Palemen Blong Ol Skul Blong Wol—?Bambae i Karem Frut?
PLANTE handred lida blong ol skul oli hivap long namba tu Palemen Blong ol Skul Long Wol we i tekem ples long Jikago, Ilinois, Yunaeted Stet, long hot taem blong 1993. I gat ol skul blong ol Budis, Krisendom, Hindu, Judaism, mo Islam we oli stap long miting ya. Ol kleva mo ol man we oli wosip long ol woman god tu oli stap long miting ya. Oli tokbaot wok blong olgeta blong finisim wo. Jeaman blong palemen ya i luksave se “tu aot long evri tri faet long wol tede oli joen wetem skul.”
Wan Handred Yia Bifo
?Palemen ya i karem frut? Traem tingbaot wanem i hapen long wan handred yia bifo long faswan Palemen Blong ol Skul Long Wol. Palemen ya tu i tekem ples long Jikago, long hot taem blong 1893, mo i gat moa long 40 skul we oli stap. Kaonsel blong Palemen ya Blong ol Skul Long Wol i agri se olgeta ya we oli kam long miting ya long 1893 “oli bin bilif se miting ya i faswan blong plante miting olsem we ol man blong defren skul oli joen wanples, we bambae i mekem fasin blong kasem save long narafala, pis mo fasin blong gohed gud i kam antap. Be i no olsem. Fasin blong ol skul blong no laeklaekem olgeta mo fasin raf blong olgeta i bin haf blong ol faet blong ol 100 yia we i pas, mo oli gohed yet kasem tede.” ?From wanem i no wokgud? From we God i no agri nating long fasin ya we ol man blong ol defren skul oli joen wanples. Baebol i talem long 2 Korin 6:14-17: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf.”
I stret nomo, long Septemba 1893, Zion’s Watch Tower i poenemaot se i no gat vas long Baebol blong sapotem Palemen Blong ol Skul Blong Wol taem hem i talem long fasin we i jikim lelebet, se: “Ol man oli bin digimaot long graon plante nambawan graonpot we oli wokem long sofmad nao oli kukum long faea, long ol ston we oli stap yet blong Babilon mo sam narafala bigfala taon blong bifo, be i gat sam we oli no faenem yet. . . . Oli no faenem nating sam we i tokbaot Moses mo Josua we oli mekem wan ‘Palemen Blong ol Skul,’ wetem ol man Moab, Amon, mo Edom . . . Oli no faenem nating sam we i tokbaot olfala Samuel we i strong i sanem toktok i go long Gat mo Ekron blong singaot sam pris blong Dagon blong kam long Silo mo holem wan miting wetem ol pris blong Jeova . . . Oli no faenem nating sam we i tokbaot Elaeja we i stap werem strap we oli wokem long skin blong buluk i mekem wan ‘miting’ wetem ol pris blong Bal mo Molek blong wan wik, we oli tokbaot ol tijing blong prapa skul blong olgeta wanwan, wetem tingting blong mekem olgeta oli soem moa respek long skul blong narafala.”
Kingdom Blong God Nomo i Givim Hop
Palemen Blong ol Skul Blong Wol bambae i no save karem frut. Ol nyuspepa mo ol man we oli go long miting ya oli yusum ol tok olsem “no gat oda nating,” “bigfala noes nomo,” mo “evri samting i fasfas” taem oli tokbaot palemen. Long wan ripot, polis tu i joen blong stretem tufala rao we oli kamaot from defren tingting long saed blong politik. Long wan pepa long 1952, palemen i raetem wan long ol plan blong hem se: “Blong putumap Palemen Blong ol Skul Long Wol blong stap oltaem, i blong wok wetem Yunaeted Nesen blong kasem pis long ful wol mo blong mekem fasin blong kasemsave long tingting blong narafala man i kamaot long medel blong ol man.” Long defren fasin, Jisas i talem se Kingdom blong hem i no haf blong wol ya. Baebol i poen i go long Kingdom blong God olsem rod ya nomo blong ansa long ol trabol blong ol olgeta man.—Daniel 2:44; Jon 18:36.