Ol Frut—⁠Gudwan Mo Rabis Wan

“Jeova i soemaot long mi, mo, !yu luk! tu basket we i gat ol frut blong figtri insaed . . . Long wan basket, ol frut blong figtri oli gud tumas, olsem ol fas frut blong figtri; be long narafala basket, ol frut blong figtri oli nogud olgeta, we man i no save kakae from oli nogud.”​—⁠JEREMAEA 24:​1, 2.

1. ?Olsem wanem Jeova i soem fasin sore long ol man blong hem, Isrel, be oli soem wanem fasin?

HEMIA long yia 617 B.K.T. Hemia ten yia nomo bifo we Jeova i mekem stret jajmen blong hem i kamaot long Jerusalem mo ol man blong hem. Jeremaea i bin gohed strong long wok blong prij long 30 yia finis. Makemgud ol klia tok blong Esra long saed blong ol samting ya we oli bin hapen, olsem yumi faenem long 2 Kronikel 36:​15, se: “Mo Jeova, we i God blong ol bubu blong olgeta, i stap sanem ol man blong karem tok blong hem agens long olgeta. Hem i sanem bakegen mo bakegen, from we hem i sore long ol man blong hem, mo long haos blong hem.” ?Mo wanem frut blong ol traehad ya? Sore tumas, Esra i gohed blong talem long vas 16 se: “Be olgeta oli gohed blong laf long ol man ya blong karem tok blong tru God, mo oli tingbaot ol tok blong hem olsem nating nomo, mo oli jikim ol profet blong hem, gogo bigfala kros blong Jeova i kam antap agens long ol man blong hem, mo i no moa gat rod blong i kamgud bakegen.”

2, 3. Tokbaot nambawan vison we Jeova i soem long Jeremaea.

² ?Samting ya i min se bambae nesen blong Juda i lus olgeta? Blong faenem ansa, i gud yumi luklukgud long wan impoten vison we God i givim long Jeremaea long taem ya, mo hem i raetemdaon long japta 24 blong buk we i karem nem blong hem. God i yusum tufala basket blong ol frut blong figtri long vison ya blong makem ol samting we oli stap hapen long medel blong ol man blong hem we hem i mekem kontrak wetem olgeta. Tu defren kaen frut blong figtri, gudwan mo rabis wan, tufala i pija blong ol samting ya.

Vison Blong Ol Gudfala Frut Blong Figtri

³ Jeremaea japta 24, vas 1 mo 2, i soemaot samting we profet blong God i luk: “Jeova i soemaot long mi, mo, !yu luk! tu basket we i gat ol frut blong figtri insaed oli stap fored long haos prea blong Jeova, afta we Nebukadnesa king blong Babilon i karem Jekonaea, pikinini blong Jeoakim, king blong Juda, mo ol prins blong Juda mo ol man we oli gat gudhan blong mekem wok mo ol man blong bildim stonwol, oli go kalabus, hem i tekemaot olgeta long Jerusalem oli go long Babilon. Long wan basket, ol frut blong figtri oli gud tumas, olsem ol fas frut blong figtri; mo long narafala basket, ol frut blong figtri oli nogud olgeta, we man i no save kakae from oli nogud.”

4. ?Insaed long vison blong ol frut blong figtri, ol man Isrel we oli stap tru long God, oli kasem wanem mesej blong givim hop?

⁴ Afta we Jeova i askem kwestin long Jeremaea long saed blong samting we hem i luk, Jeova i gohed blong talem long vas 5 kasem 7 se: “Olsem ol gudfala frut blong figtri ya, ale bambae mi luk ol man Juda we oli go kalabus, we bambae mi sanemaot olgeta long ples ya oli go long kantri blong ol man Koldia, long wan gudfala fasin. Mo bambae mi lukaot long olgeta long wan gudfala fasin, mo bambae mi mekem oli kambak long kantri ya. Mo bambae mi bildimap olgeta, mo bambae mi no brebrekem; mo bambae mi planem, mo bambae mi mo karemaot. Mo bambae mi givim wan hat long olgeta blong save mi, se mi mi Jeova; mo bambae oli kam man blong mi, mo mi wan bambae mi God blong olgeta, from we bambae oli kambak long mi wetem fulhat blong olgeta.”

5, 6. (a) ?Olsem wanem oli sanem sam man Isrel oli go long Koldia ‘long wan gudfala fasin’? (b) ?Olsem wanem Jeova i lukaot long ol man Isrel we oli stap tru long Hem ‘long wan gudfala fasin’ taem oli stap long kalabus?

⁵ Ale, long tok we Jeova i talem long ples ya, i luk olsem se ol gudfala taem oli stap long fored, se bambae nesen blong Juda i no save lus olgeta. ?Be wanem mining blong basket ya we insaed i gat ol gudfala frut blong figtri?

⁶ Jekonaea, no Jehoajin, i bin stap olsem king long Juda blong tri manis mo ten dei nomo taem hem i letem Jerusalem i go nomo long han blong King Nebukadnesa. Long medel blong olgeta we oli karem i go kalabus wetem hem, i gat Daniel mo trifala Hibru fren blong hem, Hananaea, Misael, mo Asaraea, mo Esikel tu. Laef blong olgeta i stap sef long han blong king blong Babilon, taswe yumi save talem se Jeova i luk ol prisina ya se oli goaot long wan gudfala fasin taem oli sanemaot olgeta oli go long kantri blong ol man Koldia. ?Yu yu makemgud se Jeova i bin promes tu blong ‘lukaot long olgeta long wan gudfala fasin’? ?Samting ya i kamtru olsem wanem? Long yia 537 B.K.T., 80 yia biaen, Jeova i mekem se King Saeras i givim wan oda blong letem wan smol grup blong ol pikinini blong olgeta blong kambak long kantri blong Juda. Ol man Jyu ya we oli stap tru long God oli bildim bakegen taon blong Jerusalem; oli bildim wan nyufala haos prea blong wosip long God blong olgeta, Jeova; mo oli kambak long hem wetem fulhat blong olgeta. Ale long olgeta samting ya, long lukluk blong Jeova, ol prisina ya wetem ol pikinini blong olgeta oli olsem ol gudfala fas frut blong figtri.

7. ?Wetaem mo olsem wanem Jeova i stap lukaot long grup ya we i olsem Jeremaea “long gudfala fasin” long taem blong yumi?

⁷ Maet yu tingbaot se long faswan atikol we i tokbaot ol profet tok blong Jeremaea, yumi lanem se ol tok blong hem oli gat mining long handred yia we i jes pas. Mo i sem mak long japta 24. Long ol nogud yia blong Faswan Bigfala Faet Blong Wol, plante man we oli givim laef blong olgeta finis long Jeova oli kam aninit long paoa blong Bigfala Babilon long ol defdefren rod. Be Jeova i stap lukaot ‘long olgeta long wan gudfala fasin.’ Ale Jeova i yusum Bigfala Saeras, Jisas Kraes, blong brekem paoa blong Bigfala Babilon we i stap holem olgeta, mo sloslou i tekem olgeta oli go insaed long wan paradaes long saed blong speret. Ol man Isrel ya long saed blong speret oli obei mo oli kambak long Jeova wetem fulhat blong olgeta. Ale, long 1931, oli glad tumas blong akseptem nem ya ol Wetnes blong Jeova. Tru ya, yumi save talem se long taem ya oli kam olsem basket blong ol frut blong figtri we oli gud tumas long lukluk blong Jeova.

8. ?Olsem wanem ol Wetnes blong Jeova oli bin talemaot mesej blong Kingdom we i swit olsem frut blong figtri?

⁸ Mo ol Wetnes blong Jeova oli no mestem stampa tingting we God i gat blong mekem olgeta oli fri long Bigfala Babilon wetem kaengud fasin. Oli no holem mesej blong gud nyus blong Kingdom we i swit olsem frut blong figtri, long olgeta nomo, be oli talemaot long olgeta ples folem ol tok blong Jisas long Matyu 24:14 se: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes long hem long fes blong olgeta man.” ?Wanem frut i kamaot? !Bitim 4,700,000 man we oli olsem sipsip we oli no man Isrel long saed blong speret, oli kam fri long Bigfala Babilon!

Vison Blong Ol Rabis Frut Blong Figtri

9. ?Ol rabis frut blong figtri long vison blong Jeremaea oli pija blong hu, mo wanem i mas hapen long olgeta?

⁹ ?Be olsem wanem long basket blong ol rabis frut blong figtri long vison blong Jeremaea? Naoia Jeremaea i lesingud long ol tok blong Jeova we yumi faenem long Jeremaea japta 24, vas 8 kasem 10 se: “Olsem nogud frut blong figtri we man i no save kakae from i nogud olgeta, hemia nao tok blong Jeova: ‘Olsem nao bambae mi givim Sedekaea king blong Juda mo ol prins blong hem mo smol grup blong ol man Jerusalem we oli stap yet long kantri ya mo olgeta we oli stap long kantri blong Ijip, oli go​—⁠bambae mi letem olgeta blong oli fraet, blong oli kasem trabol, long olgeta kingdom blong wol, blong oli kasem sem mo blong ol man oli lukluk nogud long olgeta, oli jikim olgeta mo oli singaot trabol i kam long olgeta, long olgeta ples we bambae mi sanem olgeta oli go wanwan long hem. Mo bambae mi sanem naef blong faet i go agens long olgeta, fasin blong sot long kakae mo strong sik, kasem taem we oli lus olgeta long graon ya we mi bin givim long olgeta mo long ol bubu blong olgeta.’ ”

10. ?From wanem Jeova i luk Sedekaea olsem ‘rabis frut blong figtri’?

¹⁰ Ale, long lukluk blong Jeova, Sedekaea i rili kam olsem ‘rabis frut blong figtri.’ Hem i rebol agens long King Nebukadnesa taem hem i brekem promes we hem i bin mekem wetem king ya long nem blong Jeova, blong stap tru long hem, be i no hemia nomo, hem i sakemaot fulwan fasin sore blong Jeova tu, we Jeremaea i talemaot long hem. !Mo tu, hem i go moa kasem mak ya we hem i putum Jeremaea long kalabus! Yumi no sapraes se long 2 Kronikel 36:​12, Esra i tokbaot ol samting we king ya i mekem: “Hem i gohed blong mekem samting we i nogud olgeta long lukluk blong Jeova, God blong hem. Hem i no mekem tingting blong hem i stap daon.” !Long lukluk blong Jeova, Sedekaea mo olgeta we oli stap long Jerusalem, oli olsem basket blong ol rabis, rotin frut blong figtri!

Samting We i Olsem Ol Rotin Frut Blong Figtri Long Taem Blong Yumi

11, 12. ?Hu i stap olsem ol rabis frut blong figtri long taem blong yumi, mo wanem bambae i hapen long olgeta?

¹¹ Nao lukluk raonabaot long wol tede. ?Yu ting se yumi save faenem samting we basket blong ol rabis frut blong figtri i pija blong hem? Blong faenemaot samting ya, i gud yumi skelem taem blong yumi wetem taem blong Jeremaea. Long laswan handred yia, Jeova i bin yusum grup ya we i olsem Jeremaea, ol tabu man we oli stap yet long wol, blong gohed blong givim woning long olgeta nesen from kros blong God long taem blong bigfala trabol we i stap kam. Jeova i askem strong long ol man blong olgeta nesen blong givim ona long hem we i stret long nem blong hem, blong mekem wosip long hem wetem speret mo trutok, mo blong luksave Pikinini blong hem, Jisas Kraes we i stap rul, olsem Man we i gat raet blong rulum wol. ?Oli mekem wanem? Sem mak nomo olsem long taem blong Jeremaea. Ol nesen oli gohed nomo blong mekem ol samting we oli nogud long lukluk blong Jeova.

¹² ?Hu ya olgeta we oli stap leftemap tingting ya blong rebol? ?Hu i stap jikim ol man ya blong ­karem mesej blong God we oli olsem Jeremaea taem oli stap askem kwestin long olgeta long saed blong raet blong olgeta blong wok olsem ol minista blong God? ?Hu i stap gohed blong daonem Tok blong God? ?Tede, hu i stap biaen long plante fasin blong ronem mo mekem nogud long ol Wetnes blong Jeova? !Ansa i klia nomo blong evriwan oli luk​—⁠hemia Krisendom, antap moa ol lida blong skul! Mo luklukgud long olgeta rotin, rabis frut blong Krisendom we yumi bin tokbaot long atikol bifo. O, yes, i rili gat wan samting we i olsem basket blong ol rabis frut blong figtri long wol tede. Tru ya, Jeova i talem se man i no save “kakae from we oli nogud.” Ol tok blong Jeova we Jeremaea i talemaot oli stap kamaot yet long taem blong yumi: !‘Bambae oli kasem en blong olgeta’! Bigfala kros blong Jeova long Krisendom bambae i no save kamgud bakegen.

Wan Woning We Yumi Save Lanem Wan Samting Long Hem

13. ?Folem ol tok blong Pol we yumi faenem long 1 Korin 10:​11, olsem wanem yumi mas kasem save long vison blong tufala basket blong ol frut blong figtri?

¹³ Taem yumi stadi long mining blong woning mesej we tabu speret i pusum Jeremaea blong raetem, i olsem we yumi save harem ol tok blong aposol Pol long 1 Korin 10:11 se: “Olgeta trabol ya we ol man ya bifo oli kasem, oli blong tijim olgeta. Mo oli raetem store blong olgeta long buk blong wekemap yumi ya we yumi stap laef naoia, we Lasdei blong wol i kolosap.” ?Wanwan long yumi i bin lesingud long woning we yumi kasem long vison ya blong tufala basket blong ol frut blong figtri? Samting we yumi jes tokbaot i wan impoten haf blong ol samting we oli kasem Isrel, oli olsem wan woning long yumi.

14. ?Olsem wanem ol man Isrel oli tingbaot kaengud fasin blong Jeova?

¹⁴ Laswan samting, i gud yumi tingtingbak long ol tok we Jeova i talem long King Deved long saed blong ol man Isrel, olsem yumi faenem long 2 Samuel 7:10 se: “Bambae mi makemaot wan ples blong ol man blong mi, Isrel, mo bambae mi planem olgeta.” Jeova i keagud wetem kaen fasin long ol man blong hem, Isrel, long evri rod. Ol man Isrel oli gat plante risen blong karem ol gudfala frut long laef blong olgeta. Wan samting nomo se, oli mas obei long tijing blong Jeova mo folem ol loa blong hem. Be, samfala nomo long olgeta oli me kem samting ya. Bighaf long olgeta oli stronghed tumas mo oli mekem ol fasin we oli olbaot nomo, mekem se oli karem ol rabis, rotin frut.

15. ?Tede, olsem wanem ol man Isrel long saed blong speret mo ol fren blong olgeta we oli olsem sipsip oli tingbaot fasin sore blong Jeova?

¹⁵ ?Oraet nao, olsem wanem long taem blong yumi? Jeova i bin gohed blong soem fasin sore long smol grup blong hem, Isrel long saed blong speret mo ol fren blong olgeta we oli olsem sipsip. Stat long taem ya we oli kam fri long saed blong speret long 1919, Jeova i bin gohed blong lukaot long olgeta. Olsem hem i yusum Aesea blong talem long profet tok, evridei oli kasem tijing blong God long bigfala Tija ya blong heven mo wol, Jeova God, we i hae moa long ol narafala tija. (Aesea 54:13) Tijing ya blong God, we hem i yusum nambawan Pikinini blong hem, Jisas Kraes blong givim, i bin mekem plante pis i kamaot long medel blong olgeta mo sloslou i bin gohed blong tekem olgeta oli kam frengud moa wetem Jeova. !Ol nambawan samting ya long saed blong speret oli mekem se i isi moa blong save Jeova, blong lesin long hem, mo blong gohed blong karem ol gudfala frut long laef blong yumi​—⁠ol frut we oli givim ona long Jeova! !Laef blong yumi i stanap long samting ya!

16. ?Wanwan long yumi i mas mekem wanem long saed blong vison blong tufala basket blong ol frut blong ol figtri?

¹⁶ Be nating se God i gat kaengud fasin, i gat samfala yet we oli gat fasin rebol mo hat blong olgeta i strong, olsem plante oli mekem long Juda bifo, mo oli karem ol rabis, rotin frut long laef blong olgeta. !Samting ya i nogud olgeta! I gud yumi evriwan yumi no fogetem lesen we yumi lanem long tufala basket blong ol frut blong figtri mo ol frut blong tufala​—⁠gudwan mo rabis wan. Taem jajmen blong Jeova we i stret long Krisendom we i mekem apostasi i stap kam kwik, i gud yumi obei long advaes blong aposol Pol se: “Yufala i save mekem laef blong yufala i kam olsem we Masta blong yumi i wantem. Oltaem bambae yufala i save mekem ol fasin we hem i glad long hem. Nao bambae yufala i gat frut long laef blong yufala, we yufala i stap mekem ol gudgudfala wok.”​—⁠Kolosi 1:⁠10.

Tingtingbak

“Ol Frut​—⁠Gudwan Mo Rabis Wan” mo paragraf 1-4 long haf ya “Rao Blong Jeova Wetem Ol Nesen”

◻ ?Basket blong ol gudfala frut blong figtri i pija blong wanem?

◻ ?Olsem wanem mining blong samting we i olsem basket blong ol rabis frut blong figtri i kam klia moa?

◻ ?Mesej blong Jeremaea i givim wanem lesen long yumi olsem wan woning?

◻ ?Wanem i impoten long saed blong yia 607 B.K.T.? mo ?yia 1914 K.T.?

[Tok blong pija long pej 15]

Olsem ol gudfala frut blong figtri, ol man blong God oli karem ol frut blong Kingdom we oli swit

[Tok blong pija long pej 15]

Krisendom i soem se hem i olsem basket blong ol rabis frut blong figtri