Korin 2:5; Filipae 4:6, 7; 1 Timote 2:3, 4.
7 Long naet afta long storeyan ya, man ya i drim long papa blong hem we i ded finis, we i talem long hem se bambae hem i kasem trabol sipos hem i no moa joen long fasin ya blong wok wetem rabis speret. Famle blong hem i stat blong kasem trabol. Be man ya i no wantem tanraon blong gobak, hem i gohed blong lanem Baebol mo i stat blong kam long ol miting. Long taem blong wan long ol stadi ya, paenia ya i eksplenem se samtaem ol samting we oli yusum blong wok wetem rabis speret i givim jans long ol dimon blong mekem trabol long olgeta we oli wantem kam fri long paoa blong ol rabis speret. Man ya i tingbaot se hem i gat sam oel we hem i bin yusum olsem wan samting blong givim laki. Nao hem i luksave se hem i mas sakemaot. Stat long taem we hem i sakemaot samting ya, ol rabis speret oli no moa mekem trabol long hem bakegen. (Lukluk Efesas 6:13; Jemes 4:7, 8.) Hem mo waef blong hem tufala i stap gohed gud wetem stadi blong tufala mo tufala i stap go long ol miting blong kasem ol tijing blong Baebol.
8, 9. ?Wanem ol narafala problem we sam man blong talemaot Kingdom oli bin winim?
8 Ol narafala hadtaem oli save blokem saon blong gud nyus. From hadtaem long saed blong ekonomi long Gana, ol wokman oli bin lusum wok blong olgeta. Praes blong ol samting i go antap bigwan, we i mekem se blong kasem inaf samting blong laef i wan bigfala problem. ?Ol man blong Jeova oli mekem wanem? Oli no trastem olgeta nomo be oli trastem Jeova. Eksampel, wan dei wan man i livim wan envlop long ofis blong mekem welkam long ol man we oli kam blong visit long branj ofis. Insaed long envlop ya i gat 200 dola, (bitim VT 20,000) no pei blong tri manis we loa i agri long hem. Envlop ya i kam long wan man blong givim presem, we i no talem nem blong hem, be i gat tok i stap long envlop se: “Mi lusum wok blong mi, be Jeova i givim wan narafala wok long mi. Mi talem tangkyu tumas long hem mo long Pikinini blong hem, Jisas Kraes. Mi mi putum wan smol presen ya blong mi, blong givhan blong mekem gud nyus blong Kingdom i goaot moa bifo we en i kam.”—Lukluk 2 Korin 9:11.
9 Fasin blong kam long miting i givhan blong trenem olgeta we oli joen long strongfala kores blong presem Jeova. (Lukluk Ol Sam 22:22.) Olsem nao, long saot blong Honduras, i gat wan kongregesen we nem blong hem El Jodan. ?Wanem samting i spesel tumas long saed blong smol grup ya? Hemia fasin blong olgeta blong go oltaem long miting. Long ol 19 pablisa blong ples ya, 12 oli mas krosem wan bigfala reva evri wik blong go long ol miting. Hemia i no wan bigfala problem long drae taem, from we oli save wokbaot antap long ol ston blong krosem reva. Be, long taem blong ren, ol samting oli jenis. Wan taem wan wora we i smol nomo i kam wan bigfala reva we i ron strong mo i karemaot evri samting we i stap long rod blong hem. Blong winim problem ya, ol brata mo sista oli lan blong kam ol gudfala man blong swim. Bifo we oli krosem reva, oli putum ol klos blong olgeta blong miting i go insaed long wan tina (wan tin) mo oli kavremap tina ya wetem wan plastik. Hemia we i save swim moa strong bitim ol narafala i yusum tina ya olsem wan flota mo i lidim grup ya i go narasaed. !Taem oli kasem narasaed, oli mekem olgeta oli kam drae, oli jenis mo oli go kasem Haos Kingdom we oli glad mo oli klin gud!—Ol Sam 40:9.
Wan Sefples We Yumi Save Stap Long Hem
10. ?From wanem yumi save lukluk i go long Jeova long ol hadtaem?
10 Nating sipos rabis speret i mekem trabol long yu no wan narafala samting i mekem hadtaem long yu, Jeova i save stap olsem wan strong haos blong yu. Singaot long hem long prea. Hem i stap lesingud long ol man blong hem nating sipos oli harem nogud tumas from we oli no gat paoa nating. Man blong raetem ol sam i faenem se samting ya i tru mo hem i raetem se: “Yu harem mi, yu sevem mi naoia. Plis yu kam olsem wan strong sefples blong mi, yu kam olsem wan strong ples blong haed, we mi mi save sef long hem. Yu nao yu sefples blong mi, yu nomo yu strong ples blong mi blong haed. Plis yu go fastaem, yu lidim mi, olsem we yu yu bin promes. Plis yu no letem mi mi foldaon long trap ya we oli putumrere finis blong kasem mi. Yu yu ples blong haed blong mi we trabol i no save spolem mi.”—Ol Sam 31:2-4.
11. Eksplenem from wanem ples blong haed blong Jeova i no blong smoltaem nomo.
11 Jeova i no givim wan sefples we i blong smoltaem nomo be hem i givim wan ples blong haed long yumi we i no save kam nogud samtaem, we yumi save stap sefgud long hem. Oltaem nomo hem i stap lidim mo i stap soem rod long ol man blong hem. Paoa blong God bambae i mekem olgeta trik blong Setan mo ol man blong hem oli kam olsem nating nomo. (Efesas 6:10, 11) Taem yumi trastem Jeova wetem fulhat blong yumi, bambae hem i tekemaot yumi long ol trap blong Setan. (2 Pita 2:9) Long ol fo yia we oli pas, wok blong prij blong ol Wetnes blong Jeova i bin open long 35 kantri. Mo tu, long ol ples long wol we ol grup blong man, ekonomi, no fasin blong politik i blokem wok blong talemaot gud nyus, sam man we oli olsem sipsip oli bin muf i go long ol ples we i fri moa long olgeta blong kasem gud nyus. Japan i wan long ol ples we oli bin muf i go long hem.
12. ?Olsem wanem wan paenia long Japan i mekem Jeova olsem wan strong haos blong hem?
12 Long Japan i gat wan ples we ol wokman blong defren kantri oli save wok long hem, mo oli bin stanemap plante kongregesen we oli tok lanwis blong ol defren kantri. Ekspiryens blong wan brata long wan Japanis kongregesen i soemaot frut we i stap kamaot long ples ya we ol man blong hem oli kam long narafala kantri. Hem i wantem go givhan long ol man long ples we i gat bigfala nid. Nating se hem i stap mekem ten Baebol stadi finis long ples we hem i stap long hem, wan long ol fren blong hem i tok plei long hem se: “!Sipos yu go long ples we i gat bigfala nid, bambae yu mekem 20 Baebol stadi long ples we yu go long hem!” Hem i kasem wan ples blong go wok long hem mo hem i go long Hirosima. Be, afta fo manis, hem i jes gat wan Baebol stadi nomo. Wan dei hem i prij long wan man Brasil we i toktok Potugis nomo. From we brata ya i no save toktok gud wetem man ya, hem i pem wan buk long Potugis. Afta we hem i lanem sam isi fasin blong toktok, hem i visitim man ya bakegen. Taem brata ya i talem halo long man ya blong haos long Potugis, man ya blong haos i sapraes tumas mo, wetem wan bigfala smael, i openem doa mo i askem hem blong go insaed. Hem i statem wan Baebol stadi. !Smoltaem biaen brata ya i stap mekem wan total blong 22 stadi, 14 long Potugis, 6 long Spanis, mo 2 long Japanis!
Prij Wetem Strong Tingting
13. ?From wanem wan man i no save traem blong mekem yumi sem blong mekem wok blong Jeova?
13 Ol man blong Jeova oli strong blong singsing long singsing ya blong Kingdom wetem ful bilif se Jeova i wan sefples blong olgeta. (Ol Sam 31:14) Bambae oli no sem—bambae Jeova i no daonem olgeta, from we bambae hem i mekem tok blong hem i kamtru. (Ol Sam 31:17) Devel Setan mo dimon blong hem bambae oli sem. From we Jeova i givim oda long ol man blong hem blong talemaot mesej we i no gat sem long hem, oli no sem taem ol narafala man ol prij long saed blong olgeta. Hemia i no rod ya we Jeova, no Pikinini blong hem, tufala i askem ol man blong hem blong wosip long hem. Taem hat blong ol man i fulap long bilif mo fasin tangkyu from gudfala fasin mo kaengud fasin blong Jeova, gudfala hat blong olgeta nao i pusum olgeta blong talemaot. (Luk 6:45) Taswe, ol haoa we yumi spenem long wok blong prij evri manis, antap moa sipos ol haoa ya oli soemaot nambawan samting we yumi save mekem, i gud, i no mekem yumi sem. Jisas mo Papa blong hem tufala i gat fasin tangkyu fulwan long smol presen we wan wido i givim—Luk 21:1-4.
14. ?Yu save talem wanem long saed blong wok blong paenia? (Lukluk bokis.)
14 Long namba blong ol pablisa we i stap gru, fasin blong wosip wetem olgeta paoa, maen mo laef i joen wetem wok blong paenia—890,231 long medel namba las yia mo long yia we i jes pas namba ya i go antap long 1,000,000. Ekspiryens we i kam biaen i soemaot olsem wanem wan sista long Naejeria i kasem ol mak blong paenia. Hem i raetem se: “Kolosap long taem we bambae mi finis skul, mi go blong givhan blong kukum kakae blong olgeta we oli kam long paenia skul blong ol Wetnes blong Jeova. Mi mitim tufala sista long ples ya we tufala i olfala moa bitim bubu woman blong mi. Taem mi faenemaot se tufala i paenia we tufala i kam blong joen long skul ya, mi askem mi wan se, ‘Sipos tufala ya i save mekem wok blong paenia, ?from wanem mi no save mekem?’ Ale afta we mi finis skul, mi tu mi kam wan fultaem paenia.”
15. ?Long wanem rod, fasin ya blong tekem jans blong prij i save mekem se ol narafala oli luk long Jeova blong sevem olgeta?
15 I no evriwan i save mekem wok blong paenia, be evriwan i save prij. Long Beljiom, wan sista we i gat 82 yia i go long stoa blong pem mit. Hem i makemgud se waef blong man we i lukaot ples ya blong katem mit i wari from ol trabol blong politik we i jes pas i no longtaem. Ale sista ya i putum traket ya What Do Jehovah’s Witnesses Believe? long medel blong mane taem hem i pem ol samting blong hem. Taem sista ya i kambak bakegen long stoa ya, kwiktaem nomo, waef blong man ya we i lukaot long ples blong katem mi i askem se Baebol i talem wanem long saed blong namba tri bigfala faet blong wol. Sista ya i tekem buk ya True Peace and Security—How Can You Find It? i kam long woman ya. Sam dei biaen, taem olfala sista ya i kam insaed long stoa, woman blong man we i lukaot long ples ya blong katem mit i gat moa kwestin blong askem long hem. Sista ya i sore tumas long woman ya; sista ya i askem woman ya blong mekem Baebol stadi wetem hem, mo hem i akseptem. Naoia, waef blong man ya we i lukaot long ples blong katem mit i wantem tekem baptaes. ?Olsem wanem long man ya blong katem mit? Hem i ridim traket ya mo naoia hem i stap stadi long Baebol tu.
‘Wan Sas Samting Blong Gudfala Fasin’
16. ?Olsem wanem Jeova i bin putumap wan sas samting blong gudfala samting ya long ol man blong hem?
16 Long taem ya blong lasdei we laef i had tumas, Jeova i bin ‘soemaot we oltaem hem i laekem tumas’ ol man we oli stap luk long hem blong hem i sevem olgeta. Olsem wan papa we i gat lav mo i gat fasin keagud, Jeova i bin putumap wan sas samting blong gudfala fasin long ol pikinini blong hem long wol. Hem i bin givim fulap glad long olgeta long fes blong olgeta man, jes olsem man ya blong raetem ol sam i talem se: “Ol gudgudfala samting ya we yu yu stap holem blong givim long olgeta we oli ona long yu, ol samting ya oli gud tumas. Long fes blong olgeta man long wol, yu yu save givim ol samting ya long ol man we oli luk long yu blong yu sevem olgeta.”—Ol Sam 31:19, 21.
17-19. ?Long Gana, wanem gudfala frut i kamaot from wan olfala man we i mekem mared blong hem i folem loa?
17 From samting ya, ol man blong wol, wetem prapa ae blong olgeta, oli luk stret fasin blong olgeta we oli stap wosip long Jeova, mo oli sapraes tumas. Eksampel, long Gana wan olfala man we i gat 96 yia i go long ofis blong rejistarem mared mo i askem blong oli rejistarem mared blong hem we i no bin rejista blong 70 yia finis. Man blong ofis ya i sek mo i askem se: “?Yu sua se yu wantem mekem samting ya? ?Long yia we yu gat?”
18 Man ya i eksplenem se: “Mi wantem kam wan Wetnes blong Jeova mo joen long wok ya we i impoten tumas bifo long en blong wol—wok blong talemaot gud nyus blong Kingdom blong God. Wok ya i lidim man i go long laef we i no save finis. Ol Wetnes blong Jeova oli obei long ol loa blong kantri, olsem loa ya blong rejistarem mared. Taswe plis yu rejistarem mared blong mi.” Man ya blong ofis i sapraes tumas. Hem i rejistarem, mo olfala ya i goaot we i glad tumas from se naoia hem i gat wan mared we i folem loa.—Lukluk Rom 12:2.
19 Biaen long samting ya, man ya blong rejistarem mared i tingting dip long ol samting ya we hem i bin harem. “Ol Wetnes blong Jeova . . . wok ya we i impoten tumas . . . en blong wol . . . Kingdom blong God . . . laef we i no save finis.” Hem i stap traem faenemaot long tingting blong hem se olgeta samting ya oli minim wanem long laef blong wan olfala man we i gat 96 yia, man ya i mekem disisen blong lukaot ol Wetnes blong save moa long bisnes ya. Hem i akseptem wan Baebol stadi long haos blong hem mo hem i gru kwik long saed blong speret. Tede, man ya blong rejistarem mared i wan Wetnes we i baptaes finis. Olsem nao, taem yumi obei long Jeova, nating se long ol samting we ol narafala oli save tingbaot olsem smol bisnes nomo, i no gat tok blong talem gudfala samting we i save kamaot long yumi mo long olgeta we oli luk fasin blong yumi.—Lukluk 1 Pita 2:12.
20. ?Long Miami, olsem wanem stret fasin blong wan yangfala sista i mekem se hem i givim wan gudfala wetnes?
20 Ol olfala we oli bin letem trutok i pulum olgeta blong gat stret fasin oli bin soem wan gudfala eksampel long ol yangfala long wol ya we i no gat stret fasin. Long Miami, i gat wan yangfala sista olsem. Hem i kam long wan famle we i no impoten tumas we i gat ten pikinini mo oli pua. Papa blong olgeta, we i stap kasem mane nomo long gavman from hem i olfala, i wan haftaem paenia. Wan dei long skul, sista ya i faenem wan daemon ring, we kwiktaem nomo hem i karem i go long tija blong hem. Taem klas ya i hivap wanples long nekis dei, tija ya i talemaot long klas olsem wanem oli faenem ring ya mo blong givimbak long woman we i lusum. Nao hem i askem long yangfala sista ya blong stanap long fored blong fulwan klas mo eksplenem from wanem hem i givimbak ring ya, tija ya i save se maet ol narafala pikinini oli save jusum blong holem i stap. Sista ya i eksplenem se hem i wan Wetnes blong Jeova mo se God blong hem i no laekem fasin blong stil no enikaen fasin we oli no stret. Evriwan long skul i harem samting ya, hemia wan gudfala jans long yangfala sista blong yumi blong prij long ol tija mo long ol studen tu.
21. ?Taem ol yangfala oli trastem Jeova, olsem wanem fasin blong olgeta i givim ona long hem?
21 Long Beljiom wan tija i mekem wan gudfala toktok long klas long saed blong ol Wetnes blong Jeova. Hem i tokbaot fasin blong wan long ol studen, mo tu wan yangfala sista, mo i talem se: “Naoia mi gat wan narafala tingting long ol Wetnes blong Jeova. Fasin blong agens i bin mekem mi ting se oli ol man we mi no mas akseptem olgeta. Oli pruvum se oli folem olgeta samting, we i no agensem ol rul blong olgeta.” Evri yia ol tija oli givim wan praes long ol nambawan studen blong olgeta. Long medel blong ol narafala i gat wan praes blong stret fasin. Long tri yia, tija i givim ol praes blong trifala hae skul i go long ol pikinini blong ol Wetnes blong Jeova. Plante taem samting ya i hapen long olgeta we tingting blong olgeta i strong long Jeova.—Ol Sam 31:23.
22. ?Wanem nambawan en blong Sam 31, mo olsem wanem samting ya i givhan long yumi long taem we en blong wol ya blong Setan i stap kam kolosap?
22 Las tok ya blong Sam 31 i nambawan tumas: “Yufala evriwan ya we yufala i putum tingting blong yufala i stap long Hae God, yufala i mas strong. Tingting blong yufala i mas stap strong oltaem.” (Ol Sam 31:24) From samting ya, taem yumi stap kam kolosap long en blong rabis wol ya blong Setan, Jeova i no save lego yumi, hem bambae i kam kolosap long yumi mo i givim paoa blong hem long yumi. Jeova i tru oltaem mo hem i no save gyaman. Hem i sefples blong yumi; wan strong haos blong yumi.—Proveb 18:10.
?Yu Yu Tingbaot?
◻ ?From wanem yumi save trastem Jeova olsem sefples blong yumi?
◻ ?Wanem i pruvum se strongfala kores i singsing blong Kingdom wetem strong tingting?
◻ ?From wanem yumi save trastem se trap blong Setan i no save holem ol man blong Jeova?
◻ ?Wanem sas samting we Jeova i rere blong olgeta we oli luk long hem blong sevem olgeta?
[Ripot long pej 12-15]
1993 SERVICE YEAR REPORT OF JEHOVAH’S WITNESSES WORLDWIDE
(Lukluk niuspepa)
[Tok blong pija long pej 16]
!Olgeta we oli luk long Jeova blong sevem olgeta oli mekem wan strongfala kores blong ol man blong talemaot Kingdom—4,709,889 man!
1. Senegal
2. Brasil
3. Jili
4. Bolivia