Ol Wetnes Blong Jeova Long Olgeta Ples Long Wol—Ripablik Blong Filipin
OL 7,083 aelan we oli mekemap Ripablik blong Filipin we oli gat plante ston long olgeta mo oli hot ples, oli haf blong ol laen blong hil we i stap antap, narafala haf i stap aninit long wora.a Mo ol 62,000,000 man we oli stap laef long Filipin oli laekem blong storeyan long eni samting. Fasin fren ya i mekem se wok blong talemaot Kingdom i karem plante frut.
Givim Wetnes Long Skul
Long aelan blong Masbate, wan yangfala we i stap long hae skul i gat jans blong wetnes long tija blong hem mo olgeta long klas long wan taem we oli stap askem ol kwestin we oli mas ansa tru no gyaman long olgeta. Hem i talem se:
“Poen we oli bin tokbaot se, ‘Sipos God i laekem mi, bambae hem i no givim ol trabol long mi no letem mi mi stap harem nogud.’ Taem tija blong mi i jekem ol pepa blong mifala, hem i faenem se olgeta oli ansa se i tru be mi nomo mi ansa se i gyaman. Tija i askem mi blong eksplenem long klas from wanem mi ansa se i gyaman. Mi talem se i no God ya we i givim ol trabol long yumi, be hem i letem ol trabol oli stap mo hem i letem yumi blong kasem ol traem. Mi yusum Baebol blong mi, we mi stap karem i go oltaem long skul, mi mekem olgeta long klas oli tingtinggud long tok we i stap long 1 Jon 4:8, ‘God i stampa blong fasin ya blong laekem tumas ol man.’ Afta we mi eksplenem finis, tija blong mi i agri, sloslou hem i kilkilim des blong hem, mo hem i talem se: ‘Marilou i talem stret.’ Mi wan nomo long klas we mi givim stret ansa blong kwestin ya mo mi kasem wan mak we i hae moa long ol narafala from.”
Mesej Blong Kingdom i Stap Long Olgeta Ples
Taem hem i stap prij long ol haos wanwan long wan narafala ples long Filipin, wan fultaem paenia (wan we i talemaot gud nyus fultaem) i mitim wan mama we i gat tri smol pikinini. Woman ya i soemaot trufala intres long mesej blong Kingdom, mo samting ya i bin mekem se i isi blong statem Baebol stadi wetem hem. Nating se hasban blong hem i no glad se hem i stap kasem ol lesen blong Baebol, antap moa long ol Wetnes blong Jeova, be stadi i gohed nomo.
Man ya i karem ol famle blong hem i go putum long wan narafala taon, wetem tingting se bambae samting ya i stopem waef blong hem blong no moa joen long ol Wetnes. Be, i no longtaem afta, ol Wetnes oli faenemaot weples woman ya i stap long hem mo hem i gohed blong stadi Baebol wetem olgeta. I tru, hasban blong hem i kros tumas. Hem i go long wok wetem kros blong hem. Long ples ya hem i putum kros blong hem long wan kastoma we hem i stap riperem trak blong hem. Man ya i no save, se , kastoma ya i wan long ol Wetnes blong Jeova.
Wetnes ya i eksplenem se bambae evriwan long famle oli haremgud sipos waef blong hem i gohed long ol Baebol lesen blong hem. Hem i save stat blong mekem ol rul blong Baebol oli wok long haos nomo. Hem i talem tu se hasban ya, hem wan i save haremgud sipos hem i kasem save long Kingdom blong God.
?Wanem frut i kamaot from storeyan ya? Waef blong man ya i fri moa blong stadi Baebol, mo hem i mekem disisen blong karem ol famle blong hem i gobak long ples we oli stap long hem bifo. Long ples ya woman ya i gohed gud long saed blong speret go kasem mak ya we hem i kam wan pablisa blong talemaot Kingdom, we i no baptaes yet. Hasban blong hem tu i agri blong stadi Baebol, mo evriwan long famle oli stat blong kam long ol Kristin miting.
[Futnot]
a Blong save moa, lukluk 1994 Calendar of Jehovah’s Witnesses.
[Bokis blong pija long pej 8]
LUKLUK LONG OL NAMBA BLONG KANTRI
Ya 1993 Sevis Yia
BIGFALA NAMBA BLONG OLGETA WE OLI STAP PRIJ: 116,576
SKELEM: 1 Wetnes blong 549
NAMBA BLONG OL MAN WE OLI KAM LONG MEMORIOL: 357,388
MEDEL NAMBA BLONG OL PAENIA: 22,705
MEDEL NAMBA BLONG OL BAEBOL STADI: 94,370
NAMBA BLONG OL MAN WE OLI TEKEM BAPTAES: 7,559
NAMBA BLONG OL KONGREGESEN: 3,332
BRANJ OFIS: Manila
[Tok blong pija long pej 9]
Wok blong prij long maket i karem plante gudfala frut
[Tok blong pija long pej 9]
Branj ofis blong Watchtower Society long Manila