Ol Yangfala We Oli ‘Trastem Jeova’
OLTAEM ol yangfala oli wanteem soem se oli naes, no ol olfala oli wantem soem se oli waes. (Lukluk Proveb 11:22; Eklesiastis 10:1.) Be, olgeta we oli gat fasin naes we i save stap longtaem mo trufala waes fasin oli ol man ya we oli trastem Jeova mo oli talem long hem wetem fulhat blong olgeta se: “Yu yu God blong mifala.”—Ol Sam 31:14; Proveb 9:10; 16:31.
Raonabaot long wol i gat wan bigfala hif blong ol naes man we namba blong olgeta i stap gru bigwan, tugeta ol yangfala mo ol olfala, we oli soem waes blong olgeta taem oli stap mekem wok blong God mo oli stap talemaot gud nyus blong Kingdom blong God. Eksampel, tingbaot Sabrina we i gat eit yia.
Sabrina i stap long Jemani mo hem i stap long klas tu. Hem i faswan long ol Wetnes blong Jeova blong stap long skul blong hem. Sore tumas, oltaem ol skul fren blong hem oli stap jikim hem gogo kasem taem ya we tija i askem ol studen blong tekem buk ya we oli laekem tumas i kam long klas. Sabrina i mekem disisen blong tekem buk ya My Book of Bible Stories i kam. Long naet bifo, nating se hem i fraet, be hem i rere gud. From we i gat 26 studen long klas blong hem, hem i save se maet hem i no gat tumas taem. Be hem i gat strong tingting blong no letem wan man i blokem toktok blong hem mo hem i sua se bambae Jeova i givhan long hem. Long stret dei ya we tija i talem, tija i askem se hu i tekem wan buk i kam mo i wantem soem buk ya fastaem. Wan samting blong sapraes, Sabrina nomo i karem wan buk i kam. Hem i stanap fored long klas mo i stat blong toktok, hem i stap ridim mo i soem ol pija long buk ya mo hem i stap eksplenem se evri samting ya oli stanap long Baebol. Blong finisim tok blong hem, hem i askem se: “?Hu i intres blong gat wan buk olsem?” Hem i givim wan kopi long tija, mo sam dei biaen, hem i givim ten buk bakegen long sam fren blong hem long klas ya. Long saed blong toktok blong Sabrina, tija ya i talem se: “Mi mi neva harem wan samting olsem hemia.” Hem i givim wan nambawan mak long Sabrina from wok blong hem.
Olsem nao, plante yangfala Wetnes oli ol hapi man blong talemaot gud nyus long skul. Wan narafala eksampel hemia Erika, wan pablisa long Meksiko we i gat 11 yia. Oli tijim hem blong laekem Jeova stat long taem we hem i wan pikinini nomo. Wok blong hem long skul i gud tumas. Wan long ol wok blong hem i blong rerem ol buk long saed blong AIDS, fasin blong yusum tabak mo alkol. Hem i reregud, hem i yusum Wekap! magasin, mo hem i kasem ol nambawan mak. Tija blong hem i askem se hem i kasem save ya weples. Erika i soemaot ol magasin ya we insaed i gat ol atikol we i tokbaot ol poen ya. Biaen, tija ya i yusum ol magasin blong tokbaot ol poen ya wetem fulwan klas. From fasin blong Erika, respek we hem i gat long ol tija blong hem, mo ol hae mak blong hem, i mekem se hem i kasem ol presen, leta we i soem se hem i naf blong mekem wan spesel wok, mo blong kasem mane we wan kampani i save givim long hem taem hem i stap skul yet. Nating se i olsem, hem i harem se samting we i bigwan moa we hem i mekem hemia se hem i soemaot hem wan olsem wan long ol Wetnes blong Jeova, hem i save seremaot ol buk we oli tokbaot Baebol, mo givim ona long nem blong Jeova.
Bakegen i gat Shannon, wan boe we i gat ten yia we hem i stap long Nyu Silan. Hem i gat wan ae nomo; kansa i spolem wan saed ae blong hem taem hem i wan smol pikinini. Taem Shannon i gat seven yia, mama blong hem i stat blong stadi Baebol wetem ol Wetnes blong Jeova. Be, i no longtaem afta we hem i stat blong stadi Baebol, hem i joen wetem wan man we tufala i no folem stret fasin blong mared mo hem i mekem disisen blong i no moa stadi. Shannon i askem blong gohed long Baebol stadi blong hem. Hem kasem samting we hem i askem. Ol Wetnes oli gohed blong visitim hem, mo biaen ol trifala memba blong famle oli stadi long Baebol mo ol gohed gud long saed blong speret. Afta we mama mo step-papa blong Shannon, tufala i mared long fasin we i folem loa, tufala i tekem baptaes.
Wan dei Shannon mo waef blong seket elda tufala i i go long wok blong prij tugeta. Wan man blong haos i askem Shannon se: “?Wanem i mekem ae blong yu?” Shannon i ansa se, “Kansa i kasem, mo oli mas tekemaot. Be i no longtaem long Paradaes bambae Jeova i givim wan nyufala ae long mi, mo hemia nao samting we mitufala i kam long ples ya blong tokbaot wetem yu.”